“Laj Ammon,” Eb’ li Seraq’ sa’ lix Hu laj Mormon (2023)
Laj Ammon
Jun moos tuulan xch’ool
Laj Ammon ut eb’ li ras riitz’in ke’raj xtzolb’aleb’ laj Lamanita chirix li Qaawa’. Ke’wulak chaq toj sa’ li ch’och’ wankeb’ wi’ laj Lamanita. Sa’ li b’e, ke’kuyuk sa’ ut ke’tijok re xtz’aamankil xtenq’ li Qaawa’. Ke’k’ojob’aak xch’ool xb’aan li Qaawa’. A’an kixye reheb’ naq te’wanq xkuyum ut naq te’xk’ut xchaab’ilaleb’. Ke’xjach rib’ re jultikank aatin sa’eb’ li jar na’ajej.
Laj Ammon kiwulak sa’ li ch’och’ Ismael. Li kristiaan aran ke’xb’ak’ ut ke’xk’am chiru li rey aj Lamoni. Laj Ammon kixye re laj Lamoni naq kiraj kanaak sa’ xyanqeb’ laj Lamanita. Laj Lamoni kiwulak chiru li k’a’ru kixye laj Ammon ut kirach’ab’. A’an kiraj naq laj Ammon taasumlaaq rik’in jun reheb’ lix rab’in, a’b’an laj Ammon kixsik’ ru ok choq’ xmoos laj Lamoni.
Laj Lamoni kixye re laj Ammon naq tixk’aak’aleheb’ lix xul. Sa’ jun li kutan, laj Ammon ut xkomoneb’ chik li moos ke’xk’ameb’ li xul re te’xtaw li ha’. Naq yookeb’ chi uk’ak li xul, ke’chal laj elq’ ut ke’xxib’esiheb’. Lix komoneb’ chik li moos ke’xuwak, ke’xk’oxla naq te’ch’iilaaq xb’aan naq ke’sach lix xul laj Lamoni chiruheb’.
Laj Ammon kixnaw naq taaruuq tixk’ut lix wankil li Qaawa’. A’an kixye reheb’ li jun siir chik chi moos naq ink’a’ te’k’oxlaq ut kixtenq’aheb’ chixtawb’aleb’ li xul sachenaqeb’.
Ke’sutq’i laj elq’ re xxib’esinkileb’ wi’chik li xul. A’b’an, laj Ammon kixye reheb’ li moos naq te’kanaaq ut te’xrameb’ li xul re naq ink’a’ te’eeleliq.
Laj Ammon naxik chixk’ulb’aleb’ laj elq’ re naq ink’a’ te’ruuq chixxib’esinkileb’ li xul. Eb’ laj elq’ ink’a’ ke’xxuwa ru laj Ammon. Ke’xk’oxla naq ninqeb’ xmetz’ew chiru xmetz’ew a’an. A’b’an ink’a’ ke’xnaw naq li Qaawa’ yoo chixtenq’ankil laj Ammon.
Laj Ammon kixkutiheb’ chi pek laj elq’ rik’in lix jok’. Ke’wan li ke’kam. Ke’josq’o’ laj elq’, ut ke’raj xkamsinkil laj Ammon. Ke’sach xch’ool xb’aan naq ink’a’ ke’ru chixketb’al laj Ammon rik’ineb’ lix pek. Ink’a’ ke’xnaw naq jwal nim xmetz’ew chi jo’kan.
Eb’ laj elq’ ke’xyal xketb’al laj Ammon rik’ineb’ lix tenleb’ che’. A’b’an rajlal sut ke’xyal, laj Ammon ke’xyok’eb’ lix tel rik’in lix yok’leb’ ch’iich’ re naq ink’a’ chik ke’ru chi pleetik. Ke’ok chi xuwak ut ke’eelelik.
Eb’ li moos ke’xye re laj Lamoni chan ru naq laj Ammon kixkoleb’ li xul. Kisach xch’ool laj Lamoni. Sa’ xch’ool a’an naq laj Ammon a’an li Xnimal ru Musiq’ej, li k’a’jo’ xnimal xwankilal ut li naxnaw chixjunil li k’a’aq re ru.
Laj Lamoni kiraj aatinak rik’in laj Ammon, a’b’an yoo ajwi’ xk’a’uxl.
Laj Ammon kiwulak chirilb’al laj Lamoni, a’b’an laj Lamoni ink’a’ kixnaw k’a’ ta ru tixye. Li Qaawa’ kixtenq’a laj Ammon chixnawb’al ru xk’oxlahom laj Lamoni. Laj Ammon kixye naq maawa’ a’an li Xnimal ru Musiq’ej. Kixye re laj Lamoni naq li Xnimal ru Musiq’ej a’an li Dios. Laj Lamoni kiraj xtzolb’al xkomon chik li na’leb’ chirix li Dios.
Laj Ammon kixye naq li Dios kixk’uub’ li ruchich’och’ ut chixjunileb’ li wankeb’ sa’ xb’een. Toja’ naq laj Ammon kixye re laj Lamoni naq li Dios wan xk’uub’anb’il na’leb’ re li kolb’a-ib’. Jo’ xcha’al li k’uub’anb’il na’leb’ a’an, taachalq li Jesukristo. Laj Lamoni kixpaab’ li raatin laj Ammon. Laj Lamoni kitijok ut kixpatz’ re li Dios naq taaruuxtana ru a’an ut lix tenamit.