“Lix paab’aal li rixaqil li rey,” Eb’ li Seraq’ sa’ lix Hu laj Mormon (2023)
“Lix paab’aal li rixaqil li rey,” Eb’ li Seraq’ sa’ lix Hu laj Mormon
Lix paab’aal li rixaqil li rey
Xtawb’al li sahil ch’oolejil rik’in li Jesukristo
Ki’awa’b’ejin li rixaqil li rey rochb’een lix b’eelom, li rey aj Lamoni. Li rey kixpatz’ re jun aj Nefita aj Ammon xk’ab’a’ naq tixk’e xna’leb’ chirix li Qaawa’. Li rey kixpaaab’ li raatin laj Ammon. Li rey kiwiq’la chi tijok ut kixpatz’ re li Qaawa’ naq tixkuy xmaak. Naq yoo chi tijok, li rey kit’ane’ chi ch’och’. Nak’utun chanchan naq kamenaq.
Eb’ lix moos li rey ke’xk’am rik’in li rixaqil. Ke’xyokob’ sa’ xch’aat. Yokyo chaq aran, ink’a’ na’eek’an chiru xnumik wiib’ kutan ut wiib’ q’ojyin.
Chiruheb’ li kutan a’an, ke’raho’ xch’ool li rixaqil li rey ut eb’ lix kok’al. Ke’kana chixkatq li rey ut ke’yaab’ak chirix. Ke’wan li ke’xye naq tento taamuqmanq li rey. A’ut li rixaqil li rey kiraj aatinak xb’een wa rik’in laj Ammon. Kirab’i naq wan xwankil li Dios rik’in. Eb’ lix moos li rixaqil li rey ke’xpatz’ re laj Ammon naq taachalq rik’in li rixaqil li rey.
Li rixaqil li rey kixye re laj Ammon naq rab’ihom naq a’an jun xprofeet li Dios. Kixpatz’ re laj Ammon naq taaril li rey. Laj Ammon kixnaw naq yo’yo li rey. A’an lix wankil li Dios li kik’ehok chi wark li rey. Laj Ammon kixye re li rixaqil li rey naq lix b’eelom taa’ajq wulaj.
Li rixaqil li rey kixpaab’ laj Ammon ut kiwan xpaab’aal chirix li Dios. Kixpaab’ naq taa’ajq lix b’eelom wulaj. Laj Ammon kixye naq osob’tesinb’il li rixaqil li rey xb’aan xnimal lix paab’aal. A’an kixye re li rixaqil li rey naq nim wi’chik xpaab’aal chiru xpaab’aaleb’ lix tenamit laj Ammon. Li rixaqil li rey kikana chixkatq li rey ut kixk’aak’ale chiru chixjunil li q’ojyin.
Wulajaq chik, li rey ki’aj. A’an kixye re li rixaqil naq kiril li Jesukristo. Li rey ut li rixaqil ke’xnaw naq k’a’jo’ xnimal lix rahom li Jesus choq’ reheb’, ut ke’numta xsahileb’ xch’ool.