“Eb’ li che’ olivo,” Eb’ li Seraq’ sa’ lix Hu laj Mormon (2023)
Eb’ li che’ olivo
Lix rahom li Dios choq’ re lix tenamit
Laj Jakob a’an chaq jun xprofeet li Dios. Kiraj xk’utb’al chiruheb’ laj Nefita k’a’jo’ xnimal lix rahom li Dios choq’ re lix tenamit. Laj Jakob kixseraq’i reheb’ jun seraq’ chirix jun awimq reheb’ li che’ olivo. Li Qaawa’ re li awimq ut eb’ lix moos ke’k’anjelak sa’ komonil re xch’oolaninkil li awimq.
Li Qaawa’ kiwan rawimq wan wi’ jun che’ olivo sik’b’il ru li chaab’il li ru che’ naxk’e. Laj Jakob kixye naq li che’ chanchan lix tenamit li Dios, malaj lix junkab’al laj Israel. Li ru che’ chanchan lix b’aanuhomeb’ li tenamit. Li Qaawa’ kixch’oolani chi us li che’ a’in. Kixtenq’a chi k’iik rik’in xch’oolaninkileb’ lix xe’ ut xsetb’aleb’ li ruq’. A’an kixk’e li k’a’ru taak’eho’q xyu’am.
Chirix wiib’ oxib’ kutan, ki’ok chi kamk lix che’ sik’b’il ru. Wiib’ oxib’ aj chik li ruq’ toj kaweb’ rib’. Kiraho’ xch’ool li Qaawa’ xb’aan a’in. Kiraj naq toj taaruuchini li chaab’il ru che’.
Re xkolb’aleb’ li ruq’ che’ kaweb’ rib’, li Qaawa’ kirisheb’ ut kixletzeb’ sa’ jalaneb’ chik li che’. Toja’ naq sa’ xna’ajeb’ kixletzeb’ li uq’ej kaweb’ rib’ re jalaneb’ chik li che’.
Ke’nume’ k’iila kutan. Li Qaawa’ ut eb’ lix moos rajlal neke’k’ulunk sa’ li awimq. Ke’xch’oolani lix sik’b’il ru che’ li Qaawa’. Ke’xch’oolaniheb’ ajwi’ li sik’b’il ru ruq’ li che’ li jek’inb’ileb’ sa’ xyanqeb’ li che’ sa’ chixjunil li awimq. Chaab’il lix k’ihaleb’ li ru che’ li neke’uuchin. Ke’saho’ xch’ool li Qaawa’ ut eb’ lix moos chirix li chaab’il ru che’.
Chirix k’iila kutan, ke’uuchin ru che’ sa’ li junjunq chi che’. A’b’an anajwan moko chaab’il ta chik li ru che’ chixjunjunqal. Kiraho’ xch’ool li Qaawa’ chi tz’aqal. Ink’a’ kiraj naq taasachq li rawimq chi moko li ru che’! Kaw kik’anjelak re xtenq’ankileb’ lix che’. Kixpatz’ rib’ k’a’ chik ru kiru raj chixb’aanunkil. Ki’aatinak rik’in lix moos ut kixsik’ ru naq toj tixyal xq’e.
Re xkolb’al li rawimq, li Qaawa’ kixye naq te’ch’utub’amanq li ruq’ che’ ke’isiik chaq chiru li che’ sik’b’il ru. Kixye naq te’letzmanq wi’chik chiru li che’ sik’b’il ru.
A’an a’in xraqik xk’anjel li Qaawa’ sa’ li rawimq. A’an kixb’oq xkomoneb’ chik li moos re te’tenqanq. Ke’k’anjelak sa’ komonil re xch’utub’ankileb’ ut xletzb’aleb’ li ruq’ che’.
Ke’xch’oolaniheb’ chixjunileb’ li che’. Ke’risiheb’ li ruq’ che’ po’jenaqeb’ ut ke’xkanab’ab’eb’ li ruq’ che’ chaab’ileb’. Chirix k’iila kutan, ki’ok wi’chik lix sik’b’il ru che’ li Qaawa’ chiruuchininkil li chaab’il che’. Wankeb’ chik li che’ li ke’ruuchini ajwi’ li chaab’il ru che’, jo’ chanru li ru li che’ sik’b’il ru. Kisaho’ xch’ool li Qaawa’. Kolb’ileb’ chixjunileb’ lix che’! Chixjunileb’ neke’ruuchini li ru che’ kiraj naq te’ruuchini.
Li Qaawa’ kib’antioxin chiruheb’ lix moos. Kixye reheb’ naq osob’tesinb’ileb’ xb’aan naq ke’k’anjelak chi kaw ut ke’xpaab’eb’ lix taqlahom. A’an kixwotz li ru che’ rik’ineb’, jo’kan naq ke’saho’ xch’ool. Chiru naab’al kutan, li Qaawa’ kixyal xsahil li ru che’.
Laj Jakob kixchoy li seraq’ chirixeb’ li che’ olivo. A’an kixk’ut chiruheb’ li tenamit naq li Dios naxch’oolaniheb’ jo’ chanru naq li Qaawa’ re li awimq kixch’oolaniheb’ lix che’. Laj Jakob kixpatz’ re chixjunileb’ naq te’xjal xk’a’uxl ut te’xjilosi rib’ rik’in li Dios. Kixk’ut chiruheb’ naq te’xra ut te’k’anjelaq chiru li Dios xb’aan naq li Dios junelik naxtenq’aheb’ a’an.