“Lix reyeb’ chixjunileb’ laj Lamanita,” Eb’ li Seraq’ sa’ lix Hu laj Mormon (2023)
“Lix reyeb’ chixjunileb’ laj Lamanita,” Eb’ li Seraq’ sa’ lix Hu laj Mormon
Lix reyeb’ chixjunileb’ laj Lamanita
Li ajom chi tzolok chirix li Qaawa’
Kiwan xreyeb’ laj Lamanita li ki’awa’b’ejin sa’ xb’een chixjunileb’ chik li rey. A’an lix yuwa’ li rey aj Lamoni. A’an xik’ narileb’ laj Nefita. Sa’ jun li kutan, kiril laj Lamoni rik’in laj Ammon. Li rey kixpatz’ re laj Lamoni k’a’ru yoo chixb’aanunkil rik’in jun aj Nefita. Laj Lamoni kixye re li rey naq xikeb’ re chixkolb’aleb’ li ras riitz’in laj Alma li wankeb’ sa’ tz’alam.
Kijosq’o’ li rey. A’an kixk’oxla naq neke’tik’ti’ik laj Nefita re te’ruuq chirelq’ankil li k’a’ru wan reheb’ laj Lamanita. Kixye re laj Lamoni naq tixkamsi laj Ammon ut taachalq rik’in a’an.
Laj Lamoni ink’a’ kiraj xkamsinkil laj Ammon. Kixye re li rey naq laj Ammon ut eb’ li ras riitz’in a’aneb’ xprofeet li Dios. Kixye naq tixtenq’a laj Ammon ut eb’ li ras riitz’in.
Li rey kixchap lix yok’leb’ ch’iich’ re xyok’b’al laj Lamoni, a’b’an laj Ammon kixram a’an. Li rey kixyal xyok’b’al laj Ammon. Laj Ammon kixkol rib’. A’an kixket li ruq’ li rey jo’kan naq ink’a’ chik kiru chi pleetik. Kixuwak li rey xb’aan xnimal xmetz’ew laj Ammon. Kixyeechi’i re laj Ammon lix yijach lix awa’b’ejihom wi laj Ammon tixkol xyu’am.
Laj Ammon ink’a’ kiraj li awa’b’ejihom. Kixpatz’ b’an re li rey naq taarach’ab’eb’ li ras riitz’in li wankeb’ sa’ tz’alam. Kixpatz’ ajwi’ re li rey naq ink’a’ chik taajosq’o’q rik’in laj Lamoni. Laj Ammon kixye naq li rey tento tixkanab’ laj Lamoni chi awa’b’ejink jo’ chanru naraj.
Kisach xch’ool laj Lamoni xb’aan xnimal xrahom laj Ammon choq’ re laj Lamoni. A’an kixk’ulub’a xb’aanunkil chixjunil li kixpatz’ laj Ammon.
Li rey kiraj xnawb’al xkomon chik li ke’xye laj Ammon ut laj Lamoni chirix li Dios. A’an kixpatz’ naq laj Ammon ut eb’ li ras riitz’in te’chalq chixtzolb’al.
Laj Ammon ut laj Lamoni xkoheb’ sa’ li ch’och’ Middoni. Wankeb’ li ras riitz’in laj Ammon sa’ tz’alam aran. Ke’b’ak’e’ rik’in k’aam ut moko ke’k’ehe’ ta xwa chi moko ruk’a. Laj Lamoni kixq’unb’esi xch’ool li awa’b’ej aran Middoni chirach’ab’ankileb’ li ras riitz’in laj Ammon.
Naq ach’ab’anb’ileb’ chik, eb’ li ras riitz’in laj Ammon xkoheb’ rik’in lix yuwa’ laj Lamoni. Ke’xwiq’ib’ rib’ chiru li rey ut ke’xpatz’ re ma naru te’ok choq’ xmoos. Li rey kixye naq ink’a’. Kiraj b’an naq te’xk’ut li evangelio chiru. Jun reheb’ a’an aj Aaron xk’ab’a’. A’an kixyaab’asiheb’ li loq’laj hu chiru li rey ut kixtzol chirix li Dios ut li Jesukristo.
Li rey kixpaab’ li raatin laj Aaron. Kixye naq tixkanab’ chixjunil lix awa’b’ejihom re xnawb’al ru li Dios. A’an kixpatz’ re laj Aaron k’a’ru tento tixb’aanu. Laj Aaron kixye re li rey naq tixjal xk’a’uxl ut taatijoq chiru li Dios rik’in paab’aal. Li rey kixjal xk’a’uxl chirix chixjunil lix maak ut kitijok.
Li rey kit’ane’ chi ch’och’. Eb’ lix moos li rey koxe’xye re li rixaqil li rey k’a’ru xk’ulman.
Kik’ulun li rixaqil li rey ut kiril li rey chi yokyo chiru ch’och’. Naxk’oxla naq laj Aaron ut eb’ li ras riitz’in ke’xkamsi li rey. Kijosq’o’ li rixaqil li rey.
Li rixaqil li rey kixye reheb’ li moos naq te’xkamsi laj Aaron ut eb’ li ras riitz’in. A’b’an ke’xuwak li moos. Ke’xye naq numtajenaq xmetz’ew laj Aaron ut eb’ li ras riitz’in. Ki’ok ajwi’ chi xuwak li rixaqil li rey. A’an kixtaqlaheb’ li moos re te’xye reheb’ li wankeb’ sa’ li tenamit k’a’ru xk’ulman. Kiroyb’eni naq li tenamit te’xkamsi laj Aaron ut eb’ li ras riitz’in.
Laj Aaron kixnaw naq te’josq’o’q li tenamit. Kixnaw ajwi’ naq moko kamenaq ta li rey. A’an kixtenq’a li rey chi xaqliik. Li rey kixk’ul wi’chik xmetz’ew ut kixaqli. Ke’sach xch’ool li rixaqil li rey ut eb’ li moos.
Li rey kixtzol li rixaqil ut eb’ li moos chirix li Jesus. Chixjunileb’ ke’xpaab’ li Jesus. Li rey kiraj naq chixjunileb’ lix tenamit te’tzoloq chirix li Jesus. A’an kixxaqab’ jun chaq’rab’ re naq laj Aaron ut eb’ li ras riitz’in te’ruuq chixk’utb’al li evangelio yalaq b’ar sa’ lix awa’b’ejihom. Ke’xtzoleb’ li tenamit ut ke’xb’oqeb’ laj tij ut laj k’utunel sa’ li ch’och’.