“Li che’ re li yu’am,” Eb’ li Seraq’ sa’ lix Hu laj Mormon (2023)
“Li che’ re li yu’am,” Eb’ li Seraq’ sa’ lix Hu laj Mormon
Li che’ re li yu’am
Lix k’utb’esinb’il matk’ laj Lehi
Sa’ jun li q’ojyin, laj Lehi kixk’ul xmatk’ rik’in li Qaawa’. A’an kixseraq’i lix matk’ re lix junkab’al.
Sa’ lix matk’, laj Lehi kiril jun winq tiqto sa’ jun saqi b’aatal. Li winq kixye re laj Lehi naq tixtaaqe.
Laj Lehi kixk’e reetal naq wan sa’ jun li yamyookil na’ajej q’ojyin ru. Kib’eek chiru xnumik k’iila hoor. A’b’an toj wan ajwi’ li q’ojyin. Sa’ roso’jik, laj Lehi kixpatz’ xtenq’ sa’ tij.
Naq laj Lehi kiraqe’ chi tijok, kiril jun nimla helhookil ch’och’. Sa’ li helhookil ch’och’ wan jun li che’, saq’eb’ li ru. Laj Lehi kixk’oxla naq taasaho’q raj xch’ool wi tixyal li ru li che’, jo’kan naq kixyal. Kinujak li raam rik’in sahil ch’oolej.
Q’axal sa li ru li che’ chiru chixjunileb’ chik li ru che’. K’a’jo’ xki’il ut xsahil. Laj Lehi kiraj xwotzb’al a’an rik’in lix junkab’al. Kixnaw naq te’saho’q raj ajwi’ xch’ool xb’aan. Laj Lehi kiril li xSariah, laj Sam, ut laj Nefi chi xaqxookeb’ chire jun li nima’. Chanchan naq sachenaq xb’eheb’. Laj Lehi kixb’oqeb’ chi kaw xyaab’ xkux. Kixpatz’ reheb’ naq te’chalq ut te’xyal ru li che’.
Li xSariah, laj Sam, ut laj Nefi ke’chal ut ke’xyal ru li che’. Laj Lehi ki’ilok re xk’eeb’al reetal laj Laman ut laj Lemuel. A’an kiraj naq te’xyal ajwi’ xsahil li ru che’. A’b’an ink’a’ ke’raj chalk ut xyalb’al ru li che’.
Toja’ naq laj Lehi kiril jun b’e rik’in jun b’arb’ookil ch’iich’ li nak’amok sa’ li che’. Kiril k’iila ch’uut chi tenamit yookeb chi b’eek sa’ li b’e. Kitaqe’ chi xaqaamil jun q’ojyinal choql. Jwal ch’a’aj li ilok xb’aan li q’ojyinal choql. Ka’ajwi’ rik’in xchapb’al li b’arb’ookil ch’iich’ ke’ru chi wulak wan wi’ li che’.
Ke’wan li kristiaan li ke’el chiru li b’e ut ke’sach. Ke’wan chik li ke’xchap li b’arb’ookil ch’iich’ ut ke’xtiikisi rib’ chi uub’ej.
Naq ke’wulak wan wi’ li che’, ke’xyal ru li che’.
Laj Lehi ki’ilok ut kiril jun nimla kab’l nujenaq rik’ineb’ k’iila kristiaan. Ke’xse’eheb’ li kristiaan neke’xk’ux ru li che’. Junjunq reheb’ li ke’xk’ux ru li che’ ke’xutaanak naq li kristiaan ke’xse’eheb’, jo’kan naq ke’el chiru li che’. Ke’xjalb’ehi rib’ ut ke’sach.
Sa’ lix matk’, laj Lehi kirileb’ xkomoneb’ chik li ke’xchap chi kaw li b’arb’ookil ch’iich’. Ke’xtiikisi rib’ chi uub’ej toj reetal naq ke’wulak wan wi’ li che’. Toja’ naq ke’xwiq’ib’ rib’ chiru li che’ ut ke’xyal li ru. Ink’a’ ke’rab’iheb’ li kristiaan wankeb’ sa’ li kab’l. Ke’xsik’ ru kanaak chixk’atq li che’.
Naq ki’aj laj Lehi, ki’ok xk’a’uxl chirix laj Laman ut laj Lemuel. Ink’a’ ke’xyal ru li che’ sa’ lix matk’. Laj Lehi naxra laj Laman ut laj Lemuel. A’an kiroyb’eni naq te’kanaaq chi nach’ rik’in li Qaawa’. Kixb’oqeb’ chixpaab’ankileb’ lix taqlahom li Dios.