“Li profeet aj Eter,” Eb’ li Seraq’ sa’ lix Hu laj Mormon (2023)
Li profeet aj Eter
Lix tijom li Qaawaʼ choqʼ re jun tenamit
Li Qaawa’ kixk’am li ras laj Jared ut lix junkab’al toj sa’ li yeechi’inb’il ch’och’. Ke’xtuulanob’resi rib’ ut ke’xpaab’eb’ lix taqlahom li Dios. Ke’k’ihan chiru k’iila chihab’, ut ke’raj naq jun rey tixjolomiheb’. Li ras laj Jared kixye reheb’ naq rik’in jun rey naru taachalq li ch’a’ajkilal, a’b’an kixkanab’eb’ chixsik’b’al ru jun rey.
Chiru k’iila cient chihab’, eb’ laj Jaredita ke’wan sa’ li yeechi’inb’il ch’och’. Wan naq ke’k’ame’ chixb’aanunkil li us xb’aaneb’ lix reyeb’, a’ut wan naq ink’a’ ke’xb’aanu li us. Eb’ lix profeet li Dios ke’xq’useb’ ut ke’xye reheb’ naq te’xjal xk’a’uxl. Naq ke’ab’in ut ke’xpaab’eb’ lix taqlahom li Dios, a’an kirosob’tesiheb’. Li roso’jik aj profeet aj Jaredita a’an laj Eter xk’ab’a’.
Eter 7:23–27; 9:26–30; 10:16–17, 28; 11:1–8, 12–13, 20–22; 12:2
Eb’ li tenamit ink’a’ yookeb’ chaq chi ab’ink chiru li Dios. A’b’an lix Musiq’ li Qaawa’ kiwan rik’in laj Eter. A’an kixtzoleb’ li tenamit chalen eq’la toj q’ojyin. A’an kixye naq tento te’xpaab’ li Dios ut te’xjal xk’a’uxl malaj ut te’sachmanq. Wi te’wanq xpaab’aal, te’royb’eni wank wi’chik rik’in li Dios ut taawanq xmetz’eweb’ re xb’aanunkil li k’a’ru us. Eb’ li tenamit ink’a’ ke’paab’an.
Laj Eter kixk’e reetal lix b’aanuhomeb’ li tenamit. Kixmuq rib’ sa’ jun ochoch pek chiru li kutan ut kixtz’iib’a li k’a’ru kiril. Li tenamit ink’a’ ke’xjal xk’a’uxl ut ke’ok chixpleetinkil rib’ chirib’ileb’ rib’.
Laj Eter kiril naq li rey aj Jaredita, aj Koriantumr xk’ab’a’, kixpleetiheb’ naab’aleb’ li ke’raj ok’ choq’ rey. Laj Koriantumr kiroksi lix teep aj pleet re xkolb’al rix.
Sa’ jun li kutan, li Qaawa’ kixye re laj Eter naq tixye re laj Koriantumr ut lix tenamit naq te’xjal xk’a’uxl. Wi te’xb’aanu, li Qaawa’ tixtenq’aheb’ li tenamit ut tixkanab’ naq laj Koriantumr taajolominq sa’ xb’een lix awa’b’ejihom. Wi ink’a’ te’xb’aanu, eb’ li tenamit te’xsach rib’ chirib’ileb’ rib’. Taanajto’q lix yu’am laj Koriantumr toj reetal naq tixk’e reetal naq yaal li raatin li Qaawa’. Toja’ naq taakamq ajwi’.
Laj Koriantumr ut lix tenamit ink’a’ ke’xjal xk’a’uxl. Eb’ li tenamit ke’xyal xkamsinkil laj Eter, a’b’an laj Eter kixmuq rib’ sa’ lix ochoch pek. Jun winq aj Xiz xk’ab’a’ kipleetik rik’in laj Koriantumr. Eb’ li tenamit ke’xsik’ ru xjunajinkileb’ rib’ rik’in lix teep aj pleet laj Xiz malaj lix teep aj pleet laj Koriantumr. Naab’al sut ke’xpleeti rib’ li teep aj pleet. Ke’kam naab’aleb’.
Kijultiko’ re laj Koriantumr li raatin laj Eter. Kiraho’ xch’ool naq ke’kamsiik naab’aleb’ lix tenamit. Kijultiko’ re naq chixjunileb’ li profeet ke’xye naq taak’ulmanq a’in. Ki’ok chixjalb’al xk’a’uxl ut kixtaqla jun hu re laj Xiz. Kixye naq tixq’axtesi li awa’b’ejihom wi te’kole’q lix tenamit. A’b’an laj Xiz kiraj pleetik.
Ke’josq’o’ lix tenamit laj Koriantumr, ut ke’raj pleetik. Ke’josq’o’ ajwi’ lix tenamit laj Xiz, ut ke’raj pleetik. Maajun kiraj xjalb’al xk’a’uxl. Laj Eter kixk’e reetal naq chixjunileb’ li tenamit xkoheb’ chi pleetik. Ke’kam naab’aleb’ chik.
Laj Koriantumr kiraj xk’eeb’al xraqik li pleet. Kixpatz’ re laj Xiz naq taareechani li awa’b’ejihom ut naq ink’a’ tixkamsiheb’ lix tenamit. A’b’an jwal josq’eb’ chixjunileb’. Moko kiwan ta lix Musiq’ li Qaawa’ rik’ineb’. Laj Eter kixk’e reetal naq chixjunileb’ ke’pleetik toj reetal naq ka’ajwi’ laj Koriantumr kikana chi yo’yo sa’ xyanqeb’ chixjunileb’ laj Jaredita. Toja’ naq kilukta laj Koriantumr.
Laj Eter kixk’e reetal naq ak tz’aqlojenaq ru chixjunil li xyehom li Qaawa’. Laj Eter kixchoy xtz’iib’ankil resil chixjunil li kik’ulman. Kixk’e reetal naq eb’ li tenamit te’ruuq chixtawb’aleb’ lix tz’iib’ahom chirix naq kamenaq. Laj Eter kixkanab’ rib’ sa’ ruq’ li Dios ut kiroyb’eni wank rik’in a’an sa’ junaq kutan chalel.