“Laj Mosiah ut Laj Tzeniff,” Eb’ li Seraq’ sa’ lix Hu laj Mormon (2023)
Laj Mosiah ut Laj Tzeniff
Kolb’il rix xb’aan li Qaawa’
Naab’al naq ke’xpleeti rib’ chirib’ileb’ rib’ laj Nefita ut laj Lamanita. Sa’ jun li kutan, li Qaawa’ kixye re jun aj Nefita aj Mosiah xk’ab’a’ naq taa’elq sa’ li ch’och’ Nefi rochb’een yalaq ani tixtaaqe raj li Qaawa’.
Ke’wan naab’aleb’ laj Nefita li ke’xpaab’ li Qaawa’ ut xkoheb’ chirix laj Mosiah. Li Qaawa’ kixk’ameb’ xb’e sa’ jun ch’och’ b’ar wi’ ak wanjenaq jalaneb’ chik li kristiaan. Aʼanebʼ ke’k’ab’a’iik lix tenamit laj Tzarahemla.
Eb’ lix tenamit laj Tzarahemla ke’el chaq ajwi’ aran Jerusalen junxil. Ke’saho’ xch’ool naq ke’taqlaak laj Nefita aran xb’aan li Qaawa’ rik’ineb’ li perel ch’iich’. Lix tenamit laj Mosiah ke’xjunaji rib’ rik’ineb’ lix tenamit laj Tzarahemla. Chixjunileb’ ke’xsik’ ru laj Mosiah jo’ xreyeb’. Kixtzoleb’ chirix li Qaawa’.
Eb’ laj Nefita ak wankeb’ aran Tzarahemla chiru naab’al chihab’ naq jun nimla ch’uut ke’sutq’i sa’ li ch’och’ Nefi. Ke’jolomiik xb’aan jun aj Nefita aj Tzeniff xk’ab’a’.
Eb’ laj Lamanita wankeb’ anajwan sa’ li ch’och’ Nefi, jo’kan naq laj Tzeniff kixpatz’ re lix reyeb’ ma te’ruuq chi kanaak ajwi’ lix tenamit aran. Li rey kixye naq naru a’an.
Li rey kixb’alaq’i laj Tzeniff ut lix tenamit. A’an kixkanab’eb’ chi kanaak sa’ li ch’och’ Nefi re naq moqon taaruuq tixchap xcha’al lix tzakemqeb’ ut lix xuleb’. Ke’kana aran lix tenamit laj Tzeniff sa’ tuqtuukilal chiru naab’al chihab’. Ke’raw naab’al li tzakemq ut ke’xk’iiresi naab’al li xul. Toja’ naq eb’ laj Lamanita ke’xpleetiheb’ ut ke’xyal xmaq’b’aleb’ lix tzakemq ut lix xul.
Laj Tzeniff kixk’ut chiru lix tenamit naq te’xpaab’ li Qaawa’. Naq eb’ laj Lamanita kole’xpleetiheb’, laj Tzeniff ut lix tenamit ke’tijok chiru li Qaawa’. Li Qaawa’ kixk’e xmetz’eweb’ ut kitenq’an chixkolb’aleb’ rix. Ke’ru chiralinasinkileb’ laj Lamanita. Li Qaawa’ kirosob’tesi laj Tzeniff ut lix tenamit xb’aan lix paab’aaleb’.