“Laj Abinadi ut li rey aj Noe,” Eb’ li Seraq’ sa’ lix Hu laj Mormon (2023)
Laj Abinadi ut li rey aj Noe
Li raatin jun li profeet
Li rey aj Noe ki’awa’b’ejin sa’ xb’eeneb’ laj Nefita sa’ li ch’och’ Nefi. Laj Noe kixmin ru lix tenamit chixk’eeb’al lix tumineb’ re, ut kixloq’ li k’a’ru chaab’il choq’ re a’an xjunes rib’. Kixb’oqeb’ laj tij li q’etq’eteb’ re xtenq’ankil chi awa’b’ejink. Laj Noe ink’a’ kixpaab’eb’ lix taqlahom li Dios. K’a’jo’ b’an li maa’usilal kixb’aanu.
Laj Noe kixk’eheb’ chi maakob’k ajwi’ lix tenamit. Ink’a’ ke’xtaaqe li Qaawa’.
Kiwan jun li profeet sa’ li ch’och’, laj Abinadi xk’ab’a’. Li Qaawa’ kixtaqla laj Abinadi re xyeeb’al re laj Noe ut lix tenamit naq te’xjal xk’a’uxl.
Laj Abinadi kixye reheb’ li tenamit naq li Qaawa’ kiraj naq te’xjal xk’a’uxl. Wi ink’a’ te’xjal xk’a’uxl, li Qaawa’ tixkanab’eb’ raj li xik’ neke’ilok reheb’ chi ok sa’ xch’och’eb’ ut chi awa’b’ejink sa’ xb’eeneb’. K’a’jo’ naq eb’ li xik’ neke’ilok reheb’ te’xrahob’tesi laj Noe ut lix tenamit.
Li tenamit ke’josq’o’ rik’in laj Abinadi xb’aan li kixye reheb’. Ke’raj xkamsinkil, a’b’an li Qaawa’ kixkol rix laj Abinadi ut kixtenq’a chi eelelik.
Laj Noe kiraj ajwi’ xkamsinkil laj Abinadi. Laj Noe ink’a’ kixpaab’ li Qaawa’. A’an ut lix tenamit ink’a’ ke’xjal xk’a’uxl.
Chirix xnumik wiib’ chihab’, li Qaawa’ kixtaqla wi’chik laj Abinadi chixtijb’al li tenamit. Laj Abinadi kixye reheb’ li tenamit naq eb’ li xik’ neke’ilok reheb’ te’reechani li ch’och’ xb’aan naq ink’a’ neke’xjal xk’a’uxl. Li tenamit ke’josq’o’ rik’in laj Abinadi. Ke’xye naq maajun maa’usilal ke’xb’aanu ut naq ink’a’ te’xjal xk’a’uxl. Ke’xb’ak’ laj Abinadi ut ke’xk’am chiru laj Noe.
Laj Noe ut eb’ laj tij ke’xk’uub’ xna’leb’. Eb’ laj tij ke’xyal xb’alaq’inkil laj Abinadi rik’in k’iila patz’om. A’b’an laj Abinadi kixsumeheb’ chi kaw xch’ool. Eb’ aj tij sachsookeb’ xch’ool xb’aaneb’ lix sumehom laj Abinadi. Ink’a’ ke’ru chixb’alaq’inkil. Laj Abinadi kixye reheb’ laj tij naq jwal naxik xch’ooleb’ rik’in li tumin chiru xb’aanunkil li us.
Laj Noe kixye reheb’ laj tij naq te’xkamsi laj Abinadi. A’b’an laj Abinadi kixye reheb’ naq ink’a’ te’xch’e’. Kilemtz’un lix naq’ ru rik’in lix wankil li Dios. Laj Abinadi kixye naq eb’ laj tij ink’a’ neke’xk’uteb’ lix chaq’rab’ li Dios. Laj Abinadi kixk’ut chiruheb’ naq taayo’laaq li Jesukristo, taakamq sa’ qak’ab’a’, ut taawakliiq chi yo’yo. Kixye naq li Jesus tixkuyeb’ xmaak wi te’xjal xk’a’uxl.
Laj Abinadi kixchoy li esil kiraj li Qaawa’ naq tixye. Toj yoo xjosq’il laj Noe. Kixye reheb’ laj tij naq te’xchap laj Abinadi ut te’xkamsi.
Jun laj tij, laj Alma xk’ab’a’, kixpaab’ li raatin laj Abinadi. Laj Alma kixyal xkolb’al laj Abinadi. A’b’an kijosq’o’ laj Noe rik’in laj Alma ut kixmin ru chi elk.
Eb’ laj tij ke’xye re laj Abinadi naq taawanq xyu’am wi tixye naq moko yaal ta lix k’utum. A’b’an laj Abinadi kixye naq yaal li kixk’ut. Ke’josq’o’ wi’chik laj Noe ut eb’ laj tij. Ke’xkamsi laj Abinadi rik’in xam. Eb’ laj k’aak’alenel re laj Noe ke’xyal ajwi’ xkamsinkil laj Alma. A’b’an laj Alma kixmuq rib’ ut kixtz’iib’a chixjunil li kixye laj Abinadi.