“Li xAbish,” Eb’ li Seraq’ sa’ lix Hu laj Mormon (2023)
Li xAbix
Xtenq’ankil lix tenamit chixpaab’ankil li Jesus
Li xAbish kik’anjelak chiru jun rixaqil li rey aj Lamanita. Li xAbish kitzolok chirix li Jesukristo rik’in jun matk’ li kik’utb’esiman chiru lix yuwa’. Chiru naab’al chihab’ naxpaab’ li Jesus ut kiraj xtaaqenkil a’an. A’b’an maji’ naxye a’an reheb’ lix komon aj Lamanita.
Sa’ jun li kutan, jun aj Nefita aj Ammon xk’ab’a’ kik’ulun sa’ li awa’b’ejihom re xtzolb’aleb’ laj Lamanita chirix li Jesus ut li Dios. Li rey ut li rixaqil ke’xpaab’ li raatin laj Ammon. Li rey ut li rixaqil ke’xnaw naq taak’ulunq li Jesus sa’ li ruchich’och’ ut tixk’e chi kuye’k xmaak chixjunileb’ li neke’paab’ank re.
Alma 17:12–13; 18:33–36, 39–40; 19:9, 13
Li rey ut li rixaqil ke’reek’a li Santil Musiq’ej ut k’a’jo’ xnimal xsahileb’ xch’ool, jo’kan naq ke’t’ane’ chi ch’och’. Laj Ammon ut eb’ li moos ke’t’ane’ ajwi’. Ka’ajwi’ li xAbish kikana chi xaqxo.
Li xAbish kiraj xyeeb’al resil li sachb’a-ch’oolej a’in chiruheb’ li tenamit. Kiroyb’eni naq te’xpaab’ lix wankil li Dios naq ke’ril li kik’ulman. Jo’kan naq ki’alinak sa’ chixjunil li junjunq chi kab’l. Kixye reheb’ li tenamit naq toxe’ril li xb’aanu li Dios choq’ re li rey ut li rixaqil.
Ke’wulak k’iila tenamit sa’ rochoch li rey ut li rixaqil. Ke’sach xch’ool xb’aan naq chanchan naq kamenaqeb’ li rey, li rixaqil, ut chixjunileb’ lix moos.
Ke’josq’o’ li tenamit. Ke’xwech’ rib’ chirib’ileb’ rib’ chirix li ke’xk’ul li rey ut li rixaqil.
Naq kiwulak xAbish, kixk’e reetal naq neke’wech’ok li tenamit. Kiraho’ xch’ool xb’aan naq eb’ a’an ink’a’ ke’xk’e reetal lix wankil li Dios. A’an kixchap li ruq’ li rixaqil li rey, ut li rixaqil li rey kixaqali ut kixnima ru li Jesus.
Li rixaqil li rey kixchap li ruq’ li rey, ut a’an kixaqli. Li rey kixye resil li Jesus chiruheb’ li tenamit. Toja’ naq kixaqli laj Ammon ut xkomoneb’ chik li moos. Ke’xye reheb’ li tenamit naq li Jesus kixjaleb’. Anajwan ke’raj xb’aanunkil ka’ajwi’ li k’a’ru us. Naab’aleb’ ke’xpaab’ li raatineb’.
Jo’ kiroyb’eni xAbish, eb’ li tenamit ke’xk’e reetal lix wankil li Dios. Naab’aleb’ ke’xpaab’ li Jesus ut ke’kub’e xha’. Kiwan lix Musiq’ li Dios rik’ineb’. Ke’xk’ojob’ ajwi’ li Iglees sa’ xch’och’eb’. Ke’xk’e reetal naq li Jesus naxtenq’a yalaq ani naxjal xk’a’uxl ut naxpaab’ a’an.