“Eb’ li ixq sa’ li yamyookil ch’och’,” Eb’ li Seraq’ sa’ lix Hu laj Mormon (2023)
Eb’ li ixq sa’ li yamyookil ch’och’
Li b’eek rik’in li Qaawa’
Eb’ lix rab’in laj Ismael ke’b’eek rochb’een lix junkab’aleb’ sa’ li yamyookil ch’och’. Ch’a’aj lix b’eenikeb’. Chirix naab’al hoonal, ke’sumla rik’ineb’ li ralal laj Lehi ut li xSariah.
Sa’ jun li kutan, kikam laj Ismael. Ke’raho’ xch’ool lix rab’in. Ke’xk’oxla lix yuwa’eb’. Eb’ li rabinb’ej ke’wan xk’a’uxl naq eb’ a’an ut lix junkab’aleb’ te’kamq ajwi’ sa’ li yamyookil ch’och’. Ke’xwech’ rix laj Lehi ut laj Nefi, ut ke’raj sutq’iik sa’ li rochocheb’ aran Jerusalen.
Lix yaab’ xkux li Qaawa’ kiraatinaheb’ lix rab’in laj Ismael ut eb’ lix junkab’al. Ke’xjal xk’a’uxl, ut li Qaawa’ kirosob’tesiheb’.
Eb’ li ixq ke’wan xkok’al sa’ li yamyookil ch’och’. Li xSarih kiwan ajwi’ wiib’ chik li ralal, laj Jakob ut laj Jose.
Li Qaawa’ kixtenq’aheb’ li ixq sa’ xb’eenikeb’. Kirosob’tesiheb’ re naq kitz’aqlok xya’aleb’ xtu’ choq’ reheb’ lix k’uula’al. Kixtenq’aheb’ li ixq chi kawuuk naq yookeb’ chi b’eek.
Li Qaawa’ kixye naq yoo chixb’eresinkileb’ li rab’inb’ej ut eb’ lix junkab’al toj sa’ jun yeechi’inb’il ch’och’. Li Qaawa’ kixyeechi’i reheb’ li junkab’al naq taawanq chixjunil li k’a’ru te’raj ru naq yooqeb’ chi b’eek. Kixk’e xsahil li tzakemq li ke’xyo, ut kixk’ameb’ xb’e.
Chirix waqxaqib’ chihab’ chi b’eek sa’ li yamyookil ch’och’, eb’ li junkab’al ke’wulak chire li palaw. Eb’ li ixq ke’saho’ xch’ool rochb’eeneb’ lix junkab’al. Ch’ina-us li ch’och’ chire li palaw. Naab’alil ke’xye re xb’aan naq nujenaq rik’in li ru cheʼ joʼ ajwiʼ xyaʼal kabʼ re xtzekankil. A’an li Qaawa’ li kixkawresi chixjunil a’an choq’ reheb’.