“Li rey aj Noe ut li rey aj Limhi,” Eb’ li Seraq’ sa’ lix Hu laj Mormon (2023)
Li rey aj Noe ut li rey aj Limhi
Li eelelik chiruheb’ laj Lamanita
Li rey aj Noe kixjolomi jun ch’uut aj Nefita. Kixb’aanu k’iila maa’usilal, ut ke’wan li tenamit li ke’josq’o’ rik’in. Jun winq aj Gideon xk’ab’a’ kiyalok rik’in laj Noe rik’in jun yo’kleb’ ch’iich’. Ki’eelelik laj Noe ut kitaq’e’ sa’ xb’een jun najt xteramil kab’l. Aran, kiril chi nach’ok jun teep aj pleet aj Lamanita. Laj Noe kixpak’ naq naxuwak sa’ xk’ab’a’ lix tenamit, jo’kan naq laj Gideon kixkanab’ chi yo’yo.
Ke’eelelik laj Noe ut lix tenamit. A’b’an laj Lamanita ke’xtaaqeheb’ ut ke’ok chixpleetinkileb’. Laj Noe kixye reheb’ li winq naq te’xkanab’eb’ lix junkab’al ut te’xik chirix.
Ke’wan li winq li ke’xchap xb’e chirix laj Noe. A’b’an ke’wan naab’al li ke’xsik’ ru kanaak rik’ineb’ lix junkab’al. Jo’kan ajwi’, laj Limhi, li ralal laj Noe, kixsik’ ru kanaak.
Ke’xaqli naab’aleb’ li rab’inb’ej chiru li teep aj pleet ut ke’xpatz’ reheb’ laj Lamanita naq ink’a’ te’xrahob’tesiheb’ lix junkab’al. Ke’ab’in laj Lamanita chiruheb’ li rab’inb’ej ut ink’a’ ke’xkamsiheb’ laj Nefita. Eb’ laj Lamanita ke’xchapeb’ b’an laj Nefita.
Eb’ li winq li ke’eelelik ke’raj sutq’iik rik’ineb’ lix junkab’al. Laj Noe kixyal xramb’aleb’, jo’kan naq eb’ li winq ke’xkamsi a’an. Toja’ naq ke’sutq’i chaq rik’ineb’ lix junkab’al.
Ke’saho’ xch’ool li winq naq kolb’ileb’ rix lix junkab’al. Ke’xye re laj Gideon li k’a’ru kixk’ul laj Noe.
Eb’ li tenamit ke’xsik’ ru laj Limhi jo’ ak’ xreyeb’. Laj Limhi kixye re li rey aj Lamanita naq te’xk’e reheb’ laj Lamanita lix yijach chixjunil li k’a’ru wan reheb’. Jo’ reeqaj, li rey aj Lamanita kixye naq ink’a’ tixrahob’tesi lix tenamit laj Limhi.
Ke’wan sa’ tuqtuukilal chiru wiib’ oxib’ chihab’. Chirix a’an eb’ laj Lamanita ke’ok chixrahob’tesinkil lix tenamit laj Limhi. Li tenamit ke’raj ach’ab’aak. Ke’xyal xpleetinkileb’ laj Lamanita, a’b’an ink’a’ ke’numta. Li tenamit ke’tijok chiru li Dios re naq tixtenq’aheb’.
Sa’ jun li kutan, jun aj Nefita aj Ammon xk’ab’a’ kirula’ani laj Limhi ut lix tenamit. Laj Ammon a’an aj Tzarahemla. Laj Limhi kisaho’ xch’ool naq kiril laj Ammon.
Laj Ammon taaruuq tixk’am xb’e lix tenamit laj Limhi toj sa’ li ch’och’ Tzarahemla, a’b’an xb’een wa tento te’eeleliq chiruheb’ laj Lamanita. Kixk’uub’ xna’leb’ laj Gideon.
Chiru q’ojyin, laj Gideon kixk’e xkomon chik li viin reheb’ laj k’aak’alenel aj Lamanita re xwartesinkileb’. Naq yookeb’ chi wark laj k’aak’alenel, laj Limhi ut lix tenamit ke’el sa’ li tenamit.
Ke’wulak aran Tzarahemla ut ke’xjunaji rib’ rik’ineb’ laj Nefita aran. Laj Limhi ut lix tenamit ke’tzolok chik chirix li Dios. Ke’ok sa’ jun sumwank, malaj jun yeechi’ihom, naq te’k’anjelaq chiru li Dios ut te’xpaab’eb’ lix taqlahom. Ke’kub’e xha’ ut ke’ok sa’ lix Iglees li Dios. Kijultiko’ reheb’ naq a’an li Dios li xtenq’ank reheb’ chi eelelik chiruheb’ laj Lamanita.