“Laj Alma ut laj Amulek sa’ tz’alam,” Eb’ li Seraq’ sa’ lix Hu laj Mormon (2023)
Laj Alma ut laj Amulek sa’ tz’alam
Xpaab’ankil li Qaawa’ chiruheb’ li hoonal ch’a’aj
Laj Alma ut laj Amulek ke’xjultika li evangelio sa’ li tenamit Ammonihah. Ke’wan li tenamit li ke’xpaab’ li Qaawa’ ut ke’xjal xk’a’uxl. A’b’an ke’wan chik li ke’josq’o’ rik’in laj Alma ut laj Amulek ut ke’raj xsachb’aleb’. Eb’ li josq’ aj tenamit ke’xb’ak’ laj Alma ut laj Amulek ut ke’xk’ameb’ li wiib’ chi winq chiru li xbʼeenil aj raqol aatin sa’ li tenamit.
Li xb’eenil aj raqol aatin ink’a’ kixpaab’ naq lix tenamit tento raj te’xjal xk’a’uxl. Ke’josq’o’ li tenamit rik’in laj Alma ut laj Amulek. Ke’xmineb’ ru li ani ke’paab’ank re lix k’utum laj Alma ut laj Amulek chi elk sa’ li tenamit. Toja’ naq ke’xkuteb’ sa’ xam li ixq ut li kok’al li ke’paab’an chiru li Qaawa’.
Laj Amulek kiraho’ xch’ool naq kirileb’ li tenamit chixk’ulb’al li rahilal. A’an kixpatz’ re laj Alma naq taaroksi lix wankil li Dios re xkolb’aleb’. A’b’an laj Alma kixye naq lix Musiq’ li Dios ink’a’ tixkanab’ a’an chixb’aanunkil. Kixye re laj Amulek naq eb’ li ixq ut li kok’al te’wanq rik’in li Qaawa’. Li Qaawa’ tixraq aatin chirixeb’ li ani xe’kamsink reheb’.
Li xb’eenil aj raqol aatin kireetz’u laj Alma ut laj Amulek xb’aan naq li Qaawa’ ink’a’ kixkoleb’ rix li ixq ut li kok’al. Kixtaqla laj Alma ut laj Amulek sa’ tz’alam.
Chirix xnumik oxib’ kutan, li xb’eenil aj raqol aatin naxik sa’ li tz’alam rochb’eeneb’ laj tij aj b’alaq’. Ke’ok chi patz’ink. A’b’an laj Alma ut laj Amulek ink’a’ ke’sumen.
Li xb’eenil aj raqol aatin ut eb’ laj tij ke’xrahob’tesi laj Alma ut laj Amulek. Ink’a’ ke’xk’e chi tzekank chi moko uk’ak laj Alma ut laj Amulek . Ke’reetz’u ajwi’ lix k’utum laj Alma ut laj Amulek.
Laj Alma ut laj Amulek ke’xk’ul rahilal chiru k’iila kutan. Li xb’eenil aj raqol aatin kik’ulun wi’chik rik’ineb’ laj tij. A’an kixye re laj Alma ut laj Amulek naq wi ta wan xwankil li Dios rik’ineb’, te’xt’up raj li k’aam b’ak’b’ookeb’ wi’. Toja’ ut naq a’an tixpaab’ raj li raatineb’.
Laj Alma ut laj Amulek ke’reek’a lix wankil li Dios. Ke’xaqli. Laj Alma kiwan xpaab’aal chirix li Qaawa’ ut kixpatz’ re naq taak’ehe’q xwankil chixt’upb’aleb’ li k’aam.
Laj Alma ut laj Amulek ke’xt’upeb’ li k’aam. Ke’ok chi xuwak li xb’eenil aj raqol aatin ut eb’ laj tij. Ke’xyal eelelik, a’b’an ki’ok chi hiikank li ch’och’.
Ke’t’ane’ xtz’akil li tz’alam sa’ xb’een li xb’eenil aj raqol aatin ut eb’ laj tij, ut ke’kam. A’b’an li Qaawa’ kixkol rix laj Alma ut laj Amulek. Naq li tenamit ke’rab’i li choqink, ke’xseeb’a rib’ chirilb’al k’a’ru yoo chi k’ulmank. Ka’ajwi’ laj Alma ut laj Amulek ke’el chaq sa’ li tz’alam. Li tenamit k’a’jo’ naq ke’xxuwa laj Alma ut laj Amulek, jo’kan naq ke’eelelik sa’ junpaat.