“Laj Alma sa’ li ha’ Mormon,” Eb’ li Seraq’ sa’ lix Hu laj Mormon (2023)
Laj Alma sa’ li ha’ Mormon
Li ok choq’ xtenamit li Dios
Laj Alma a’an chaq laj tij chiru li rey aj Noe. Laj Alma kixyal xkolb’al laj Abinadi, jun xprofeet li Dios, re naq ink’a’ taakamsiiq xb’aan laj Noe. A’b’an laj Noe kijosq’o’ rik’in laj Alma ut kiraj xkamsinkil ajwi’ laj Alma. Laj Alma ki’eelelik chiru laj Noe re xkolb’al rix. Chiru li kutan, laj Alma naxmuq rib’ chixk’atq jun na’ajej, li ha’ Mormon nayeeman re.
Laj Alma kixpaab’ li kixk’ut laj Abinadi chirix li Jesukristo. Kixpatz’ re li Dios naq tixkuy xmaak.
Laj Alma kixch’utub’ rib’ rik’ineb’ li tenamit chi muqmu ut kixtzoleb’ chirix li Jesus. Kixtzol yalaq ani naraj ab’ink.
Naab’aleb’ ke’xpaab’ li raatin laj Alma. Ke’wulak chire li ha’ Mormon re rab’inkil lix k’utum laj Alma.
Eb’ laj paab’anel ke’raj k’ab’a’iik jo’ xtenamit li Dios, xtenq’ankileb’ li ras riitz’in, ut xwotzb’al li raatin li Dios. Jo’kan naq laj Alma kixb’oqeb’ chi kub’eek xha’. Wi te’kub’eeq xha’, te’ok sa’ sumwank, malaj sa’ jun yeechi’ihom, rik’in li Dios re k’anjelak chiru ut xpaab’ankileb’ lix taqlahom. Jo’ reeqaj a’an, li Dios taarosob’tesiheb’ rik’in lix Musiq’.
Jwal sa xch’ooleb’ li tenamit. Ke’xpoq’poq’i li ruq’ ut ke’xye naq te’raj kub’eek xha’. Laj Alma kixkubʼsihebʼ xhaʼ saʼ li haʼ Mormon. Ke’nujak rik’in lix Musiq’ li Dios ut ke’reek’a lix rahom li Dios choq’ reheb’. Ke’ok jo’ komon sa’ lix Iglees li Kristo.
Laj Noe kixk’e reetal naq wankeb’ li tenamit li neke’el chaq sa’ lix ch’och’. Kixtaqlaheb’ lix moos chixtaaqenkileb’. Eb’ li moos ke’ril li tenamit chi xik sa’ li ha’ Mormon re rab’inkil lix k’utum laj Alma. K’a’jo’ naq kijosq’o’ laj Noe. Kixtaqla lix teep aj pleet re xkamsinkil laj Alma ut eb’ li tenamit li neke’rab’i li raatin laj Alma.
Li Dios kixye re laj Alma naq chalkeb’ re li teep aj pleet. Chi tenq’anb’il xb’aan li Dios, laj Alma ut lix tenamit ke’el chaq sa’ li ch’och’. Eb’ li teep aj pleet ink’a’ ke’ru chixchapb’aleb’. Ke’b’eek chiru waqxaqib’ kutan sa’ li yamyookil ch’och’ ut ke’wulak sa’ jun ch’och’ jwal ch’ina-us. Ke’kana aran. Laj Alma kixtzoleb’ li tenamit, ut ke’xpaab’eb’ lix yeechi’ihom rik’in li Dios.