“Laj Alma ut lix tenamit,” Eb’ li Seraq’ sa’ lix Hu laj Mormon (2023)
Laj Alma ut lix tenamit
Li kawob’resiik xb’aan li Dios sa’eb’ li hoonal ch’a’aj
Jwal ch’ina-us li ch’och’ ke’wan wi’ laj Alma ut lix tenamit. Ke’raw li iyaj ut ke’xkab’laheb’ li kab’l. Laj Alma a’an aj tij chiru li Dios. Kixk’ut chiru lix tenamit naq te’xra rib’ chirib’ileb’ rib’. Li tenamit ke’ab’in chiru laj Alma ut ke’xpaab’eb’ lix taqlahom li Dios. Ke’niman lix junkab’al, ut ke’xyiib’ jun tenamit.
Sa’ jun li kutan, kik’ulun jun teep aj pleet aj Lamanita. Ke’sach xb’eheb’. Eb’ laj Lamanita ke’xye naq te’xkanab’ lix tenamit laj Alma sa’ xyaalal wi laj Alma naxtenq’aheb’ chixtawb’al lix b’eheb’ re xik sa’ xch’och’eb’. Laj Alma kixk’ut chiruheb’ laj Lamanita li b’e te’sutq’iiq wi’ sa’ xch’ocheb’.
A’b’an eb’ laj Lamanita ink’a’ ke’xb’aanu li ke’xyeechi’i. Ke’reechani b’an li ch’och’ ut ke’xk’aak’ale lix tenamit laj Alma. Ke’xk’e jun aj Nefita aj Amulon xk’ab’a’ jo’ rey sa’ xb’een lix tenamit laj Alma. Laj Amulon a’an aj jolominel reheb’ laj tij aj b’alaq’. A’an ut eb’ laj tij ke’xkamsi jun xprofeet li Dios ut ke’xb’aanu k’iila maa’usilal.
Mosiah 17:12–13; 23:31–32, 37–39; 24:9
Laj Amulon kijosq’o’ rik’in laj Alma. Kixk’e lix tenamit laj Alma chi k’anjelak chi kaw ut kixrahob’tesiheb’. Jwal ch’a’aj a’an choq’ re lix tenamit laj Alma.
Ke’xtz’aama xtenq’ankil chiru li Dios. Laj Amulon kixye reheb’ naq ink’a’ chik te’tijoq. Kixye naq yalaq ani natijok taakamsiiq.
Laj Alma ut lix tenamit ke’xkanab’ tijok chi kaw xyaab’eb’ xkux. Ke’tijok b’an sa’ xch’ooleb’. Li Dios kirab’iheb’ lix tij. Kixk’ojob’ xch’ooleb’ ut kixyeechi’i naq tixtenq’aheb’ chi eelelik. Li Dios kixseeb’ob’resiheb’ lix kawil k’anjel. Ke’wan xkuyum li tenamit ut ke’saho’ xch’ool naq ke’ab’in chiru li Dios. Neke’xnaw naq a’an natenq’ank reheb’.
Lix tenamit laj Alma ke’xkanab’ rib’ sa’ ruq’ li Dios ut ke’paab’an chiru. Sa’ jun li kutan, li Dios kixye reheb’ naq xwulak xhoonalil naq te’elq aran. Sa’ li q’ojyin a’an, laj Alma ut lix tenamit ke’xkawresi rib’. Ke’xch’utub’eb’ lix xul ut lix tzakemq. Naq kisaqew li kutan, li Dios kixwartesiheb’ laj Lamanita. Toja’ naq laj Alma ut lix tenamit ke’eelelik ut ke’b’eek chiru chixjunil li kutan.
Sa’ li q’ojyin a’an, chixjunileb’ li winq, ixq, ut kok’al ke’b’antioxin chiru li Dios. Ke’xnaw naq ka’ajwi’ li Dios kiru raj chi tenq’ank reheb’. Ke’b’eek chiru k’iila kutan toja’ naq ke’wulak sa’ li ch’och’ Tzarahemla. Eb’ laj Nefita ke’xk’uleb’ chi saheb’ sa’ xch’ool, ut laj Alma kixtzol chixjunileb’ chirix li paab’aal chirix li Jesukristo. Naab’aleb’ li tenamit ke’paab’an ut ke’kub’e xha’.