Vahehongofulú mo e Ngaahi Foakí

• ʻOku fakahaaʻi fēfē ʻe heʻetau loto fiemālie ke totongi vahehongofulu mo e ngaahi foakí, ʻa ʻetau fakafetaʻi ki heʻetau Tamai Hēvaní koeʻuhí ko e ngaahi tāpuaki kuó Ne foaki mai kiate kitautolú?

Kuo foaki mai kiate kitautolu ha ngaahi fekau ke tokoni ʻi hono teuteuʻi kitautolu ʻi he tapa kotoa pē ke tau nofo ʻi he ʻao ʻo ʻetau Tamai Hēvaní. Kuó Ne tuku mai ha founga ke tau fakamālō ai kiate Ia koeʻuhí ko hotau ngaahi tāpuakí. Ko ha founga ʻe taha ke tau fakamālō ai kiate Iá, ko ʻetau loto fiemālie ko ia ke totongi vahehongofulu mo e ngaahi foakí. ʻI heʻetau totongi e ngaahi foaki ko ʻení, ʻoku tau fakahaaʻi ai ʻetau ʻofa kiate Iá mo ʻetau fie talangofua ki Heʻene faleʻí.

• ʻOku tokoni fēfē ʻa ʻetau totongi vahehongofulú mo e ngaahi foakí, ke tau fakamālō ai ki heʻetau Tamai Hēvaní?

• Ko e hā ʻa e vahehongofulu totonu?

Naʻe talangofua ʻa ʻĒpalahame mo Sēkope ʻi he kuonga muʻá, ki he fekau ke totongi vahehongofulú, ʻa ia ko ha vahe hongofulu ʻe taha ʻo ʻena tupú (vakai, Hepelū 7:1–10; Sēnesi 14:19–20; 28:20–22).

Naʻe lotu ʻa e Palōfita ko Siosefa Sāmitá ʻi onopooni ʻo pehē, “ ʻE ʻEiki! Fakahā mai ki hoʻo tamaioʻeikí ʻa hono lahi ʻo e ngaahi koloa ʻa ho kakaí ʻokú ke fie maʻu ke hoko ko e vahehongofulú” (T&F 119, talateu ʻo e vahé). Naʻe tali ange ʻe he ʻEikí: “ ʻE hoko ʻeni ko e kamataʻanga ʻo hono fakavahehongofuluʻi ʻo hoku kakaí. Pea ka hili iá, ko kinautolu kuo fakavahehongofuluʻi peheʻí te nau totongi ʻa e vahehongofulu ʻe taha ʻo e tupu kotoa pē ʻi he taʻu taki taha; pea ʻe hoko ʻeni ko ha fono tuʻu maʻu kiate kinautolu ʻo taʻengata” (T&F 119:3–4). Kuo fakamatala mai ʻe he Kau Palesitenisī ʻUluakí, ʻoku ʻuhinga ʻa e “vahe hongofulu ʻe taha ʻo ʻenau tupu fakataʻú” ki heʻetau paʻanga hū maí (vakai, tohi ʻa e Kau Palesitenisī ʻUluakí, 19 Māʻasi 1970).

ʻI he taimi ʻoku tau totongi vahehongofulu aí, ʻoku tau fakahaaʻi ai ʻetau tui faivelenga ki he ʻEikí. ʻOku tau akoʻi foki ki heʻetau fānaú ʻa hono mahuʻinga ʻo e fonó ni. Te nau fie muimui ki heʻetau sīpingá pea nau vahehongofuluʻi ha paʻanga pē te nau maʻu.

• Ko e hā ha ngaahi founga ʻoku hoko ai ʻa e vahehongofulú ko ha tefitoʻi moʻoni ʻo e tuí, ʻo mahulu hake ia heʻene hoko ko ha tefitoʻi moʻoni fakapaʻangá?

• Ko e hā ʻe lava ke fai ʻe he ngaahi mātuʻá ke akoʻi ai ʻenau fānaú ke totongi vahehongofulu pea mahino kiate kinautolu ʻa hono mahuʻingá?

• Ko e hā ʻoku mahuʻinga ai hotau lotó ʻi he taimi ʻoku tau totongi vahehongofulu aí?

ʻOku mahuʻinga ke tau foaki loto fiemālie. “ʻI he taimi ʻoku ʻikai totongi fiefia ai ʻe ha taha ʻene vahehongofulú, ʻoku toʻo ai meiate ia ha konga ʻo e tāpuakí. Kuo pau ke ne ako ke foaki fiefia, loto fiemālie mo vēkeveke pea ʻe faitāpuekina ai ʻene foakí” (Stephen L. Richards, The Law of Tithing [pamphlet, 1983], 8).

Naʻe akoʻi mai ʻe he ʻAposetolo ko Paulá ʻoku mahuʻinga tatau pē ʻa e founga ʻoku tau foaki aí, pea mo e meʻa ko ia ʻoku tau foakí. Naʻá ne pehē, “Ke foaki ʻe he tangata taki taha ʻo hangē ko ia kuo pau hono loto ki ai, kae ʻikai ʻi he mamahi, pe ʻi hono puleʻi: he ʻoku ʻofa ʻa e ʻOtuá ki ha foaki fiefia” (2 Kolinitō 9:7).

• Ko e hā ʻene ʻuhinga kiate koe ke “foaki fiefia”?

• Ko e hā ha ngaahi founga ʻoku fakaʻaongaʻi ai ʻe he Siasí ʻa e vahehongofulú mo e ngaahi foaki kehé?

ʻI heʻetau hoko ko ha kāingalotu ʻo e Siasí, ʻoku tau foaki ai ʻetau vahehongofulú mo e ngaahi foaki kehé ki he ʻEikí.

ʻOku talaʻofa mai ʻe he ʻEikí te Ne faitāpuekina kitautolu ʻi heʻetau totongi faivelenga ʻetau ngaahi vahehongofulú mo e ngaahi foakí. Naʻá Ne folofola, “Mou ʻomi ʻa e ngaahi vahehongofulu ʻo e meʻa ki he tukuʻanga koloá, koeʻuhi ke ai ha meʻa kai ʻi hoku falé, pea mou ʻahiʻahi ai au … pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10).

ʻOku fakamatala ʻa e fakahā ʻi he ʻaho kimui ní ʻo kau ki ha tāpuaki ʻe taha maʻanautolu ʻoku totongi vahehongofulú: “Ko e moʻoni ko ha ʻaho ia ʻo e feilaulau, pea ko ha ʻaho ki hono fakavahehongofuluʻi ʻo hoku kakaí; he ko ia ia ʻoku fakavahehongofuluʻi ʻe ʻikai tutu ia ke vela ʻi heʻene hāʻele maí” (T&F 64:23).

ʻOku fakatou matelie mo fakalaumālie e ngaahi tāpuaki kuo talaʻofa mai kiate kitautolú. Kapau te tau foaki loto fiemālie, ʻe tokoniʻi kitautolu ʻe he Tamai Hēvaní ke tau tokonaki maʻa ʻetau ngaahi fie maʻu fakaʻaho ʻi he meʻakaí, valá mo e nofoʻangá. ʻI ha lea ʻa Palesiteni Kōtoni B. Hingikelī ki he kāingalotu ʻo e Siasí ʻi Filipainí, naʻá ne pehē ai kapau ʻe “tali ʻe he kakaí ʻa e ongoongoleleí pea nau moʻuiʻaki ia ʻo totongi ʻenau vahehongofulú mo e ngaahi foakí, neongo ʻene siʻisiʻí, ʻe tauhi ʻe he ʻEikí ʻa ʻene talaʻofa ne fai he kuonga muʻá, pea ʻe ʻi ai haʻanau meʻakai, vala ke nau tui mo hanau nofoʻanga. ʻOku ʻikai mo ha toe founga kehe. ʻOku nau fie maʻu ha mālohi ʻoku mahulu ange ʻi ha toe faʻahinga mālohi fakaemāmani, ke ne hikiʻi hake mo tokoniʻi kinautolu” (“Inspirational Thoughts,” Ensign, Aug. 1997, 7). ʻE tokoni foki ʻa e ʻEikí ke tau tupulaki “ ʻi he ʻilo ki he ʻOtuá, ʻi he fakamoʻoní, ʻi he mālohi ke moʻui ʻaki ʻa e ongoongoleleí pea mo ueʻi hotau ngaahi fāmilí ke nau fai peheé” (Ngaahi Akonaki ʻa e Kau Palesiteni ʻo e Siasí: Hiipa J. Kalānite [2002], 142).

ʻOku faitāpuekina lahi ʻa kinautolu ʻoku totongi vahehongofulú. ʻOku nau ongoʻi fiefia ʻoku nau tokoni ki hono langa e puleʻanga ʻo e ʻOtuá ʻi he māmaní.

• Ko e hā ha ngaahi tāpuaki kuó ke maʻu mo ho fāmilí pe kaungāmeʻá, ʻo fakafou ʻi he totongi vahehongofulú mo e ngaahi foaki kehé?

• T&F 119:1–4 (fono ʻo e vahehongofulú)

• Sēnesi 14:18–20; ʻAlamā 13:13–16 (totongi vahehongofulu ʻa ʻĒpalahame)