Hakeakiʻi

ʻI heʻetau kei nofo fakataha mo ʻetau Tamai Hēvaní, naʻá Ne fakamatalaʻi mai ha palani ki heʻetau fakalakalaká. ʻE lava ke tau hoko ʻo hangē ko Iá, ko ha Tokotaha hakeakiʻi. Naʻe fie maʻu ʻe he palaní ke tau mavahe meiate Ia ʻo tau omi ki he māmaní. Naʻe fie maʻu ke fai ʻa e mavahevahe ko ʻení ke fakamoʻoniʻi ai pe te tau talangofua ki he ngaahi fekau ʻa ʻetau Tamaí, neongo naʻe ʻikai ke tau kei nofo ʻi Hono ʻaó. Naʻe ʻomi foki ʻi he palaní ko e taimi ʻe ngata ai ʻetau moʻui ʻi he māmaní, ʻe fakamaauʻi ʻa kitautolu pea fakapaleʻi ʻo fakatatau mo e tuʻunga ʻo ʻetau tuí mo e talangofuá.

ʻOku tau ako mei he folofolá ʻoku ʻi ai ha ngaahi puleʻanga ʻe tolu ʻo e ngaahi nāunaú ʻi he langí. Naʻe pehē ʻe he ʻAposetolo ko Paulá naʻá ne ʻiloʻi ha tangata naʻe “ ʻo hake ia ki hono tolu ʻo e langí” (2 Kolinitō 12:2). Naʻe fakahingoa mai ʻe Paula ha puleʻanga ʻe ua ʻi he langí: ko e fakasilesitialé pea mo e fakatelesitialé (vakai, 1 Kolinitō 15:40–42). Ko e māʻolunga tahá ʻa e silesitialé pea hoko hake ki ai ʻa e telesitialé. ʻOku fakafou ʻi ha fakahā he ʻaho kimui ní, ʻa ʻetau ʻilo ko e puleʻanga hono tolú ʻa e puleʻanga fakatilesitialé (vakai, T&F 76:81). ʻOku tau ako foki ʻo ʻiloʻi ʻoku ʻi ai ha ngaahi langi pe tuʻunga ʻe tolu ʻi he puleʻanga fakasilesitialé (vakai, T&F 131:1).

• Ko e hā ʻa e hakeakiʻi?

Ko e hakeakiʻí, ko e moʻui taʻengatá ia, ʻa e faʻahinga moʻui ʻoku maʻu ʻe he ʻOtuá. ʻOkú Ne ʻafio ʻi ha nāunau maʻongoʻonga. ʻOkú Ne haohaoa. ʻOkú Ne maʻu ʻa e ʻilo mo e poto kotoa pē. Ko e Tamai Ia ʻa e fānau fakalaumālié. Ko Ia naʻá Ne fai ʻa e fakatupú. ʻE lava ke tau hoko ʻo hangē ko ʻetau Tamai Hēvaní. Ko e hakeakiʻí ʻeni.

Kapau te tau fakamoʻoniʻi ki he ʻEikí ʻa ʻetau faivelengá, te tau nofo ʻi he tuʻunga māʻolunga taha ʻo e puleʻanga fakasilesitale ʻo e langí. ʻE hakeakiʻi ʻa kitautolu ke tau nofo fakataha mo ʻetau Tamai Hēvaní ʻi ha ngaahi fāmili taʻengata. Ko e hakeakiʻí, ko e meʻaʻofa maʻongoʻonga taha ia ʻe lava ke foaki ʻe he Tamai Hēvaní ki Heʻene fānaú (vakai, T&F 14:7).

• Ko e hā ha ngaahi tāpuaki ʻe foaki kiate kinautolu ʻe hakeakiʻí?

ʻOku haohaoa ʻetau Tamai Hēvaní, pea ʻokú Ne vikiviki ʻi he foʻi moʻoni ko ia ʻe malava ke hoko ʻa ʻEne fānaú ʻo hangē ko Iá. Ko ʻEne ngāué mo Hono nāunaú ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Ko kinautolu te nau maʻu ʻa e hakeakiʻí ʻi he puleʻanga fakasilesitialé ʻo fakafou ʻi he tui kia Sīsū Kalaisí, te nau maʻu ha ngaahi tāpuaki makehe. Kuo talaʻofa mai ʻa e ʻEikí, “ ʻOku ʻanautolu ʻa e ngaahi meʻa kotoa pē” (T&F 76:59). Ko ha niʻihi ʻeni ʻo e ngaahi tāpuaki ʻoku foaki ki he kakai hakeakiʻí:

1. Te nau nofo taʻengata ʻi he ʻao ʻo e Tamai Hēvaní mo Sīsū Kalaisi (vakai, T&F 76:62).

2. Te nau hoko ko ha ngaahi ʻotua (vakai, T&F 132:20–23).

3. Te nau fakataha ʻo taʻengata mo e kau mēmipa anga māʻoniʻoni ʻo honau fāmilí pea ʻe lava ke nau tupulaki taʻengata.

4. Te nau maʻu ha fiefia kakato.

5. Te nau maʻu ʻa e meʻa kotoa pē ʻoku maʻu ʻe heʻetau Tamai Hēvaní mo Sīsū Kalaisi—ʻa e mālohi, nāunau, pule mo e ʻilo kotoa pē (vakai, T&F 132:19–20). Naʻe tohi ʻe Palesiteni Siosefa Filitingi Sāmita ʻo pehē: “Kuo talaʻofa mai ʻa e Tamaí ʻi he ʻAló, ʻe foaki ʻa e meʻa kotoa pē ʻokú Ne maʻú kiate kinautolu ʻoku talangofua ki Heʻene ngaahi fekaú. Te nau tupulaki ʻi he ʻilo, poto mo e mālohi ʻo nau ʻalu mei he ʻaloʻofa ki he ʻaloʻofa, kae ʻoua kuo hoko mai kiate kinautolu ʻa hono kakato ʻo e ʻaho haohaoá” (Doctrines of Salvation, comp. Bruce R. McConkie, 3 vols. [1954–56], 2:36; fakamamafaʻi ʻi he tatau totonú).

Ko e taimi pē ʻeni ke fakakakato ai e ngaahi fie maʻu ki he hakeakiʻí (vakai, ʻAlamā 34:32–34). Naʻe pehē ʻe Palesiteni Siosefa Filitingi Sāmita, “Kuo pau ke tau tali ʻa e ongoongoleleí mo e kotoa ʻo hono ngaahi fuakavá, kae lava ke tau maʻu ʻa e hakeakiʻí; pea tau toʻo kiate kitautolu ʻa e tufakanga kuo ʻomi ʻe he ʻEikí; pea tau ʻaʻeva ʻi he māmá pea mahino kiate kitautolu ʻa e moʻoní; pea moʻui ʻo fakatatau mo e “folofola kotoa pē ʻoku ʻalu atu mei he fofonga ʻo e ʻOtuá’” (Doctrines of Salvation, 2:43).

Ke hakeakiʻi kitautolú, kuo pau ke tau tomuʻa tui kia Sīsū Kalaisi pea kātaki ki he ikuʻanga ʻo ʻetau moʻuí ʻi he tui ko iá. Kuo pau ke tau tui kiate Ia ʻo fakatomala mei heʻetau ngaahi angahalá pea talangofua ki Heʻene ngaahi fekaú.

ʻOkú Ne fekau mai kiate kitautolu kotoa pē ke tau maʻu ha ngaahi ouau tukupau:

1. Kuo pau ke papitaiso kitautolu.

2. Kuo pau ke hilifaki nima ʻa kitautolu ʻo fakamaʻu ko ha mēmipa ʻo e Siasi ʻo Sīsū Kalaisí pea tau maʻu e meʻafoaki ʻo e Laumālie Māʻoniʻoní.

3. Kuo pau ke maʻu ʻe he houʻeiki tangatá ʻa e Lakanga Taulaʻeiki Faka-Melekisētekí mo fua faivelenga honau ngaahi uiuiʻi ʻi he lakanga fakataulaʻeikí.

4. Kuo pau ke tau maʻu ʻa e ʻenitaumeni fakatemipalé.

5. Kuo pau ke tau mali ki he taʻengatá, ʻi he moʻuí ni pe ko e moʻui ka hokó.

Tānaki atu ki hono maʻu ʻo e ngaahi ouau ʻoku fie maʻú, ʻoku fekau mai ʻe he ʻEikí kiate kitautolu kotoa pē ke tau:

1. ʻOfa ki he ʻOtuá mo hotau kaungāʻapí.

2. Tauhi ʻa e ngaahi fekaú.

3. Fakatomala mei heʻetau ngaahi fehālākí.

4. Fekumi ki hotau kāinga kuo pekiá pea maʻu maʻanautolu ʻa e ngaahi ouau fakamoʻui ʻo e ongoongoleleí.

5. ʻAlu maʻu pē ki heʻetau ngaahi fakatahaʻanga faka-Siasí ʻi he lahi taha ʻe malavá ke tau lava ʻo fakafoʻou ai ʻetau ngaahi fuakava ʻi he papitaisó ʻaki ʻetau kai ʻa e sākalamēnití.

6. ʻOfa ki he kau mēmipa ʻo hotau fāmilí pea fakamālohia kinautolu ʻi he ngaahi founga ʻo e ʻEikí.

7. Lotu fakafāmili mo fakatāutaha ʻi he ʻaho kotoa pē.

8. Akoʻi ʻa e ongoongoleleí ki he niʻihi kehé ʻi he lea mo e faʻifaʻitakiʻanga.

9. Ako ʻa e folofolá.

10. Fakafanongo pea talangofua ki he ngaahi lea fakalaumālie ʻa e kau palōfita ʻa e ʻEikí.

Fakaʻosí, ʻoku fie maʻu ke tau takitaha maʻu ʻa e Laumālie Māʻoniʻoní pea ako ke muimui ki Heʻene fakahinohinó ʻi heʻetau moʻui fakafoʻituituí.

• ʻOku teuteuʻi fēfē kitautolu ʻe he ngaahi ouaú mo e ngaahi fuakavá ki he hakeakiʻí?

• ʻOku tokoni fēfē ʻa e tui kia Sīsū Kalaisí ke tau talangofua ki he ngaahi fekaú?

• Ko e hā kuo pau ke tau ako ai ke muimui ki he fakahinohino ʻa e Laumālie Māʻoniʻoní kae hakeakiʻi kitautolú?

• Ko e hā ʻoku hoko he taimi ʻoku tau kātaki ai ki he ngataʻangá ʻi he muimui faivelenga kia Kalaisí?

Kuo folofola ʻa e ʻEikí, “Kapau te ke tauhi ʻeku ngaahi fekaú ʻo kātaki ki he ngataʻangá, te ke maʻu ʻa e moʻui taʻengatá, ʻa ia ko e meʻaʻofa ʻoku mahuʻinga taha ʻi he ngaahi meʻaʻofa kotoa pē ʻa e ʻOtuá” (T&F 14:7). Naʻe pehē ʻe Palesiteni Siosefa Filitingi Sāmita, “Kapau te tau hoko atu ʻi he ʻOtuá; ʻo tauhi ʻEne ngaahi fekaú, hū kiate Ia pea moʻuiʻaki ʻEne moʻoní; ʻe hokosia ʻa e taimi te tau fālute ai ʻa hono kakato ʻo e moʻoní, ʻa ia ʻe tupulaki ʻene māmá mo ʻene ngingilá kae ʻoua ke hokosia ʻa e ʻaho haohaoá” (Doctrines of Salvation, 2:36).

Naʻe akonaki ʻa e Palōfita ko Siosefa Sāmitá ʻo pehē: “Kapau te ke kaka ʻi ha tuʻunga, kuo pau ke ke kamata hake mei lalo, ʻo kaka ai ki ʻolunga, kae ʻoua kuó ke aʻu ki he tumuʻakí; pea ʻoku pehē pē mo e ngaahi tefitoʻi [fono] ʻo e ongoongoleleí—kuo pau ke ke kamata mei he ʻuluakí, pea [hokohoko] atu ai kae ʻoua kuó ke ʻilo ʻa e ngaahi tefitoʻi [fono] kotoa ʻo e hakeakiʻí. Ka ʻe fuoloa, hili hoʻo [hū atu] ʻi he veilí, peá ke toki ʻilo[ʻi] kotoa kinautolu. ʻE ʻikai lava ke mahino kiate kitautolu ʻa e meʻa kotoa pē ʻi he māmaní; ko e ngāue lahi ʻa ʻetau ako [ke ʻilo] hotau fakamoʻuí mo hotau hakeakiʻí ʻi he hili ʻetau maté” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 308).

Naʻe akonaki mai ʻa Siosefa Sāmita ʻo pehē: “Ko e ʻuluaki tefitoʻi moʻoni ia ʻo e Ongoongoleleí ke ʻiloʻi fakapapau ʻa e ʻUlungāanga ʻo e ʻOtuá. … Naʻe ʻi ai ha taimi naʻá Ne hangē ai ko ha tangata tatau mo kitautolu; … Naʻe nofo tonu ʻa e ʻOtuá, ʻa ia ko ʻetau Tamaí kotoa Ia, ʻi he māmaní, ʻo hangē ko ia naʻe fai ʻe Sīsū Kalaisí” (Teachings of the Prophet Joseph Smith, sel. Joseph Fielding Smith [1976], 345–46).

ʻOku ʻafioʻi ʻe heʻetau Tamai Hēvaní ʻa hotau ngaahi ʻahiʻahí, hotau ngaahi vaivaí pea mo ʻetau ngaahi angahalá. ʻOkú Ne manavaʻofa mo ʻaloʻofa mai kiate kitautolu. ʻOkú Ne finangalo ke tau lavameʻa ʻo hangē ko Iá.

Fakakaukau angé ki he faʻahinga fiefia te tau takitaha aʻusia ʻi he taimi te tau toe foki ai ki heʻetau Tamai Hēvaní pea tau pehē ange: “Tamai, ne u moʻui ʻo fakatatau ki Ho finangaló. Kuó u faivelenga mo tauhi Hoʻo ngaahi fekaú. ʻOku ou fiefia ke u toe foki mai ki ʻapi.” Te tau fanongo ki Heʻene folofola mai, “Mālō … ; kuó ke faitotonu ʻi he meʻa siʻi, te u fakanofo koe ke ke pule ki he meʻa lahi: hū koe ki he fiefiaʻanga ʻo hoʻo ʻeikí” (Mātiu 25:23).

• Mou toe vakai ki he Mātiu 25:23. Fakakaukau angé ki he ongo te ke maʻu ʻo kapau te ke fanongo ki hano folofola atu ʻaki ʻe he ʻEikí e ngaahi kupuʻi lea ko iá.

• T&F 132:3–4, 16–26, 37 (fekauʻaki mo e hakeakiʻí)

• T&F 131:1–4 (ko e mali taʻengatá ʻa e kī ki he hakeakiʻí)

• T&F 76:59–70 (fakamatalaʻi e ngaahi tāpuaki ʻo e nāunau fakasilesitialé)

• T&F 84:20–21 (fakahaaʻi e mālohi ʻo e anga fakaʻotuá ʻi he ngaahi ouau ʻo e lakanga fakataulaʻeikí)