Ngaahi Fakaʻilonga ʻo e Hāʻele ʻAngaua Maí

ʻOku fakailifia mo fakalilifu ha niʻihi ʻo e ngaahi fakaʻilongá. Kuo fakatokanga mai ‘a e kau palōfitá ʻe hoko ki he māmaní ha moveuveu lahi, faiangahalá, fetauʻakí pea mo e faingataʻaʻiá. Naʻe pehē ʻe he palōfita ko Tanielá ko e kuonga ko ia ki muʻa ʻi he Hāʻele ʻAngauá, ko ha taimi ia ʻo e puputuʻu lahi kuo teʻeki ʻiloʻi ʻi he māmaní (vakai, Taniela 12:1). Naʻe folofola ʻa e ʻEikí, “ ʻE fakaʻau ʻo momoko ʻa e ʻofa ʻa e tangatá, pea ʻe hulu ʻa e fai angahalá” (T&F 45:27). “Pea ʻe moveuveu ʻa e ngaahi meʻa kotoa pē; pea … ʻe hoko mai ʻa e ilifia ki he kakai kotoa pē” (T&F 88:91). ʻE lava ke tau ʻilo ʻe hoko mai ha ngaahi mofuike, mahaki fakaʻauha, honge, matangi mālohi, fatulisi mo e mana (vakai, Mātiu 24:7; T&F 88:90). ʻE fakaʻauha ʻe he ʻuha maká ʻa e ngaahi ngoue ʻi he māmaní (vakai, T&F 29:16).

Naʻe fakahā ʻe Sīsū ki Heʻene kau ākongá ʻe fakafonu ʻa e māmaní ʻe he ngaahi tau: “Te mou fanongo ki he ngaahi tau mo e ongoongo ʻo e tau. … ʻE tuʻu hake ʻa e kakai ki he kakai, mo e puleʻanga ki he puleʻanga” (Mātiu 24:6–7). Naʻe pehē ʻe he Palōfita ko Siosefa Sāmitá: “ ʻOua naʻa mou lotosiʻi ʻi heʻemau fakamatala atu ʻa e ngaahi taimi faingataʻá, he ʻe vavé ni mai ʻenau hokó, he ʻoku tuʻunuku mai ʻa e heletaá, mo e hongé, mo e ngaahi meʻa fakamamahí. ʻE hoko ha fakaʻauha lahi ʻi he funga ʻo e fonuá, kae ʻoua naʻa mou mahalo ʻe ʻikai hoko ha kihiʻi kupu pe tohi ʻo e ngaahi kikite kotoa ʻa e kau palōfita māʻoniʻoní, pea ʻoku kei toe ha ngaahi meʻa lahi ʻoku teʻeki fakahoko” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 289).

ʻOku lolotonga fakahoko ha konga lahi ʻo e ngaahi fakaʻilonga ko ʻení. ʻOku ʻi he feituʻu kotoa pē ʻa e angahalá. ʻOku toutou fetauʻaki ʻa e ngaahi puleʻangá. ʻOku hoko mai ha ngaahi mofuike mo ha ngaahi fakatamaki kehe. ʻOku lolotonga faingataʻaʻia ha kakai tokolahi ko e ola ʻo e ngaahi matangi mālohí, laʻalaʻaá, fiekaiá mo e mahakí. ʻE lava ke tau ʻiloʻi pau ʻe ʻalu ke toe kovi ange ʻa e ngaahi fakatamaki ko ʻení ki muʻa pea hāʻele mai ʻa e ʻEikí.

Ka neongo ia, ʻoku ʻikai ke fakalilifu ʻa e ngaahi meʻa kotoa pē ʻe hoko ki muʻa ʻi he Hāʻele ʻAngauá. ʻOku ʻomi ʻe ha tokolahi ha fiefia ki he māmaní.

Naʻe folofola ʻa e ʻEikí, “ ʻE ulo atu ha maama ʻiate kinautolu ʻoku nofo ʻi he fakapoʻulí, pea ko e kakato ia ʻo ʻeku ongoongoleleí” (T&F 45:28). Naʻe tomuʻa fakahā pē ʻe he kau palōfita ʻo e kuonga muʻá ʻa hono Toe Fakafoki mai ʻo e ongoongoleleí. Naʻe mamata ʻa e ʻAposetolo ko Sioné ʻe toe fakafoki mai ʻa e ongoongoleleí ʻe ha ʻāngelo (vakai, Fakahā 14:6–7). Naʻe haʻu e ʻāngelo ko Molonaí mo ha kau talafekau fakalangi kehe ke ʻomi ʻa e ongoongolelei ʻo Sīsū Kalaisí kia Siosefa Sāmita, ke fakahoko ai ʻa e kikite ko ʻení.

Naʻe folofola ʻa e ʻEikí ki he kau Nīfaí ʻo fekauʻaki mo ha fakaʻilonga ʻe taha: ʻe ʻomi ʻa e Tohi ʻa Molomoná ki honau hakó (vakai, 3 Nīfai 21). ʻI he ngaahi kuonga ʻo e Fuakava Motuʻá, naʻe tomuʻa mamata ai ʻa e ongo palōfita ko ʻĪsaiá mo ʻIsikeli ki hono ʻomi ʻo e Tohi ʻa Molomoná (vakai, ʻĪsaia 29:4–18; ʻIsikeli 37:16–20). ʻOku lolotonga fakahoko he taimí ni ʻa e ngaahi kikite ko ʻení. Kuo ʻomi ʻa e Tohi ʻa Molomoná pea kuo ʻoatu ia ki he tapa kotoa pē ʻo e māmaní.

Ko ha toe fakaʻilonga ʻe taha ʻo e ngaahi ʻaho fakaʻosí ko e “ongoongoleleí ni ʻo e puleʻangá ʻe malanga ʻaki ʻi māmani kotoa pē, ko e meʻa fakamoʻoni ki he puleʻanga kotoa pē” (Mātiu 24:14; vakai foki, Siosefa Sāmita—Mātiu 1:31). ʻE fanongo ʻa e kakai kotoa pē ki hono kakato ʻo e ongoongoleleí ʻi heʻenau lea fakafonua pē ʻanautolú (vakai, T&F 90:11). Talu mei hono Toe Fakafoki mai ʻo e Siasí, mo hono malangaʻaki ʻe he kau faifekaú ʻa e ongoongoleleí. Kuo tupulaki e ngāue fakafaifekaú he taimí ni ʻo aʻu ki ha kau faifekau ʻe lau mano ʻoku nau malanga ʻi he ngaahi fonua lahi ʻi ha ngaahi lea fakafonua kehekehe. Kimuʻa ʻi he Hāʻele ʻAngauá pea lolotonga ʻa e Nofotuʻí, ʻe ʻomi ʻe he ʻEikí ha ngaahi founga ke ʻoatu ʻaki e moʻoní ki he puleʻanga kotoa pē.

Naʻe kikite ʻa e palōfita ko Malakaí ʻe fekauʻi mai ʻa e palōfita ko ʻIlaisiaá ki he māmaní, kimuʻa pea Hāʻele ʻAngaua Mai ʻa e Fakamoʻuí. ʻE toe fakafoki mai ʻe ʻIlaisiā ʻa e mālohi faisilá/faifakamaʻú kae lava ke silaʻi fakataha ʻa e ngaahi fāmilí. Te ne ueʻi foki ʻa e kakaí ke nau tokanga ki heʻenau ngaahi kuí mo honau hakó. (Vakai, Malakai 4:5–6; T&F 2.) Naʻe haʻu ʻa e palōfita ko ʻIlaisiaá kia Siosefa Sāmita ʻi ʻEpeleli ʻo e 1836. Talu mei he taimi ko iá, mo e tupulaki ʻa e tokanga ki he ngāue fakatohihohokó mo e hisitōlia fakafāmilí. ʻOku tau lava foki ʻo fakahoko ʻa e ngaahi ouau sila ʻi he temipalé maʻanautolu ʻoku moʻuí pea mo kinautolu kuo pekiá.

Naʻe folofola ʻa e ʻEikí ko e taimi ʻe ofi ai ki Heʻene hāʻele maí, ʻe hoko ʻa e kau Leimaná ko ha kakai angatonu mo fakaʻapaʻapaʻiaʻi. Naʻá ne pehē, “Ki muʻa pea hoko ʻa e fuʻu ʻaho lahi ʻo e ʻEikí, … ʻe matala ʻa e kau Leimaná ʻo hangē ko e losé” (T&F 49:24). Kuo tokolahi fau e ngaahi hako ʻo Līhai ʻoku nau maʻu he taimí ni ʻa e ngaahi tāpuaki ʻo e ongoongoleleí.

ʻI he fakaofi atu ki he taimi ʻe hāʻele mai ai ʻa Sīsū Kalaisí, ʻe langa ʻe he Kāingalotu faivelengá ha kolo māʻoniʻoni, ko ha kolo ʻo e ʻOtuá, ʻo ui ko Selusalema Foʻou. ʻE pule tonu pē ai ʻa Sīsū Kalaisi. (Vakai, 3 Nīfai 21:23–25; Mōsese 7:62–64; Ngaahi Tefito ʻo e Tuí 1:10.) Naʻe folofola ʻa e ʻEikí ʻe langa ʻa e koló ʻi he vahefonua ko Mīsulí ʻi he ʻIunaiteti Siteití (vakai, T&F 84:2–3).

Ko ha niʻihi pē ʻeni ʻo e ngaahi fakaʻilonga kuo foaki mai ʻe he ʻEikí. ʻOku lahi mo ha toe ngaahi fakaʻilonga ʻoku fakamatalaʻi mai ʻe he folofolá.