Seksen 111
Revelesen we Lod i givim tru long Profet Josef Smit, long Salem, Masajuset, long 6Â Ogis 1836. Long taem ia, ol lida blong Jos oli bin gat ol bigfala kaon from ol wok blong olgeta long seves long Jos. From se oli harem se i gat wan bigfala mane i stap blong oli yusum long Salem, Profet, Sidni Rigdon, Haeram Smit, mo Oliva Kaodri, oli bin travel aot long Ketlan, Ohaeo i go long Salem, blong lukluk long toktok ia, mo tu, blong prijim gospel. Ol brata ia oli bin mekem sam bisnis blong Jos mo oli bin prij. Taem we i kam klia we i no gat eni mane blong yusum, oli bin gobak long Ketlan. Sam pat blong histri blong taem ia i kamaot long ol toktok blong revelesen ia.
1–5, Lod i lukluk long ol nid, long saed blong laef ia, blong ol wokman blong Hem; 6–11, Bae hem i soemaot sore blong hem long Saeon mo mekem evri samting i stret, blong gud blong ol wokman blong Hem.
1 Mi, Lod, God blong yufala, mi no harem nogud we yufala i mekem rod ia i kam, nomata long ol krangke fasin blong yufala.
2 Mi gat plante rij samting blong yufala long siti ia, blong gud blong Saeon, mo i gat plante pipol long siti ia we bae mi mekem oli kam wanples long stret taem, blong gud blong Saeon, tru long yufala.
3 From hemia, hem i impoten blong yufala i kam blong save gud ol man insaed long siti ia, olsem we mi lidim yufala, mo olsem we bae mi talem long yufala.
4 Bambae i hapen se long taem ia we i stret we bae mi givim siti ia long han blong yufala, bae yufala i gat paoa ova long hem, mekem se bae oli no faenemaot ol sikret plan blong yufala; mo ol rij samting blong hem, long saed blong gol mo silva, bambae i blong yufala.
5 Yufala i no mas wari long saed blong ol akaon blong yufala, from we bae mi givim paoa long yufala blong pem olgeta.
6 Yufala i no wari long saed blong Saeon, from we bae mi soemaot sore blong mi long hem.
7 Yufala i mas stastap long ples ia, mo long ol ples we oli stap raonabaot;
8 Mo ples ia we i tingting blong mi blong yufala i stap long hem long bigfala taem, bae mi talemaot long yufala tru long apis mo paoa blong Spirit blong mi, we bae i kam long yufala.
9 Ples ia, bae yufala i pem long mane. Mo yufala i mas askem gud long saed blong ol pipol we oli bin stap laef long ples ia bifo finis, mo long saed blong olgeta we oli bin bildimap siti ia;
10 From we i gat moa bitim wan rij samting blong yufala insaed long siti ia.
11 From hemia, yufala i mas awaes olsem snek, be yet, yufala i no mas gat sin; mo bae mi givim oda long evri samting blong bgud blong yufala, kwik olsem we yufala i save kasem olgeta. Amen.