Seksen 55
Revelesen we Lod i bin givim, tru long Profet Josef Smit, i go long Wiliam W. Felps, long Ketlan, Ohaeo, long 14 Jun 1831. Wiliam W. Felps, wan man blong printim buk, mo famli blong hem i jes kasem Ketlan, mo Profet i bin askem Lod blong kasem sam toksave long saed blong man ia.
1–3, Lod i singaotem mo jusum Wiliam W. Felps blong i baptaes, blong oli odenem hem i kam wan elda, mo blong hem i go prijim gospel; 4, Mo tu, blong hem i raetem ol buk blong ol pikinini we oli stap long ol skul blong Jos; 5–6, Hem i mas go kasem Misuri, we bae i stap olsem wan ples blong hem i mekem ol wok blong hem.
1 Luk, olsem ia nao Lod i talem long yu, wokman blong mi, Wiliam, yes, mi we mi Lod blong ful awol, mi singaotem mo jusum yu; mo afta we yu kasem bbaptaes long wota, we sapos yu mekem wetem wan ae we i lukluk nomo long glori blong mi, bambae yu kam klin aot long ol sin blong yu mo bambae yu kasem Tabu Spirit tru long fasin blong putum dhan antap long hed;
2 Mo afta, tru long han blong wokman blong mi, Josef Smit Junia, bambae oli odenem yu i kam wan elda blong Jos ia, blong prijim fasin blong sakem sin mo fasin blong akam klin aot long ol sin tru long rod blong baptaes long nem blong Jisas Kraes, Pikinini blong God we i laef.
3 Mo long huia nao we bambae yu putum han blong yu antap long hed blong olgeta, sapos oli wantem sakem sin long fes blong mi, bambae yu gat paoa blong givim Tabu Spirit.
4 Mo bakegen, bae oli odenem yu blong yu givhan long wokman blong mi, Oliva Kaodri, blong mekem wok blong printim buk, mo blong jusum mo raetem ol abuk blong ol skul blong jos ia, blong mekem se ol smol pikinini tu oli save kasem instraksen long fes blong mi, olsem we mi glad long hem.
5 Mo bakegen, i tru, mi talem long yu, from stamba tingting ia nao bae yu tekem rod blong yu wetem ol wokman blong mi Josef Smit Junia, mo Sidni Rigdon, blong yu save astanap long graon we yu gat raet long hem blong mekem wok ia.
6 Mo bakegen, wokman blong mi Josef Ko, i mas tekem rod blong hem tu wetem olgeta. Ol narafala samting we oli stap, bambae mi mekem yu save long olgeta afta, olsem we mi wantem. Amen.