Seksen 47
Revelesen we God i givim tru long Profet Josef Smit, long Ketlan, Ohaeo, long 8 Maj 1831. Jon Witma, we i bin stap givim seves finis olsem wan klak blong Profet, long fas ples i gat tu tingting taem oli bin askem hem blong stap olsem man blong raetem histri blong Jos mo kipim rekod, mo i tekem ples blong Oliva Kaodri. Hem i raetem: “I moa gud mi no mekem, be luk nomo se oli mekem tingting blong Lod, mo sapos Hem i wantem, mi wantem se Hem i talemaot tru long Josef we i Sia.” Afta we Josef Smit i kasem revelesen ia, Jon Witma i akseptem mo i givim seves long ofis ia we oli putum hem long hem.
1–4, Lod i jusum Jon Witma blong i raetemdaon histri blong Jos mo blong hem i raet blong Profet.
1 Luk, long mi, hem i nid blong wokman blong mi, Jon, i mas raet mo i kipim oltaem wan ahistri, mo helpem yu, wokman blong mi, Josef, blong raetemdaon evri samting we bambae mi talemaot long yu, kasem taem we mi singaotem hem blong mekem sam moa wok.
2 Bakegen, i tru, mi talem long yu se hem i save leftemap voes blong hem tu long ol miting, long taem we bae i gat nid from.
3 Mo bakegen, mi talem long yu se mi jusum hem blong hem i kipim rekod mo histri blong jos oltaem; from we Oliva Kaodri, mi bin jusum hem blong stap long wan narafala ofis.
4 Taswe, mi givim ol samting ia long hem, folem hamas bae hem i fetful, tru long aSpirit blong Givhan, blong hem i raetemdaon ol samting ia. I olsem. Amen.