Seksen 96
Revelesen we Lod i bin givim long Profet Josef Smit, mo i soemaot oda blong siti o stek blong Saeon, long Ketlan, Ohaeo, long 4 Jun 1833, we Lod i givim olsem wan eksampol long olgeta Sent long Ketlan. Hemia i bin hapen long taem blong wan konfrens blong ol hae pris, mo stamba poen blong lukluk long hem i bin olsem wanem blong mekem wetem sam graon, we oli bin save long olgeta olsem Franis fam, we Jos i gat kolosap long Ketlan. From se konfrens i no save agri se huia bambae i lukaotem fam ia, evriwan i bin agri blong askem long Lod long saed blong samting ia.
1, Ketlan Stek blong Saeon i mas kam strong moa; 2–5, Bisop i mas serem ol samting we olgeta Sent oli gat raet long hem; 6–9, Jon Jonson i mas kam wan memba blong grup blong yunaet oda.
1 Luk, mi talem long yufala, hemia i waes toktok, we tru long hem bambae yufala i save olsem wanem blong mekem samting long saed blong poen ia, from we long mi, hem i nid blong astek ia we mi mekem blong i kam paoa blong Saeon, i mas kam strong moa.
2 From hemia, wokman blong mi, Niuwel K. Witni i mas lukaotem ples ia we yufala i stap tokbaot, we mi gat tingting blong bildim tabu haos blong mi long hem.
3 Mo bakegen, bae oli mas serem i go long ol pis graon, folem waes tingting, blong gud blong olgeta we oli stap lukaotem wan ples we oli gat raet long hem, folem tingting we bambae yufala i mekem long kaonsel miting blong yufala.
4 From hemia, mekemsua se yufala i lukluk long poen ia, mo long pis graon ia we i nid, blong gud blong aoda blong mi, blong tekem toktok blong mi i go long ol pikinini blong ol man.
5 From luk, i tru mi talem long yufala, hemia nao we long mi, i gat moa nid from, se toktok blong mi i go aot long ol pikinini blong ol man, blong mekem se hat blong ol pikinini blong ol man oli kam sopsop blong gud blong yufala. I olsem. Amen.
6 Mo bakegen, i tru, mi talem long yufala; long mi, hem i waes mo hem i nid blong wokman blong mi, Jon Jonson, we mi akseptem ofring blong hem, mo mi harem ol prea blong hem, mo long hem we mi givim wan promes blong kasem wan laef we i no save finis folem hamas bambae hem i stap obei long ol komanmen blong mi stat long naoia i go—
7 From we hem i wan laen blong aJosef mo hem i gat raet blong gat pat long ol blesing blong promes we God i bin mekem long ol papa blong hem—
8 I tru, mi talem long yufala, se long mi, i nid blong hem i mas kam wan memba blong oda, blong hem i givhan blong tekem toktok blong mi i go kasem ol pikinini blong ol man.
9 From hemia, bambae yufala i mas odenem hem long blesing ia, mo hem i mas traem, wetem fasin blong wok strong wetem strong tingting, blong stretem ol samting blong pem haos ia we yufala i stap tokbaot, blong mekem se hem i save stap insaed long hem. I olsem. Amen.