Seksen 114
Revelesen we Lod i givim tru long Profet Josef Smit, long Fa Wes, Misuri, long 11 Epril 1838.
1–2, Bae Lod i givim ol wok blong jos we olgeta we oli no fetful oli holem i go long ol narafala man.
1 I tru, olsem ia nao Lod i talem: Mi talem se hem i waes se wokman blong mi, Deved W. Paten, i stretem evri wok blong bisnis blong hem kwiktaem olsem i posibol, mo hem i salemaot evri samting we hem i gat blong salem, blong hem i save go mekem wan misin blong mi long nekis Springtaem, wetem sam narafala moa, we olgeta twelef wetem hem, blong oli testifae abaot nem blong mi mo talemaot ol gudfala nius long ful wol.
2 From i tru, olsem ia nao Lod i talem, se folem hamas we oli stap long medel blong yufala we oli tanem baksaed long nem blong mi, ol narawan bae oli atekem bples blong olgeta mo kasem bisoprik blong olgeta. Amen.