Seksen 113
Hemia sam ansa blong sam kwestin long saed blong ol toktok we Aesea i bin raetem, we Profet Josef Smit i bin givim long, o kolosap long Fa Wes, Misuri long Maj 1838.
1–6, Lod i talemaot huia i stamba blong Jese, branj we i kamaot long hem, mo rus blong Jese; 7–10, Haf laen blong Saeon we oli go wanwan, oli gat wan raet long prishud mo Aesea i singaotem olgeta blong kambak long Lod.
1 ?Huia hem i Stamba blong Jese we oli tokbaot long ves namba 1, namba 2, namba 3, namba 4 mo namba 5 blong japta 11 blong buk blong Aesea?
2 I tru, olsem ia nao Lod i talem: Hem i Kraes.
3 ?Wanem nao hem i branj we oli tokbaot long fas ves blong japta 11 long buk blong Aesea, we i mas kamaot long Stamba blong Jese?
4 Luk, olsem ia nao Lod i talem: Hem i wan wokman we i stap long han blong Kraes, we i haf laen blong Jese, mo tu, blong Efrem, o blong haos blong Josef, we plante paoa i stap long hem.
5 ?Huia hem i rus blong Jese, we oli tokbaot long namba 10 ves long japta 11?
6 Luk, olsem ia nao Lod i talem, hem i wan we i kamaot long laen blong Jese, mo tu, blong Josef, we hem i gat raet blong kasem prishud, mo ol ki blong kingdom, olsem wan flag, mo blong karem ol pipol blong mi oli kam tugeta wanples long ol las dei.
7 Ol kwestin we i kam long Ilaeas Higbi: ?Oda we i stap long Aesea, japta 52, ves 1, i minim wanem taem i talem se: Saeon ya i mas kam strong bakegen?—mo ?wanem pipol nao Aesea i stap tokbaot?
8 Hem i stap tokbaot olgeta we God bae i singaotem olgeta long ol las dei, we oli mas holem paoa blong prishud blong tekem Saeon i kambak bakegen, mo fasin blong pemaot Isrel; mo blong mekem olgeta oli kam strong bakegen, hem i blong oli kasem atoriti blong prishud, we hem, Saeon, i gat raet long hem tru long laen blong hem; mo tu, blong gobak long paoa ia we hem i bin lusum.
9 ?Wanem nao yumi mas andastanem taem i talem se Saeon i mas kam fri long jen we i fasem nek blong hem; long namba 2 ves?
10 Yumi mas andastanem se ol haf laen blong Saeon we oli go wanwan, Aesea i stap askem strong long olgeta se long weaples oli foldaon long hem, oli mas kambak long Lod; mo sapos oli mekem, promes blong Lod i we bae hem i toktok long olgeta, o givim revelesen long olgeta. Luk long ves namba 6, namba 7, mo namba 8. Ol jen we oli fasem nek blong hem, oli ol strong nogud tok we God i sakem long Saeon, o ol haf laen blong Isrel we oli go wanwan, long wanem situesen oli stap long hem long medel blong Ol Jentael.