Seksen 74
Revelesen we Lod i bin givim long Profet Josef Smit, long Wen Kaonti, Niu Yok, long yia 1830. Bifo we Jos i bin oganaes, i bin gat kwestin i stap long saed blong stret fasin blong mekem baptaes, we i mekem Profet i askem ansa long saed blong poen ia. Histri blong Josef Smit i talem se revelesen ia, i eksplenem Fas Korin 7:14, wan skripja we oli yusum plante taem blong tokbaot baptaes blong ol smol pikinini.
1–5, Pol i givim advaes long Jos long taem blong hem blong no kipim loa blong Moses; 6–7, Ol smol pikinini oli tabu mo Lod i mekem olgeta oli kam tabu tru long Atonmen.
1 From we hasban ia we i no biliv i kam tabu tru long waef blong hem, mo waef ia we i no biliv i kam tabu tru long hasban blong hem; sapos no, ol pikinini blong yufala bae oli no klin, be naoia oli tabu.
2 Nao, long ol dei blong ol aposol, loa blong sakomsaes i bin stap long medel blong evriwan long Ol Jiu we oli no biliv long gospel blong Jisas Kraes.
3 Mo i bin hapen se i bin gat wan bigfala rao long medel blong ol pipol long saed blong loa blong sakomsaes, from we hasban we i no biliv i wantem se ol pikinini blong hem oli mas sakomsaes mo oli mas kam blong folem loa blong Moses, mo loa ia i bin hapen finis.
4 Mo i bin hapen se ol pikinini, from we oli bin groap folem loa blong Moses, oli bin folem gud ol kastom blong ol papa blong olgeta mo oli no bin biliv long gospel blong Kraes, mo long wei ia, i bin hapen se oli nomo tabu.
5 Taswe, taswe, aposol i bin raet i go long jos, mo i givim olgeta wan komanmen, we i no kam long Lod, be i kam long hemwan, se wan we i biliv bae i no mas mared long wan we i no biliv; be nomo, sapos loa blong Moses i stop long medel blong tufala;
6 Blong mekem se ol pikinini blong tufala oli no kasem sakomsaes; mo blong kastom ia, we i talem se ol smol pikinini oli no tabu, i go stop; from kastom ia i bin stap long medel blong Ol Jiu;
7 Be ol smol pikinini oli tabu, mo oli kam tabu tru long atonmen blong Jisas Kraes; mo hemia nao wanem we ol skripja oli minim.