Tupulaki Lahi Ange ʻia Kalaisi: Ko e Talanoa Fakatātā ʻo e Lainé
ʻI he taimi ʻa e ʻEikí, ʻoku ʻikai ko e feituʻu ʻoku tau kamata aí, ka ko e feituʻu ʻoku tau fakataumuʻa ki aí ʻoku mahuʻinga tahá.
ʻI heʻeku kei siʻí, naʻe lahi ʻeku ngaahi fakaʻānauá. ʻI ha ʻaho ʻe taha ʻi he tuku ʻa e akó naʻá ku fehuʻi ange, “Fineʻeiki, ko e hā e meʻa te u fai heʻeku fuʻu lahí: ko ha tokotaha vaʻinga pasiketipolo fakapalōfesinale pe ko ha tokotaha hiva ʻiloa?” Ko e pangó, naʻe ʻikai ʻasi meia Kalake “taʻetalēniti” ha faʻahinga fakaʻilonga ʻo ha taha sipoti pe mūsika lelei ki he kahaʻú. Pea neongo ne u toutou feinga, ka naʻe toutou fakasītuʻaʻi ʻeku kole hū ki he polokalama ako tuʻu-ki-muʻa ʻi heʻeku ʻapiakó. Naʻe faifai pea fokotuʻu mai ʻe heʻeku kau faiakó ke u tokanga pē ā ki he ako angamaheni ʻi loki akó. Hili ha ngaahi taimi, ne u fakatupulaki ha tōʻonga moʻui fakaako kehe. Ka naʻá ku toki ongoʻi pē ʻa e kamata ke hā mai ʻa hoku ivi malava fakaʻatamai mo fakalaumālié ʻi heʻeku ngāue fakafaifekau ki Siapaní. Naʻá ku hoko atu ke ngāue mālohi. Ka ko e fuofua taimi ia ʻi heʻeku moʻuí ne u fakakau maʻu ai pē ʻa e ʻEikí ʻi heʻeku fakalakalaká, pea naʻe tupu ai e ngaahi lelei kotoa pē.
ʻE kāinga, ʻi he Siasi ko ʻení, ʻoku tau tui ki he ivi malava fakalangi ʻo e fānau kotoa ʻa e ʻOtuá pea mo ʻetau malava ke hoko ko ha meʻa lahi ange ʻia Kalaisí. ʻI he taimi ʻa e ʻEikí, ʻoku ʻikai ko e feituʻu ʻoku tau kamata aí ʻoku mahuʻinga tahá, ka ko e feituʻu ʻoku tau fakataumuʻa ki aí.1
Ke fakatātaaʻi ʻa e tefitoʻi moʻoni ko ʻení, te u fakaʻaongaʻi ha founga fika faingofua. ʻOua te mou manavasiʻi ʻi he fanongo ki he foʻi lea fiká ʻi he konifelenisi lahí. ʻOku fakapapauʻi mai ʻe heʻemau kau faiako fika ʻi BYU-Idaho, ʻe mahino ʻa e tefitoʻi fakakaukau ko ʻení ki ha taha pē ʻoku ʻikai taukei ʻi he fiká. ʻOku kamata ʻaki ia e founga hono fikaʻi ʻo ha foʻi laine. Ko e fetaulakiʻangá, ki heʻetau taumuʻá, ʻa e kamataʻanga ʻa ʻetau lainé. ʻOku lava pē ke kamata ʻa e fetaulakiʻangá ʻi ha poini māʻolunga pe poini maʻulalo. ʻE lava leva ke fakahihifi ki ʻolunga pe ki lalo ʻa e huʻunga ʻo e foʻi lainé.
ʻOku kehekehe kotoa pē hotau ngaahi fetaulakiʻanga ʻi he moʻuí—ʻoku tau kamata ʻi ha ngaahi feituʻu kehekehe mo ha ngaahi fakakoloa kehekehe ʻo e moʻuí. ʻOku fanauʻi mai ha niʻihi ʻi ha tuʻunga lelei, ʻoku mohu faingamālie. Ko ha niʻihi ʻoku nau kamata ʻi ha ngaahi tūkunga ʻoku faingataʻa mo ngali taʻetotonu.2 ʻOku tau tupulaki leva ʻi ha laine ʻo e fakalakalaka fakatāutahá. ʻE siʻisiʻi ʻaupito hano fakatefito hotau kahaʻú ʻi he feituʻu ʻoku tau kamata aí ka ʻe lahilahi ange hano fakatefitó ʻi he loloto ʻo ʻetau fakalakalaká. ʻOku ʻafioʻi ʻe Sīsū Kalaisi ʻa e ivi malava fakalangí ʻo tatau ai pē pe ko e fē feituʻu te tau kamata aí. Naʻá Ne ʻafioʻi ia ʻi he paeá, ko e angahalá mo e mahamahakí. Naʻá Ne ʻafioʻi ia ʻi he tangata toutaí, ko e tangata tānaki tukuhaú, pea naʻa mo e taki lotu Siú. Neongo pe ko e fē ʻoku tau kamata mei aí, ka ʻoku ʻafioʻi ʻe Kalaisi ʻa e meʻa ʻoku tau fakahoko ʻaki ʻa ia ʻokú Ne foaki maí.3 Neongo ʻoku tokanga ʻa māmani ki he tuʻunga ʻo hotau kamataʻangá, ka ʻoku tokanga taha ʻa e ʻOtuá ki heʻetau fakalakalaká. ʻI he founga ʻa e ʻEikí, te Ne fai ʻa e meʻa kotoa pē te Ne lavá ke tokoni ke liliu e huʻunga ʻo ʻetau fakalakalaká ke fakataumuʻa ki hēvani.
ʻOku totonu ke foaki ʻe he tefitoʻi moʻoni ko ʻení ha fakafiemālie ki he niʻihi ʻoku faingataʻaʻiá pea mo ha fakakaukau lelei kiate kinautolu ʻoku maʻu ʻa e lelei kotoa peé. Tuku ke u kamata ʻaki haʻaku lea ki he niʻihi fakafoʻituitui ʻoku ʻi ai ha ngaahi tūkunga kamataʻanga faingataʻá, kau ai ʻa e masivesivá, fakangatangata ʻo e faingamālie akó, mo e ngaahi tūkunga fakafāmili faingataʻá. ʻOku fehangahangai ha niʻihi kehe mo ha ngaahi faingataʻa fakatuʻasino, fakangatangata ʻi he tuʻunga moʻui lelei fakaeʻatamaí pe ko ha uesia fakaesino mālohi.4 Ki ha taha pē ʻoku ʻi ai hano kamataʻanga faingataʻa, kātaki muʻa ʻo ʻiloʻi ʻoku ʻafioʻi ʻe he Fakamoʻuí ʻetau ngaahi feingá. Naʻá Ne “toʻo kiate ia ʻa [ʻetau] ngaahi vaivaí, koeʻuhi ke fonu hono lotó ʻi he ʻaloʻofa … koeʻuhí ke ne ʻafioʻi … ʻa e founga ke tokoniʻi ai [kitautolu] ʻo fakatatau ki [heʻetau] ngaahi vaivaí.”5
Tuku ke u vahevahe ha ʻēlia ʻe ua ʻo e fakalotolahí maʻanautolu ʻoku kamata mei ha ngaahi tūkunga faingataʻá. ʻUluakí, tokanga taha ki he feituʻu ʻokú ke fakataumuʻa ki aí kae ʻikai ko e feituʻu naʻá ke kamata mei aí. ʻE hala ia ke tukunoaʻi ho ngaahi tūkungá—ʻoku nau hoko moʻoni pea ʻe fie maʻu ia ke tokangaʻi. Ka ʻi he fuʻu tōtuʻa ko ia ʻa e tokanga ki ha kamataʻanga ʻoku faingataʻá, ʻe lava ke tupu ai haʻane fakamatalaʻi ho tūkungá pea aʻu ʻo ne fakangatangata hoʻo malava ke fakahoko ha filí.6
ʻI he ngaahi taʻu kuohilí, ne u ngāue ai mo ha kulupu toʻu tupu ʻi he vaheloto ʻo Positoni, Masasūsetí, ʻa ia ko e tokolahi taha ʻo kinautolú ne nau toki kau mai pē ki he ongoongoleleí pea ne foʻou kiate kinautolu e ngaahi fiemaʻu ʻa e Siasí. Naʻe ʻahiʻahiʻi au ʻo fakafihiʻi ʻeku kaungāongoʻi mo e hohaʻa ki honau tuʻungá pea mo ha loto-holi ke fakangaloku e ngaahi tuʻunga ʻulungaanga ʻo e ʻOtuá.7 Ne faifai peá u ʻiloʻi e founga mālohi taha ke fakahaaʻi ai ʻeku ʻofá ko e ʻoua naʻa teitei fakangaloku ʻeku ngaahi ʻamanakí. ʻI he kotoa ʻo e ngaahi meʻa ne u ʻilo ke fakahokó, ne mau ngāue fakataha ke tokanga taha ki honau ivi malavá, pea naʻe kamata ke fakautuutu ʻenau takitaha tupulakí. Naʻe māmālie ʻenau tupulaki ʻi he ongoongoleleí ka naʻe pau ia. ʻI he ʻaho ní, kuo nau ngāue fakafaifekau, ʻosi mei he ʻunivēsití, mali ʻi he temipalé, pea ʻoku nau tataki ha moʻui ʻoku taau ke fakatokangaʻi fakataautaha mo fakapalōfesinale.
Ko hono uá, fakakau e ʻEikí ʻi he ngāue ki hono fakalahi hoʻo fakalakalaká. Lolotonga ʻeku hoko ko e palesiteni ʻo e BYU–Pathway Worldwide, ʻoku ou manatuʻi ʻeku tangutu ʻi ha fakataha lotu tokolahi ʻi Lima, Pelū, ʻa ia ne lea ai ʻa ʻEletā Kālosi A. Kotoi. ʻI heʻene vakai atu ki he haʻofangá, ne hangē naʻá ne ongoʻi lōmekina ʻi he mamata ki he tokolahi ʻo e tamaiki ako ʻunivēsiti moʻui faivelenga ʻo e toʻu tangata ʻuluakí. Mahalo ne hoko e fakakaukauloto ʻa ʻEletā Kotoi ki heʻene fonongaʻia mai e faʻahinga tūkunga faingataʻa peheé ke ne pehē ai: ʻe “lahi ange hono tokoniʻi koe ʻe he ʻEikí ʻi hoʻo tokoniʻi koé. [Ko ia ai] fakakau ʻa e ʻEikí ʻi he ngāue ko ʻení.”8 Naʻe akoʻi ʻe he palōfita ko Nīfaí “ʻoku ʻi he ʻaloʻofá ʻa homau fakamoʻuí, ʻo ka hili ʻemau fai ʻa e meʻa kotoa pē ʻe ala faí.”9 Kuo pau ke tau fai hotau lelei tahá,10 ʻa ia ʻoku kau ai ʻa e fakatomalá, ka ʻoku fakafou pē ia ʻi he ʻaloʻofa ʻa e ʻEikí ʻa ia te tau ʻiloʻi ai hotau ivi malava fakalangí.11
Ko hono fakaʻosí, tuku ke u vahevahe ha akonaki ʻe ua maʻanautolu ne kamata mei ha ngaahi tūkunga faingamālié. ʻUluakí, ʻe lava nai ke tau fakahaaʻi ha loto-fakatōkilalo ki he ngaahi tūkunga ne ʻikai haʻatau kaunga ki hono fakatupú? Naʻe pehē ʻe he Palesiteni mālōlō ʻo BYU ko Leki E. Lī ki heʻene fānau akó, “Kuo tau kai monū kotoa mei ha ngaahi ngāue ne ʻikai ke tau kamataʻi, mo fakamāfana ʻi he ngaahi maama ne ʻikai ke tau ngaohi.”12 Naʻá ne kole leva ki heʻene fānau akó ke fakafoki mo fakalahi e ngaahi monūʻia fakaako kuo fokotuʻu ʻe he kau paionia kimuʻá. Ko e ʻikai malava ko ia ke toe foaki e ngaahi faingamālie tatau naʻe tūtuuʻi ʻe he niʻihi kehé ʻoku lava ke tatau ia mo hono fakafoki ha talēniti taʻe ʻi ai ha tupulakí.
Uá, ʻe lava ke fakataueleʻi kitautolu ʻe he nofotaha ʻi ha kamataʻanga māʻolungá ke tau ongoʻi ʻoku tau fakalakalaka, ka ko hono moʻoní, ʻoku ʻikai ha tupulaki ʻi heʻetau tuʻunga fakalaumālié. Naʻe akoʻi ʻe he palōfesa Hāvati ko Keleitoni M. Kulisitenisení ʻo pehē ko e kakai lavameʻa lahi tahá ko e kakai loto-fakatōkilalo lahi tahá, he ʻoku nau loto-falala feʻunga ke fakatonutonuʻi kinautolu pea ako mei ha faʻahinga taha pē.13 Naʻe faleʻi mai ʻe ʻEletā D. Toti Kulisitofasoni ke tau “loto fiemālie ke tali ʻa e fakatonutonú pea feinga foki ke maʻu ia.”14 Naʻa mo e taimi ʻoku hā ngali lavameʻa ai e moʻuí, kuo pau ke tau fekumi ki ha ngaahi faingamālie ke tupulaki ai ʻo fakafou ʻi he lotu tāumaʻú.
Neongo pe ʻoku tau kamata mei ha ngaahi tūkunga faingamālie pe faingataʻa, ka te tau toki ʻilo pē hotau ivi malavá he taimi te tau fokotuʻu ai e ʻOtuá ke hoko ko hotau hoa-ngāué. Ne u talanoa kimuí ni mo ha faiako ʻiloa fakafonua ʻa ia naʻá ne fie ʻilo ki he lavameʻa ʻa e ako he BYU–Pathway. Naʻá ne ʻatamai poto pea naʻá ne fie ʻilo ʻi he loto-fakamātoato, ka naʻe mahino ʻene fie maʻu ha tali fakapotó. Ne u vahevahe mo ia ʻemau polokalama ke pukepuke mai ʻaki e kau akó mo e ngaahi ngāue faifakahinohinó. Ka naʻá ku fakaʻosi ʻaki ʻeku pehē ange, “Ko ha ngaahi ngāue lelei kotoa ʻeni, ka ko e ʻuhinga totonu ʻoku fakalakalaka ai ʻemau fānau akó he ʻoku mau akoʻi kiate kinautolu honau ivi malava fakalangí. Fakalaulauloto angé kapau naʻe talaatu ʻi hoʻo moʻuí kotoa he ʻikai ke ke lavameʻa. Fakakaukau leva ki he lelei ʻo hono akoʻi atú, ko ha foha pe ʻofefine koe ʻo e ʻOtuá ʻokú ke maʻu ha ivi malava fakalangi?” Naʻá ne kiʻi longo peá ne pehē mai, “ʻOku mālohi moʻoni ia.”
ʻE kāinga, ko e taha e ngaahi mana ʻo e meʻá ni, ʻa e Siasi ʻo e ʻEikí, ko ʻetau malava kotoa pē ʻo hoko ko ha meʻa lahi ange tuʻunga ʻia Kalaisí. ʻOku ʻikai te u ʻilo ha toe tui fakalotu ange ʻokú ne ʻoange ki hono kāingalotú ha faingamālie lahi ange ke tokoni, foaki, fakatomala pea hoko ko ha kakai lelei ange. Neongo pe te tau kamata mei ha ngaahi tūkunga faingamālie pe faingataʻa, tau puke maʻu muʻa ʻetau ngaahi taumuʻá mo e ngaahi fakalakalaká ke fakataumuʻa ki he ʻOtuá. ʻI heʻetau fakahoko iá, ʻe hiki hake kitautolu ʻe Kalaisi ki ha tuʻunga māʻolunga ange. ʻI he huafa ʻo Sīsū Kalaisí, ʻēmeni.