ໝັ້ນຄົງໃນພະຍຸ
ເມື່ອພະຍຸໃນຊີວິດມາເຖິງ, ທ່ານສາມາດໝັ້ນຄົງໄດ້ ເພາະວ່າທ່ານຢືນຢູ່ເທິງດານຫີນແຫ່ງສັດທາຂອງທ່ານໃນພຣະເຢຊູຄຣິດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາໄດ້ຮັບພອນຫລາຍໃນມື້ນີ້ ທີ່ໄດ້ຍິນຜູ້ຮັບໃຊ້ທີ່ໄດ້ຮັບການດົນໃຈຂອງພຣະເຈົ້າ ໃຫ້ຄຳແນະນຳ ແລະ ການຊຸກຍູ້. ເຮົາແຕ່ລະຄົນ, ບໍ່ວ່າເຮົາຈະຢູ່ໃສ, ຕ່າງກໍຮູ້ວ່າ ເຮົາມີຊີວິດຢູ່ໃນຊ່ວງເວລາທີ່ອັນຕະລາຍຫລາຍຂຶ້ນເລື້ອຍໆ. ຂ້າພະເຈົ້າອະທິຖານວ່າ ຂ້າພະເຈົ້າຈະຊ່ວຍທ່ານໃຫ້ໝັ້ນຄົງໃນພະຍຸທີ່ເຮົາປະເຊີນຢູ່, ດ້ວຍໃຈທີ່ສະຫງົບສຸກ.1
ຈຸດເລີ່ມຕົ້ນຄືການຈື່ຈຳວ່າ ເຮົາແຕ່ລະຄົນເປັນລູກທີ່ຮັກຂອງພຣະເຈົ້າ ແລະ ວ່າພຣະອົງມີຜູ້ຮັບໃຊ້ທີ່ໄດ້ຮັບການດົນໃຈ. ຜູ້ຮັບໃຊ້ຂອງພຣະເຈົ້າເຫລົ່ານັ້ນໄດ້ເຫັນລ່ວງໜ້າເຖິງເວລາທີ່ເຮົາມີຊີວິດຢູ່. ອັກຄະສາວົກໂປໂລໄດ້ຂຽນຫາຕີໂມທຽວວ່າ, “ຈົ່ງຮູ້ຈັກຂໍ້ຄວາມນີ້ວ່າ, ໃນຄາວທີ່ສຸດນັ້ນຈະເກີດຄວາມລຳບາກຢ່າງຮ້າຍແຮງ.”2
ຜູ້ໃດມີຕາເພື່ອເຫັນສັນຍານຂອງເວລາ ແລະ ມີຫູເພື່ອໄດ້ຍິນຖ້ອຍຄຳຂອງສາດສະດາ ກໍຮູ້ວ່າເປັນຄວາມຈິງ. ໄພອັນຕະລາຍທີ່ຍິ່ງໃຫຍ່ທີ່ສຸດມາສູ່ເຮົາຈາກພະລັງຂອງຄວາມຊົ່ວຮ້າຍ. ພະລັງເຫລົ່ານັ້ນກຳລັງເພີ່ມຂຶ້ນ. ແລະ ສະນັ້ນມັນຈະຍາກຫລາຍຂຶ້ນ, ບໍ່ແມ່ນງ່າຍກວ່າ, ທີ່ຈະໃຫ້ກຽດແກ່ພັນທະສັນຍາ ທີ່ເຮົາຕ້ອງເຮັດ ແລະ ຮັກສາ ເພື່ອດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ.
ສຳລັບພວກເຮົາທີ່ຫ່ວງໃຍກັບຕົວເອງ ແລະ ກັບຄົນທີ່ເຮົາຮັກ, ມີຄວາມຫວັງຢູ່ໃນຄຳສັນຍາ ທີ່ພຣະເຈົ້າໄດ້ຈັດຕຽມສະຖານທີ່ປອດໄພໄວ້ໃຫ້ພັກ ໃນຍາມພະຍຸຂ້າງໜ້າ.
ນີ້ຄືຂໍ້ຄວາມບັນຍາຍສະຖານທີ່ນັ້ນ. ມັນໄດ້ຖືກບັນຍາຍຊ້ຳຫລາຍເທື່ອໂດຍບັນດາສາດສະດາທີ່ມີຊີວິດຢູ່. ຍົກຕົວຢ່າງ, ດັ່ງທີ່ບັນທຶກຢູ່ໃນພຣະຄຳພີມໍມອນ, ພໍ່ຄົນໜຶ່ງທີ່ໄດ້ຮັບການດົນໃຈ ແລະ ເຕັມດ້ວຍຄວາມຮັກ ໄດ້ບອກພວກລູກຊາຍຂອງເພິ່ນເຖິງວິທີເຮັດໃຫ້ຕົນເຂັ້ມແຂງ ເພື່ອໝັ້ນຄົງຢູ່ໃນພະຍຸທີ່ຢູ່ຂ້າງໜ້າພວກເຂົາ: “ແລະ ບັດນີ້, ຈົ່ງຈື່ໄວ້, ລູກຂອງພໍ່, ຈົ່ງຈື່ໄວ້ວ່າ ລູກຈະຕ້ອງສ້າງຮາກຖານຂອງລູກຂຶ້ນເທິງດານຫີນຂອງພຣະຜູ້ໄຖ່ຂອງພວກເຮົາ, ຄືພຣະຄຣິດ, ພຣະບຸດຂອງພຣະເຈົ້າ; ເພື່ອວ່າເມື່ອມານສົ່ງລົມພະຍຸຮ້າຍຂອງມັນມາ, ແທ້ຈິງແລ້ວ, ຟ້າແມບເຫລື້ອມກັບລົມບ້າໝູຂອງມັນມາ, ແທ້ຈິງແລ້ວ, ເມື່ອໝາກເຫັບທັງໝົດ ແລະ ລົມຝົນອັນແຮງກ້າຂອງມັນລົງມາຕີລູກ, ມັນຈະບໍ່ມີອຳນາດອັນໃດເໜືອລູກເລີຍທີ່ຈະແກ່ລູກລົງໄປຫາເຫວເລິກແຫ່ງຄວາມທຸກທໍລະມານ ແລະ ຄວາມຈິບຫາຍອັນບໍ່ສິ້ນສຸດ, ເພາະດານຫີນບ່ອນທີ່ລູກຖືກສ້າງຂຶ້ນເທິງມັນ ຊຶ່ງເປັນຮາກຖານທີ່ແໜ້ນໜາ, … ຊຶ່ງຫາກມະນຸດສ້າງຂຶ້ນເທິງມັນ ພວກເຂົາຈະຕົກໄປບໍ່ໄດ້.”3
ຄວາມທຸກທໍລະມານ ແລະ ຄວາມຈິບຫາຍອັນບໍ່ສິ້ນສຸດທີ່ເພິ່ນກ່າວເຖິງ ແມ່ນຜົນຮ້າຍຂອງບາບ ຖ້າຫາກເຮົາບໍ່ກັບໃຈຈາກມັນຢ່າງເຕັມທີ່. ພະຍຸທີ່ຮ້າຍແຮງຫລາຍຂຶ້ນ ແມ່ນການລໍ້ລວງ ແລະ ການໂຈມຕີເພີ່ມຂຶ້ນຂອງຊາຕານ. ບໍ່ເຄີຍມີຄວາມສຳຄັນຫລາຍກວ່າໃນປະຈຸບັນນີ້ ທີ່ຈະເຂົ້າໃຈວິທີການສ້າງເທິງພື້ນຖານທີ່ແນ່ນອນນັ້ນ. ສຳລັບຂ້າພະເຈົ້າແລ້ວ, ບໍ່ມີບ່ອນໃດທີ່ດີກວ່າ ຄຳເທດສະໜາສຸດທ້າຍຂອງກະສັດເບັນຢາມິນ, ທີ່ບັນທຶກຢູ່ໃນພຣະຄຳພີມໍມອນເຊັ່ນກັນ.
ຄຳທຳນາຍຂອງກະສັດເບັນຢາມິນໃຊ້ໄດ້ກັບເຮົາ ໃນວັນເວລາຂອງເຮົາ. ເພິ່ນຮູ້ຈາກປະສົບການຂອງເພິ່ນເອງເຖິງຄວາມຮ້າຍກາດຂອງສົງຄາມ. ເພິ່ນໄດ້ປ້ອງກັນປະຊາຊົນຂອງເພິ່ນໃນການສູ້ຮົບ, ໂດຍເພິ່ງອາໄສອຳນາດຂອງພຣະເຈົ້າ. ເພິ່ນໄດ້ເຫັນຢ່າງແຈ່ມແຈ້ງເຖິງອຳນາດທີ່ຮ້າຍແຮງຂອງລູຊິເຟີ ທີ່ຈະລໍ້ລວງ, ພະຍາຍາມເອົາຊະນະ, ແລະ ເພື່ອເຮັດໃຫ້ລູກໆຂອງພຣະເຈົ້າທໍ້ຖອຍໃຈ.
ເພິ່ນໄດ້ເຊື້ອເຊີນຜູ້ຄົນຂອງເພິ່ນ ແລະ ເຮົາ ໃຫ້ສ້າງຢູ່ເທິງດານຫີນແຫ່ງຄວາມປອດໄພບ່ອນດຽວນັ້ນ, ຄືພຣະຜູ້ຊ່ວຍໃຫ້ລອດ. ເພິ່ນບອກຢ່າງແຈ່ມແຈ້ງວ່າ ເຮົາມີອິດສະລະທີ່ຈະເລືອກລະຫວ່າງຖືກຕ້ອງ ແລະ ຜິດ ແລະ ວ່າເຮົາບໍ່ສາມາດຫລີກລ້ຽງຈາກຜົນສະທ້ອນຂອງການເລືອກຂອງເຮົາ. ເພິ່ນເວົ້າກົງໄປກົງມາ ແລະ ຮຸນແຮງ ເພາະເພິ່ນຮູ້ວ່າ ຄວາມເສົ້າສະຫລົດໃຈຈະມາສູ່ຜູ້ທີ່ບໍ່ຟັງ ແລະ ບໍ່ເອົາໃຈໃສ່ຕໍ່ຄຳເຕືອນຂອງເພິ່ນ.
ຕໍ່ໄປນີ້ແມ່ນວິທີທີ່ເພິ່ນບັນຍາຍເຖິງຜົນສະທ້ອນທີ່ຕາມມາຫລັງຈາກການເລືອກຂອງເຮົາ ບໍ່ວ່າຈະເຮັດຕາມການກະຕຸ້ນຂອງພຣະວິນຍານ ຫລື ເຮັດຕາມຂ່າວສານຊົ່ວຮ້າຍທີ່ມາຈາກຊາຕານ, ຊຶ່ງມີເຈດຕະນາທີ່ຈະລໍ້ລວງ ແລະ ທຳລາຍເຮົາ:
“ເພາະຈົ່ງເບິ່ງ, ມີວິບັດຢ່າງໜຶ່ງຊຶ່ງກຳນົດໃຫ້ເກີດກັບຄົນທີ່ເລືອກເຊື່ອຟັງວິນຍານນັ້ນ; ເພາະຖ້າຫາກເຂົາເລືອກເຊື່ອຟັງມັນ, ແລະ ຄົງຢູ່ໃນຄວາມຊົ່ວຮ້າຍ, ແລະ ຕາຍໃນບາບຂອງເຂົາແລ້ວ ຜູ້ນັ້ນຍ່ອມດື່ມຄວາມອັບປະໂຫຍດເຂົ້າໄປໃນຈິດວິນຍານຂອງເຂົາເອງ; ເພາະວ່າເຂົາຕ້ອງໄດ້ຮັບໂທດ ອັນເປັນນິດທີ່ເປັນຄ່າຈ້າງຂອງເຂົາໂດຍການລ່ວງລະເມີດກົດຂອງພຣະເຈົ້າອັນເປັນການກົງກັນຂ້າມກັບຄວາມຮູ້ຂອງເຂົາເອງ. …
“ສະນັ້ນ ຖ້າຫາກຄົນນັ້ນບໍ່ກັບໃຈ ແລະ ຄົງຢູ່ ແລະ ຕາຍໂດຍເປັນສັດຕູກັບພຣະເຈົ້າ, ແລ້ວຄວາມຍຸດຕິທຳແຫ່ງສະຫວັນຈະປຸກຈິດວິນຍານອັນເປັນອະມະຕະຂອງເຂົາໃຫ້ຕື່ນຂຶ້ນມາຫາຄວາມຮູ້ສຶກໃນຄວາມຜິດທີ່ຮຸນແຮງຂອງຕົນເອງ, ຊຶ່ງເຮັດໃຫ້ເຂົາຖອຍອອກໄປຈາກທີ່ປະທັບຂອງພຣະຜູ້ເປັນເຈົ້າ, ແລະ ເຮັດໃຫ້ອົກຂອງເຂົາເຕັມໄປດ້ວຍຄວາມຮູ້ສຶກຜິດ, ແລະ ຄວາມເຈັບປວດ, ແລະ ຄວາມທຸກທໍລະມານ, ຊຶ່ງປຽບເໝືອນດັ່ງໄຟທີ່ບໍ່ຮູ້ມອດ, ຊຶ່ງແປວໄຟນັ້ນລອຍຂຶ້ນຢູ່ຕະຫລອດການ ແລະ ຕະຫລອດໄປ.”
ກະສັດເບັນຢາມິນໄດ້ກ່າວຕື່ມວ່າ, “ໂອ້, ພວກທ່ານຜູ້ມີອາຍຸສູງທັງຫລາຍ, ແລະ ພວກເຈົ້າຜູ້ໜຸ່ມແໜ້ນ, ແລະ ພວກເຈົ້າຜູ້ເປັນເດັກນ້ອຍໆ ຜູ້ທີ່ສາມາດເຂົ້າໃຈຂໍ້ຄວາມຂອງຂ້າພະເຈົ້າ, ເພາະຂ້າພະເຈົ້າໄດ້ເວົ້າຢ່າງແຈ່ມແຈ້ງເພື່ອພວກທ່ານຈະໄດ້ເຂົ້າໃຈ, ຂ້າພະເຈົ້າໄດ້ອະທິຖານແທນພວກທ່ານ ເພື່ອພວກທ່ານຈະໄດ້ຕື່ນຂຶ້ນມາຫາຄວາມຊົງຈຳເຖິງສະພາບອັນເປັນຕາຢ້ານຂອງຄົນທີ່ຕົກຢູ່ໃນການລ່ວງລະເມີດ.”4
ສຳລັບຂ້າພະເຈົ້າ, ພະລັງຂອງການເຕືອນໃຫ້ກັບໃຈນັ້ນ ເຮັດໃຫ້ຂ້າພະເຈົ້າວາດພາບຢູ່ໃນໃຈ ເຖິງວັນເວລາທີ່ແນ່ນອນ ເມື່ອທ່ານ ແລະ ຂ້າພະເຈົ້າຈະຢືນຢູ່ຕໍ່ພຣະພັກຂອງພຣະຜູ້ຊ່ວຍໃຫ້ລອດ ຫລັງຈາກຊີວິດນີ້. ເຮົາປາດຖະໜາສຸດໃຈ ວ່າບໍ່ຢາກຫົດຢູ່ ແຕ່ຢາກຫລຽວຂຶ້ນເບິ່ງພຣະອົງ, ເຫັນພຣະອົງຍິ້ມ, ແລະ ໄດ້ຍິນພຣະອົງກ່າວວ່າ, “ດີແລ້ວ, ຄົນຮັບໃຊ້ທີ່ດີ: … [ເຂົ້າມາໄດ້].”5
ກະສັດເບັນຢາມິນໄດ້ກ່າວຢ່າງແຈ່ມແຈ້ງເຖິງວິທີທີ່ເຮົາສາມາດໄດ້ຮັບຄວາມຫວັງ ທີ່ຈະໄດ້ຍິນພຣະຄຳເຫລົ່ານັ້ນ ຖ້າຫາກເຮົາພົບວິທີໃນຊີວິດນີ້ ເພື່ອປ່ຽນແປງທຳມະຊາດຂອງເຮົາຜ່ານທາງການຊົດໃຊ້ຂອງພຣະເຢຊູຄຣິດ. ນັ້ນເປັນວິທີດຽວທີ່ເຮົາສາມາດສ້າງຢູ່ເທິງຮາກຖານທີ່ແນ່ນອນ ແລະ ຕັ້ງຢູ່ຢ່າງໝັ້ນຄົງລະຫວ່າງພະຍຸຂອງການລໍ້ລວງ ແລະ ການທົດລອງທີ່ຢູ່ຂ້າງໜ້າ. ກະສັດເບັນຢາມິນບັນຍາຍເຖິງການປ່ຽນແປງໃນທຳມະຊາດຂອງເຮົາ ດ້ວຍຄຳປຽບທຽບທີ່ສວຍງາມ ທີ່ສຳພັດໃຈຂອງຂ້າພະເຈົ້າສະເໝີມາ. ມັນຖືກໃຊ້ໂດຍສາດສະດາເປັນເວລານັບພັນປີ ແລະ ໂດຍພຣະຜູ້ເປັນເຈົ້າເອງ. ນີ້ແມ່ນເວລາທີ່ເຮົາຄວນກາຍເປັນເດັກນ້ອຍ—ເດັກນ້ອຍໆ.
ສຳລັບບາງຄົນ, ອາດຮັບໄດ້ຍາກ. ພວກເຮົາສ່ວນຫລາຍຢາກເຂັ້ມແຂງ. ເຮົາອາດເຫັນວ່າ ການເປັນຄືກັນກັບເດັກນ້ອຍເປັນສິ່ງອ່ອນແອ. ພໍ່ແມ່ສ່ວນຫລາຍຢາກເຫັນມື້ທີ່ລູກເຮັດປານເດັກນ້ອຍໜ້ອຍລົງ. ແຕ່ກະສັດເບັນຢາມິນ, ຜູ້ເຂົ້າໃຈເທົ່າໆກັບມະນຸດຄົນອື່ນໆ ເຖິງຄວາມໝາຍຂອງການເປັນຄົນເຂັ້ມແຂງ ແລະ ກ້າຫານ, ໄດ້ກ່າວຢ່າງແຈ່ມແຈ້ງວ່າ ການເປັນຄືກັນກັບເດັກນ້ອຍ ບໍ່ແມ່ນການເຮັດປານເດັກນ້ອຍ. ຕ້ອງເປັນເໝືອນພຣະຜູ້ຊ່ວຍໃຫ້ລອດ, ຜູ້ໄດ້ອະທິຖານຫາພຣະບິດາຂອງພຣະອົງຂໍຄວາມເຂັ້ມແຂງ ເພື່ອຈະສາມາດເຮັດຕາມພຣະປະສົງຂອງພຣະບິດາຂອງພຣະອົງ ແລະ ຊົດໃຊ້ບາບແທນລູກທຸກຄົນຂອງພຣະບິດາຂອງພຣະອົງ ແລະ ແລ້ວກໍໄດ້ກະທຳ. ທຳມະຊາດຂອງເຮົາຈະຕ້ອງປ່ຽນແປງກ່ອນຈະກາຍເປັນຄືກັນກັບເດັກນ້ອຍ ເພື່ອໃຫ້ມີພະລັງທີ່ເຮົາຕ້ອງການ ເພື່ອໝັ້ນຄົງ ແລະ ສະຫງົບສຸກໃນເວລາທີ່ອັນຕະລາຍ.
ຕໍ່ໄປນີ້ແມ່ນຄຳບັນຍາຍທີ່ຊັກຊວນຂອງກະສັດເບັນຢາມິນ ເຖິງວິທີທີ່ການປ່ຽນແປງນັ້ນເກີດຂຶ້ນ: “ເພາະມະນຸດທີ່ມີຈິດໃຈທຳມະດາເປັນສັດຕູກັບພຣະເຈົ້າ, ແລະ ເປັນມາແລ້ວຕັ້ງແຕ່ການຕົກຂອງອາດາມ, ແລະ ຈະເປັນໄປຕະຫລອດການ ແລະ ຕະຫລອດໄປ, ເວັ້ນເສຍແຕ່ພວກເຂົາຈະຍອມຕໍ່ການຊັກຈູງຂອງພຣະວິນຍານສັກສິດ, ແລະ ປະຖິ້ມມະນຸດທີ່ມີຈິດໃຈທຳມະດາ ແລະ ກາຍມາເປັນໄພ່ພົນຂອງພຣະເຈົ້າໂດຍການຊົດໃຊ້ຂອງອົງພຣະຄຣິດ, ແລະ ກາຍເປັນຄືກັນກັບເດັກນ້ອຍ, ບອກລອນສອນງ່າຍ, ອ່ອນໂຍນ, ຖ່ອມຕົວ, ອົດທົນ, ເຕັມໄປດ້ວຍຄວາມຮັກ, ເຕັມໃຈໃນທຸກສິ່ງທີ່ພຣະຜູ້ເປັນເຈົ້າເຫັນສົມຄວນທີ່ຈະໃຫ້ເກີດກັບພວກເຂົາ, ເໝືອນດັ່ງເດັກນ້ອຍຍິນຍອມຕໍ່ບິດາຂອງຕົນ.”6
ເຮົາໄດ້ຮັບການປ່ຽນແປງນັ້ນ ເມື່ອເຮົາເຮັດ ແລະ ຕໍ່ພັນທະສັນຍາຂອງເຮົາກັບພຣະເຈົ້າ. ສິ່ງນັ້ນນຳອຳນາດຂອງການຊົດໃຊ້ຂອງພຣະຄຣິດມາ ເຮັດໃຫ້ເກີດການປ່ຽນແປງໃນໃຈຂອງເຮົາ. ເຮົາສາມາດຮູ້ສຶກມັນ ທຸກເທື່ອທີ່ເຮົາຮັບສ່ວນສິນລະລຶກ, ປະຕິບັດພິທີການພຣະວິຫານແທນບັນພະບຸລຸດທີ່ໄດ້ຈາກໄປ, ຢືນຢັນເປັນພະຍານເຖິງພຣະຜູ້ຊ່ວຍໃຫ້ລອດ, ຫລື ດູແລບາງຄົນທີ່ຂັດສົນ ໃນຖານະສານຸສິດຂອງພຣະຄຣິດ.
ໃນປະສົບການເຫລົ່ານັ້ນ, ເມື່ອເວລາຜ່ານໄປ ເຮົາຈະກາຍເປັນຄືກັນກັບເດັກນ້ອຍໃນຄວາມສາມາດຂອງເຮົາ ທີ່ຈະຮັກ ແລະ ເຊື່ອຟັງ. ເຮົາມາຢືນຢູ່ເທິງຮາກຖານທີ່ແນ່ນອນ. ສັດທາຂອງເຮົາໃນພຣະເຢຊູຄຣິດນຳເຮົາມາຫາການກັບໃຈ ແລະ ການຮັກສາພຣະບັນຍັດຂອງພຣະອົງ. ເຮົາເຊື່ອຟັງ, ແລະ ເຮົາໄດ້ຮັບພະລັງເພື່ອຕ້ານທານກັບການລໍ້ລວງ, ແລະ ເຮົາໄດ້ຮັບການເປັນເພື່ອນຂອງພຣະວິນຍານບໍລິສຸດທີ່ສັນຍາໄວ້.
ທຳມະຊາດຂອງເຮົາປ່ຽນໄປເປັນເດັກນ້ອຍໆ, ເຊື່ອຟັງພຣະເຈົ້າ ແລະ ມີຄວາມຮັກຫລາຍຂຶ້ນ. ການປ່ຽນແປງນັ້ນຈະເຮັດໃຫ້ເຮົາເໝາະສົມກັບຂອງປະທານທີ່ມີມາຜ່ານທາງພຣະວິນຍານບໍລິສຸດ. ການມີພຣະວິນຍານເປັນເພື່ອນຈະປອບໂຍນ, ນຳພາ, ແລະ ເຮັດໃຫ້ເຮົາເຂັ້ມແຂງ.
ຂ້າພະເຈົ້າຮູ້ບາງຢ່າງທີ່ກະສັດເບັນຢາມິນໝາຍເຖິງ ເມື່ອເພິ່ນກ່າວວ່າ ເຮົາສາມາດກາຍເປັນຄືກັນກັບເດັກນ້ອຍຢູ່ຕໍ່ພຣະພັກຂອງພຣະເຈົ້າ. ຂ້າພະເຈົ້າໄດ້ຮຽນຮູ້ຈາກຫລາຍປະສົບການ ວ່າສ່ວນຫລາຍແລ້ວພຣະວິນຍານບໍລິສຸດກ່າວດ້ວຍສຽງແຜ່ວເບົາ, ໄດ້ຍິນງ່າຍທີ່ສຸດເມື່ອໃຈອ່ອນໂຍນ ແລະ ບອກລອນສອນງ່າຍ, ຄືກັນກັບເດັກນ້ອຍ. ຕາມຈິງແລ້ວ, ຄຳອະທິຖານທີ່ໄດ້ຜົນຄື “ຂ້ານ້ອຍຕ້ອງການພຽງແຕ່ສິ່ງທີ່ພຣະອົງຕ້ອງການ. ພຽງແຕ່ບອກຂ້ານ້ອຍວ່າແມ່ນຫຍັງ. ຂ້ານ້ອຍຈະເຮັດຕາມ.”
ເມື່ອພະຍຸໃນຊີວິດມາເຖິງ, ທ່ານສາມາດໝັ້ນຄົງໄດ້ ເພາະວ່າທ່ານຢືນຢູ່ເທິງດານຫີນແຫ່ງສັດທາຂອງທ່ານໃນພຣະເຢຊູຄຣິດ. ສັດທານັ້ນຈະພາທ່ານໄປສູ່ການກັບໃຈທຸກວັນ ແລະ ການຮັກສາພັນທະສັນຍາຢ່າງສະໝ່ຳສະເໝີ. ແລ້ວທ່ານຈະລະນຶກເຖິງພຣະອົງຕະຫລອດເວລາ. ແລະ ຜ່ານທາງພະຍຸຂອງຄວາມກຽດຊັງ ແລະ ຊົ່ວຮ້າຍ, ທ່ານຈະຮູ້ສຶກໝັ້ນຄົງ ແລະ ມີຄວາມຫວັງ.
ຍິ່ງໄປກວ່ານັ້ນ, ທ່ານຈະເຫັນຕົວເອງເອື້ອມອອກໄປຍົກຄົນອື່ນຂຶ້ນສູ່ບ່ອນປອດໄພຢູ່ເທິງດານຫີນກັບທ່ານ. ສັດທາໃນພຣະເຢຊູຄຣິດຈະນຳພາໄປຫາຄວາມຫວັງທີ່ຍິ່ງໃຫຍ່ກວ່າສະເໝີ ແລະ ໄປຫາຄວາມຮູ້ສຶກຂອງຄວາມໃຈບຸນຕໍ່ຄົນອື່ນ, ຊຶ່ງເປັນຄວາມຮັກທີ່ແທ້ຈິງຂອງພຣະຄຣິດ.
ຂ້າພະເຈົ້າເປັນພະຍານກັບທ່ານຢ່າງໜັກແໜ້ນ ວ່າອົງພຣະເຢຊູຄຣິດເຈົ້າໄດ້ເຊື້ອເຊີນທ່ານວ່າ “ຈົ່ງມາຫາເຮົາ.”7 ພຣະອົງເຊື້ອເຊີນທ່ານ, ດ້ວຍຄວາມຮັກຕໍ່ທ່ານ ແລະ ຕໍ່ຄົນທີ່ທ່ານຮັກ, ເພື່ອໃຫ້ມາຫາພຣະອົງສຳລັບຄວາມສະຫງົບສຸກໃນຊີວິດນີ້ ແລະ ຊີວິດນິລັນດອນ ໃນໂລກທີ່ຈະມາເຖິງ. ພຣະອົງຮູ້ດີເຖິງພະຍຸທີ່ທ່ານຈະປະເຊີນໃນການທົດສອບຂອງທ່ານ ຊຶ່ງເປັນສ່ວນໜຶ່ງໃນແຜນແຫ່ງຄວາມສຸກ.
ຂ້າພະເຈົ້າອ້ອນວອນທ່ານໃຫ້ຮັບເອົາຄຳເຊື້ອເຊີນຂອງພຣະຜູ້ຊ່ວຍໃຫ້ລອດ. ເໝືອນດັ່ງເດັກນ້ອຍທີ່ອ່ອນໂຍນ ແລະ ຮັກແພງ, ຍອມຮັບເອົາຄວາມຊ່ວຍເຫລືອຈາກພຣະອົງ. ຈົ່ງເຮັດ ແລະ ຮັກສາພັນທະສັນຍາທີ່ພຣະອົງສະເໜີມອບໃຫ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ມັນຈະເຮັດໃຫ້ທ່ານເຂັ້ມແຂງຂຶ້ນ. ພຣະຜູ້ຊ່ວຍໃຫ້ລອດຮູ້ເຖິງພະຍຸ ແລະ ຮູ້ຈັກສະຖານທີ່ປອດໄພໃນເສັ້ນທາງກັບບ້ານຫາພຣະອົງ ແລະ ຫາພຣະບິດາເທິງສະຫວັນຂອງເຮົາ. ພຣະອົງຮູ້ຈັກທາງ. ພຣະອົງເປັນທາງນັ້ນ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.