ພະລັງຂອງແຮງຜັກດັນທາງວິນຍານ
ຂ້າພະເຈົ້າຂໍແນະນຳການປະຕິບັດຫ້າຢ່າງທີ່ເຮົາສາມາດເຮັດ ເພື່ອຊ່ວຍໃຫ້ເຮົາຮັກສາແຮງຜັກດັນທາງວິນຍານໃນທາງບວກຂອງເຮົາໄວ້.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຮັກທ່ານ. ຂ້າພະເຈົ້າທະນຸຖະໜອມໂອກາດນີ້ທີ່ໄດ້ກ່າວກັບທ່ານໃນມື້ນີ້. ຂ້າພະເຈົ້າອະທິຖານທຸກວັນວ່າທ່ານຈະໄດ້ຮັບການປົກປ້ອງຈາກການໂຈມຕີທີ່ດຸເດືອດຂອງຜູ້ປໍລະປັກ ແລະ ມີພະລັງທີ່ຈະກ້າວໄປໜ້າຜ່ານຜ່າການທ້າທາຍໃດກໍຕາມທີ່ທ່ານປະເຊີນ.
ການທົດລອງບາງຢ່າງເປັນຄວາມໜັກໜ່ວງສ່ວນຕົວທີ່ຍິ່ງໃຫຍ່ ຊຶ່ງຄົນອື່ນບໍ່ສາມາດຫລຽວເຫັນ. ບາງຢ່າງຖືກສະແດງຢູ່ໃນເວທີໂລກ. ຄວາມຂັດແຍ້ງທາງອາວຸດໃນເອີຣົບຕາເວັນອອກກໍເປັນໜຶ່ງໃນນັ້ນ. ຂ້າພະເຈົ້າເຄີຍໄປອູແກຣນ ແລະ ລັດເຊຍ ຫລາຍເທື່ອ. ຂ້າພະເຈົ້າຮັກແຜ່ນດິນເຫລົ່ານັ້ນ, ຮັກຜູ້ຄົນ, ແລະ ມັກພາສາຂອງເຂົາເຈົ້າ. ຂ້າພະເຈົ້າຮ້ອງໄຫ້ ແລະ ອະທິຖານເພື່ອທຸກຄົນທີ່ໄດ້ຮັບຜົນກະທົບຈາກການຂັດແຍ້ງນີ້. ໃນຖານະສາດສະໜາຈັກ ພວກເຮົາກຳລັງເຮັດທຸກຢ່າງທີ່ສາມາດ ເພື່ອຊ່ວຍເຫລືອຜູ້ທີ່ກຳລັງທຸກທໍລະມານ ແລະ ດີ້ນລົນເພື່ອຄວາມຢູ່ລອດ. ພວກເຮົາຂໍເຊື້ອເຊີນທຸກຄົນໃຫ້ສືບຕໍ່ຖືສິນອົດເຂົ້າ ແລະ ອະທິຖານເພື່ອທຸກຄົນທີ່ໄດ້ຮັບຄວາມເຈັບປວດຈາກໄພພິບັດນີ້. ສົງຄາມໃດໆກໍເປັນການຝ່າຝືນທີ່ໜ້າຢ້ານກົວຕໍ່ທຸກສິ່ງທີ່ອົງພຣະເຢຊູຄຣິດເຈົ້າຍຶດຖື ແລະ ສິດສອນ.
ບໍ່ມີໃຜໃນພວກເຮົາທີ່ສາມາດຄວບຄຸມປະເທດຊາດ, ຫລື ການກະທຳຂອງຄົນອື່ນ ຫລື ແມ່ນແຕ່ສະມາຊິກໃນຄອບຄົວຂອງເຮົາເອງ. ແຕ່ເຮົາສາມາດຄວບຄຸມຕົວເອງໄດ້. ອ້າຍເອື້ອຍນ້ອງທີ່ຮັກແພງ, ຄຳຮຽກຮ້ອງຂອງຂ້າພະເຈົ້າໃນມື້ນີ້, ຈົ່ງຢຸດຕິການຂັດແຍ້ງທີ່ລຸກລາມຢູ່ໃນໃຈ ຂອງທ່ານ, ໃນບ້ານເຮືອນ ຂອງທ່ານ, ແລະ ໃນຊີວິດ ຂອງທ່ານ. ຈົ່ງຝັງຄວາມໂນ້ມອຽງໃດໆ ແລະ ທັງໝົດທີ່ຈະທຳຮ້າຍຄົນອື່ນ—ບໍ່ວ່າຄວາມໂນ້ມອຽງເຫລົ່ານັ້ນຈະເປັນອາລົມ, ຄຳເວົ້າຮຸນແຮງ, ຫລື ຄວາມແຄ້ນໃຈຕໍ່ຄົນທີ່ເຮັດໃຫ້ທ່ານເຈັບປວດກໍຕາມ. ພຣະຜູ້ຊ່ວຍໃຫ້ລອດຍັງໄດ້ບັນຊາເຮົາໃຫ້ປິ່ນແກ້ມອີກເບື້ອງໜຶ່ງ,1 ໃຫ້ຮັກສັດຕູຂອງເຮົາ, ແລະ ໃຫ້ອະທິຖານເພື່ອຄົນທີ່ໃຊ້ເຮົາຢ່າງໝິ່ນປະໝາດ.2
ມັນອາດເປັນເລື່ອງຍາກທີ່ແສນເຈັບປວດທີ່ຈະປ່ອຍວາງຄວາມຄຽດແຄ້ນ ຊຶ່ງຮູ້ສຶກວ່າມີເຫດຜົນ. ມັນອາດເບິ່ງຄືວ່າເປັນໄປບໍ່ໄດ້ທີ່ຈະໃຫ້ອະໄພຄົນທີ່ກະທຳການທຳລາຍ ຊຶ່ງໄດ້ທຳຮ້າຍຜູ້ບໍລິສຸດ. ແຕ່ປານນັ້ນ, ພຣະຜູ້ຊ່ວຍໃຫ້ລອດຍັງໄດ້ຕັກເຕືອນເຮົາ “ໃຫ້ອະໄພແກ່ມະນຸດທັງປວງ.”3
ເຮົາເປັນຜູ້ຕິດຕາມອົງສັນຕິລາດ. ຫລາຍກວ່າທີ່ເຄີຍເປັນມາ, ເຮົາຕ້ອງການຄວາມສະຫງົບສຸກທີ່ພຣະອົງເທົ່ານັ້ນສາມາດນຳມາໃຫ້. ເຮົາຈະຄາດຫວັງໃຫ້ຄວາມສະຫງົບສຸກມີຢູ່ໃນໂລກໄດ້ແນວໃດ ເມື່ອໂດຍ ລຳພັງ ເຮົາບໍ່ໄດ້ສະແຫວງຫາຄວາມສະຫງົບສຸກ ແລະ ຄວາມປອງດອງເລີຍ? ອ້າຍເອື້ອຍນ້ອງທັງຫລາຍ, ຂ້າພະເຈົ້າຮູ້ວ່າ ສິ່ງທີ່ຂ້າພະເຈົ້າແນະນຳບໍ່ແມ່ນເລື່ອງງ່າຍ. ແຕ່ຜູ້ຕິດຕາມພຣະເຢຊູຄຣິດຄວນເປັນຕົວຢ່າງໃຫ້ທຸກຄົນໃນໂລກເພື່ອເຮັດຕາມ. ຂ້າພະເຈົ້າຂໍອ້ອນວອນທ່ານໃຫ້ເຮັດຈົນສຸດຄວາມສາມາດ ເພື່ອຢຸດຕິການຂັດແຍ້ງ ສ່ວນຕົວ ທີ່ກຳລັງລຸກລາມໃນໃຈ ແລະ ໃນຊີວິດຂອງທ່ານໃນເວລານີ້.
ຂ້າພະເຈົ້າຂໍເນັ້ນການເອີ້ນໃຫ້ປະຕິບັດສິ່ງນີ້ ໂດຍການກ່າວເຖິງແນວຄິດທີ່ເຕືອນຂ້າພະເຈົ້າເຖິງເກມບານບ້ວງ ທີ່ຂ້າພະເຈົ້າໄດ້ເບິ່ງເມື່ອບໍ່ດົນມານີ້.
ໃນເກມນັ້ນ, ເຄິ່ງທຳອິດເປັນການຕໍ່ສູ້ແບບປ່ຽນກັນໄດ້ຄະແນນ, ກັບໄປກັບມາ. ແລ້ວ, ລະຫວ່າງຫ້າວິນາທີສຸດທ້າຍຂອງເຄິ່ງທຳອິດ, ຜູ້ພິທັກໃນທີມໜຶ່ງໂຍນສາມຄະແນນໄດ້ຢ່າງສວຍງາມ. ໂດຍທີ່ເຫລືອຢູ່ໜຶ່ງວິນາທີ, ເພື່ອນຮ່ວມທີມຂອງລາວໄດ້ລັກໝາກບານ ແລະ ໄດ້ໂຍນເຂົ້າບ້ວງອີກ ຂະນະທີ່ສຽງໝາກຫວີດດັງຂຶ້ນ! ແລ້ວທີມນັ້ນໄດ້ເຂົ້າໄປໃນຫ້ອງໄວ້ເຄື່ອງ ດ້ວຍສີ່ຄະແນນນຳໜ້າ ດ້ວຍແຮງຜັກດັນທີ່ເຕັມດ້ວຍພະລັງ. ພວກເຂົາສາມາດນຳເອົາແຮງຜັກດັນນັ້ນເຂົ້າສູ່ເຄິ່ງທີສອງ ແລະ ຊະນະເກມ.
ແຮງຜັກດັນ ເປັນແນວຄິດທີ່ມີພະລັງ. ເຮົາທຸກຄົນກໍເຄີຍປະສົບກັບມັນໃນຫລາກຫລາຍຮູບແບບ—ຍົກຕົວຢ່າງ, ໃນຍານພາຫະນະທີ່ເລັ່ງຄວາມໄວ ຫລື ໃນການບໍ່ເຫັນດ້ວຍ ແລ້ວທັນທີກໍປ່ຽນເປັນການໂຕ້ຖຽງກັນ.
ສະນັ້ນຂ້າພະເຈົ້າຂໍຖາມວ່າ, “ແມ່ນຫຍັງສາມາດຈຸດໄຟ ແຮງຜັກດັນທາງວິນຍານ?” ພວກເຮົາໄດ້ເຫັນຕົວຢ່າງຂອງແຮງຜັກດັນໃນທາງບວກ ແລະ ທາງລົບ. ພວກເຮົາຮູ້ຈັກຜູ້ຕິດຕາມພຣະເຢຊູຄຣິດ ຜູ້ທີ່ປ່ຽນໃຈເຫລື້ອມໃສ ແລະ ເຕີບໂຕໃນສັດທາຂອງເຂົາເຈົ້າ. ແຕ່ພວກເຮົາກໍຮູ້ຈັກອີກເຖິງຜູ້ທີ່ຄັ້ງໜຶ່ງເຄີຍເຊື່ອ ແລ້ວໄດ້ໜີໄປ. ແຮງຜັກດັນສາມາດແກວ່ງໄປທາງໃດກໍໄດ້.
ເຮົາບໍ່ເຄີຍຕ້ອງການແຮງຜັກດັນທາງວິນຍານໃນ ທາງບວກ ຫລາຍເທົ່າກັບທີ່ເຮົາຕ້ອງການໃນເວລານີ້, ເພື່ອຕໍ່ຕ້ານຄວາມໄວຂອງຄວາມຊົ່ວຮ້າຍ ແລະ ສັນຍານຂອງເວລາທີ່ກຳລັງເພີ່ມທະວີຫລາຍຂຶ້ນ. ແຮງຜັກດັນທາງວິນຍານໃນທາງບວກຈະຊ່ວຍໃຫ້ເຮົາກ້າວໄປໜ້າທ່າມກາງຄວາມຢ້ານກົວ ແລະ ຄວາມບໍ່ແນ່ນອນໄດ້ ທີ່ເກີດຈາກການແຜ່ລະບາດ, ສຸນະມິ, ພູເຂົາໄຟລະເບີດ, ແລະ ການສູ້ຮົບດ້ວຍອາວຸດ. ແຮງຜັກດັນທາງວິນຍານສາມາດຊ່ວຍເຮົາຕ້ານທານກັບການໂຈມຕີຢ່າງບໍ່ຢຸດຢັ້ງ ແລະ ຊົ່ວຮ້າຍຂອງຜູ້ປໍລະປັກ ແລະ ຂັດຂວາງຄວາມພະຍາຍາມຂອງມັນທີ່ຈະທຳລາຍຮາກຖານທາງວິນຍານສ່ວນຕົວຂອງເຮົາ.
ການກະທຳຫລາຍຢ່າງສາມາດຈຸດໄຟແຮງຜັກດັນທາງວິນຍານໃນທາງບວກໄດ້. ການເຊື່ອຟັງ, ຄວາມຮັກ, ຄວາມຖ່ອມຕົວ, ການຮັບໃຊ້, ແລະ ຄວາມກະຕັນຍູ4 ເປັນພຽງຈຳນວນໜ້ອຍໜຶ່ງເທົ່ານັ້ນ.
ມື້ນີ້ ຂ້າພະເຈົ້າຂໍແນະນຳການປະຕິບັດຫ້າຢ່າງທີ່ເຮົາສາມາດເຮັດ ເພື່ອຊ່ວຍໃຫ້ເຮົາຮັກສາແຮງຜັກດັນທາງວິນຍານໃນທາງບວກຂອງເຮົາໄວ້.
ໜຶ່ງ: ເຂົ້າໄປໃນເສັ້ນທາງແຫ່ງພັນທະສັນຍາ ແລະ ຢູ່ໃນນັ້ນ.
ເມື່ອບໍ່ດົນມານີ້, ຂ້າພະເຈົ້າໄດ້ຝັນວ່າ ຂ້າພະເຈົ້າໄດ້ພົບກັບຜູ້ຄົນກຸ່ມໃຫຍ່. ເຂົາເຈົ້າໄດ້ຖາມຂ້າພະເຈົ້າຫລາຍສິ່ງຫລາຍຢ່າງ, ຫລາຍທີ່ສຸດແມ່ນກ່ຽວກັບເສັ້ນທາງແຫ່ງພັນທະສັນຍາ ແລະ ເປັນຫຍັງມັນຈຶ່ງສຳຄັນຫລາຍແທ້.
ໃນຄວາມຝັນຂອງຂ້າພະເຈົ້າ, ຂ້າພະເຈົ້າໄດ້ອະທິບາຍວ່າ ເຮົາເຂົ້າໄປໃນເສັ້ນທາງແຫ່ງພັນທະສັນຍາໂດຍການຮັບບັບຕິສະມາ ແລະ ເຮັດພັນທະສັນຍາຢ່າງທຳອິດກັບພຣະເຈົ້າ.5 ທຸກເທື່ອທີ່ເຮົາຮັບສ່ວນສິນລະລຶກ, ເຮົາສັນຍາ ອີກຄັ້ງ ທີ່ຈະຮັບເອົາພຣະນາມຂອງພຣະຜູ້ຊ່ວຍໃຫ້ລອດ, ທີ່ຈະລະນຶກເຖິງພຣະອົງ, ແລະ ທີ່ຈະຮັກສາພຣະບັນຍັດຂອງພຣະອົງ.6 ໃນການຕອບແທນ, ພຣະເຈົ້າສັນຍາວ່າ ເຮົາຈະມີພຣະວິນຍານຂອງພຣະຜູ້ເປັນເຈົ້າຢູ່ດ້ວຍ ຕະຫລອດເວລາ.
ຕໍ່ມາ ເຮົາເຮັດພັນທະສັນຍາເພີ່ມເຕີມຢູ່ໃນພຣະວິຫານ, ບ່ອນທີ່ເຮົາຮັບເອົາຄຳສັນຍາທີ່ຍິ່ງໃຫຍ່ກວ່າ. ພິທີການ ແລະ ພັນທະສັນຍາຊ່ວຍໃຫ້ເຮົາສາມາດເຂົ້າເຖິງອຳນາດຂອງພຣະເຈົ້າ. ເສັ້ນທາງແຫ່ງພັນທະສັນຍາເປັນທາງດຽວ ເທົ່ານັ້ນ ທີ່ນຳໄປສູ່ຄວາມສູງສົ່ງ ແລະ ຊີວິດນິລັນດອນ.
ໃນຄວາມຝັນຂອງຂ້າພະເຈົ້າ, ຜູ້ຍິງຄົນໜຶ່ງໄດ້ຖາມວ່າ, ຄົນທີ່ລະເມີດພັນທະສັນຍາຂອງພວກເຂົາ ສາມາດກັບຄືນຫາເສັ້ນທາງນັ້ນໄດ້ຢູ່ບໍ. ຄຳຕອບຕໍ່ຄຳຖາມຂອງນາງ ນຳໄປສູ່ຄຳແນະນຳຢ່າງທີສອງຂອງຂ້າພະເຈົ້າ:
ໃຫ້ຄົ້ນພົບ ຄວາມຊື່ນຊົມ ຂອງການກັບໃຈທຸກວັນ.
ການກັບໃຈສຳຄັນແນວໃດ? ແອວມາໄດ້ສິດສອນວ່າ ເຮົາບໍ່ຄວນ “ສັ່ງສອນສິ່ງອື່ນນອກຈາກຈະເປັນເລື່ອງຂອງການກັບໃຈ ແລະ ມີສັດທາໃນພຣະຜູ້ເປັນເຈົ້າ.”7 ການກັບໃຈແມ່ນຈຳເປັນສຳລັບທຸກຄົນທີ່ຮູ້ຈັກຮັບຜິດຊອບ ຜູ້ປາດຖະໜາລັດສະໝີພາບນິລັນດອນ.8 ບໍ່ມີຂໍ້ຍົກເວັ້ນ. ໃນການເປີດເຜີຍຕໍ່ສາດສະດາໂຈເຊັບ ສະມິດ, ພຣະຜູ້ເປັນເຈົ້າໄດ້ຕີສອນຜູ້ນຳຂອງສາດສະໜາຈັກສະໄໝເລີ່ມຕົ້ນທີ່ບໍ່ໄດ້ສິດສອນພຣະກິດຕິຄຸນໃຫ້ລູກໆຂອງຕົນ.9 ການກັບໃຈເປັນ ຂໍກະແຈ ສູ່ຄວາມກ້າວໜ້າ. ສັດທາທີ່ບໍລິສຸດເຮັດໃຫ້ເຮົາກ້າວໄປໜ້າໃນເສັ້ນທາງແຫ່ງພັນທະສັນຍາ.
ຢ່າສູ່ຢ້ານ ຫລື ເລື່ອນການກັບໃຈ. ຊາຕານເພິ່ງພໍໃຈກັບຄວາມທຸກຂອງທ່ານ. ຕັດໃຫ້ສັ້ນ. ໃຫ້ຂັບໄລ່ອິດທິພົນຂອງມັນອອກໄປຈາກຊີວິດຂອງທ່ານ! ໃຫ້ເລີ່ມຕົ້ນໃນມື້ນີ້ ເພື່ອຈະໄດ້ປະສົບກັບຄວາມຊື່ນຊົມໃນການປະຖິ້ມມະນຸດທີ່ມີຈິດໃຈທຳມະດາ.10 ພຣະຜູ້ຊ່ວຍໃຫ້ລອດຮັກເຮົາສະເໝີ ແຕ່ ໂດຍສະເພາະ ເມື່ອເຮົາກັບໃຈ. ພຣະອົງໄດ້ສັນຍາວ່າ ເຖິງແມ່ນ “ພູໃຫຍ່ ແລະ ພູນ້ອຍອາດພັງທະລາຍລົງ ແຕ່ … ຄວາມຮັກຂອງເຮົາ ໝັ້ນຄົງບໍ່ສິ້ນສຸດໄດ້.”11
ຖ້າຫາກທ່ານຮູ້ສຶກວ່າທ່ານໄດ້ອອກຈາກເສັ້ນທາງແຫ່ງພັນທະສັນຍາໄກເກີນໄປ ຫລື ດົນນານເກີນໄປ ແລະ ບໍ່ມີທາງຈະຫວນກັບ, ນັ້ນບໍ່ເປັນຄວາມຈິງ.12 ກະລຸນາຕິດຕໍ່ຫາອະທິການ ຫລື ປະທານສາຂາຂອງທ່ານ. ເພິ່ນເປັນຕົວແທນຂອງພຣະຜູ້ເປັນເຈົ້າ ແລະ ຈະຊ່ວຍທ່ານໃຫ້ປະສົບກັບຄວາມຊື່ນຊົມ ແລະ ການບັນເທົາທຸກຈາກການກັບໃຈ.
ບັດນີ້, ຂໍ້ຄວນລະວັງ: ການກັບຄືນມາສູ່ເສັ້ນທາງແຫ່ງພັນທະສັນຍາ ບໍ່ ໝາຍຄວາມວ່າ ຊີວິດຈະງ່າຍ. ເສັ້ນທາງນີ້ແມ່ນເຂັ້ມງວດ ແລະ ບາງເທື່ອຈະຮູ້ສຶກວ່າເປັນຄ້ອຍສູງ.13 ເຖິງຢ່າງໃດກໍຕາມ, ການປີນໄຕ່ນີ້ຖືກອອກແບບໄວ້ເພື່ອທົດສອບ ແລະ ສິດສອນເຮົາ, ຫລໍ່ຫລອມທຳມະຊາດຂອງເຮົາ, ແລະ ຊ່ວຍໃຫ້ເຮົາກາຍເປັນໄພ່ພົນ. ມັນຄືເສັ້ນທາງດຽວເທົ່ານັ້ນ ທີ່ນຳໄປສູ່ຄວາມສູງສົ່ງ. ສາດສະດາທ່ານໜຶ່ງ14 ໄດ້ບັນຍາຍວ່າ “ແລະ ຍິ່ງໄປກວ່ານັ້ນ, … ໃຫ້ພວກທ່ານພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ. ເພາະຈົ່ງເບິ່ງ, ເຂົາໄດ້ຮັບພອນທຸກຢ່າງ ທັງຝ່າຍໂລກ ແລະ ຝ່າຍວິນຍານ; ແລະ ຖ້າຫາກເຂົາອົດທົນຢ່າງຊື່ສັດຈົນເຖິງທີ່ສຸດແລ້ວ, ເຂົາຈະຖືກຮັບເຂົ້າສູ່ສະຫວັນ … [ແລະ] ຢູ່ກັບພຣະເຈົ້າໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”15
ການເດີນໄປໃນເສັ້ນທາງແຫ່ງພັນທະສັນຍາ, ບວກກັບການກັບໃຈທຸກວັນ, ຈະເຕີມພະລັງໃຫ້ແຮງຜັກດັນທາງວິນຍານໃນທາງບວກ.
ຄຳແນະນຳຢ່າງທີສາມຂອງຂ້າພະເຈົ້າແມ່ນ: ຮຽນຮູ້ກ່ຽວກັບພຣະເຈົ້າ ແລະ ວິທີທີ່ພຣະອົງທຳງານ.
ໜຶ່ງໃນການທ້າທາຍທີ່ຍິ່ງໃຫຍ່ທີ່ສຸດໃນທຸກວັນນີ້ແມ່ນການຈຳແນກລະຫວ່າງຄວາມຈິງຂອງພຣະເຈົ້າ ແລະ ການປອມແປງຂອງຊາຕານ. ນັ້ນຄືເຫດຜົນທີ່ພຣະຜູ້ເປັນເຈົ້າໄດ້ເຕືອນເຮົາໃຫ້ “ອະທິຖານສະເໝີ, … ເພື່ອວ່າ [ເຮົາ] ຈະເອົາຊະນະຊາຕານ, ແລະ … ຫລົບໜີຈາກກຳມືຂອງບໍລິວານຂອງຊາຕານ ທີ່ຄ້ຳຈູນວຽກງານຂອງມັນ.”16
ໂມເຊໃຫ້ຕົວຢ່າງທີ່ດີເລີດເຖິງວິທີທີ່ຈະຫລິງເຫັນລະຫວ່າງພຣະເຈົ້າ ແລະ ຊາຕານ. ເມື່ອຊາຕານມາລໍ້ລວງໂມເຊ, ເພິ່ນໄດ້ຫລິງເຫັນຄວາມຫລອກລວງ ເພາະເພິ່ນຫາກໍໄດ້ພົບກັບພຣະເຈົ້າແບບໜ້າຕໍ່ໜ້າ. ໂມເຊຈຶ່ງຮູ້ທັນທີວ່າຊາຕານຄືໃຜ ແລະ ໄດ້ສັ່ງໃຫ້ມັນໜີໄປ.17 ເມື່ອຊານຕານດື້ດຶງ, ໂມເຊຮູ້ຈັກວິທີຂໍຄວາມຊ່ວຍເຫລືອເພີ່ມເຕີມຈາກພຣະເຈົ້າ. ໂມເຊໄດ້ຮັບພະລັງຈາກສະຫວັນ ແລະ ໄດ້ສັ່ງມານຮ້າຍ ອີກຄັ້ງ, ໂດຍກ່າວວ່າ, “ຈົ່ງໄປຈາກຂ້າພະເຈົ້າ, ຊາຕານ, ເພາະວ່າພຣະເຈົ້າອົງດຽວນີ້ເທົ່ານັ້ນທີ່ຂ້າພະເຈົ້າຈະນະມັດສະການ.”18
ເຮົາຄວນເຮັດຕາມຕົວຢ່າງນັ້ນ. ຈົ່ງຂັບໄລ່ອິດທິພົນຂອງຊາຕານອອກໄປຈາກຊີວິດຂອງທ່ານ! ຢ່າ ຕິດຕາມ ມັນລົງໄປໃນ “ເຫວເລິກແຫ່ງຄວາມທຸກທໍລະມານ ແລະ ຄວາມຈິບຫາຍອັນບໍ່ສິ້ນສຸດ.”19
ດ້ວຍຄວາມໄວທີ່ໜ້າຢ້ານກົວ, ປະຈັກພະຍານທີ່ບໍ່ໄດ້ຮັບການບຳລຸງລ້ຽງທຸກວັນ “ດ້ວຍພຣະຄຳອັນປະເສີດຂອງພຣະເຈົ້າ”20 ສາມາດພັງທະລາຍໄດ້. ດັ່ງນັ້ນ, ສິ່ງທີ່ສາມາດຕໍ່ຕ້ານອຸບາຍຂອງຊາຕານໄດ້ແມ່ນແຈ່ມແຈ້ງ: ເຮົາຕ້ອງການປະສົບການປະຈຳວັນໃນການນະມັດສະການພຣະຜູ້ເປັນເຈົ້າ ແລະ ການສຶກສາພຣະກິດຕິຄຸນຂອງພຣະອົງ. ຂ້າພະເຈົ້າອ້ອນວອນກັບທ່ານ ວ່າໃຫ້ພຣະເຈົ້າໄຊຊະນະໃນຊີວິດຂອງທ່ານ. ຈົ່ງມອບເວລາຂອງທ່ານໃຫ້ພຣະອົງຫລາຍພໍ. ຂະນະທີ່ທ່ານເຮັດ, ໃຫ້ສັງເກດເບິ່ງສິ່ງທີ່ເກີດຂຶ້ນກັບແຮງຜັກດັນທາງວິນຍານໃນທາງບວກຂອງທ່ານ.
ຄຳແນະນຳຢ່າງທີ 4: ສະແຫວງຫາ ແລະ ຄາດຫວັງການມະຫັດສະຈັນ.
ໂມໂຣໄນໃຫ້ເຮົາແນ່ໃຈໄດ້ວ່າ “ພຣະເຈົ້າຍັງບໍ່ເຊົາເປັນພຣະເຈົ້າແຫ່ງສິ່ງມະຫັດສະຈັນເທື່ອ.”21 ພຣະຄຳພີ ທຸກເຫລັ້ມ ສະແດງໃຫ້ເຫັນວ່າ ພຣະຜູ້ເປັນເຈົ້າເຕັມພຣະໄທພຽງໃດທີ່ຈະເຂົ້າແຊກແຊງໃນຊີວິດຂອງຜູ້ທີ່ເຊື່ອໃນພຣະອົງ.22 ພຣະອົງໄດ້ແຍກທະເລແດງໃຫ້ໂມເຊ, ໄດ້ຊ່ວຍນີໄຟໃຫ້ໄດ້ແຜ່ນຈາລຶກທອງເຫລືອງ, ແລະ ໄດ້ຟື້ນຟູສາດສະໜາຈັກຂອງພຣະອົງຜ່ານທາງສາດສະດາ ໂຈເຊັບ ສະມິດ. ການມະຫັດສະຈັນແຕ່ລະຢ່າງຕ້ອງໃຊ້ເວລາ ແລະ ອາດບໍ່ແມ່ນສິ່ງທີ່ບຸກຄົນເຫລົ່ານັ້ນທູນຂໍຈາກພຣະຜູ້ເປັນເຈົ້າໃນຕອນຕົ້ນ.
ໃນວິທີດຽວກັນ, ພຣະຜູ້ເປັນເຈົ້າຈະໃຫ້ພອນແກ່ ທ່ານ ດ້ວຍການມະຫັດສະຈັນ ຖ້າ ຫາກທ່ານເຊື່ອໃນພຣະອົງ, “ບໍ່ສົງໄສຈັກດີ້.”23 ໃຫ້ເຮັດວຽກງານທາງວິນຍານເພື່ອສະແຫວງຫາການມະຫັດສະຈັນ. ຈົ່ງອະທິຖານຂໍໃຫ້ພຣະເຈົ້າຊ່ວຍທ່ານໃຊ້ສັດທາເຊັ່ນນັ້ນ. ຂ້າພະເຈົ້າສັນຍາວ່າ ທ່ານຈະສາມາດມີປະສົບການດ້ວຍຕົວເອງວ່າ ພຣະເຢຊູຄຣິດ “ເຊີດຊູກຳລັງຜູ້ທີ່ອິດເມື່ອຍອ່ອນແຮງ ແລະ ໃຫ້ຄວາມເຂັ້ມແຂງແກ່ຜູ້ທີ່ຂາດກຳລັງ.”24 ສອງສາມຢ່າງຈະເລັ່ງແຮງຜັກດັນທາງວິນຍານຂອງທ່ານຫລາຍກວ່າການຮັບຮູ້ວ່າ ພຣະຜູ້ເປັນເຈົ້າກຳລັງຊ່ວຍທ່ານຍ້າຍພູເຂົາໃນຊີວິດຂອງທ່ານ.
ຄຳແນະນຳຢ່າງທີ 5: ຢຸດຕິການຂັດແຍ້ງໃນຊີວິດສ່ວນຕົວຂອງທ່ານ.
ຂ້າພະເຈົ້າຂໍກ່າວຊ້ຳວ່າ ຈົ່ງຢຸດຕິການຂັດແຍ້ງໃນຊີວິດ ຂອງທ່ານ. ການໃຊ້ຄວາມຖ່ອມຕົວ, ຄວາມກ້າຫານ, ແລະ ຄວາມເຂັ້ມແຂງຮຽກຮ້ອງທັງການໃຫ້ອະໄພ ແລະ ການຂໍອະໄພ. ພຣະຜູ້ຊ່ວຍໃຫ້ລອດໄດ້ສັນຍາວ່າ “ຖ້າ [ເຮົາ] ຍົກໂທດຄວາມຜິດຂອງຄົນອື່ນທີ່ໄດ້ເຮັດຕໍ່ [ເຮົາ], ພຣະບິດາເທິງສະຫວັນ [ຂອງເຮົາ] ກໍຈະຍົກຄວາມຜິດ [ຂອງເຮົາ] ເໝືອນກັນ.”25
ສອງອາທິດຈາກນີ້ ພວກເຮົາຈະສະຫລອງວັນອີດສະເຕີ. ໃນລະຫວ່າງນີ້, ຂ້າພະເຈົ້າຂໍເຊື້ອເຊີນທ່ານໃຫ້ຫາທາງເພື່ອຢຸດຕິການຂັດແຍ້ງທີ່ເຮັດໃຫ້ທ່ານໜັກໜ່ວງ. ຈະມີຄວາມກະຕັນຍູອື່ນໃດບໍທີ່ເໝາະສົມກັບພຣະເຢຊູຄຣິດ ສຳລັບການຊົດໃຊ້ຂອງພຣະອົງ? ຖ້າຫາກການໃຫ້ອະໄພເບິ່ງຄືວ່າເປັນໄປບໍ່ໄດ້ໃນເວລານີ້, ຈົ່ງອ້ອນວອນຂໍພະລັງຜ່ານທາງໂລຫິດຊົດໃຊ້ຂອງພຣະເຢຊູຄຣິດ ເພື່ອຊ່ວຍເຫລືອທ່ານ. ເມື່ອທ່ານເຮັດເຊັ່ນນັ້ນ, ຂ້າພະເຈົ້າສັນຍາຄວາມສະຫງົບສຸກສ່ວນຕົວ ແລະ ແຮງຜັກດັນທາງວິນຍານທີ່ລະເບີດອອກມາ.
ເມື່ອພຣະຜູ້ຊ່ວຍໃຫ້ລອດໄດ້ຊົດໃຊ້ແທນມວນມະນຸດ, ພຣະອົງໄດ້ເປີດທາງໃຫ້ຜູ້ທີ່ຕິດຕາມພຣະອົງ ໃຫ້ສາມາດເຂົ້າເຖິງອຳນາດແຫ່ງການປິ່ນປົວ, ຄວາມເຂັ້ມແຂງ, ແລະ ການໄຖ່ຂອງພຣະອົງ. ສິດທິພິເສດທາງວິນຍານເຫລົ່ານີ້ມີໃຫ້ທຸກຄົນທີ່ສະແຫວງຫາທີ່ຈະໄດ້ຍິນພຣະອົງ ແລະ ຕິດຕາມພຣະອົງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ດ້ວຍຄຳອ້ອນວອນຈາກໃຈຂອງຂ້າພະເຈົ້າ, ຂ້າພະເຈົ້າຊຸກຍູ້ທ່ານໃຫ້ເຂົ້າໄປໃນເສັ້ນທາງແຫ່ງພັນທະສັນຍາ ແລະ ຢູ່ໃນນັ້ນ. ປະສົບກັບຄວາມຊື່ນຊົມຂອງການກັບໃຈທຸກວັນ. ຮຽນຮູ້ກ່ຽວກັບພຣະເຈົ້າ ແລະ ວິທີທີ່ພຣະອົງທຳງານ. ສະແຫວງຫາ ແລະ ຄາດຫວັງການມະຫັດສະຈັນ. ພະຍາຍາມຢຸດຕິການຂັດແຍ້ງໃນຊີວິດຂອງທ່ານ.
ເມື່ອທ່ານກະທຳຕາມການສະແຫວງຫາເຫລົ່ານີ້, ຂ້າພະເຈົ້າສັນຍາວ່າ ທ່ານຈະມີຄວາມສາມາດທີ່ຈະເດີນໄປໜ້າໃນເສັ້ນທາງແຫ່ງພັນທະສັນຍາດ້ວຍແຮງຜັກດັນຫລາຍກວ່າເກົ່າ, ບໍ່ວ່າຈະປະເຊີນກັບອຸປະສັກໃດໆກໍຕາມ. ແລະ ຂ້າພະເຈົ້າສັນຍາວ່າ ທ່ານຈະເຂັ້ມແຂງຫລາຍຂຶ້ນເພື່ອຕ້ານທານກັບການລໍ້ລວງ, ມີຄວາມສະຫງົບສຸກໃນໃຈ, ເປັນອິດສະລະຈາກຄວາມຢ້ານກົວຫລາຍຂຶ້ນ, ແລະ ມີຄວາມເປັນນ້ຳໜຶ່ງໃຈດຽວກັນໃນຄອບຄົວຂອງທ່ານຫລາຍຂຶ້ນ.
ພຣະເຈົ້າຊົງພຣະຊົນຢູ່! ພຣະເຢຊູຄືພຣະຄຣິດ! ພຣະອົງຊົງພຣະຊົນ! ພຣະອົງຮັກເຮົາ ແລະ ຈະຊ່ວຍເຫລືອເຮົາ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະຜູ້ໄຖ່ຂອງເຮົາ, ພຣະເຢຊູຄຣິດ, ອາແມນ.