ວິດີໂອ: “ທ່ານເປັນຜູ້ຍິງທີ່ເພິ່ນໄດ້ເຫັນລ່ວງໜ້າ”
ໃນປີ 1979 ປະທານສະເປັນເຊີ ດັບເບິນຢູ ຄິມໂບ ໄດ້ນອນໂຮງໝໍ ແລະ ໄດ້ຂໍໃຫ້ຄາມິວລາ ພັນລະຍາຂອງເພິ່ນ ອ່ານບົດປາໄສຂອງເພິ່ນຢູ່ໃນກອງປະຊຸມສະຕີສາມັນ.
ຊິດສະເຕີ ຄາມິວລາ ຄິມໂບ: “ຄວາມເຕີບໂຕອັນໃຫຍ່ຫລວງ ທີ່ຈະມາສູ່ສາດສະໜາຈັກໃນຍຸກສຸດທ້າຍ ຈະເກີດຂຶ້ນ ເພາະສະຕີທີ່ດີທັງຫລາຍຢູ່ໃນໂລກ (ຊຶ່ງມັກຈະມີຄວາມຮູ້ສຶກທາງວິນຍານພາຍໃນຕົວສະເໝີ) ຈະຖືກດຶງດູດເຂົ້າມາໃນສາດສະໜາຈັກເປັນຈຳນວນຫລວງຫລາຍ. ມັນຈະເກີດຂຶ້ນເຖິງລະດັບທີ່ສະຕີຂອງສາດສະໜາຈັກ ສະທ້ອນຄວາມຊອບທຳ ແລະ ການກ່າວຢ່າງຊັດເຈນໃນຊີວິດຂອງເຂົາເຈົ້າ ແລະ ເຖິງລະດັບທີ່ສະຕີຂອງສາດສະໜາຈັກຖືກພົບເຫັນວ່າ ໂດດເດັ່ນ ແລະ ແຕກຕ່າງ—ໃນແງ່ດີ—ຈາກສະຕີຂອງໂລກ.”1
ປະທານຣະໂຊ ເອັມ ແນວສັນ: “ເອື້ອຍນ້ອງທີ່ຮັກແພງ, ທ່ານເປັນຜູ້ສຳພັນ ທີ່ສຳຄັນຜູ້ໜຶ່ງໃນຍຸກສຸດທ້າຍ, ເວລາທີ່ປະທານຄິມໂບໄດ້ເຫັນລ່ວງໜ້າແມ່ນປະຈຸບັນນີ້. ທ່ານເປັນຜູ້ຍິງທີ່ເພິ່ນໄດ້ເຫັນລ່ວງໜ້າ! ຄຸນນະທຳ, ແສງສະຫວ່າງ, ຄວາມຮັກ, ຄວາມຮູ້, ຄວາມກ້າຫານ, ລັກສະນະ, ສັດທາ, ຊີວິດທີ່ຊອບທຳຂອງທ່ານ ຈະນຳຜູ້ຍິງທັງຫລາຍຂອງໂລກ ພ້ອມດ້ວຍຄອບຄົວຂອງເຂົາເຈົ້າ ໃຫ້ເຂົ້າມາໃນສາດສະໜາຈັກໃນຈຳນວນທີ່ບໍ່ເຄີຍມີມາກ່ອນ!
“ພວກເຮົາອາໄສພະລັງ, ການປ່ຽນໃຈເຫລື້ອມໃສ, ຄວາມເຊື່ອໝັ້ນ, ຄວາມສາມາດໃນການນຳພາ, ປັນຍາ, ແລະ ປາກສຽງຂອງທ່ານ. ອານາຈັກຂອງພຣະເຈົ້າຈະບໍ່ເກີດ ແລະ ສຳເລັດໄດ້ ຖ້າປາດສະຈາກຜູ້ຍິງທີ່ເຮັດ ແລະ ຮັກສາພັນທະສັນຍາອັນສັກສິດ ແລະ ຖ້າປາດສະຈາກຜູ້ຍິງທີ່ສາມາດເວົ້າດ້ວຍພະລັງ ແລະ ອຳນາດຂອງພຣະເຈົ້າ! …
“… ບໍ່ວ່າການເອີ້ນ, ບໍ່ວ່າສະຖານະການຂອງທ່ານຈະເປັນແນວໃດກໍຕາມ, ພວກເຮົາຕ້ອງການຄວາມນຶກຄິດຂອງທ່ານ, ຄວາມເຂົ້າໃຈເລິກເຊິ່ງ, ແລະ ການດົນໃຈຂອງທ່ານ. ພວກເຮົາຢາກໃຫ້ທ່ານເວົ້າຢ່າງກ້າຫານໃນການປະຊຸມສະພາຫວອດ ແລະ ສະເຕກຂອງທ່ານ. ພວກເຮົາຢາກໃຫ້ເອື້ອຍນ້ອງທີ່ແຕ່ງງານ ອອກສຽງ ‘ເປັນຫຸ້ນສ່ວນ ທີ່ມີພາກສ່ວນ ແລະ ເຕັມສ່ວນ’ ເມື່ອຮ່ວມມືກັບສາມີຂອງທ່ານ ໃນການປົກຄອງຄອບຄົວຂອງທ່ານ. ບໍ່ວ່າຈະແຕ່ງງານ ຫລື ເປັນໂສດ, ເອື້ອຍນ້ອງທັງຫລາຍ ທ່ານມີຄວາມສາມາດດີເດັ່ນ ແລະ ມີສັນຊາດຕະຍານພິເສດ ທີ່ເປັນຂອງປະທານຈາກພຣະເຈົ້າ. ພວກເຮົາ ທີ່ເປັນອ້າຍນ້ອງທັງຫລາຍ ບໍ່ສາມາດທົດແທນອິດທິພົນທີ່ເປັນເອກະລັກຄືທ່ານໄດ້.
“ພວກເຮົາຮູ້ວ່າ ການສ້າງທີ່ເລີດລ້ຳທີ່ສຸດໃນການສ້າງສິ່ງທັງມວນນັ້ນ ແມ່ນການສ້າງຜູ້ຍິງ! ພວກເຮົາອາໄສພະລັງຂອງທ່ານ! …
“… ຂ້າພະເຈົ້າຂໍຂອບໃຈທ່ານ, ເອື້ອຍນ້ອງທີ່ຮັກແພງ, ແລະ ອວຍພອນທ່ານໃຫ້ໄດ້ຮັບຄວາມສຳເລັດທຸກປະການ, ເພື່ອເຮັດໃຫ້ຈຸດປະສົງຂອງການສ້າງຂອງທ່ານສຳເລັດຄົບຖ້ວນ, ຂະນະທີ່ເຮົາມີສ່ວນຮ່ວມນຳກັນໃນວຽກງານທີ່ສັກສິດນີ້. ພວກເຮົາຈະຕຽມພ້ອມສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້ານຳກັນ.”2