Ol Paoa blong Prea we i Haed Insaed long Hat

Ol brata mo sista, mi bin lanem wan lesen we i so lelebet stat long las taem we mi bin stanap long pulpit ia long Oktoba 2022. Lesen ia i we: sapos yu no givim wan gudfala toktok, bae oli sakemaot yu long ol nekis konfrens we i stap kam. Yufala i save luk se oli asaenem mi eli long fas sesen blong konfrens ia. Wanem we yufala i no save luk i we, oli putum mi mi stanap long wan doa blong trikim mi, we i save open isi nomo. Sapos toktok ia i no go gud, bae mi nomo luk yufala long ol nekis konfrens.

Long spirit blong naesfala hym ia wetem naesfala kwaea ia, mi bin lanem sam lesen i no longtaem i pas se, wetem help blong Lod, mi wantem serem wetem yufala tedei. Hemia bae i mekem toktok blong mi ia i moa abaot laef blong mi.

Long ol eksperiens blong mi we i bin hapen i no longtaem i pas, hemia we i blong miwan mo i moa soa hem i ded blong waef blong mi Pat, we mi lavem tumas. Hem i bin wan gudfala woman tumas, we mi bin save—wan waef mo mama we i stret gud, ol gudfala fasin blong hem blong stap klin, hem i gud blong serem ol filing blong hem, mo hem i gat wan gudfala spirit. Wan taem hem i bin givim wan toktok we taetol blong hem “Kasem Paoa Ia blong Mekem Tingting We Lod I Bin Krietem Yu From, blong I hapen.” Long mi, hem i bin kasem paoa blong mekem tingting we Lod i bin krietem hem from, blong i hapen wetem moa sakses bitim we wan i save tingting long hem. Hem i wan gel blong God fulwan, wan eksampol blong woman long Kraes. Mi laki bitim evri man blong save spendem 60 yia blong laef blong mi wetem hem. Sapos mi pruvum se mi klin inaf, siling blong mitufala i minim se mi save spendem taem we i no save finis wetem hem.

Wan nara eksperiens i stat 48 aoa afta we mifala i berem waef blong mi. Long taem ia, oli hariap long mi i go long hospital wetem wan series medikol kondisen. Long fas fo wik aot long sikis wik we bae mi stap long hospital, mi bin spendem blong stap go kam long intensiv kea (rum wetem spesel kea), mo maen blong mi i gohed blong wekap mo slip.

Mi no tingbaot ful eksperiens blong mi long fas taem ia, we mi stap insaed long hospital. Be wanem we mi no lusum, i memori blong mi abaot wan wokbaot aotsaed long hospital. Aotsaed long wan ples we i luk olsem laef we i no save finis. Mi no save tokbaot fulwan eksperiens ia long ples ia, be mi save talem se pat blong wanem we mi bin kasem i wan strong woning blong mi gobak long ministri blong mi mo wok moa kwik, givim moa konsekresen, lukluk moa long Sevya, mo gat moa fet long tok blong Hem.

Mi no save stop blong filim se mi stap kasem wan vesen blong miwan abaot wan revelesen we oli bin givim long Ol Twelef Aposol, kolosap 200 yia i pas:

“Mo bae yu testifae abaot nem blong mi … [mo] sendemaot toktok blong mi i go long ol en blong wol ia. …

“…Moning afta moning; mo dei afta dei yu mas letem voes blong yu blong givim woning i go aot; mo taem naet i kam, yu no mas letem ol man we oli stap laef long wol ia oli slip, from ol toktok blong yu. …

“Girap[,] … karem kros blong yufala, [mo] folem mi.”¹

Ol sista mo brata blong mi we mi lavem, stat long taem blong eksperiens ia, mi bin traem blong traehad blong karem kros blong mi, mo mekem bes blong faenem weaples mi save leftemap voes blong mi olsem wan Aposol, we i givim pis mo woning long moning, truaot long dei, mo i go kasem naet.

Hemia i lidim mi go long nambatri trutok we mi lanem long ol manis ia we mi lusum waef, mi filim sik mo fulap harem nogud. Hem i bin wan witnes we i kam niu bakegen abaot fasin blong tangkyu we i no save finis, blong ol strong prea blong Jos ia—ol prea blong yufala—from mi. Bae mi oltaem talem tangkyu long krae blong taosen blong ol pipol, we i olsem wido ia we i stap krae,² we oli wokem lukaotem help blong heven long bihaf blong mi. Mi bin kasem ol prishud blesing mo mi bin luk klas blong mi long hae skul i lego kaekae from mi, semmak olsem sam wod raon long Jos. Mo maet nem blong mi bin stap long prea rol blong evri tempol blong Jos.

Long bigfala tangkyu blong mi from evri samting ia, mi joen wetem G. K. Chesterton, we i bin talem wan taem se “ol tangkyu i wan wei blong tingting we i moa hae long ol narawan; mo … fasin blong talem tangkyu hem i hapines we i dabol wetem sapraes.”³ Wetem “hapines we i dabol wetem sapraes,” blong miwan, mi talem tangkyu long yufala evriwan mo tangkyu long Papa blong mi long Heven, we i bin harem ol prea blong yufala mo i blesem laef blong mi.

Ol brata mo sista, mi testifae se God i harem evri prea we yumi mekem mo i stap ansa long wanwan long olgeta folem rod we Hem i bin mekem blong mekem yumi kam stret evriwan. Mi andastanem se samples long semmak taem ia we plante oli stap prea blong helt blong mi i kam oraet, wan semmak namba blong pipol—we i tekem mi tu—oli stap prea from helt blong waef blong mi. Mi testifae se wan tabu Papa long Heven i bin harem tugeta prea ia mo Hem i ansarem, iven sapos ol prea blong Pat oli no bin ansa long wei we mi bin askem. God i stap ansarem ol prea defren long wanem we yumi hop from, from ol risen we Hem nomo i save—be mi promesem yu se ol prea ia oli harem, mo oli ansa long olgeta folem taem blong yumi long wol mo lav blong Hem we i no save sot long yumi.

Sapos yumi “no askem eni samting we i rong,”⁴ bae i no gat limit long wetaem, weaples mo wanem we yumi sapos blong prea from. Folem ol revelesen, yumi mas “prea oltaem.”⁵ Yumi mas prea, olsem we Amulek i talem, blong “olgeta we oli stap raon long yufala,”⁶ wetem bilif se “taem we stret [pipol] i prea, prea blong [olgeta] i gat paoa, mo i save karem plante frut.”⁷ Yumi mas prea laod taem yumi stap yumiwan blong save mekem ol prea ia.⁸ Sapos hemia i no wok gud oltaem, yufala i mas prea slo long hat blong yufala wetem wan truhat.⁹ Yumi singsing se ol prea oli “[ol]paoa blong prea long hat,”¹⁰ we oltaem yumi givim, folem toktok blong Sevya Hemwan, i go long God Papa We I No Save Finis, long nem blong Pikinini Ia nomo blong Hem.¹¹

Ol fren blong mi we mi lavem, ol prea blong yumi oli ol taem we i moa spesel,¹² ol “tru tingting insaed long hat”¹³ wei we i moa sua mo simpol blong yumi wosip.¹⁴ Yu mas prea wanwan, insaed long ol famli blong yumi, mo insaed long ol kongregesen blong evri saes.¹⁵ Yumi mas yusum prea olsem wan sil agensem temtesen,¹⁶ mo sapos i gat eni taem we yumi filim blong no prea, yumi save stap sua se tu tingting ia i no kam long God, we i wantem tumas blong toktok wetem ol pikinini blong Hem eni taem mo evri taem. I tru tumas se enemi nao i stap traehad blong stopem yumi blong prea.¹⁷ Taem yumi no save olsem wanem o wanem stret blong prea from, yumi sapos blong statem, mo gohed, kasem taem Tabu Spirit bae i lidim yumi i go long prea we yumi sapos blong stap givim.¹⁸ Wei ia, maet hem i wei ia nao blong prea taem yumi stap prea from ol enemi blong yumi mo olgeta we oli stap yusum nogud yumi.¹⁹

Long en, yumi save lukluk long eksampol blong Sevya we i bin prea evri taem nomo. Be mi bin oltaem faenem i intresting tumas long mi se ?from wanem Jisas i filim se hem i mas prea? ?Hem i no stret gud evriwan finis? ?Bae Hem i nidim blong prea abaot wanem? Mi kam blong luksave tu se Jisas, mo yumi tu, yumi wantem blong “lukaotem fes [blong Papa], biliv long tok blong Hem, mo trastem gladhat blong Hem.”²⁰ Be, taem afta taem, Hem i stap aot long sosaeti blong stap Hemwan bifo Hem i stikim heven wetem ol prea blong Hem.²¹ Long ol nara taem, Hem i prea wetem sam nara kompanion blong Hem. Afta bae Hem i lukaotem heven long bihaf blong ol fulap pipol we oli save kavremap wan saed blong wan hil. Samtaem prea i mekem klos blong hem i saen long glori.²² Samtaem prea i mekem fes blong Hem i saen long glori.²³ Samtaem Hem i stanap blong prea, samtaem Hem i nildaon, mo wan taem Hem i bin foldaon, mo i slip long fes blong Hem blong prea.²⁴

Luk i tokbaot harem nogud blong Jisas long Garen blong Getsemane, we i mekem se Jisas i filim se Hem i nidim blong “prea strong moa.”²⁵ ?From wanem nao wan we i stret evriwan i prea strong moa? Yumi luk se evri prea blong Hem oli kam long hat blong Hem, be yet taem Hem i stap mekem sakrifaes blong Atonmen mo go tru long harem nogud we bae i sevem ful wol, Hem i filim blong prea strong moa, mo wetem evri harem nogud mo hamas i had, blad blong Hem i ron olsem swet long ful bodi blong Hem.

Folem win blong Kraes ova long ded mo presen blong Hem we Hem i bin givim long mi i no longtaem i pas, blong laef sam moa wik o manis long wol ia, mi testifae strong abaot hamas laef we i no save finis i tru, mo yumi nidim blong stap series blong plan from laef ia.

Mi testifae se taem bae Kraes i kam, bae Hem i nidim blong luksave yumi—i no olsem ol memba we oli rekodem baptaes blong olgeta long wan pepa we stap nogud finis, be olsem ol memba we oli givim olgeta fulwan, oli fetful blong stap biliv, mo ol disaepol we oli stap kipim ol kavenan. Hemia i wan impoten samting long yumi evriwan, blong mekem se yumi no harem toktok ia: “Neva mi mi save yufala,”²⁶ o, olsem we Josef Smit i transletem ol toktok ia, “[Yu yu] neva save mi.”²⁷

Gudfala samting i we, yumi gat help from wok blong yumi—fulap help. Yumi nidim blong biliv long ol enjel mo ol merikel mo ol promes blong tabu prishud. Yumi nidim blong biliv long presen we i Tabu Spirit, paoa ia blong ol gudfala famli mo fren, mo paoa blong lav blong Kraes we i klin evriwan. Yumi nidim blong biliv long revelesen mo ol profet, ol sia, mo ol reveleta mo Presiden Russell M. Nelson. Yumi nidim blong bilivim se wetem prea mo krae mo fasin blong stap stret mo gud, bae yumi save go antap long “Hil blong Saeon, … siti blong God we i stap laef, ples blong heven, ples we i moa tabu long evri narafala ples.”²⁸

Ol brata mo sista, taem yumi sakem sin blong yumi mo no fraet blong kam “long fes blong God we hem i stap givhan long yumi long gladhat blong hem,”²⁹ mo putum evri krae blong hat blong yumi long fored blong Hem, bae yumi faenem sore mo fogivnes long han blong Papa blong yumi we i no save finis mo Pikinini blong Hem we i obei mo i stret gud evriwan. Mo afta, wetem Job mo evriwan we oli fetful, bae yumi luk wan wol we i “naes tumas”³⁰ blong yumi andastanem. Long nem blong Jisas Kraes, amen.