Jeneral Konfrens
Frut Ya I Blong Stap Longtaem
Epril 2024 jeneral konfrens

Frut Ya I Blong Stap Longtaem

I Kam long Elda Matthew L. Carpenter

Blong Olgeta Seventi

Hem i impoten blong gat Tabu Spirit i silim ol odinens blong yumi, sapos yumi wantem blong kasem ol promes blesing blong taem we i no save finis.

Olsem wan yang boe, mi laekem ol fres, raep pij (wan frut olsem apol we i red mo kaekae blong hem i yelo). Kasem tedei, tingting ia blong kakae wan raep pij we i gat fulap jus wetem konkon tes, i mekem wota blong maot blong mi i fulap. Taem we ol pij oli redi mo oli pikimap, oli save stap blong tu kasem fo dei, bifo oli go nogud. Mi gat ol gudfala memori blong mi wetem mama mo ol yangfala brata mo sista blong mi, we mifala i stap long kijin mo stap putum gud ol pij we mifala i pikimap i go long ol botel we mifala i silim i stap blong yusum long winta. Sapos mifala i kipim gud ol pij ia, swit frut ia bae i stap blong plante yia, be i no blong tu,tri o fo dei nomo. Sapos oli redi gud mo hotem gud, bae frut ia i stap gud kasem taem oli brekem sil blong lid blong hem.

Kraes i daerektem yumi blong “go mekem wok, …blong yufala i save karem frut we frut ia i blong stap longtaem .”1 Be Hem i no stap tokbaot ol pij. Hem i stap tokbaot ol blesing blong God i go long ol pikinini blong Hem. Sapos yumi mekem mo kipim ol kavenan wetem God, ol blesing we oli kam wetem ol kavenan blong yumi i save gohed afta long laef ia mo oli silim long yumi, o kipim, blong taem we i no save finis, mo kam olsem frut ia we i stap longtaem blong taem we i no save finis.

Tabu wok blong Tabu Spirit, olsem Tabu Spirit blong promes, bae i silim wanwan odinens long olgeta we oli fetful long ol kavenan blong olgeta, mekem se ol odinens ia oli laef afta laef long wol ia.2 Hem i impoten blong gat Tabu Spirit i silim ol odinens blong yumi, sapos yumi wantem blong kasem ol promes blesing blong taem we i no save finis, mo kam frut ia we i stap longtaem.

Hemia i impoten tumas sapos yumi wantem kam olsem wan god.3 Olsem Presiden Nelson i bin tijim: yumi mas “stat wetem en long maen. … I sua se blong wanwan long yumi, ‘en’ we yumi wantem tumas blong kasem i blong stap tugeta wetem ol famli blong yumi olsem wan god, long ples we God, Papa blong yumi long Heven, mo Pikinini blong Hem Jisas Kraes, Tufala i stap long hem.”4 Presiden Nelson i tokbaot tu se: “Selestial mared i wan impoten pat blong stap rere from laef ia we i no save finis. I nidim blong wan i mas mared long stret man, long stret ples, tru long stret atoriti, mo blong stap fetful mo obei long tabu kavenan ia. Afta, wan bae i save kasem promes blong kam olsem wan god long selestial kingdom blong God.”5

?Wanem nao ol blesing blong kam olsem wan god? Bae oli stap tu long ples blong God blong taem we i no save finis olsem hasban mo waef, mo kasem “ol jea blong king, ol kingdom, ol ples blong prins i rul, mo ol paoa, … mo bae laen blong tufala i gohed blong oltaem mo oltaem,”6 mo kasem evri samting we Papa long Heven i gat.7

Lod i talemaot tru long Josef Smit:

“Insaed long selestial glori, i gat tri heven o level;

Mo blong kasem hemia we i moa hae olgeta, wan i mas kam insaed long oda ia blong prishud [we i mared kavenan we i niu mo no save finis];

“Mo sapos hem i no mekem, hem i no save kasem level ia.

“Hem i save go insaed long narafalawan, be hemia i en blong kingdom blong hem; hem i no save go long wan level we i antap moa blong gat pikinini.”8

Yumi lanem long skripja ia se wan i save stap long selestial kingdom, o laef long ples blong God, mo stap singgel. Be blong kam olsem wan god insaed long level we i moa hae long selestial kingdom, wan i mas mared long stret atoriti mo afta stap tru long ol kavenan we hem i mekem long mared ia. Taem yumi stap fetful long ol kavenan ia, Tabu Spirit blong Promes i save silim mared kavenan blong yumi.9 Ol siling blesing olsem, oli kam frut we i gohed blong stap.

?I nidim wanem blong stap fetful blong kipim wan mared kavenan we i niu mo no save finis?

Presiden Russell M. Nelson i tijim se i gat tu kaen rilesensip taem yumi go mekem mared kavenan ia we i no save finis: wan rilesensip we i fasem tugeta wan hasban mo waef, mo wan rilesensip we i moa hae, we i fasem tugeta wan hasban mo waef wetem God.10 Blong kasem ol blesing blong kam olsem wan god we oli silim long yumi mo bae i gohed blong stap afta long laef ia, yumi mas stap tru long tugeta rilesensip we i fasem tugeta wan hasban mo waef mo rilesensip we i moa hae, we i fasem tugeta wan hasban mo waef wetem God, long kavenan ia.

Blong kipim rilesensip ia we i fasem tugeta wan hasban o waef blong yu, God i givim kaonsel long yumi blong “lavem waef o hasban [blong yu] wetem ful hat blong [yu], mo … hang gud long hem mo i nogat narawan.”11 Blong olgeta we oli mared, blong hang gud long waef o hasban mo i nogat narawan, i minim blong kaonsel tugeta wetem lav, yu lavem mo kea long wanwan long yutufala, yu mekem taem blong yu wetem hem i kam faswan long ol nara samting, mo yu singaot long God blong helpem yu winim ol samting we yu no strong long hem.12 I minim tu se i nogat eni kaen rilesensip blong serem ol filing o gat seks aotsaed long mared blong yu, we i tekem tu fasin ia blong tokplei wetem narawan o stap deit, mo ponografi we i mekem se i save gat ol rabis tingting long saed blong seks i kam moa bigwan.13

Blong kipim rilesensip we i fasem tugeta wan hasban o waef long kavenan ia, wanwan patna i mas wantem blong stap insaed long mared ia. Presiden Dallin H. Oaks i tijim i no longtaem i pas: “Yumi save tu se Hem [God] i no fosem wan man o woman blong mekem wan siling rilesensip sapos man o woman ia i no wantem. Ol blesing blong ol rilesensip we oli silim, oli tru blong evriwan we oli kipim ol kavenan blong olgeta be i no blong fosem wan rilesensip we i sil long wan narawan we i no klin inaf o i no wantem.”14

?Wanem nao rilesensip we i moa hae, we i fasem tugeta wan hasban mo waef wetem God, we Presiden Nelson i stap tokbaot? Hem i rilesensip we i moa hae, we i fasem tugeta wan hasban mo waef wetem God.

Blong kipim rilesensip we i moa hae, we i fasem tugeta wan hasban mo waef wetem God, yumi mas stap tru long ol tempol kavenan we yumi bin mekem folem ol loa blong fasin blong stap obei, sakrifaes, gospel, jastiti, mo fasin blong konsekresen. Yumi mekem kavenan tu wetem God blong kasem kompanion blong yumi we i no save finis mo blong stap wan papa o mama we i stret mo gud. Taem yumi kipim rilesensip fasem tugeta wan hasban mo waef i moa hae wetem God, yumi kwalifae from ol blesing blong stap pat long famli blong God tru long kavenan blong Ebraham, we i gat ol blesing blong gat plante pikinini, gospel, mo prishud.15 Ol blesing ia oli save kam ol frut we bae i stap blong longtaem.

Naoia we yumi hop se evriwan we oli go insaed long kavenan we i niu mo i no save finis oli stap tru mo kasem ol blesing we oli silim long olgeta blong taem we i no save finis, samtaem tingting ia i luk olsem se bae yumi no save kasem. Truaot long ministri blong mi, mi mitim ol memba we oli mekem mo kipim ol kavenan, be ol patna blong olgeta i no mekem. I gat tu olgeta we oli singgel, oli neva gat janis blong mared long laef ia. Mo i gat olgeta we oli no fetful long ol mared kavenan blong olgeta. ?Wanem nao i hapen long wanwan man o woman long situesen ia?

  1. Sapos yu stap fetful long ol kavenan we yu mekem taem yu kasem endaomen blong yu, bae yu kasem ol promes blesing blong yuwan we oli givim long yu long endaomen iven sapos patna blong yu i brekem kavenan blong hem o hem i kamaot long mared ia. Sapos yu bin sil mo afta yu divos, mo sapos siling blong yu oli no kanselem, bae yu gohed blong kasem blesing blong siling ia long yuwan sapos yu stap fetful.16

    Samtaem, from ol filing blong no stap tru mo wan harem nogud we i soa tumas, patna we i fetful bae i wantem blong kanselem siling blong tufala wetem patna blong hem we i no stap fetful blong stap longlongwe, tugeta long wol ia mo blong taem we i no save finis. Sapos yu stap wari se bae yu fas i stap long wan patna we i no wantem sakem sin, tingbaot, !bae i no save hapen! God bae i no fosem wan man blong gohed blong stap long wan siling rilesensip truaot long taem we i no save finis agensem tingting blong hem. Papa long Heven bae i mekem sua se yumi kasem evri blesing folem ol joes mo tingting blong hat blong yumi.17

    Be, sapos wan i wantem kanselem siling, oli respektem joes blong yu. I gat ol step blong folem. !Be hemia bae i no isi blong mekem! Fas Presidensi i holem ol ki blong joenem mo silim ol samting long wol mo long heven. Taem we Fas Presidensi i apruvum blong kanselem wan siling, ol blesing we oli go wetem siling ia, oli nomo gat paoa, oli kanselem long tugeta saed blong rilesensip we i fasem tugeta wan hasban mo waef mo rilesensip we i moa hae we i fasem tugeta wan hasban mo waef wetem God. Hem i impoten blong andastanem se blong kasem ol blesing blong kam olsem wan god, yumi mas soem se yumi glad blong mekem mo stap fetful blong kipim kavenan we i niu mo i no save finis, long laef ia o long nekis laef.

  2. Long olgeta we oli singgel memba blong Jos, plis tingabaot se “long taem mo wei blong Lod, bae evri fetful Sent blong Hem bae oli kasem blesing. Lod bae i jajem mo i givim praes long wanwan man mo woman folem wanem hat blong olgeta i filim mo wantem, mo tu wok blong olgeta.”18

  3. Sapos yu no gohed blong stap fetful long ol tempol kavenan, ?i gat hop i stap? !Yes! Gospel blong Jisas Kraes i wan gospel blong hop. Hop ia i kamtru long Jisas Kraes wetem wan hat we i wantem sakem sin tru mo stap obei mo folem ol tijing blong Kraes. Mi bin luk wanwan man mo woman we oli mekem ol mistek, mo brekem ol tabu kavenan. Long semmak fasin, mi luk olgeta we oli sakem sin wetem tru hat, oli kasem fogivnes mo oli kambak long kavenan rod. Sapos yu bin brekem tempol kavenan blong yu, mi askem strong long yu blong tanem yu i go long Jisas Kraes, kaonsel wetem bisop blong yu, sakem sin, mo openem sol blong yu i go long bigfala paoa blong hiling we i stap tru long Atonmen blong Jisas Kraes.

Ol brata mo sista, Papa blong yumi long Heven we i gat lav, i givim yumi ol kavenan blong mekem se yumi save gat akses long evri samting we Hem i gat i stap blong yumi. Ol tabu blesing ia we i kam long God oli moa swit bitim eni narafala frut long wol ia. Oli save kipim gud blong yumi blong oltaem, taem yumi stap fetful long ol tempol kavenan blong yumi.

Mi testifae se God i putumbak atoriti blong joenem mo silim ol samting long wol mo long heven. Atoriti ia i stap long Jos Ia blong Jisas Kraes blong Ol Lata-dei Sent. Fas Presidensi mo Kworom blong Olgeta Twelef Aposol nao oli holem mo oli yusum raet ia anda long daereksen blong Presiden Russell M.Nelson. Olgeta we oli go insaed long mared kavenan we i niu mo we i no save finis mo kipim kavenan ia, oli save kam stret gud mo long en kasem ful glori blong Papa, nomata long ol situesen blong olgeta we oli no save kontrolem.19

Ol promes blesing ia we i go wetem ol kavenan blong yumi, oli save silim long yumi tru long Tabu Spirit blong Promes mo i save kam frut we bae i stap longtaem blong taem we i no save finis. Mi testifae olsem, long nem blong Jisas Kraes, amen.

Ol Not

  1. Jon 15:16.

  2. Luk long Dale G. Renlund, “Stap Gat Akses long Paoa blong God tru Ol Kavenan,” Liahona, Mei 2023, 35–38; Doktrin mo Ol Kavenan 132:7.

  3. Wan odinens i sil taem oli mekem i stret gud tugeta long heven mo long wol ia from hemia i hapen tru long wan we i gat stret mo raet atoriti mo i apruvum mo mekem i kam tabu tru long Tabu Spirit.

    “Fulap taem yumi stap tingting long siling atoriti olsem se hem i blong sam tempol odinens nomo, be atoriti ia hem i save mekem eni odinens we i stret gud mo blong fasem odinens ia i go bitim ded. Eksampol, siling paoa i silim wok blong baptaes blong yu folem stret loa mekem se bae oli luksave long wol ia mo long heven. Long en, evri prishud odinens oli yusum anda long ol ki blong Presiden blong Jos, mo olsem we Presiden Joseph Fielding Smith i eksplenem se, ‘Hem [Presiden blong Jos] i bin givim mifala atoriti ia, hem i putum siling paoa insaed long prishud blong mifala, from se hem i holem ol ki ia’ [Harold B.Lee i kwotem, long Conference Report, Oct. 1944, 75]” (D. Todd Christofferson, “Siling Paoa,” Liahona, Nov. 2023, 20).

    “Wan odinens we oli silim tru long Tabu Spirit blong Promes i wan we Tabu Spirit i apruvum; mo hem ia Lod i apruvum. Nogat man i save giaman long Tabu Spirit mo ting se bae oli no faenemaot. Ol prinsipol ia i aplae tu long evri narafala odinens mo wok insaed long Jos. Sapos tugeta patna [long wan mared] tufala i stap ‘stret mo tru’ [Doktrin mo Ol Kavenan 76:53], sapos tufala i stap klin inaf, wan siling we oli apruvum i stap long tempol mared blong tufala; be sapos tufala i no stap klin inaf, tufala i no kam stret mo gud tru long Spirit mo fasin blong mekem tufala i kam tabu tru long Tabu Spirit bae oli karemaot. Fasin ia blong stap klin inaf bae i gat paoa long siling, mo fasin we i no klin bae i brekem eni siling” (Bruce R. McConkie, “Holy Spirit of Promise),” in Preparing for an Eternal Marriage Student Manual [2003], 136).

    “Tabu Spirit blong Promes i Tabu Spirit we i apruvum evri odinens: baptaes, konfemesen, odinesen mo mared. Promes i we ol blesing ia bae oli kasem tru long fasin blong stap fetful. Sapos wan man i brekem wan kavenan, olsem hemia blong baptaes, odinesen, mared o eni narafala samting, Spirit bae i karemaot stam blong apruv, mo bae oli no save kasem ol blesing. Evri odinens oli silim, wetem wan promes blong wan praes we i dipen long fasin blong stap fetful. Tabu Spirit i karemaot stam blong apruv taem we oli bin brekem ol kavenan” (Joseph Fielding Smith, Doctrines of Salvation, comp. Bruce R. McConkie [1955], 1:45).

  4. Russell M. Nelson, Heart of the Matter: What 100 Years of Living Have Taught Me (2023), 15. Evri kavenan, oli mas silim tru long Tabu Spirit blong Promes, sapos oli mas stap tru afta long laef bakegen long ded blong ded ia (luk long Doktrin mo Ol Kavenan 132:7).

  5. Russell M. Nelson, “Celestial Marriage,” Liahona, Nov. 2008, 94.

  6. Doktrin mo Ol Kavenan 132:19.

  7. Luk long Doktrin mo Ol Kavenan 84:38.

  8. Doktrin mo Ol Kavenan 131:1–4

  9. Luk long Doktrin mo Ol Kavenan 132:19–20. “Ples ia we i moa hae—fasin blong kam olsem wan god long selestial kingdom—i lukluk nomo blong Jos Ia blong Jisas Kraes blong Ol Lata-dei Sent” (Dallin H. Oaks, “Kingdoms of Glory,” Liahona, Nov. 2023, 26).

  10. “Semmak olsem ol mared mo ol famli we oli serem wan spesel rilesensip we i fasem tugeta wan hasban mo waef we i krietem wan lav we i spesel, niufala rilesensip ia tu i semmak taem i fom mo fasem yumi tugeta tru long kavenan we i moa hae wetem … God” taem yumi mekem wan mared kavenan we i niu mo i no save finis (Russell M. Nelson, Heart of the Matter, 41–42).

  11. Doktrin mo Ol Kavenan 42:22luk tu long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 38.6.16. Long toktok raon blong mared long ples ia, Mi stap minim mared we i folem loa blong God, we i tijim se mared we i stret mo i folem loa we i joen bitwin wan man mo wan woman (Luk long “Famli: Wan Ofisol Toktok I Go long Wol, “Gospel Laebri).

  12. Luk long “Famle: Wan Ofisol Toktok I Go long Wol,” Gospel Laebri.

  13. Luk long Doktrin mo Ol Kavenan 42:22–24.

  14. Dallin H. Oaks, “Kingdom blong Glori,” 29; oli ademap long italik.

  15. Luk long Doktrin mo Ol Kavenan 86:8–11; 113:8; Ebraham 2:9–11.

  16. Luk long Jeneral Hanbuk, 38.4.1.

    Taem mi stap givim seves olsem wan ful taem misinari long Switselan, kompanion blong mi mo mi i serem gospel wetem wan naesfala kapol we i gat 60-yia. Taem mitufala i tijim kapol ia abaot gospel blong Jisas Kraes we i bin kambak, woman ia i soem bigfala intres long wanem we mitufala i stap tijim. Long samfala wik i pas, hem i kasem wan testemoni blong trutok ia se Jos blong Jisas Kraes i bin kambak, wetem stret atoriti blong God, mo se Jisas Kraes i stap lidim Jos blong Hem tru long ol profet mo aposol we oli stap laef tedei. Mifala i luk fored blong tijim kapol ia abaot wan long ol impoten doktrin blong Restoresen, mo janis ia blong mared we i no save finis. Be, wetem sapraes, taem mitufala i tijim kapol ia abaot doktrin blong mared we i no save finis, woman Switselan ia i talem se hem i no intres blong stap wetem hasban blong hem blong taem we i no save finis. Long hem, heven i no blong stap wetem hasban blong hem we hem i maredem blong 36 yia. Sista ia i bin kasem baptaes, be hasban blong hem i no baptaes. Tufala i neva sil long tempol.

    Be, long plante, heven i no save kam heven sapos wan i no stap wetem hasban o waef we hem i maredem. Blong stap tugeta wetem hasban o waef we yu lavem, blong taem we i no save finis, hem ia i olsem heven. Olsem Elda Jeffrey Holland i serem abaot dia waef blong hem we i lavem tumas , Pat, Heven bae i no kam heven taem hem i no stap (luk long “Scott Taylor: For Elder Holland, Heaven without His Wife and Children ‘Wouldn’t Be Heaven for Me,’” Jos Nius, Julae 22, 2023).

  17. Luk long Dallin H. Oaks, “Ol Kingdom blong Glori,” 26.

  18. Russell M. Nelson, “Selestial Mared,” 94.

  19. Luk long Jon 15:16.