Ol Tempol, Ol Haos blong Lod long Evri Ples Raon long Wol
Taem yu klin inaf mo prea blong kam long tabu haos blong Hem, bae yu fulap wetem paoa blong Hem.
?Yu yu no laekem ol naesfala toktok we yumi jes singsing long hem? “Mi helpem, sapotem, mi mekem yu stanap, … From we mi gat paoa, gat paoa i stap.” Lod i stap mekem Ol Sent blong evri taem oli kam moa strong taem oli kam insaed long tabu haos blong Hem. Ol yut stat long Kinsasa, Zollikofen, Fukuoka kasem Oklan, oli mekem olgetawan blong go long tempol mo oli fulumap ples blong baptaes long tempol. Long bifo, plante long olgeta we oli wok insaed we yumi lavem tumas, oli gat ol waet hea—be naoia i nomo gat. Ol misinari we oli singaotem olgeta, ol seves misinari mo ol riten misinari, oli stap raon long evri kona. Raon long wol i gat wan filing we i stap gro mo stap pulum yumi i kam kolosap long haos blong Lod.
Wan yia nomo i pas, wan dia famli fren, we hem i gat 95 yia, i stap long Is Kos blong Yunaeted Stet, we oli misinari oli bin tijim hem blong 70 yia, i talem long pikinini gel blong hem, “Mi wantem go long tempol wetem yu.”
Gel blong hem i ansa, “Okei mama, be faswan, yu mas kasem baptaes.”
“Okei,” hem i ansa, “i stret, mi wantem blong kasem baptaes.” Hem i bin kasem baptaes. Sam dei i pas, hem i go kwaet insaed long ples blong baptaes long tempol. Mo wan manis nomo i pas, hem i kasem endaomen mo siling blong hemwan. “Save mo paoa blong God i stap kam bigwan; vel we i seperetem wol i stat open.”2
?Yu eva tingting se from wanem Lod bae i givim daereksen long profet blong Hem naoia blong putum ol tempol blong Hem raon long wol?3 ?From wanem Hem i mekem olsem, long spesel taem ia, givim wanem we ol kavenan pipol blong Hem oli nidim blong kam antap gud tru long ol tabu taeting blong olgeta, blong oli save bildim handred long ol haos blong Lod?
Long moning ia, Presiden Oaks i soem wan naesfala pikja blong ol tempol we oli stap bildim raon long wol. Mi mo Kathy i jes kambak nomo long Filipin. Tingting long merikel ia: Oli dediketem Manila Tempol long 1984. Bae i 26 yia nao bifo oli finisim nambatu tempol long Cebu Siti long 2010. Naoia, 14 yia i pas, i gat 11 tempol we oli stap bildim, oli disaenem o rere long hem blong oli dediketem. Stat long not kasem saot: Laoag, Tuguegarao, Santiago, Urdaneta, Alabang, Naga, Tacloban Siti, Iloilo, Bacolod, Cagayan de Oro, mo Davao. !Hem i bigfala sapraes tumas blong luk ol naesfala wok blong God!
Raon long wol, ol haos blong Lod oli stap kam kolosap moa long yumi. ?From wanem long dei blong yumi?
Ol Las Dei
Lod i wonem se long ol las dei, bae i gat harem nogud long medel blong ol nesen,4 ol pipol bae “oli save tingbaot olgeta nomo,”5 evri samting bambae oli muvmuv olbaot,”6 fasin blong gat tu tingting bae i kam bigwan,7 mo “hat blong man [bae] i nomo strong.”8 I tru, mifala i bin luk hat blong ol man mo woman we i nomo strong: ol naes samting blong wol, ol samting mo voes we i pulumaot tingting, oli no wantem gro long saed blong spirit, les blong wantem stap olsem wan disaepol.9 Maet yu no bin glad taem yu bin luk wan we yu lavem, we long wan taem, hem i bin tokbaot wetem tru hat, fet blong hem long Jisas Kraes, serem witnes blong hem abaot Buk blong Momon, mo wantem tumas blong help bildimap kingdom blong God, kwiktaem i muvaot, be blong naoia nomo, aot long ol bilif blong hem mo long Jos. !Kaonsel blong mi long yufala i blong no lusum hop! Evri samting i gud. I no gat wan samting we i strong tumas, we God i no save mekem.10
Wetem profesi ia blong ol samting we i muvmuv olbaot mo fasin blong no bilif long wol, Lod i givim promes se bae i gat wan kavenan pipol, wan pipol we oli gohed strong blong stap wet from taem we bae Hem i kambak; wan pipol we oli stanap long ol tabu ples mo oli no muvaot long ples blong olgeta.11 Hem i tokbaot wan pipol we oli stret mo gud oli stanap strong agensem ol giaman blong devel, holemtaet fet blong olgeta, stap tingting selestial, mo stap trastem fulwan Sevya, Jisas Kraes.
?From wanem naoia, Lod i stap karem handred long ol tempol blong Hem i kam kolosap moa long yumi? Wan risen i we long medel blong ol noes mo ol temtesen blong wol, Hem i promes blong mekem i kam strong mo blesem Ol kavenan Sent blong Hem mo ol promes blong Hem oli stap hapen.
Ol promes blong Ketlan Tempol
?Olsem wanem nao ol tabu haos ia oli mekem yumi kam strong, givim kamfot mo protektem yumi? Yumi faenem wan ansa long ol toktok blong Profet Josef Smit long taem blong dedikesen blong Ketlan Tempol. I bin insaed long tempol ia we Ol Sent oli bin singsing, “Singsing mo singaot wetem ol man long heven.”12 Sevya Hemwan i kamkamaot, mo ol profet blong bifo oli bin kambak, blong putumbak sam moa prishud ki blong gospel we i bin kambak.13
Long tabu taem ia insaed long Ketlan Tempol, profet i prea se, insaed long tabu haos blong Lod, Ol Sent bae oli fulap wetem paoa blong God, se nem blong Jisas Kraes bae i stap long olgeta, se ol enjel blong Hem bae oli lukaotem gud olgeta mo se bae oli gro long Lod mo kasem Tabu Spirit we i fulwan.14 Ol toktok blong prea ia oli kamtru long laef blong yumi taem yumi fetful blong wosip insaed long haos blong Lod.
Fulap wetem Paoa
Insaed long haos blong Hem, yumi kasem endaomen stret wetem paoa blong Hem.15 Fet blong yumi long Jisas Kraes mo lav blong yumi long Hem oli konfem mo oli protektem yumi. Yumi save stret long saed blong spirit abaot tru aedentiti blong yumi mo stamba tingting blong laef.16 Taem yumi stap fetful, yumi kasem blesing blong proteksen long ol temtesen mo ol samting we i stap pulumaot tingting blong yumi. Yumi filim lav blong Sevya blong yumi taem Hem i leftemap yumi aot long ol hadtaem mo ol harem nogud. Yumi fulap wetem paoa blong God.
Nem blong Hem long Yumi
Insaed long tabu haos blong Hem, yumi tekem nem blong Hem moa fulwan long yumi. Taem yumi kasem baptaes, yumi talemaot bilif blong yumi long Hem mo tingting blong yumi blong wantem obei ol komanmen blong Hem. Insaed long tempol, yumi mekem tabu promes, tru long ol kavenan blong yumi blong folem Hem blong oltaem.
Ol yut blong Jos ia, oli gud tumas. Long wan wol we i had tumas, oli tekem long olgetawan nem blong Kraes. Insaed long Heba Siti, Yuta, oli holem wan miting blong toktok raon long ol ditel blong wan tempol we oli mekem plan blong bildimap. Tri handred long ol yut we oli fulumap wan pak narasaed blong soem sapot long tempol ia we oli bin proposem. Wan yang man, we i stap toktok long ol lida blong gavman long wan open miting, mo wetem strong paoa long tingting, hem i eksplenem se “Mi stap hop blong mared long tempol ia. [Tempol bae i helpem] mi blong kipim miwan mi klin mo klin evriwan.” Wan narawan i tokbaot tempol olsem wan saen blong laet mo hop. Ol yang man mo woman blong Jos truaot long wol oli stap holemtaet nem blong Jisas Kraes.17
Ol Enjel i stap wetem Yumi
Insaed long Ketlan Tempol, Profet Josef i bin prea se “ol enjel [bae] oli lukaotem gud [Ol Sent blong Hem].”18 Oltaem stap mekem ol odinens blong ol bubu blong yumi insaed long tempol, i tekem i kam wan naes mo stret save se, laef i gohed bitim vel.
Nomata se plante long ol eksperiens blong yumi insaed long haos blong Lod oli tabu tumas blong serem long pablik, sam, yumi save serem. Foti yia i pas, taem mi stap long Florida, mi mo Kathy i travel i go long tempol long Atlanta, Jojia. Long Wenesdei naet, 9 Mei, 1984, taem mifala i finisim wan sesen insaed long tempol, wan odinens woka i kam kolosap long mi mo askem sapos mi gat taem blong mekem wan odinens nomo blong stap redi. Nem blong man we bae mi ripresentem mi no stap harem tumas. Nem blong hem i Eleazer Cercy.
Long nekis dei, tempol i fulap long Ol Sent. Taem mi rere blong mekem nambatu endaomen blong mi blong dei ia, oli givim nem blong man we bae mi ripresentem. Long sapraes blong mi, nem ia i semmak nem blong wan we mi bin luk long las naet, Eleazer Cercy. Mi bin filim Spirit blong Lod taem we endaomen i komplit. Afta, long aftenun, mi stap yet long tempol, Kathy i luk wan olfala famli fren, Sista Dolly Fernandez, we naoia i stap long Atlanta. From i no gat wan man memba blong famli we i stap wetem hem, hem i askem sapos i posibol long mi blong save help long siling blong papa blong hem, i go long papa mo mama blong hem. Yes, mi glad wetem respek.
Taem mi nildaon long en blong olta from tabu odinens ia, mi harem wan moa taem bakegen nem we i stap finis long maen blong mi, papa blong hem, Eleazer Cercy. Mi bilivim fulwan se blong stap folem laef ia, bae mi mitim mo haggem wan man we oli bin save long laef blong hem long wol ia olsem Eleazer Cercy.
Plante long ol eksperiens blong mitufala insaed long haos blong Lod i givim pis mo bigfala glad mo kwaet revelesen moa bitim blong pat long wan so. Gat hop se: !ol enjel oli gat kontrol ova long yumi!
Wan Presen blong Tabu Spirit we i Fulwan.
Oli givim presen ia blong Tabu Spirit long yumi taem oli konfemem yumi i kam wan memba blong Jos Ia. Evri wik taem yumi klin inaf blong tekempat long bred mo wota, blong stap tingbaot Sevya blong yumi, oli promesem long yumi se oltaem bae Spirit blong Hem i stap wetem yumi.19 Taem yumi kam wetem ol wiling hat insaed long haos blong Lod, we i nambawan tabu ples long wol, yumi gro long Lod mo save “kasem Tabu Spirit we i fulwan.”20 Tru long paoa blong Tabu Spirit, pis mo glad mo hop bae i fulumap yumi we i nogat toktok blong tokbaot.21 Yumi kasem paoa blong stap gohed olsem ol disaepol blong Hem iven taem yumi faenem yumiwan aotsaed long ol tabu ples.
Presiden Russell M. Nelson i bin talemaot se: “Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori.”22 Blong stap putum ol haos blong Lod raon long wol i wan bigfala wok mo merikel we i stap hapen.23
Ol dia fren blong mi we mi lavem tumas, sapos yumi bin save mo no save yet blong kam antap blong stap go long tempol, letem yumi faenem moa taem oltaem blong wosip insaed long haos blong Lod. Letem yumi prea from ol tempol we oli bin anaonsem se oli save pem ol propeti, se ol gavman bae oli apruvum ol plan, se ol wokman we oli gat ol talen blong wok bae oli luk ol presen i moa klia, mo se tabu dedikesen bae i mekem ol heven i apruvum mo ol enjel blong oli kam visit.
Ol promes
Tempol hem i stret haos blong Lod. Mi promesem yufala se taem yufala i klin inaf blong kam mo prea from tabu haos blong Hem, bae yufala i fulap wetem paoa blong Hem, nem blong Hem bae i stap long yufala, ol enjel blong Hem bae oli lukaotem gud yufala, mo bae yufala i gro i kam antap long ol blesing blong Tabu Spirit.
Lod i promes se, “Evri sol we i livim sin blong hem mo i kam long mi, mo i singaotem nem blong mi, mo i obei long voes blong mi, mo i stap obei long ol komanmen blong mi, bambae hem i luk fes blong mi mo save se mi mi stap.”24 I gat plante defren wei blong luk fes blong Kraes, mo i no gat ples we i moa gud bitim tabu haos blong Hem.25
Long dei ia blong gat tu tingting mo plante noes, mi testifae se tempol i tabu haos blong Hem mo bae i help blong sevem yumi, protektem yumi, mo mekem yumi rere from dei ia we i fulap long glori, taem, we evri tabu enjel blong Hem, Sevya blong yumi, i kambak wetem paoa mo bigfala glori. Long nem blong Jisas Kraes, amen.