Klin Wei blong Doktrin blong Kraes We i Gat Moa Paoa

Sam yia i pas, mi mo waef blong mi, Ruth, mo gel blong mitufala, Ashley, i joen wetem ol nara turis long wan smol kayak trip long stet blong Hawae long Ol Yunaeted Stet. Wan kayak i stap daon nomo kolosap long wota, olsem kenu we man blong patel i sidaon fesem fored mo yusum wan parel we i flat long tugeta saed blong patel long fored i kam biaen long wan saed mo afta nara saed. Plan i blong patel i go long 2 smol aelan we i stap aotsaed long Oahu mo kambak. Mi no fraet, from, olsem wan yang man, mi bin stap patel long kayak finis krosem ol lek blong ol hil. Bigfala hae tingting i neva go gud, ?i tru?

Gaed blong mifala i givim instraksen mo soem long mifala kayak we bae mifala i yusum long solwota. Oli defren long wanem we mi bin yusum blong patel long hem bifo. Mi sud sidaon antap long kayak, be i no insaed long hem. Taem mi go insaed long kayak, mi filim se weit blong mi i mekem kayak i no balens gud long wota.

Taem mifala i stat blong go aot, mi patel hariap bitim Ruth mo Ashley. Sam taem i pas, mi stap go fored bitim tufala. Nomata we mi praod long spid blong mi, mi stop blong patel mo wet long tufala blong kam. Wan bigfala wef—samples 13 sentimeta¹—i bangem saed blong kayak blong mi mo kapsaetem mi go insaed long wota. Taem mi mi tanembak kayak i kam antap mo traehad blong gobak antap long kayak, Ruth mo Ashley i kam bitim mi i go, be mi taet tumas blong stat patel bakegen. Bifo mi save pulum gud win blong mi, wan nara wef, be hemia i moa bigwan—kolosap 20 sentimeta²—i bangem kayak blong mi mo kapsaetem mi bakegen. Taem mi stretem gud kayak bakegen, win blong mi i finis gud mo mi fraet se bae mi nomo save go antap.

Gaed i luk situesen blong mi, i pul i kam long mi mo holemtaet kayak blong mi, mekem isi long mi blong go antap. Taem hem i luk se mi taet tumas blong patel miwan, hem i fasem wan rop long kayak blong mi mo stat blong patel mo pulum mi go wetem hem. I no longtaem afta, mi pulum gud win mo stat blong patel gud bakegen miwan. Hem i lego rop, mo mi patel miwan kasem fas aelan. Taem mifala i kasem aelan ia, mi ledaon long sanbij from mi taet tumas.

Afta we grup i spel gud, gaed i kam mo talem long mi, “Mista. Renlund, sapos yu stap gohed blong patel, mo kipim semmak paoa mo spid ia, mi ting se bae yu oraet.” Mi folem advaes blong hem taem mifala i patel i go long seken aelan mo afta kambak long ples blong stat. Tu taem, gaed i patel i kam kolosap long mi mo talem se mi stap mekem gud. Nomata ol bigfala wef oli bangem saed blong kayak blong mi, be mi no bin kapsaet.

Wetem stret wei blong stap patel long kayak, mi kipim paoa mo spid blong stap muv i go fored mo save holemtaet paoa blong ol wef we i stap fas long saed blong hem. Semfala prinsipol ia i aplae long laef blong yumi long saed blong spirit. Yumi nomo sef taem yumi slo daon, mo speseli taem yumi stop.³ Taem yumi kipim paoa mo spid long saed blong spirit blong gohed blong stap “patel” i go long Sevya, bae yumi gat sefti mo sekiuriti oltaem from laef blong yumi we i no save finis i dipen moa long fet blong yumi long Hem.⁴

Yumi krietem paoa mo spid long saed blong spirit “truaot laef blong yumi taem yumi stap ripitim blong laef folem doktrin blong Kraes.”⁵ Taem yumi mekem olsem, Presiden Russell M. Nelson i tijim, hemia i krietem wan “klin wei we i gat moa paoa.”⁶ I tru, ol pat blong doktrin blong Kraes—olsem fet long Lod Jisas Kraes, sakem sin, gat wan kavenan rilesensip wetem Lod tru long baptaes, kasem presen ia we i Tabu Spirit, mo stanap strong kasem en⁷—oli no ol lis blong ol samting we yumi eksperiensem olgeta long wan taem nomo mo tikim bokis mo fogetem olgeta. Long wan stret wei, “blong stanap strong kasem en” i no wan seperet step long doktrin blong Kraes—olsem se yumi komplitim ol fasfala fo pat ia, afta stap nomo, stap kakae tut blong yumi mo stap wet blong ded. No, blong stanap strong kasem en, i blong stap ripitim oltaem, bakegen mo bakegen ol nara pat blong doktrin blong Kraes, mo krietem “klin wei we i gat moa paoa” we Presiden Nelson i bin tokbaot.⁸

Ripit oltaem i minim se yumi eksperiensem ol fo pat blong doktrin blong Kraes bakegen mo bakegen truaot laef blong yumi. Ripit bakegen mo bakegen i minim se evri taem we yumi ripitim wanwan pat ia, yumi stap kam moa gud. Nomata we yumi ripitim ol pat ia, yumi no stap raonraon nomo long sekol mo no go fored long wan stret rod. Be, yumi go moa kolosap long Jisas Kraes tru long sekol ia.

Paoa mo spid i tekem tugeta spid mo daereksen.⁹ Sapos mi patel kwik tumas long kayak mo go long rong rod, bae mi save krietem bigfala paoa mo spid, be bae mi no save kasem ples we mi wantem go long hem. Semmak, long laef, yumi nidim blong “patel” i go long Sevya blong kam long Hem.¹⁰

Yumi nidim blong fidim fet blong yumi long Jisas Kraes evri dei.¹¹ Yumi fidim fet ia taem yumi prea evri dei, stadi long skripja evri dei, luklukbak long ol gudgudfala fasin blong God evri dei, sakem sin evri dei, mo folem smol voes blong Tabu Spirit evri dei. Semmak olsem we i no helti blong yumi no kakae ol kaekae blong yumi be wet kasem Sandei nomo, afta yumi kilim yumi wetem plante kakae wantaem, hem i no helti tu long saed blong spirit blong givim kaekae long testemoni blong yumi wan dei nomo long wik.¹²

Taem yumi tekem responsabiliti long testemoni blong yumiwan,¹³ yumi kasem paoa mo spid long saed blong spirit, mo sloslo yumi developem fandesen we i fet long Jisas Kraes, mo doktrin blong Kraes i kam stamba tingting blong laef.¹⁴ Semmak taem yumi traehad blong obei ol loa blong God mo sakem sin, i bildim paoa mo spid. Sakem sin i givim glad mo letem yumi lanem samting aot long ol mistek blong yumi, we i olsem wanem yumi progres long taem we i no save finis. Bae yumi gat ol taem we yumi kapsaet long ol kayak blong yumi, mo swim long dip wota. Tru long fasin blong sakem sin, yumi save kambak antap mo gohed, nomata hamas taem yumi foldaon.¹⁵ Impoten pat hem i we yumi no givap.

Nekis pat blong doktrin blong Kraes i baptaes, we i tekem baptaes long wota mo, konfemesen we i baptaes blong Tabu Spirit.¹⁶ Baptaes i hapen wan taem nomo, be taem yumi tekem sakramen oltaem, yumi stap ripitim blong riniu kavenan blong baptaes blong yumi. Sakramen i no tekemples blong baptaes, be i joenem ol pat blong doktrin blong Kraes—fet mo fasin blong sakem sin—wetem konfemesen blong Tabu Spirit.¹⁷ Taem yumi tekem sakramen wetem tru tingting,¹⁸ yumi invaetem Tabu Spirit i kam long laef blong yumi, i semmak olsem taem yumi baptaes mo kasem konfemesen.¹⁹ Taem yumi kipim kavenan we oli eksplenem long ol prea blong sakramen, Tabu Spirit i kam kompanion blong yumi.

Taem Tabu Spirit i stap putum moa paoa long laef blong yumi, yumi stap gohed blong developem ol fasin olsem hemia blong Kraes bakegen mo bakegen. Ol hat blong yumi i jenis. Fasin blong yumi blong mekem nogud i go daon. Fasin blong yumi blong mekem gud i kam antap kasem taem we yumi wantem nomo “blong gohed blong mekem gudfala fasin oltaem.”²⁰ Mo long wei ia yumi gat paoa ia blong heven we yumi nidim blong stap strong kasem en.²¹ Fet blong yumi i gro i kam antap, mo yumi rere blong ripitim bakegen klin wei we i gat moa paoa.

Paoa mo spid long saed blong spirit i pusum yumi tu blong go fored blong mekem ol nara kavenan wetem God insaed long haos blong Lod. Plante kavenan i karem yumi kam moa kolosap long Kraes mo joenem yumi moa strong i go long Hem. Tru ol kavenan ia, yumi gat moa raet blong kasem paoa blong Hem. Blong mekem i klia, ol kavenan blong baptaes mo tempol tufala i no stamba paoa ia. Stamba paoa hem i Lod Jisas Kraes mo Papa blong yumi long Heven Stap mekem mo kipim ol kavenan i krietem wan rod blong kasem paoa blong Tufala long ol laef blong yumi. Taem yumi laef folem ol kavenan ia, yumi kasem ful raet ia blong kasem evri samting we Papa long Heven i gat.²² Taem yumi laef folem doktrin blong Kraes, i krietem paoa mo spid we i no jenisim yumi nomo i kam ol stret pikinini blong God be tu i givim strong tingting long yumi blong helpem ol narawan long ol gudfala wei.

Tingting long olsem wanem gaed blong trip ia i helpem mi taem mi kapsaet long kayak. Hem i no singaot longwe nomo wetem wan kwestin we i olsem, “Mista Renlund, ?yu stap mekem wanem insaed long wota?” Hem i no patel i kam long mi mo tok strong long mi, se, Mista Renlund, yu no sapos blong stap long kaen situesen olsem sapos yu bin stap fit.” Hem i no stat blong pulum kayak blong mi taem mi stap traem blong gobak antap long hem. Hem i no bin korektem mi long fored blong grup. Be, hem i bin givim long mi help we mi nidim long taem we mi nidim. Hem i givim advaes long taem we mi rere blong akseptem. Mo Hem i kamaot long rod blong hem mo kam leftemap tingting blong mi.

Taem yumi givhan long ol narawan, yumi no nid blong askem ol kwestin we i no save help o talem ol samting we olgeta i luksave finis i stap. Plante pipol we oli stap fesem hadtaem oli save finis se oli stap long hadtaem. Yumi no stap jajem ol pipol; jajmen blong yumi i no save help o bae i mekem olgeta oli harem moa nogud.

Taem yumi stap komperem yumi wetem ol narawan, i save lidim yumi i go long ol bigfala mistek, speseli sapos yumi stap tekem se yumi moa stret mo gud bitim olgeta we oli stap fesem hadtaem. Kaen fasin ia blong stap komperem yu wetem ol narawan i olsem we yu stap draon long wota²³ we i 3 meta, stap luk olgeta long saed blong yu oli stap draon long wota²⁴ we i 4 meta, mo stap jajem hem se hem i mekem moa sin, mo yu filim gud abaot yuwan. Long en, yumi stap traehad long wei blong yumiwan. I no gat wan long yumi i winim fasin blong sevem man.²⁵ Yumi neva save mekem hemia. Jekob, long Buk blong Momon, i bin tijim, “tingbaot, afta we [yumi] stretem [yumi] wetem God, se i wetem mo tru long gladhat blong God nomo, we bae Lod i sevem [yumi].”²⁶ Yumi evriwan yumi nidim Atonmen blong Sevya we i no gat en, i no wan pat blong hem nomo.

Yumi nidim evri sore, evri andastaning mo lav taem yumi stap wok wetem olgeta we oli stap raon long yumi.²⁷ Olgeta we oli stap traehad “oli nid blong eksperiensem klin lav blong Jisas Kraes i kamaot long ol toktok mo ol aksen blong [yumi].”²⁸ Taem yumi givhan, yumi leftemap tingting blong ol narawan oltaem mo givim help. Nomata sapos wan i no akseptem, yumi gohed blong minista kasem taem oli letem. Sevya i bin tijim se “from olgeta olsem ia, bae yufala i gohed blong givhan long olgeta; from yufala i no save sapos bae oli kambak mo sakem sin, mo kam long mi wetem evri tingting blong hat mo bae mi mekem olgeta ia i kam oraet; mo bae yufala i stap olsem wei blong karem fasin blong sevem man i go long olgeta.”²⁹ Wok blong Sevya i blong hilim man. Wok blong yumi i blong lavem man—blong lavem mo givhan long wei we i save pulum man i kam long Jisas Kraes. Hemia i wan long ol frut blong klin wei blong doktrin blong Kraes we i gat moa paoa.

Mi invaetem yu blong laef folem doktrin blong Kraes oltaem, bakegen mo bakegen, wetem tru tingting mo helpem ol narawan long rod blong olgeta. Mi testifae se doktrin blong Kraes i stamba blong plan blong Papa long Heven; from doktrin ia i doktrin blong Hem. Taem yumi yusum fet blong yumi long Jisas Kraes mo Atonmen blong Hem, i putum yumi long rod blong kavenan mo i mekem yumi wantem helpem ol narawan oli kam fetful disaepol blong Jisas Kraes. Yumi save gat raet ia long kingdom blong Papa long Heven, we i save kam nomo tru long laef folem doktrin blong Kraes, long nem blong Jisas Kraes, amen. Long nem blong Jisas Kraes, amen.