Jeneral Konfrens
Hem I Waes Tingting blong Lod Se Yumi Mas Gat Buk blong Momon
Epril 2024 jeneral konfrens

Hem I Waes Tingting blong Lod Se Yumi Mas Gat Buk blong Momon

I Kam long Mark L. Pace

Sandei Skul Jeneral Presiden

Hem i prea blong mi se blong stap ridim Buk blong Momon long yia ia, bae i wan glad mo wan blesing blong wanwan long yumi.

Ol dia brata mo sista. Tangkyu blong stap traehad blong stap ridim olgeta skripja wetem Kam Folem Mi. Tangkyu from evri samting we yu stap mekem. Evri dei we yu joen wetem God mo ol toktok blong Hem, i gat ol nogud saed blong hem we i bigwan tumas. “Yufala i stap putum fandesen blong wan bigfala wok.” Mo aot long ol smol samting, ol samting we oli bigwan oli kamaot.”1

Stap ridim ol tijing blong Sevya long olgeta skripja i helpem yumi jenisim ol hom blong yumi i kam ol tabu haos blong fet mo ol senta blong stap lanem gospel.2 Hem i invaetem Spirit long ol hom blong yumi. Tabu Spirit i fulumap ol sol blong yumi wetem glad3 mo jenisim laef blong yumi olsem ol disaepol blong Jisas Kraes blong ful laef.

Ova sam yia we i pas, taem ridim ol tabu skripja, mifala i luk (tru long riding mo stadi) bigfala pikja ia blong ol tijing blong God we i givim long ol pikinini blong Hem long evri bigfala dispensesen blong gospel.4

Long evri dispensesen, yumi luksave wan paten. God i putumbak o soemaot gospel blong Jisas Kraes tru ol profet blong Hem. Ol pipol oli folem ol profet mo oli kasem blesing. Be, afta long sam taem, sam pipol oli stop blong folem ol toktok blong ol profet mo go longwe long Lod mo gospel blong Hem. Hemia i wanem yumi singaotem apostasi. Adam i fas wan blong kasem gospel, be sam long ol pikinini blong Adam mo Iv oli bin tanem baksaed long Lod long apostasi.5 Yumi luk wan paten blong restoresen mo apostasi we oli bin ripitim long ol dispensesen blong Inok, Noah, Abraham, Moses, mo ol narawan.

Tedei, yumi stap long dispensesen ia blong taem blong evri wok blong God i kamtru fulwan.6 Hemia i dispensesen ia nomo we bae i no en wetem apostasi.7 Hem i dispensesen ia nao we bae i priperem yumi from Seken Kaming blong Sevya Jisas Kraes mo taem we bae Hem i rul blong wan taosen yia.

?Wanem nao i defren long dispensesen ia? ?Wanem nao Lod i givim long yumi tedei, speseli long taem blong yumi, we bae i helpem yumi kam klosap long Sevya mo neva lego Hem?

Wan ansa we i kam long maen blong mi hem i olgeta skripja—speseli Buk blong Momon: Wan Narafala Testeman blong Jisas Kraes.

Taem God i promes se bae i neva gat wan nara bigfala apostasi, yumi nid blong tingting gud mo lukaot gud blong no gat wan apostasi blong yumiwan —tingbaot, olsem we Presiden Russell M. Nelson i bin tijim, “Wanwan long yumi i responsibol blong gro long saed blong spirit blong yumiwan.”8 Blong stap ridim Buk blong Momon, olsem we yumi stap mekem long yia ia, oltaem i karem yumi kam moa klosap long Sevya—mo i helpem yumi stap klosap long Hem.

Yumi singaotem se “stadi,” mo i gud from hemia i nidim blong wokhad. Be yumi no nid blong lanem sam niu samting oltaem. Samtaem blong stap ridim Buk blong Momon hem i blong gat filing ia blong joenem yumi long God tedei—fidim sol, blong stap kam strong moa long saed blong spirit bifo go aot blong fesem wol, o kasem hiling afta wan rabis dei long wol.

Yumi stadi ol skripja mekem se Tabu Spirit, we i hae tija, i save jenisim laef blong yumi moa i go long Papa long Heven mo Jisas Kraes, mo helpem yumi kam moa olsem Tufala.9

Wetem olgeta tingting ia long maen, yumi save askem, ?“Wanem nao Tabu Spirit i tijim yumi long wik ia taem yumi stadi long Buk blong Momon?” mo ?“Olsem wanem nao i mekem yumi kam moa klosap long Sevya?”

Hemia ol gudfala kwestin blong skripja stadi blong yumi long hom. Oli ol gud kwestin tu blong statem wan Sandei skul klas long jos. Yumi mekem tijing blong yumi i kam moa gud long jos long Sandei taem yumi stap lan moa gud long hom long wik. Taswe, long ol Sandei klas blong yumi, “hem we i prij mo hem we i kasem toktok, tufala i andastanem tufala bakegen, mo tufala i kam antap mo stap glad tugeta.”10

Hemia sam long ol ves we Spirit i putum long maen blong mi long stadi blong Buk blong Momon long wik ia:

  • Nifae i tijim Jekob blong “mas sevem ol buk ia mo pasem i go daon … stat long wan jeneresen i go long narafala jeneresen. Mo sapos i gat ol toktok we oli tabu, o revelesen … o profesi,” Jekob i mas “raetem … olgeta samting ia long ol buk ia … blong helpem ol pipol blong [olgeta].”11

  • Afta Jekob i testifae, “Mifala i stadi olgeta [skripja], … mo from mifala i gat ol witnes ia mifala i kasem wan hop; mo fet blong mifala i kam we i nomo seksek.”12

Ol ves ia i mekem mi tingbaot wanem Nifae i talem bifo abaot ol gol buk:

“Mo mifala i bin kasem ol histri ia … mo mifala i bin stadi gud histri ia, mo faenemaot se hemia ol samting we … i gat bigfala yus long mifala, inaf blong mekem se mifala i save sevem ol komanmen blong Lod long ol pikinini blong mifala.

“Taswe, hem i bin waes tingting long Lod we mifala i mas karem ol histri ia wetem mifala, long taem we mifala i bin wokbaot tru long waelples i go long graon blong promes.”13

Nao sapos hemia i bin waes tingting blong Lihae mo famli blong hem blong gat ol skripja, hem i mas waes samting tu blong yumi. Paoa blong skripja mo hamas i impoten i gohed blong laet strong long ol laef blong yumi tedei.

I neva gat wan pipol long histri we oli gat Buk blong Momon mo ol nara skripja we yumi stap glad long hem tedei.14 Yes, i wan blesing blong Lihae mo famli blong karem wetem olgeta ol gol plet, !be oli no gat kopi blong olgetawan! Impoten kopi blong Buk blong Momon hem i kopi blong yumiwan. Hem i kopi we yumi stap ridim.

Long visen blong Lihae abaot tri blong laef, Lihae i bin tijim yumi hamas eksperiens blong yumiwan wetem lav blong God i impoten. Afta we hem i kakae frut, Lihae i bin luk waef blong hem, Saraea, mo tufala boe blong hem Nifae mo Sam we oli stap longwe smol.

“Mo oli bin stanap olsem we oli no save se bae oli go wea.

“… Mi sakem han long olgeta,” Lihae i talem, mo tu, mi singaot bigwan long olgeta blong oli mas kam long mi mo tekem mo kakae frut ia, we i gud bitim ol narafala frut.

“Mo … oli kam long mi, mo oli tekem mo kakae frut ia tu.”15

Mi laekem eksampol blong Lihae olsem wan gudfala paren. Saraea, Nifae, mo Sam oli stap long wan laef we i stret mo gud. Be Lod i gat wan samting we i moa gud, wan samting we i moa swit blong olgeta. Oli no bin save wea blong faenem samting ia, be Lihae i faenem. Mekem se hem i singaotem olgeta, “bigwan,” blong kam long tri blong laef mo blong olgetawan oli kakae frut ia. Daereksen blong hem i bin klia. I no gat wan se i no andastanem.

Mi mi wan prodak blong sem kaen gudfala paren olsem Lihae.16 Taem mi bin wan yang boe, ating mi gat 11 o 12 yia, mama blong mi askem, “Mark, ?yu save yuwan, tru long Tabu Spirit, se gospel i tru?”

Mi sapraes long kwestin ia. Mi bin traem oltaem blong stap olsem wan “gud boe,” mo mi ting se hemia i inaf. Be mama blong mi olsem Lihae, i bin save se i nidim wan samting moa. Mi nidim blong mekem mo faenemaot blong miwan.

Mi ansa se mi no bin gat eksperiens ia yet. Hem i no bin sapraes nating long ansa blong mi.

Afta hem i talem wan samting we mi neva fogetem. Mi tingbaot ol toktok blong hem kasem tedei: “Papa long Heven i wantem yu blong faenemaot blong yuwan. Be yu mas hadwok from. Yu nidim blong ridim Buk blong Momon mo prea blong save tru long Tabu Spirit. Papa long Heven bae i ansarem ol prea blong yu.”

I tru, mi neva ridim Buk blong Momon bifo. Mi no ting se mi bigwan inaf blong ridim Buk blong Momon. Be mama blong mi i bin save gud moa.

Kwestin blong hem i mekem se mi wantem faenemaot blong miwan.

So evri naet long bedrum we mi serem wetem tufala brata blong mi, mi onem laet antap long hed blong mi mo ridim wan japta long Buk blong Momon. Afta, mi ofem laet, mi glisaot long bed blong mi mo nildaon mo prea. Mi prea moa wetem tru hat mo wetem tingting blong wantem save moa bitim we mi bin stap mekem bifo. Mi askem Papa long Heven blong plis letem mi save se Buk blong Momon i tru.

Long taem we mi statem ridim Buk blong Momon, mi filim se Papa long Heven i luksave hadwok blong mi. Mo mi filim se mi mi impoten long Hem. Taem mi rid mo prea, ol filing blong pis mo kamfot i kam long mi. Japta afta japta, laet blong fet i stap gro bigwan insaed long sol blong mi. Folem taem, mi luksave se ol filing ia oli givim konfemesen blong trutok we i kam long Tabu Spirit.17 Mi bin kam blong faenemaot blong miwan se Buk blong Momon i tru, mo we Jisas Kraes i Sevya blong wol. Mi talem tangkyu from invitesen we mama blong mi i givim long mi tru insperesen.

Eksperiens ia blong stap ridim Buk blong Momon olsem wan boe i bin statem wan paten o fasin blong stadi skripja we i gohed blong blesem mi kasem tedei. Mi gohed blong ridim Buk blong Momon mo nildaon mo prea. Mo Tabu Spirit i konfemem ol trutok ia bakegen, mo bakegen.

Nifae i talem tru. Hem i bin waes tingting long Lod we yumi mas karem ol skripja ia wetem mifala truaot long laef blong mifala. Buk blong Momon i “ki ston” we i mekem dispensesen ia i defren long evri dispensesen blong bifo. Taem yumi stadi Buk blong Momon mo folem profet we i laef tedei, bae i no gat apostasi blong yumiwan long ol laef blong yumi.18

Invitesen ia blong kam long tri blong laef mo hang long toktok blong God i no wan invitesen nomo blong Lihae i go long famli blong hem, mo i no wan invitesen nomo we i kam long mama blong mi blong rid mo prea abaot Buk blong Momon. Hem i wan invitesen tu we i kam long profet blong yumi, Presiden Russell M. Nelson, long yumi wanwan.

“Mi promesem yufala se taem yufala i stap stadi long Buk blong Momon wetem prea evri deibambae yufala i save mekem ol moa gud desisen—evri dei Mi promes se taem yufala i tingting hevi long wanem yu stap stadi long hem, bae ol windo blong heven oli open, mo bae yu kasem ol ansa long kwestin blong yu, mo bae i olsem rod blong laef blong yuwan.”19

Hem i prea blong mi se blong stap ridim Buk blong Momon long yia ia bae i wan glad mo wan blesing blong wanwan long yumi mo bae i tekem yumi go moa klosap long Sevya.

Papa long Heven i laef. Jisas Kraes i Sevya mo Ridima blong yumi. Buk blong Momon i holem ol toktok blong Hem mo soem lav blong Hem. Presiden Russel M. Nelson i profet blong Lod we i stap laef tedei long wol. Mi save ol samting ia oli tru from Tabu Spirit i konfemem witnes blong hem, we i semmak witnes ia nao mi bin kasem taem mi stap ridim Buk blong Momon olsem wan boe. Long nem blong Jisas Kraes, amen.

Ol Not

  1. Doktrin mo Ol Kavenan 64:33.

  2. “Niufala tingting ia we bae oli putum insaed long kurikulom blong stap tijim gospel long hom mo Jos i sapotem i save givim paoa long ol famli, taem we wanwan famli i folem hemia wetem ful tingting mo kea blong jenisim hom blong olgeta i kam wan tabu ples blong fet. Mi promes se taem yu stap wok strong blong jenisim hom blong yu i kam wan senta blong lanem gospel, wetem taem bae ol Sabat dei blong yufala i kam wan glad. Ol pikinini blongyufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala mo hom blong yufala bae i kamdaon. Ol jenis insaed long famli blong yu bae i bigwan mo i sapotem yu” (Russell M. Nelson, “Blong Kam Ol Lata-dei Sent we I Givim Eksampol,” Liahona, Nov. 2018, 113).

  3. “I tru, i tru, mi talem long yu, bambae mi soemaot smol, Spirit blong mi, we bambae i givim laet long maen blong yu, we bambae i fulumap sol blong yu wetem glad” (Doktrin mo Ol Kavenan 11:13).

  4. Ol dispensesen oli ol longfala taem we Lod i gat wan wokman we i gat raet blong Hem, we i stap long wol ia mo i holem tabu prishud mo ol ki, mo i gat wan tabu hae wok ia blong serem gospel i go long ol pipol blong wol” (Topics and Questions, “Dispensations,” Gospel Library).

  5. Luk long Moses 5:12–16.

  6. Profet Daniel i bin luk dei blong yumi, dispensesen blong yumi, taem hem i intepretem drim blong Nebukadnesa. Jos Ia blong Jisas Kraes blong Ol Lata dei Sent hem i ston long drim ia, we i kamaot hemwan antap long wan bigfala hil, mo i rol i kam daon blong fulumap ful wol (luk long Daniel 2:34–35, 44–45; Doktrin mo Ol Kavenan 65:2).

  7. “God Papa mo Jisas Kraes i singaotem Profet Josef Smit, blong stap olsem profet blong dispensesen ia. Evri tabu paoa blong ol dispensesen blong bifo oli kambak bakegen tru long hem. Dispensesen ia blong taem we evri wok blong God i kamtru bae i no gat limit long taem mo ples. Bae i no en long apostasi, mo bae i fulumap wol” (Russell M. Nelson, “The Gathering of Scattered Israel,” Liahona, Nov. 2006, 79–80).

  8. Russell M. Nelson, “Ol Fas Toktok,” Liahona, Nov. 2018, 8.

  9. Luk long “Fasin blong Jenisim Laef Hem I Gol blong Yumi,” Kam Folem Mi—Blong Hom mo Jos: Buk blong Momon 2024, v.

  10. Doktrin mo Ol Kavenan 50:22; luk tu long ol ves 17–21.

  11. Jekob 1:3–4.

  12. Jekob 4:6.

  13. 1 Nifae 5:21–22.

  14. Oli jes anaonsem se 200 milian kopi blong Buk blong Momon we oli givimaot long dispensesen ia. Hemia i gud tumas. Oli bin transletem Buk blong Momon long 113 lanwis, wetem 17 niu translesen we i stap gohed naoia. Hem i wan blesing blong gat Buk blong Momon we oli printim, i stap long dijitol, long odio, vidio, mo ol nara fomat. (Luk long Ryan Jensen, “Church Distributes 200 Millionth Copy of the Book of Mormon,” Church News, Dec. 29, 2023, thechurchnews.com.)

  15. 1 Nifae 8:14–16; oli ademap italik.

  16. Laef we i gat moa paoa blong tajem laef blong wan pikinini hem i gud mo stret eksampol blong wan papa mo mama mo ol apu man mo apu woman we oli fetful blong kipim ol tabu kavenan blong olgeta. Ol paren oli tingting strong blong tijim ol pikinini blong olgeta fet long Lod Jisas Kraes, blong mekem se olgeta tu ‘oli save gat save long wanem ples oli save lukluk long hem blong kam klin aot long sin blong olgeta’ [2 Nifae 25:26]. Taem yu kipim kavenan samsam taem nomo yu kasem blesing blong spirit tu samsam taem nomo. Ol pikinini mo apu pikinini blong yumi oli spolem moa olgeta long saed blong spirit” (Kevin W. Pearson, “Are You Still Willing?,” Liahona, Nov. 2022, 69).

  17. Luk long Doktrin mo Ol Kavenan 6:22–23.

  18. Profet Josef Smit i talem: “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa klosap long God sapos hem i folem ol tijing blong hem, bitim eni narafala buk” (insaed long Fas Toktok long Buk blong Momon).

  19. Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat Buk Ia?,” Liahona, Nov. 2017, 62–63.