Ol Merikel, Ol Enjel, mo Prishud Paoa

Plante bae oli talem se i nomo gat ol merikel, ol enjel oli no tru, mo ol heven oli nomo open. Mi testifae se ol merikel oli no stop, ol enjel oli stap long medel blong yumi, mo ol heven oli open i stap.

Taem we Sevya blong yumi, Jisas Kraes, i stap long wol ia, Hem i givim ol prishud ki long hae jif Aposol blong Hem Pita.¹ Tru long ol ki ia, Pita mo ol narafala Aposol oli bin lidim Jos blong Sevya. Be taem ol Aposol ia oli ded, ol ki blong prishud ia oli tekemaot long wol ia.

Mi testifae se ol ki blong prishud blong bifo oli kambak finis. Pita, Jemes, mo Jon mo ol narafala profet oli bin kamaot long Profet Josef Smit wetem bodi we i laef bakegen long ded mo givim wanem we Lod i tokbaot olsem “ol ki blong kingdom blong mi, mo wan dispensesen blong gospel ia.”²

Ol semfala ki ia nao oli pasem long wan profet i go long narafala profet kasem tedei. Ol 15 man we yumi sastenem olgeta olsem ol profet, sia, mo reveleta oli yusum ol ki ia blong lidim Jos blong Sevya. Olsem long taem blong bifo, i gat wan senia Aposol we i holem mo i givim raet blong yusum evri prishud ki. Hem i Presiden Russell M. Nelson, profet mo Presiden blong Jos Ia blong Kraes long dei blong yumi: Jos Ia blong Jisas Kraes blong Ol Lata Dei Sent.

Tru long Jos blong Sevya, yumi kasem ol blesing blong prishud—wetem paoa blong God blong helpem yumi long laef blong yumi. Anda long raet blong ol prishud ki, yumi mekem ol tabu promes long God mo kasem ol tabu odinens we i mekem yumi rere blong laef wetem Hem. Stat wetem baptaes mo konfemesen, mo afta insaed long tempol, yumi muv i go fored long wan rod blong ol kavenan we i lidim yumi i gobak long Hem.

Wetem ol han antap long hed blong yumi, yumi kasem ol prishud blesing, wetem daereksen, kamfot, kaonsel, hiling mo paoa blong folem Jisas Kraes. Truaot long laef blong mi, mi bin kasem blesing we i kam long bigfala paoa ia. Olsem we oli talemaot long skripja, yumi lukluk long hem olsem paoa blong Melkesedek Prishud.³

Long yang taem blong mi, mi gat bigfala respek long paoa ia, speseli taem oli stap yusum blong givim ol prishud blesing. Taem mi stap givim seves olsem wan yang misinari long Jile, oli arestem mi mo kompanion blong mi mo oli seperetem mitufala. Oli neva talem long mitufala from wanem. Hem i long wan taem blong wan bigfala jenis long saed blong politik. Ol militeri polis oli bin arestem plante taosen pipol mo afta mifala i neva save wanem i hapen long olgeta.

Afta ansarem sam kwestin, mi sidaon miwan long presin rum, mo no save sapos bae mi save luk bakegen olgeta we mi lavem. Mi tanem mi i go long Papa blong mi long Heven, mo askem wetem ful hat blong mi: “Papa oltaem oli tijim mi se Yu stap lukaotem gud ol misinari blong Yu. Plis Papa, mi mi no spesel nating, be mi stap obei mo mi nidim help blong Yu tedei long naet.”

Ol sid blong help blong Hem oli bin planem plante yia i pas finis. Afta long baptaes blong mi, oli bin konfemem mi wan memba blong Jos mo givim long mi presen ia we i Tabu Spirit. Taem mi stap prea, miwan, biaen long ol aean blong presin, Tabu Spirit i kam stret long mi mo givim kamfot long mi. Hem i karem i kam long maen blong mi wan spesel pat blong toktok long petriakel blesing blong mi, we i wan narafala blesing blong prishud. Insaed long hem, God i promesem mi se sapos mi stap fetful bae mi save sil long tempol blong wan taem we i no save finis long wan woman we i naes tumas, i klin mo i gat lav, se bae mitufala i kam papa mo mama blong ol naesfala pikinini boe mo gel, mo se bae mi kasem blesing mo kam wan gud papa insaed long Isrel.

Ol toktok blong insperesen ia abaot fiuja blong mi, i fulumap sol blong mi wetem pis. Mi save se oli kam long wan Papa blong mi long Heven we i gat lav, we oltaem i kipim ol promes blong Hem.⁴ Long stret taem ia, mi bin kasem stret save se bae oli lego mi mi go fri mo laef blong luk ol promes ia blong oli kamtru.

Wan yia afta, Papa long Heven i blesem mi wetem wan waef we i naes tumas mo i gat klin fasin mo i gat lav. Mi mo Lynette i bin sil long tempol. Mitufala i gat blesing ia blong gat tri naesfala pikinini boe mo fo naesfala pikinini gel. Mi kam wan papa, folem ol promes blong God insaed long petriakel blesing blong mi we mi bin kasem taem mi gat 17 yia.

“Taswe, ol brata [mo ol sista] blong mi we mi lavem tumas, ol merikel oli bin stop from we Kraes i go finis antap long heven? …

“… No; mo tu, ol enjel oli no stop blong givhan long ol pikinini blong ol man.”⁵

Mi testifae se ol merikel mo ol wok blong givhan i stap gohed blong hapen long ol laef blong yumi, plante taem i kam stret tru long paoa blong prishud. Sam long ol prishud blesing oli hapen semtaem, long ol wei we yumi save luk mo andastanem. Ol narafalawan oli stap kamkamaot sloslo mo bae i no evriwan we bae yumi luk long laef ia. Be God i kipim evri promes blong Hem, oltaem, olsem we oli soem long stori ia blong famli histri blong mifala.

Abu man long saed blong papa, Grant Reese Bowen i wan man blong bigfala fet. Mi tingbaot smol nomo hem i talem stori ia olsem wanem hem i kasem petriakel blesing blong hemwan. Long jenol blong hem, hem i raetem: “Petriak i promesem mi presen ia blong stap hilim man. Hem i talem, ‘Ol sik bae oli kam oraet. Yes, ol ded bae oli girap tru long ol han blong yu.’”

Plante yia i pas, abu man i stap hipimap ol drae gras, taem hem i kasem wan filing blong gobak long haos. Hem i mitim papa blong hem we i stap kam kolosap long hem. Papa blong hem i talem, “Grant mama blong yu i jes ded nomo.”

Mi kwotem bakegen wanem i stap long jenol blong abu man: “Mi no bin stop, be mi hariap go insaed long haos mo aot long franda blong haos we hem i silip long wan bed. Mi lukluk hem mo luksave se i nogat wan saen se hem i laef. Mi tingbaot petriakel blesing blong mi mo promes se sapos mi stap fetful, tru long fet blong mi bae sik i kam oraet, mo bae ded i girap bakegen. Mi putum ol han blong mi antap long hed blong hem, mo mi talem long Lod se sapos promes we Hem i mekem long mi tru long petriak i bin tru, bae i mekem hemia i hapen long taem ia mo mekem mama blong mi i girap bakegen long ded. Mi promesem Hem se sapos Hem i mekem hemia, bae mi neva tingting tu taem blong mekem evri samting long paoa blong mi blong bildim kingdom blong Hem. Taem mi stap prea, hem i openem ae blong hem mo talem. ‘Grant, yu leftemap mi. Mi bin stap long spirit wol, be yu singaotem mi blong kambak. Letem hemia bae i stap oltaem wan testemoni long yu mo long ol narafala famli blong mi.’”

Presiden Russell M. Nelson i tijim yumi se blong lukaotem mo wet from ol merikel.⁶ Mi testifae se from se prishud i bin kambak bakegen, paoa mo raet blong God i stap long wol ia. Tru long ol koling mo ol kaonsel, ol man mo ol woman, yangfala mo olfala, oli save tekpat long prishud wok ia. Hem i wok blong ol merikel, we ol enjel oli lukaotem. Hem i wok blong heven, mo i blesem evri pikinini blong God.

Long 1989, famli blong mi we mifala i seven, mifala i stap kambak long wan aktiviti blong wod. Hem i let. Lynette i stap rere blong bonem namba sikis pikinini blong mitufala. Hem i gat wan strong filing blong werem sit bel blong hem, we hem i fogetem blong werem. Sot taem nomo mifala kam kolosap long kona, taem wan trak i krosem laen mo kam long laen blong mifala. Hem i stap ron long 112 kilometa long 1haoa, mi swingim trak blong no pagem trak we i stap kam. Mini bas blong mifala, i ski i go long hae wei, mo kamaot long rod mo i stop, we i putum saed blong pasenja long graon.

Nekis samting we mi tingbaot se mi harem hem i voes blong Lynette: “Shayne, yumi nid blong kamaot tru long doa blong yu.” Mi stap hang antap wetem sit bel blong mi. I tekem sam taem blong tingting i kam klia. Mifala i stat blong karemaot ol pikinini aot long mini bas tru long windo blong mi, we naoia hem i siling blong bas. Oli stap krae, wetem tingting se wanem i hapen.

I no longtaem mifala i luksave se gel blong mitufala we i gat 10 yia Emily i lus. Mifala i singaotem nem blong hem, be i nogat wan i ansa. Ol memba blong wod, we oli stap gobak long haos, oli stap long ples blong aksiden oli stap lukaotem hem. Ples i tudak. Mi lukluk andanit long mini bas ia wetem wan toj mo wetem fraet, mi luk smol bodi blong Emily i fas andanit long mini bas ia. Mi singaot wetem fraet, “Yumi nidim blong tekemaot mini bas long Emily.” Mi holemtaet ruf mo pulum i gobak biaen. I gat hamas man nomo we oli leftemap, be wetem merikel mini bas ia i swingraon mo sidaon long ol wil blong hem, mo putumaot bodi blong Emily i ded i stap.

Emily i no pulum win. Fes blong hem i stat blong i go blak. Mi talem, “Yumi nidim blong givim hem wan blesing.” Wan dia fren mo memba blong wod i nildaon long saed blong mi mo tru long raet blong Melkesedek Prishud, mo long nem blong Jisas Kraes, mifala i komandem hem blong i laef. Long taem ia nomo, Emily i pulum longfala rabis win.

Afta we i luk olsem plante aoa i pas, ambulens i jes kam. Oli hariap long Emily blong go long hospital. Lang blong hem i brok mo string blong ni blong hem i nogud. Oli wari long bren blong hem se i damej from smol taem ia we hem i no pulum gud win. Emily i stap long koma blong wan dei mo haf. Mifala i gohed blong prea mo livim kakae from hem. Hem i gat blesing ia blong kam gud evriwan. Tedei, Emily mo hasban blong hem, Kevin, oli mama mo papa blong sikis pikinini gel.

Wetem merikel, evriwan oli save wokbaot. Bebi we Lynette i stap karem hem i Tyson. Hem tu i no kasem wan kil, mo i bon i kam long wol long nekis Febwari. Eit manis afta, we hem i kasem wan bodi blong mit mo bun, Tyson i gobak hom long Papa long Heven. Hem i enjel we i stap lukaotem mifala. Mifala i filim hem long famli blong mifala mo stap lukluk fored blong stap wetem hem bakegen.

Olgeta we oli leftemap mini bas ia oli filim se mini bas ia i laet nomo. Mi save se ol enjel blong heven oli joen tugeta wetem ol enjel blong wol blong leftemap trak ia aot long bodi blong Emily. Mi save se Emily i kambak long laef tru long paoa blong tabu prishud.

Lod i talemaot trutok ia long ol wokman blong Hem: “From we bambae mi go long fored blong yufala. Mi bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala.”⁸

Mi testifae se “Tabu Prishud we i folem Oda blong Pikinini blong God.”⁹—Melkesedek Prishud—wetem ol ki, raet mo paoa blong hem oli bin kambak long wol ia, long ol las dei ia. Mi save se bae ol samting i no hapen long wei we yumi wantem mo prea from ol merikel blong God bae oltaem i kam tingting blong Hem, taem blong Hem, mo plan blong Hem blong yumi.

Sapos yu wantem ol blesing blong prishud, we i tekem tu ol merikel mo ol seves blong ol enjel, mi invaetem yu blong wokbaot long rod blong ol kavenan we God i mekem i stap blong wanwan long yumi. Ol memba mo ol lida blong Jos we oli lavem yu bae oli helpem yu tekem nekis step.

Mi testifae se Jisas Kraes, Pikinini blong God, i laef mo i lidim Jos blong Hem tru long ol profet we oli laef we oli holem mo yusum ol prishud ki. Tabu Spirit i ril. Sevya i givim laef blong Hem blong hilim yumi, klemembak yumi, mo karem yumi kam hom.

Mi testifae se ol merikel oli no stop, ol enjel oli stap long medel blong yumi, mo ol heven oli open i stap. !Mo o, oli open! Long nem blong Jisas Kraes, amen.