Testemoni abaot Jisas
Invitesen blong mi i blong tekem aksen naoia mo holemtaet ples blong yu olsem wan we i gat strong testemoni abaot Jisas.
Long 1832, Josef Smit mo Sidni Rigdon, tufala i kasem wan spesel visen we i abaot ples we i no save finis, we ol pikinini blong God bae oli kasem long en. Revelesen ia i tokbaot ol tri kingdom blong heven. Presiden Dallin H. Oaks i tokbaot “ol kingdom blong glori” ia long las Oktoba,1 i putum se “tru long win mo glori blong Smol Sipsip,”2 wanwan man o woman, long en bae oli kasem wan long ol kingdom ia “folem wanem oli wantem taem oli bin soem tru long ol joes blong olgeta.”3 Plan ia blong God blong pemaot man i pat blong wan janis we i blong ful wol, blong evri pikinini blong Hem, long wanem taem mo weaples oli save stap laef long hem long wol ia.
Taem we glori we i laswan aot long ol tri kingdom, telestial, “we i bitim wanem we man i andastanem,”4 hop blong Papa blong yumi i we bae yumi jusum—mo tru long gladhat blong Pikinini blong Hem, bae yumi kwalifae from—hemia we i moa hae wetem bigfala glori long ol kingdom ia, selestial, ples ia we yumi save glad from laef we i no save finis blong “oli joen mo gat ples wetem Kraes.”5 Presiden Russell M. Nelson i bin askem strong long yumi blong “tingting selestial,” mekem selestial kingdom i gol blong yumi we i no save finis mo afta, “tingting gud long wea wanwan desisen blong yumi long laef ia bae i putum [yumi] long hem long nekis wol.”6
Olgeta long selestial kingdom oli “olgeta we oli kasem wan testemoni abaot Jisas Kraes, … we oli ol stret man we oli kam stret gud evriwan tru long Jisas, we i man blong toktok from niu kavenan.”7 Olgeta we oli kasem nambatu, o terestrial kingdom oli tokbaot olgeta “ol gudfala man long wol, we oli bin kam blaen from ol giaman blong man.” Mein prinsipol we oli no bin gat “i we oli no strong long testemoni long saed blong Jisas.”8 Long narasaed, olgeta long “telestial kingdom, we i daon moa, oli olgeta we “oli no kasem gospel, mo oli no akseptem testemoni blong Jisas.”9
Tekem not se, ol defdefren fasin blong olgeta we oli stap long wanwan kingdom, i dipen “long testemoni [blong olgeta] abaot Jisas,” stat long (1) stap fetful wetem ful hat (2) no stap strong long (3) nomo akseptem fulwan. Fiuja blong wanwan man mo woman we i no save finis i dipen long testemoni blong hem abaot Jisas.
I.
?Wanem ia testemoni abaot Jisas?
Hem i wan witnes blong Tabu Spirit se, Hem i tabu Pikinini blong God, Mesaea mo Ridima. Hem i testemoni blong Jon se, Jisas i bin stap long stat wetem God, se Hem i Krieta blong heven mo wol, mo we “tru long hem i bin gat gospel, mo gospel i laef, mo laef i laet blong man.”10 Hem i “testemoni blong Ol Aposol mo Ol Profet, … se Hem we i bin ded, we oli bin berem, mo i girap bakegen long nambatri dei, mo i bin go antap long heven.”11 Hem i save ia se, “i no gat wan narafala nem we i save mekem yufala i fri tru long hem.”12 Hemia i “testemoni, laswan long evriwan,” we Profet Josef Smit i bin givim “!se hem i stap laef! … Se Hem i Pikinini Ia Nomo blong Papa—mo tru long hem, mo aot long hem, ol wol oli stap mo oli bin krietem olgeta, mo ol pipol we oli stap long hem oli ol stret boe mo gel long God.”13
II.
Antap long testemoni ia hem i kwestin ia: ?wanem nao yumi mekem abaot hemia?
Olgeta we oli stap long selestial kingdom oli “kasem” testemoni abaot Jisas we i fulwan tru taem oli kasem baptaes, kasem Tabu Spirit, mo stap win tru long fet.14 Ol prinsipol mo trutok blong gospel blong Jisas Kraes oli rul ova long ol samting we oli putum i kam faswan mo ol joes blong olgeta. Oli soem testemoni blong olgeta abaot Jisas tru long huia olgeta mo huia oli stap kam. Gol blong olgeta hem i Jareti, “klin lav blong Kraes.”15 Lukluk blong olgeta i blong kasem mak we Kraes nomo, we hem i bigman tru i kasem.”16
Nomata hemia, be sam long olgeta we bae oli stap long terestrial kingdom, oli akseptem testemoni tu abaot Jisas, be yumi luksave olgeta tru long wanem we oli no mekem abaot hemia. Blong no stap strong olsem witnes blong Sevya, i soem smol se no gat tru filing o blong witnes sot taem nomo—stap “witnes hafhaf nomo”17mo i defren long ol pipol blong Amon long Buk blong Momon, eksampol, oli “save olgeta from sapot blong olgeta long God,.”18
Olgeta we oli stap long telestial kingdom, oli olgeta we oli no akseptem blong gat testemoni abaot Jisas wetem gospel, kavenan mo ol profet blong Hem. Abinadae i tokbaot olgeta olsem “olgeta we i bin go folem tingting blong wol mo hemia blong olgetawan nomo; oli neva bin singaotem Lod taem we hem i stap stretem han blong sore i long olgeta; from Lod i bin stretem han blong sore i long olgeta mo oli no bin wantem.”19
III.
?Wanem i minim blong stap strong long testemoni abaot Jisas?
I gat sam posibol ansa we yumi save tingting long hem blong ansarem kwestin ia. Bae mi tokbaot sam. Blong stap strong long testemoni abaot Jisas, i tru, i tekem tu, fasin blong lukaot gud mo mekem testemoni ia i kam strong moa. Ol tru disaepol, bae oli no ting nating long evri smol samting we i stap sapotem mo mekem testemoni blong olgeta abaot Jisas i kam moa strong, olsem prea, stadi long ol skripja, kipim Sabat i tabu, stap kakae long sakramen, mekem wok blong givhan, givim seves, mo wosip long haos blong Lod. Presiden Nelson i rimaenem yumi se “wetem wan hae spid, wan testemoni we oli no fidim evri dei wetem gud toktok blong God’ [Moronae 6:4] i save foldaon. From hemia, … yumi nidim blong gat eksperiens evri dei blong stap wosipim Lod mo stap stadi long gospel blong Hem. Mi plis long yu blong letem God i stap win insaed long laef blong yu. Givim Hem wan gudfala pat blong taem blong yu. Taem yu mekem olsem, tekem not long wanem i hapen long gud paoa blong faea blong spirit blong yu.”20
Blong stap strong i minim tu se, stap open mo stap wan witnes long pablik. Tru long baptaes, yumi talem stret se yumi wantem “stanap olsem ol witnes blong God evri taem mo long evri samting, mo long evri ples we [yumi] save stap long hem, go kasem ded.”21 Speseli, long Ista sisen ia, wetem glad, long pablik ples, wetem open hat, yumi talemaot witnes blong yumi abaot laef bakegen long ded blong Kraes we i stap laef.
Wan pat blong stap strong long testemoni abaot Jisas i blong stap lisin gud long ol mesenja blong Hem. God i no fosem yumi i go long rod we i moa gud, rod blong kavenan, be Hem i givim instraksen long ol profet blong Hem blong mekem yumi save fulwan ol risal blong ol joes blong yumi. Mo i no blong ol memba blong Jos blong Hem nomo. Tru long ol profet mo ol aposol blong Hem, wetem Lav, Hem i toktok wetem ful wol blong lisin gud long trutok we bae i mekem oli fri,22 sevem olgeta long ol safaring we oli no nidim mo givim glad we bae i stap oltaem.
Blong stap strong long testemoni abaot Jisas, i minim blong leftemap tingting blong ol narawan, tru long toktok mo eksampol, semmak blong stap strong speseli wetem ol famli blong yumiwan. Elda Neal A. Maxwell, long wantaem i talem “i tru se ol gudfala memba [blong Jos] we oli stap pas kwik antap nomo, be no stap wan tru disaepol mo blong stap pat blong sot taem nomo bitim blong stap ‘wok strong wetem strong tingting’ [Doktrin mo Ol Kavenan 76:75; 58:27].”23 Tekem not se evriwan i fri blong jusum, Elda Maxwell i talem wetem sore: “Sore tumas, be, taem sam oli jusum blong les, oli no stap jusum blong olgetawan nomo, be blong ol nekis jeneresen, mo olgeta afta. !Ol toktok we papa mo mama i talem we i no klia gud, i save mekem ol pikinini blong olgeta oli go rong! Long ol fas jeneresen insaed long wan famli, bae oli save soem fasin blong stap fetful, be sam long ol jeneresen tedei, oli no andastanem trutok. Sore tumas, long ol nekis wan, sam bae oli save jusum blong no agri we bae i save mekem ol raorao i girap.”24
Plante yia i pas, Elda Jon H. Groberg i tokbaot stori blong wan yang famli we oli stap long wan smol branj long Hawae long eli 1900. Oli bin memba blong Jos blong tu yia taem wan long ol gel blong tufala i bin sik wetem wan sik we oli no save faenem wanem i mekem mo i slip long hospital. Long nekis Sandei long jos, papa mo pikinini boe blong hem tufala i rere long sakramen olsem we tufala i mekem blong kolosap evri wik, be taem we yang papa i nildaon blong blesem bred, branj presiden, kwiktaem i luksave huia i stap long tebol blong sakramen, i jiam mo stanap mo krae se, “Stop. Yu no save tajem sakramen. Gel blong yu i gat wan sik we man i no save. Yutufala i aot kwiktaem, bae wan i rere long ol niu bred blong sakramen. Yutufala i no save stap long ples ia. Go.” Papa ia we i sapraes, i lukluk long branj presiden mo afta long ol kongregesen mo traem blong andastanem, mo filim save bigfala wari mo sem long evriwan, i mekem saen long famli blong hem, mo oli go aotsaed kwaet aot long japel.
I no gat wan i toktok, tingting i foldaon, famli ia i wokbaot folem smol rod i go long smol hom blong olgeta. Long ples ia, oli sidaon long wan sekol mo papa i talem, “Plis evriwan stap kwaet kasem taem mi rere blong toktok.” Yangfala boe i stap tingting se wanem bae oli mekem blong givimbak, from sem we oli harem nogud from: ?bae oli kilim ol pig blong branj presiden o bonem haos blong hem o joenem wan narafala jos? Faef, ten, fiftin, twante faef minit i pas, oli kwaet i stap.
Ol han blong papa we oli taet strong i stap ia, oli stat blong kam slak, mo wota blong ae i fulap. Mama i stat blong krae, mo i no longtaem, ol pikinini oli krae long kwaet wei. Papa i tanem hem i go long waef blong hem mo talem, “Mi lavem yu” mo afta, i ripitim ol toktok ia long wanwan pikinini blong hem. Mi lavem yufala evriwan mo mi wantem yumi blong stap tugeta, blong oltaem, olsem wan famli. Mo wei nomo blong stap olsem, i blong yumi evriwan i stap olsem ol gudfala memba blong Jos Ia blong Jisas Kraes blong Ol Lata-dei Sent, mo sil tru long tabu prishud insaed long tempol. Hemia i no jos blong branj presiden. Hemia i Jos Ia blong Jisas Kraes. Bae yumi no letem eni man o eni harem nogud o filing blong sem o hae tingting blong blokem yumi blong stap tugeta blong oltaem. Nekis Sandei bae yumi gobak long jos. Bae yumi stap kolosap long yumiwan kasem taem we oli faenemaot sik blong gel blong yumi, be bae yumi gobak.”
Oli bin gobak, gel blong tufala i kam oraet, mo famli ia i sil long Lae Hawae Tempol taem we i komplit. Tedei, yes, ova long 100 sol oli singaotem papa blong olgeta, bubuman, bigfala bubuman, se i blesing from se, hem i bin putum ae blong hem i stap nomo long taem we i no save finis.25
Wan las pat blong stap strong long testemoni abaot Jisas we bae mi tokbaot hem i blong lukaotem tabu fasin blong yumiwan. Jisas, Hem i tru Ridima blong yumi,26 mo Hem i talem, “Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam tabu taem we yufala i kasem Tabu Spirit, blong yufala i save stanap mo yufala i no gat mak long fored blong mi long las dei.”27
Profet Momon i tokbaot wan grup blong Ol Sent we oli gohed long rod ia nomata oli “go tru long plante hadtaem”:28
“Be oli bin livim kakae mo oli bin prea plante taem, mo oli kam moa strong mo moa strong long fasin blong olgeta blong putum tingting i stap daon, mo oli kam moa strong moa mo moa strong moa long fet blong Kraes, mekem se oli fulumap sol blong olgeta wetem glad mo fasin blong leftemap tingting blong harem gud bakegen, hem i mekem se hat blong olgeta i kam klin mo tabu, we fasin blong mekem i kam tabu i kam from we oli givim hat blong olgeta long God.”29 Hemia i bigfala jenis blong hat, stap givim hat blong yumi long God mo bon bakegen long saed blong spirit tru long gladhat blong Sevya, we yumi lukaotem.30
Invitesen blong mi i blong tekem aksen naoia mo holemtaet ples blong yu olsem wan we i gat strong testemoni abaot Jisas. From se yumi nidim fasin blong sakem sin, “no pusumbak dei blong sakem sin blong yufala,”31 nogud bae “long wan aoa, taem yufala i no ting se hot taem bae i pas, mo taem blong pikimap kaekae i finis, mo bae mi no sevem ol sol blong yufala.”32 Soem strong paoa blong stap kipim ol kavenan blong yu wetem God. No stap “kros from we trutok ia i strong.”33 “Tingbaot blong holem nem [blong Kraes] mo raetem oltaem long hat blong yufala, blong mekem se oli no faenem yufala long lef han blong God, be blong yufala i harem mo save voes we bae i singaotem yufala, mo tu, nem ia we bae hem i singaotem yufala long hem.”34 Laswan, “putum gud hemia long hat blong yufala, se bae yufala i mekem ol samting we [Jisas] bae i tijim, mo givim komanmen long yufala blong mekem.”35
Papa blong yumi i wantem yumi evri pikinini blong Hem we bae oli glad from laef we i no save finis wetem Hem insaed long selestial kingdom blong Hem. Jisas i safa, i bin ded, mo i bin laef bakegen long ded blong mekem hemia i hapen. Hem “i go finis antap long heven, mo i sidaon long raet han blong God, blong askem long Papa ol raet blong sore blong Hem, we hem i gat long ol pikinini blong ol man.”36 Mi prea se bae yumi save kasem blesing wetem wan testemoni we i laef abaot Lod, Jisas Kraes, stap glad mo stap strong long testemoni ia, mo glad long ol frut blong glad blong Hem long laef blong yumi oltaem. Long nem blong Jisas Kraes, amen.