From Ol Kavenan blong Tempol Evri Samting Bae I Oraet
I nogat wan samting we i moa impoten bitim hemia blong givim ona long ol kavenan we yu stap mekem o bae yu mekem insaed long tempol.
Ol brata mo sista we mi lavem tumas, sesen ia blong jeneral konfrens, i bin wan tabu taem blong mi. Mi glad long asaenmen ia blong toktok long ol milian blong Lata‑dei Sent mo ol fren blong yumi raon long wol. Mi lavem yufala, mo mi save se God i lavem yufala.
50 yia i pas, mi gat janis blong givim seves olsem Presiden blong Riks Kolej long Rexburg Aedaho. Long moning blong 5 Jun 1976, waef blong mi Kathy mo mi i draev long Rexburg go kasem Aedaho Fol Tempol blong go long wan siling blong wan gudfala fren. !Yes, wetem fo yangfala boe we oli stap long haos long taem ia, mifala i no save mekem tempol trip ia sapos i no gat wan gudfala haos gel blong lukaotem ol pikinini! Mitufala i lego ol naesfala pikinini blong mitufala long kea blong hem mo mekem sot 30 minit draev ia.
Eksperiens blong mitufala insaed long tempol long dei ia i naes tumas, olsem oltaem. Be, afta long en blong tempol siling—mo taem mitufala i stap rere blong gobak long haos—mitufala i luksave se plante wokman blong tempol mo ol petron oli stap toktok sloslo long fored blong tempol. !Afta samtaem, wan long ol wokman blong tempol i talem long mifala se bigfala wol simen blong Teton Dam we oli jes bildim long is blong Aedaho i foldaon! Moa long 80 bilian galon blong wota we i ronaot long simen wol ia i kavremap moa long 775km skwea long ol vale we i stap kolosap. Ova haf long siti blong Rexburg i stap andanit wota, wetem ol hom mo ol trak we wota i karem i go. Bitim haf long 9000 pipol we i stap long Rexburg, oli nomo gat haos.1
Olsem we yu maet stap tingting long hem ol tingting mo wari blong mitufala i go long sefti blong ol dia pikinini blong mitufala, ol handred long ol kolej pikinini mo ol dipatmen blong skul, mo wan komuniti we mitufala i lavem. Mifala i stap kolosap 50 km long haos, be yet long dei ia, bifo i no gat ol fon mo blong stap teks, mifala i nogat wan wei blong toktok stret wetem ol pikinini blong mitufala, o blong mitufala i save draev long Aedaho Fol go kasem Rexburg, from se evri rod oli klos.
Mifala i gat wan joes ia nomo blong stap long naet ia long wan lokol motel long Aedaho Fol. Kathy mo mi i nil daon long motel rum blong mitufala mo wetem tingting we i stap daon, mitufala i krae long Papa long Heven from sefti blong ol dia pikinini blong mitufala mo ol taosen narawan we oli stap fesem sem disasta ia. Mi tingbaot Kathy i stap wokbaot go kam long eli moning wetem wari long ol pikinini blong hem. Nomata long ol wari blong miwan, mi bin save mekem maen blong mi i spel mo mi silip.
I no longtaem afta, swit kompanion blong mi blong taem we i no save finis i wekemap mi mo talem, “Hal,?olsem wanem nao yu save silip long wan taem olsem ia?”
Nao, ol toktok ia i kam klia long hat mo maen blong mi. Mi talem long waef blong mi: “Kathy, nomata wanem bae i hapen, evri samting bae i oraet from tempol. Yumitu bin mekem ol kavenan wetem God mo sil olsem wan famli blong taem we i no save finis.”
Long taem ia, olsem we Spirit blong Lod i konfemem long hat mo maen blong mitufala, wanem we mitufala tugeta i save finis se i tru: ol siling odinens, we oli faenem nomo long haos blong Lod mo oli givim tru long stret paoa blong prishud atoriti, oli fasem mitufala tugeta olsem hasban mo waef, mo ol pikinini blong mitufala oli sil long mitufala. I no nid blong fraet, mo mitufala i glad blong lanem afta se ol boe blong mitufala oli sef.
Maet toktok ia blong Presiden Thomas S. Monson i soemaot wanem Kathy mo mi i filim long naet ia we mitufala i no save fogetem. Taem yumi stap long tempol, yumi save kasem wan nara save long saed blong spirit mo wan filing blong pis. … Bae yumi kasem ol tru mining blong ol toktok blong Sevya taem Hem i talem se: “Mi mi putum pis blong mi wetem yufala. Mi nomo mi givim pis ya long yufala. … Yufala i no letem tingting blong yufala i trabol, yufala i no fraet.” [Jon 14:27].’”2
Mi bin gat blesing ia blong filim pis ia evri taem mi go insaed long tabu tempol. Mi tingbaot fas dei we mi wokbaot i go insaed long Sol Lek Tempol. Mi bin wan yang man.
Mi lukluk i go antap long wan hae waet siling we i mekem rum i laet, we i luk se i olsem se i open i go long skae. Mo long tetaem ia, tingting i kam long maen blong mi wetem ol klia toktok ia: “Mi bin stap long ples blong laet ia bifo.” Be stret afta, long maen blong mi, be i no long voes blong miwan, ol toktok ia oli kam: “No. Yu neva kam ia bifo. Yu stap tingbaot wan taem ia bifo we yu bin bon. Yu bin stap long wan tabu ples olsem hemia, ples we Lod bae i save kam long hem.”
Ol brata mo sista, mi testifae wetem tingting i stap daon taem yumi stap go long tempol, i save rimaenem yumi long huia stret yumi long saed blong spirit blong taem we I no save finis, rilesensip blong yumi wetem Papa mo tabu Pikinini Boe blong Hem, mo strong tingting ia blong wantem tumas blong gobak long hom blong yumi long heven.
Long ol toktok blong konfrens we i jes pas, Presiden Russell M. Nelson i bin tijim se:
“!Ples we i moa sef ples blong stap long hem long saed blong spirit i blong stap laef insaed long ol tempol kavenan blong yu!”
“Evri samting we yumi bilivim mo evri promes we God i bin mekem long ol kavenan pipol blong Hem i kam tugeta insaed long tempol.”3
“Wanwan man mo woman we i mekem ol kavenan … insaed long ol tempol—mo i kipim olgeta—i kasem moa akses long paoa blong Jisas Kraes.”4
Hem i bin tijim tu se “taem yumi mekem wan kavenan wetem God, yumi lego fasin blong wol fogud. God bae i no lego rilesensip we Hem i gat wetem olgeta we oli traehad blong joen wetem Hem. Be i tru se, evriwan we oli bin mekem wan kavenan wetem God, oli save kasem wan spesel kaen blong lav ia mo sore ia.”5
Anda long daereksen blong lidasip blong Presiden Nelson, Lod i muvum kwik, mo bae i gohed blong muvum kwik, wok blong bildim ol tempol raon long wol. Hemia bae i letem ol pikinini blong God blong gat janis blong kasem ol odinens blong sevem man mo kam olsem wan god mo blong mekem mo kipim ol tabu kavenan. Blong kwalifae blong mekem ol tabu kavenan i no wan samting we wan i trae haed blong mekem wantaem nomo, be hem i wan samting blong mekem long ful laef taem. Lod i talem se bae i tekem ful hat, ful paoa blong tingting, ful maen mo ful paoa.6
Blong tekpat oltaem long ol odinens blong tempol, i save krietem wan paten blong putum ful hat blong yu long Lod. Taem we yu kipim ol tempol kavenan blong yu mo tingbaot olgeta, yu stap invaetem kampani blong Tabu Spirit, blong mekem yu kam moa strong mo klinim yu semtaem.
Bae yu save eksperiensem wan filing blong laet mo hop we i stap testifae long yu se, ol promes ia oli tru. Bae yu kam blong save se evri kavenan wetem God, i wan janis blong kam moa kolosap long Hem, we afta, bae i mekem yu wantem tumas long hat blong yu blong kipim ol tempol kavenan.
Oli bin promesem yumi, “From kavenan blong yumi wetem God, Hem bae i neva taed long ol traehad blong Hem blong helpem yumi, mo bae yumi neva stopem ol ol sore mo longfala tingting blong Hem we hem i gat long yumi.”7
Hem i tru long ol siling insaed long tempol nao we bambae yumi save kasem tras ia se ol famli rilesensip bae oli gogohed afta long ded mo bae oli stap blong taem we i no save finis. Fasin blong stap givim ona long mared mo ol famli kavenan we i hapen insaed long ol tempol blong God, bae i givim wan proteksen long ol rabis fasin mo hae tingting.
Kea ia we ol brata mo ol sista oli givim oltaem long wanwan long olgeta, bae i kam nomo taem yumi traehad oltaem blong lidim famli blong yumi long wei blong Lod. Givim janis long ol pikinini blong prea from wanwan long olgeta bakegen. Luksave kwiktaem stat blong ol raorao, mo luksave ol gudfala seves we oli stap givim long olgeta wanwan. Taem ol brata mo ol sista oli stap prea from wanwan long olgeta mo givim seves long olgeta, ol hat bae oli kam sofsof long wanwan long olgeta mo papa mo mama blong olgeta.
Hemia i pat blong wanem we Malakae i bin tokbaot taem hem i stap profesae abaot Elaeja we i kambak: “Mo bae hem i planem insaed long hat blong ol pikinini, ol promes we Lod i bin mekem long ol papa, mo hat blong ol pikinini bae i tanem i go long ol papa blong olgeta. Sapos i no hapen olsem, bae Lod i spolem gud ful wol ia long taem we bae hem i kam.”8
Ol hadtaem, ol jalenj, mo ol harem nogud bae oli kam long yumi evriwan. I nogat wan long yumi bae i ronwe long ol “Trabol ya olsem nil blong aranis.”9 Be, taem yumi stap go long tempol mo tingbaot olgeta kavenan blong yumi, yumi rere blong kasem daereksen blong yumiwan we i kam long Lod.
Taem we Kathy mo mi mitufala i mared mo sil long Logan Yuta Tempol, Elda Elda Spencer W. Kimball i mekem siling blong mitufala. Long sam sot toktok we hem i talem, hem i givim kaonsel ia: “Hal mo Kathy, laef long wan wei we, taem koling ia i kam, bae yutufala i save wokbaot i go isi nomo.”
Long stat, mitufala i no andastanem kaonsel ia i minim wanem long mitufala, be mitufala i traem bes blong laef long wan laef long wan wei we mitufala i rere blong go mo givim seves long Lod taem oli singaotem mitufala. Afta we mitufala i bin mared kolosap 10 yia, wan kol i kam long Komisina blong Jos Edukesen, Neal A. Maxwell.
Gudfala kaonsel ia, we Presiden Kimbol i bin talem insaed long tempol, blong save “wokbaot i go isi” i kam wan tru samting. Kathy mo mi i risivim wan singaot blong lego wan gudfala famli situesen long Kalifonia blong save go wok long wan wok long wan ples we mi no save eni samting long hem. Nomata long hemia, famli blong mitufala i rere blong aot, from wan profet, insaed long wan tabu tempol, wan ples blong revelesen, i bin luk wan fiuja we mitufala i bin rere from.
Ol dia brata mo ol sista blong mi, mi talem witnes blong mi se i nogat wan samting i moa impoten bitim hemia blong givim ona long ol kavenan we yu stap mekem o bae yu mekem insaed long tempol. Nomata wea ples yu stap long rod blong kavenan ia, mi askem strong long yu blong kwalifae mo blong save gat raet blong go insaed long tempol. Atendem tempol evri taem olsem we yu save mekem. Mekem mo holemtaet ol tabu kavenan wetem God. Mi save talem long yu wetem sem trutok ia mi bin serem wetem Kathy long medel blong naet ia, kolosap fifti yia i pas long motel rum ia long Aedaho Fol: “ No mata wanem bae i hapen, evri samting bae i oraet from ol tempol kavenan.”
Mi talem witnes blong mi long yufala se Jisas Hem i Kraes. Hem i laef mo i stap lidim Jos blong Hem. Ol tempol oli ol haos blong Lod. Ol tempol oli ol haos blong Lod. Presiden Russell M. Nelson i profet blong God we i stap laef tedei long wol. Mi lavem hem, mo mi lavem wanwan long yufala. Long tabu nem blong Jisas Kraes, amen.