Tras long Kavenan We I Kam tru long Jisas Kraes

Ol brata mo sista blong mi we mi lavem tumas, mi prea se bae yumi kam niu bakegen long saed blong spirit, tru ol insperesen mesej we bae yumi harem i kam long ol lida blong yumi long wiken ia, mo stap glad long wanem we mi laekem blong singaotem “tras long kavenan we i kam tru long Jisas Kraes.” Tras ia hem i kwaet, be yet, i stret save blong stap kasem ol blesing we God i promesem long olgeta we oli kipim ol kavenan blong olgeta, mo yumi nidim tumas long medel blong ol had situesen blong dei blong yumi.

Fasin blong stap bildim ol niufala haos blong Lod raon long wol, folem insperesen lidasip blong Presiden Russell M. Nelson, i bin givim bigfala glad long medel blong ol memba blong Jos mo givim seves olsem wan impoten saen blong mekem kingdom blong Lod i kam moa bigwan.

Taem mi stap luklukbak long sapraes eksperiens blong mi long taem blong dedikesen blong Feta Reva Kalifonia Tempol long las Oktoba, mi stap tingting se, samtaem yumi stap lus insaed long bigfala glad ia blong stap gat ol niu tempol long ol siti mo ol komuniti, mo no luksave tabu stamba tingting blong ol tabu kavenan we yumi bin mekem insaed long tempol.

Wan raeting we i stap long fored blong evri tempol, i wan series stetmen: “Tabu fasin long Lod.”¹ Ol insperesen toktok ia oli wan klia invitesen se taem yumi go insaed long haos blong Lod, yumi stap long wan tabu rod blong stap lanem blong kam ol disaepol blong Kraes we oli moa hae mo tabu. Taem yumi mekem ol kavenan long ol tabu fasin long fored blong God, mo mekem komitmen blong folem Sevya, yumi kasem paoa blong jenisim hat blong yumi, riniu spirit blong yumi, mo mekem rilesensip blong yumi wetem Hem i kam moa strong. Fasin ia blong traehad i mekem sol blong yumi i kam tabu mo krietem wan rilesensip wetem God mo Jisas Kraes, we Tufala i promes se, bae yumi save kasem presen blong laef we i no save finis.² Risal blong tabu rod ia i blong kasem wan tras we i moa hae mo tabu we i blong evri dei laef blong yumi, insaed long ol kavenan we yumi bin mekem tru long Jisas Kraes.

Kaen tras olsem i mak we i moa hae blong tabu koneksen blong yumi wetem God, mo i save helpem yumi stap fetful moa, talem tangkyu moa long Jisas Kraes mo atonmen mo sakrifaes blong Hem. Hemia i givim paoa long yumi blong lavem mo givim seves long ol narawan, mo mekem ol sol blong yumi i moa strong blong laef long wan wol we i no tabu, i tudak bigwan mo mekem man i wari. Tras ia i givim paoa long yumi blong winim ol sid blong gat tu tingting, fraet, filing blong givap, hat we i brok mo fasin blong lusum hop we enemi i stap traem blong pusum i go dip insaed long hat blong yumi, speseli taem we laef i had, ol hadtaem oli longfala o ol situesen oli kam had tumas. Wan ves long Baebol i givim wan gudfala advaes blong yumi, taem yumi fesem ol rabis win blong ol jalenj blong wol tedei: “Nao from samting ya, yufala i mas stanap strong.”³

Ol brata mo sista, olgeta we oli kasem tru tras ia we i stap insaed long ol kavenan we oli bin mekem insaed long haos blong Lod, tru long Jisas Kraes, oli gat wan long ol fos we i gat moa paoa, we yumi save aksesem long laef ia.

Taem yumi stadi long Buk blong Momon long Kam Folem Mi long yia ia, yumi witnesem olsem wanem Nifae i soem naesfala eksampol abaot paoa blong kaen tras ia long kavenan, taem hem i stap fetful blong fesem ol samting we oli holembak hem mo ol jalenj, olsem blong karem ol buk, we Lod i talem. Be from Nifae i harem nogud tumas from Leman mo Lemyul we tufala i fraet mo no gat fet, hem i gohed blong trastem Lod se bae Hem i givim ol buk ia long olgeta. Hem i talem long ol brata blong hem, “Olsem we i tru se Lod i stap laef, mo olsem we i tru se yumi stap laef, bae yumi no gobak long papa blong yumi long waelples kasem taem we yumi finisim samting ia we Lod i bin talem long yumi.”⁴ From we Nifae i trastem ol promes blong Lod, hem i save mekem wanem we oli askem hem blong mekem.⁵ Afta, long visen blong hem, Nifae i luk paoa blong kaen tras ia, mo i raetem,“Mi, Nifae, mi luk paoa blong Smol Sipsip blong God, we i kamdaon long ol sent blong Jos Ia blong Smol Sipsip, mo long ol kavenan pipol blong Lod mo oli blokem olgeta wetem stret mo gud fasin mo paoa blong God long bigfala glori.”⁶

Miwan mi bin luk ol promes blong Lod we i gat bigfala lav mo paoa we i fulap i kam long ol pikinini blong God, we i mekem olgeta oli strong blong fesem ol situesen blong laef. Wan dei we i pas, waef blong mi i kam hom afta we hem i wosip insaed long tempol mo talem long mi wan eksperiens we i tajem hat blong hem long we. Taem hem i go insaed long haos blong Lod, hem i luk wan man long wan wiljea we i stap muv sloslo mo wan woman i gat hadtaem blong wokbaot wetem wan stik, tufala tugeta i stap kam wetem strong paoa long tingting blong wosipim Lod insaed long haos blong Hem. Taem we waef blong mi i wokbaot i go insaed long inisitori eria, hem i luk wan naesfala sista we wan han blong hem i no gat—mo nara han blong hem i no fulwan—i stap mekem eni wok we oli bin givim long hem blong mekem long wan naesfala mo selestial fasin.

Taem we mi mo waef i tokbaot eksperiens ia, mitufala i endem se, God i givim ol promes we i no save finis tru long ol tabu kavenan we yumi mekem wetem Hem long haos blong Hem, mo we tras we i klin evriwan nomo mo i kam long tru hat, long ol promes ia, i save mekem ol gudfala disaepol ia blong Kraes, oli lego ol hom blong olgeta long dei ia we i kolkol tumas, nomata long ol situesen blong wanwan laef blong olgeta.

Ol dia fren blong mi, sapos i gat wan impoten samting we yumi save gat—mo wan impoten samting we yumi save pasem i go long ol pikinini mo ol apu pikinini blong yumi we i save helpem wanwan long olgeta, long ol tes mo ol hadtaem blong laef we i stap kam—bae hem i, tras ia we i stap insaed long ol kavenan we oli bin mekem tru long Jisas Kraes. Blong stap kasem wan tabu paoa olsem, bae i helpem olgeta blong laef olsem we Lod i givim promes long ol fetful man we oli stap folem Hem: “Ol disaepol blong mi bambae oli stanap long ol tabu ples, mo bambae oli no muv.”⁷

?Olsem wanem nao yumi kasem kaen tras ia tru long Jisas Kraes? Hemia i kam tru long fasin blong putum tingting i stap daon, mekem Sevya i stap long medel blong laef blong yumi, laef folem ol prinsipol blong gospel blong Jisas Kraes, kasem ol odinens blong sevem man mo blong kam olsem ol god, mo respektem ol kavenan we yumi mekem wetem God insaed long tabu haos blong Hem.

Long las toktok blong hem long Oktoba 2019 jeneral konfrens, dia profet blong yumi i rimaenem yumi abaot wan impoten step blong kasem tras ia we i stap insaed ol kavenan, i talem: “Fasin blong stap klin inaf blong go insaed long haos blong Lod, i nidim blong yu rere gud tu long saed blong spirit. … Blong wanwan i stap klin inaf, i nidim blong wan i jenisim fulwan maen mo hat blong kam moa olsem Lod, blong i stap olsem wan ones sitisen, blong i stap olsem wan moa gud eksampol, mo i wan moa tabu man o woman.”⁸ From hemia, sapos yumi jenisim fasin blong yumi blong stap rere blong go insaed long tempol, bae yumi jenisim eksperiens blong yumi insaed long tempol, mo hemia bae i jenisim laef blong yumi aotsaed long tempol. “Afta nao, tras blong yu bae i gro i kam strong long fored blong God; mo doktrin blong prishud bae i go insaed long sol blong yu sloslo, semmak olsem ol smol ren blong moning i foldaon long heven i kamdaon.”⁹

Wan bisop we mi save i no singaotem klas blong ol bigfala pikinini se “Praemeri” klas, be olsem wan “tempol preperesen” klas. Long Jenuware, bisop i askem ol memba blong klas ia mo ol tija blong olgeta blong kam long ofis blong hem, long ples ia, oli tokbaot olsem wanem bae oli spenem ful yia blong stap rere blong go insaed long tempol. Bisop i tekem taem blong go tru ol kwestin blong tempol rekomen, we afta, bae oli tokbaot tu long ol lesen blong Praemeri. Hem i invaetem ol pikinini blong stap rere mekem se taem oli kam long ofis blong bisop long wan yia, bae oli trastem olgetawan, trastem kavenan we bae oli mekem, rere blong kasem wan tempol rekomen mo go insaed long haos blong Lod. Long yia ia, bisop i gat fo yang gel we oli glad tumas, oli bin rere, mo gat tras ia blong go long tempol, we oli wantem blong bisop i printim ol tempol rekomen blong olgeta long Dei blong Niu Yia long 12:01 long moning.

Fasin blong stap rere i no blong olgeta nomo we oli stap go long tempol blong fastaem. Yumi evriwan i mas stap gohed blong mekem ol jenis blong stap rere blong go long haos blong Lod. Wan stek we mi save i yusum stamba toktok ia, “Tijim gospel long hom, we Jos i sapotem, we i lukluk i go long tempol (temple bound).” Bound¹⁰ i wan intresting toktok, we i minim blong, lukluk moa long wan daereksen, be i minim tu blong fasem strong o protektem, stretem mo gat strong tingting, sua. So, blong lukluk i go long tempol i fasem yumi long Sevya, i givim stret daereksen long yumi mo mekem yumi no muvmuv, mo long semmak taem, i mekem sua se yumi gat tras long kavenan tru long Jisas Kraes. From hemia, yumi evriwan i mas wantem blong fasem yumi moa long Sevya, taem yumi gat nekis apoenmen we yumi putum taem from, wetem Lod insaed long tabu haos blong Hem, nomata sapos tempol i kolosap o longwe.¹¹

Dia profet blong yumi, Presiden Russell M. Nelson, i rimaenem yumi abaot ol impoten prinsipol ia mo talem: Tempol i stap long medel blong mekem fet mo paoa blong yu long saed blong spirit i kam strong moa, from se Sevya mo doktrin blong Hem oli stap long hat blong tempol. Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol Impoten odinens blong Hem oli fasem yumi wetem Hem tru long ol tabu prishud kavenan. Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi.” Mo, O yes, bae yumi nidim paoa blong Hem long ol dei we oli stap kam.”¹²

Sevya i wantem tumas se, yumi kam rere blong andastanem, wetem bigfala klia tingting, olsem wanem stret blong tekem aksen taem yumi mekem ol kavenan wetem Papa long Heven long nem blong Hem. Hem i wantem yumi blong stap rere blong eksperiensem ol spesel janis blong yumi, ol promes mo ol responsabiliti; blong stap rere blong kasem ol niu tingting long saed blong spirit mo ol woning we yumi nidim long laef ia. Mi save se, taem Lod i luk yumi wantem smol, o traehad smol blong wantem mekem Hem i stap fulwan insaed long laef blong yumi mo long ol odinens mo kavenan we yumi mekem insaed long haos blong Hem, Hem bae i blesem yumi, long wei blong Hem we i stret evriwan, wetem ol merikel mo ol sore blong Hem we yumi nidim.

Haos blong Lod i ples ia we yumi save jenis long ol wei we oli moa hae mo moa tabu. So, taem yumi wokbaot aot long tempol, yumi jenis tru long hop blong yumi long ol promes blong ol kavenan, fulap wetem paoa we i kam antap, mo tekem tempol wetem yumi i go long ol hom mo laef blong yumi. Mi talem long yufala wetem stret save ia se, blong gat spirit blong haos blong Lod insaed long yumi i jenisim yumi fulwan.

Yumi save tu tru long tempol se, sapos yumi wantem Spirit blong Lod i kam fulap long laef blong yumi, i simpol, yumi no save mo no mas gat ol rabis filing long eniwan. Blong stap mekem ples insaed long hat o maen blong yumi, blong gat ol nogud filing o tingting, bae i givim ol toktok mo aksen we oli no kaen, nomata long sosol media o insaed long ol hom blong yumi, we i mekem se Spirit blong Lod i kamaot long hat blong yumi. From hemia, plis no sakemaot tras blong yu, be, letem tras blong yu i gro i kam strong.

Fasin blong stap gohed mo bildim kwik ol tempol, bae i gohed blong mekem yumi glad, givim insperesen mo blesem yumi. Be yet, wanem we i mo impoten i, taem yumi jenisim fasin blong yumi blong taem yumi stap rere blong go insaed long tempol, bae yumi jenisim eksperiens blong yumi long tempol, we bae i jenisim laef blong yumi aotsaed long tempol. Letem fasin blong jenis ia bae i fulumap yumi wetem tras long ol tabu kavenan blong yumi we yumi bin mekem wetem God tru long Jisas Kraes. God i stap laef, Jisas i Sevya blong yumi, mo hemia i Jos Ia blong Hem we i bin kambak long wol. Mi talemaot ol tabu trutok ia wetem respek, long tabu nem blong Sevya, Jisas Kraes, amen.