Stap Glad long Presen Ia blong Ol Ki blong Prishud

Ol dia brata mo sista blong mi, tedei hem i wan histri dei blong mi mo Presiden Dallin H. Oaks. Hem i bin 40 yia i pas finis, long 7 Epril, 1984, taem oli singaotem mitufala i go long Kworom blong Olgeta Twelef Aposol.¹ Mitufala i bin stap glad long evri jeneral konfrens stat long taem we oli bin singaotem mitufala kasem hemia tedei. Bakegen bae yumi kasem blesing we i fulap wetem tabu paoa blong Spirit. Mi hop bae yufala i ripitim mo stadi ol mesej blong konfrens ia truaot long ol manis we i stap kam.

Taem mi bin bon,² i bin gat sikis tempol nomo we i stap operet long Jos—wanwan long St. George, Logan, Manti, mo Sol Lek Siti, Yutah; mo tu long Cardston, Alberta, Kanada; mo Laie, Hawae. I bin gat tu tempol we i bin operet blong sot taem long Ketlan, Ohaeo, mo Nauvu, Ilinois. Taem grup blong Jos i bin muv i go long Wes, oli bin fosem olgeta blong lego tufala tempol i stap.

Wan man we i putum faea i bin bonem nogud Tempol blong Nauvu. Oli bin bildim bakegen tempol ia afta mo Presiden Gordon B. Hinckley nao i dediketem.³ Ol enemi blong Jos i bin spolem nogud Ketlan Tempol. Samtaem afta, Community of Christ i bin karem Ketlan Tempol mo onem blong plante yia.

Las manis yumi anaonsem se Jos Ia blong Jisas Kraes blong Ol Lata-dei Sent i bin pemaot Ketlan Tempol, wetem sam narfala impoten histri ples long Nauvu. Yumi talem tangkyu from gudfala storian we mifala i bin gat wetem ol lida blong Community of Christ we i lid i kam long agrimen ia.

Pikja

Ketlan Tempol.

Ketlan Tempol i gat wan spesel mining long gospel blong Jisas Kraes we i kambak. Sam long ol spesel taem we i bin tekem ples longwe i bin ol profesi blong milenium mo oli impoten long Jos blong Lod we i bin kambak blong fulfilim misin blong hem long las dei ia.

Wan long ol impoten taem ia i bin hapen long Ista Sandei, 3 Epril, 1836.⁴ Long dei ia, Josef Smit mo Oliva Kaodri i bin go tru ol taem blong ol impoten visit. Faswan, Lod Jisas Kraes i bin kamaot. Profet i bin rekodem abaot Sevya se “ol Ae blong hem i olsem faea we i laet; hea blong hed blong hem i waet we i waet olsem klin sno; fes blong hem i saen i bitim laet blong san; mo voes blong hem i bigwan olsem noes blong bigfala solwota.”⁵

Long taem blong visit ia, Lod i mekem i klia aedentiti blong Hem. Hem i se “Mi mi faswan mo laswan; Mi mi hem ia we i stap laef, mi mi hem we oli bin kilim hem i ded; mi mi loya blong yufala long fored blong Papa.”⁶

Afta Jisas Kraes i talem se Hem i akseptem tempol olsem haos blong Hem mo mekem spesel promes ia: “Bae mi kamaot long ol pipol blong mi wetem sore insaed long haos ia.”⁷

Impoten promes ia i go long evri tempol we oli dediketem tedei. Mi invaetem yufala blong tingting hevi long promes blong Lod mo wanem i minim long yuwan.

Afta long visit blong Sevya, Moses i bin kamaot. Moses i bin givim long Josef Smit ol ki blong kam tugeta blong Isrel mo blong kambak blong olgeta ten traeb.⁸

Taem visin ia i finis, “Elias i kamaot, mo givim dispensesen blong gospel blong Abraham” long Josef.⁹

Afta Profet Elaeja i kamaot. Kamaot blong Elaeja i fulfilim promes ia se bifo Seken Kaming, Lod bae i sendem Elaeja blong “tanem hat blong ol papa i go long ol pikinini, mo ol hat blong ol pikinini i go long ol papa.”¹⁰ Afta Elaeja i bin givim ol ki blong siling paoa long Josef Smit.¹¹

Ol trifala impoten ki ia oli bin givim i kambak long wol ia tru long tri mesenja blong heven folem daereksen blong Lod we yu no save eksplenem. Ol ki blong prishud i fomem atoriti mo paoa blong presidensi. Ol ki blong prishud i rul ova prishud blong God long olsem wanem blong yusum blong save mekem stamba tingting blong Lod i hapen mo blesem evriwan we i akseptem gospel blong Jisas Kraes we i bin kambak bakegen.

Hem i impoten blong tekem not se bifo oganaesesen blong Jos, ol mesenja blong heven i bin givim Aronik mo Melkesedek Prishud long Profet Josef mo givim long hem tugeta ki blong prishud.¹² Ol ki ia oli givim atoriti long Josef Smit blong oganaesem Jos long 1830.¹³

Long 1836, long Ketlan Tempol, afta we oli givim ol trifala prishud ki ia—we i, ol ki blong kam tugeta blong Isrel, ol ki blong gospel blong Abraham, mo ol ki blong siling paoa—oli impoten. Ol ki ia oli givim raet long Josef Smit—mo evri Presiden blong Jos blong Lod we i kam afta—blong karem i kam tugeta Isrel long tugeta saed blong vel, blong blesem evri kavenan pikinini wetem ol blesing blong Abraham, blong putum wan sil tru long ol prishud odinens mo kavenan, mo blong silim ol famli blong laef we i no save finis. Paoa blong ol prishud ki ia i no gat en mo i gud tumas.

Tingting long olsem wanem bae laef blong yu i defren sapos ol prishud ki i no bin kambak long wol.¹⁴ Spos i no bin gat prishud ki, bae yu no save kasem endaomen wetem paoa blong God.¹⁵ Spos i no bin gat ol prishud ki, Jos bae i save wok nomo olsem wan oganaesesen we i stap givim ol impoten tijing blong ol man long wol be i no moa. Spos i no bin gat prishud ki, no gat wan long yumi bae i save kasem ol impoten odinens mo kavenan we i fasem yumi long olgeta we yumi lavem blong taem we i no save finis mo oli letem yumi se long en, bae yumi save stap wetem God.

Ol prishud ki i mekem Jos Ia blong Jisas Kraes blong Ol Lata-dei Sent i defren long evri oganaesesen long wol. Plante narafala oganaesesen oli save mo mekem gud laef blong yu long wol ia. Be i no gat wan oganaesesen i save mo bae i givim paoa long laef blong yu afta long ded.¹⁶

Ol prishud ki i givim yumi atoriti blong mekem evri blesing we God i bin promes long Abraham i go long evri man mo woman we i kipim ol kavenan blong olgeta. Tempol wok i mekem ol naesfala blesing ia i stap blong evri pikinini blong God, nomata wea o wetaem oli bin stap o oli stap laef naoia. !Letem yumi glad se ol prishud ki oli stap wan moa taem bakegen long wol!

Mi invaetem yu blong tingting gud long ol trifala toktok ia:

1. Kam tugeta blong Isrel i pruf ia se God i lavem evri pikinini blong Hem long evri ples.

2. Gospel blong Abraham i wan moa pruf se God i lavem evri pikinini blong Hem long evri ples. Hem i stap invaetem evriwan blong kam long Hem—“blak mo waet, slef mo fri, man mo woman; … evriwan i semmak long God.”¹⁷

3. Siling paoa i bigfala pruf ia nao long hamas God i lavem evri pikinini blong Hem evri ples mo wantem wanwan long olgeta blong jusum blong gobak hom long Hem.

Ol ki blong prishud oli bin kambak tru long Profet Josef Smit blong mekem i isi blong evri man mo woman we i kipim kavenan, blong stap glad long spesel janis ia blong wanwan man long saed blong spirit. Bakegen, long ples ia i gat plante blong lanem aot long ol tabu histri blong Ketlan Tempol.

Prea blong dedikesen blong Josef Smit blong Ketlan Tempol i wan tijing blong olsem wanem tempol i givim paoa long saed blong spirit long yu mo mi blong fesem ol jalenj blong laef long ol las dei ia. Mi leftemap tingting blong yu blong stadi long prea ia we oli rekodem long Doktrin mo Ol Kavenan seksen 109. Prea blong dedikesen ia, we i bin kam tru revelesen, i tijim se tempol i “wan haos blong prea, wan haos blong livim kakae, wan haos blong fet, wan haos blong lanem samting, wan haos blong glori, wan haos blong oda, wan haos blong God.”¹⁸

Be lis blong haos ia wetem kaen fasin ia i moa bitim olsem wanem yu tokbaot wan tempol. Hem i wan promes abaot wanem i save hapen long olgeta we oli stap givim seves mo wosip long haos blong Lod. Oli save gat tingting ia blong kasem ol ansa long prea, revelesen blong wanwan, moa fet, kam moa strong, kamfot, kasem moa save, mo moa paoa.

Taem yu stap insaed long tempol, bae i helpem yu blong tingting selestial mo blong kasem wan visin blong huia yu stret, huia yu save kam, mo wan kaen laef we yu save kasem blong oltaem. Go long tempol oltaem bae i jenisim wei we yu luk yuwan mo hao yu fit insaed long naesfala plan ia blong God. Mi promesem yu se.

Yumi kasem promes ia tu se long tempol yumi save “kasem fulwan Tabu Spirit.”¹⁹ Tingbaot wanem promes ia i minim, long saed blong gat ol heven i open blong wanwan man we i lukaotem wetem tru hat, trutok ia we i no save finis.

Oli tijim yumi tu se evriwan we oli wosip long tempol, oli aot wetem paoa blong God mo wetem ol enjel we oli “lukaot long olgeta.”²⁰ ?Hamas nao tras blong yu i kam antap blong save se, olsem wan endaomen woman o man we i fulap wetem paoa blong God, yu no save fesem laef yuwan? ?Wanem strong tingting i kam long yu blong save se ol enjel bae i rili helpem yu?

Long en, yumi kasem promes se “eni grup blong fasin nogud” bae i no gat paoa blong winim olgeta we i wosip insaed long haos blong Lod.²¹

Blong andastanem ol spesel blesing ia long saed blong spirit we i stap long tempol i impoten long wanwan long yumi tedei.

Ol dia brata mo sista blong mi. Hemia i promes blong mi. I no gat wan samting bae i helpem yu moa blong hang strong long aean rel²² bitim we blong stap wosip long tempol oltaem long taem we yu save mekem. I no gat wan samting bae i protektem yu moa taem yu stap long medel blong tudak blong wol. I no gat wan samting bae i mekem testemoni blong yu long Lod Jisas Kraes mo Atonmen blong Hem i kam strong moao helpem yu andastanem moa naesfala plan ia blong God. I no gat wan samting bae i givim yu moa kamfot long spirit long taem blong harem nogud. I no gat wan samting bae i openem ol heven moa. !I no gat samting!

Tempol i bigfala get ia we i lidim yumi i go long ol blesing we God i kipim i stap blong wanwan long yumi, from Tempol i wan ples ia nomo long wol we yumi save kasem evri promes blesing we i blong Abraham.²³ Hemia nao from wanem yumi stap mekem evri samting wetem paoa we yumi gat folem daereksen blong Lod, blong mekem ol blesing blong tempol i isi moa long ol memba blong Jos. Tedei, yumi glad blong anaonsem se yumi plan blong bildim niu tempol long wanwan long ol 15 ples ia:

• Uturoa, Franis Polinesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Ol dia brata mo sista blong mi, mi testifae se hemia i Jos Ia blong Jisas Kraes blong ol Lata dei Sent. Hem i stap long hed blong Jos. Yumi, yumi ol disaepol blong Hem.

Letem yumi glad long restoresen blong ol ki blong prishud, we i mekem i posibol blong yu mo mi blong stap glad long evri blesing long saed blong spirit we yumi wiling mo stap klin inaf blong kasem. Mi testifae olsem long tabu nem blong Jisas Kraes, amen.