Fasin blong Stap Tru mo Strong: Wan Fasin Olsem Hemia blong Kraes

Jisas Kraes i eksampol blong yumi. Blong stap laef long fasin blong stap tru mo strong, i nidim yumi blong stap tru long God, long wanwan long yumi, mo long tabu aedentiti blong yumi. Stap tru mo strong i kam long bigfala fas komanmen ia blong lavem God. From se yu lavem God, yu stap tru long Hem long oltaem. Yu andastanem se i gat raet mo rong mo i gat trutok we i stret evriwan—trutok blong God. Stap tru mo strong i minim se yumi no putum standet o aksen blong yumi i go daon blong folem o akseptem tingting o filing blong ol narawan.⁵ Yu “mekem wanem we i raet” mo “letem ol risal blong hem i kam.”⁶ Long revisen blong Prijim Gospel blong Mi we oli jes mekem i no longtaem, speseli misinari lesenbuk, oli ademap, fasin blong stap tru mo strong olsem wan fasin we i olsem hemia blong Kraes.⁷

Sam yia i pas, oli asaenem Elda Uchtdorf blong oganaesem bakegen stek blong mifala. Long taem blong intaviu blong mitufala, hem i askem wan kwestin long mi we mi neva fogetem: “?I gat eni samting long laef blong yu we, we sapos pablik i luk yu o save yu from, bae i mekem sem long yu o long Jos?” Wetem sapraes, kwiktaem mi tingtingbak long ful laef blong mi, stap traem blong luklukbak long ol taem we mi no mekem wanem we mi mas mekem, mo stap askem miwan se, “Sapos ol narawan oli save evri samting we mi bin mekem, ?wanem nao tingting blong olgeta long mi mo Jos?

Long sot taem ia, mi tingting se Elda Uchtdorf i stap askem nomo abaot fasin blong mi blong stap klin inaf, be mi kam blong andastanem se, i tru se hem i wan kwestin blong fasin blong stap tru mo strong. ?Mi stap tru long wanem we mi talemaot? ?Bae wol i luk se ol toktok blong mi i go stret wetem ol aksen blong mi? ?Bae ol narawan oli luk God tru ol fasin blong mi?

Presiden Spencer W. Kimball i bin tijim, “Fasin blong stap tru mo strong” hem i “hamas yumi rere inaf mo hamas yumi save mekem blong wantem laef folem ol bilif mo ol komitmen blong yumi.”⁸

Fas mo impoten samting we i nidim blong stap tru long God, i blong gat wan laef blong fasin blong stap tru mo strong.

Long ol taem we yumi smol, yumi lanem abaot stori blong Daniel insaed long hol blong ston blong ol laeon. Oltaem, Daniel i stap tru long God. Ol fren blong hem we oli jalus oli traem blong “faenemaot sam poen long [hem] long wok blong hem”⁹ mo statem wan loa we man i mas prea o askem samting long god blong olgeta nomo. Daniel i save loa ia be hem i go hom mo—wetem “ol windo blong hem oli lukluk long saed i go long Jerusalem”¹⁰—i nildaon mo prea tri taem long wan dei i go long God blong Isrel. Olsem wan risal, oli sakem Daniel i go insaed long hol blong ston blong ol laeon. Long moning, king i faenemaot se God blong Daniel i sevem hem mo putum wan niu loa se evriwan bae oli “fraet long God ya blong Daniel: hem i God we i stap laef.”¹¹

King i kam blong save God tru long fasin blong Daniel blong stap tru mo strong. Ol narawan oli luk God tru long—ol toktok mo aksen blong yumi. Semmak olsem Daniel, blong stap tru long God, bae i mekem yumi gohed blong stap longwe long ol samting blong wol.

Sevya i rimaenem yumi, “Long wol ya, bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ya finis.”¹² Presiden Nelson i kaonsel i bin givim kaonsel, [Blong winim wol] i “minim blong winim temtesen ia blong kea moa abaot ol samting blong wol ia bitim ol samting blong God. I minim blong stap trastem doktrin blong Kraes moa bitim save blong man.”¹³ I semmak, yumi mas stap longwe long temtesen blong wokbaot “long rod blong [yumiwan], folem fasin blong god blong [yumiwan], we fasin blong god ia i semmak long hemia blong wol.”¹⁴

Fos ia blong fasin blong go agens i nid blong stap olsem wan pat blong plan ia blong God blong sevem man. Olsem wanem yumi ansa long fos ia i soemaot huia nao yumi—wan aksen blong fasin blong yumi blong stap tru mo strong. Wan fos blong wol i save kam stret blong prapa spolem fasin blong stap fetful long mared laef o blong stat smol blong haed mo postem ol nogud komen abaot doktrin o kalja blong Jos. Blong stap yusum fasin blong stap tru mo strong long ol joes blong yumi, hem i stap soemaot aksen blong aotsaed we hem i mekem wan komitmen insaed long hem blong folem Sevya Jisas Kraes.

Semmak olsem blong stap tru mo strong i kam long bigfala fas komanmen ia blong lavem God, blong stap tru long wanwan long yumi, i kam long seken komanmen, blong lavem neba blong yumi olsem yumiwan. Wan laef blong gat fasin blong stap tru mo strong i no wan laef blong stap stret gud evriwan; hem i wan laef we yumi traehad evri dei blong stap tru long God we i moa impoten mo long sem wei ia, blong stap tru long ol narawan. Presiden Oaks i rimaenem yumi, “Glad blong yumi blong stap mekem seken komanmen i no mas mekem yumi fogetem nambawan komanmen.”¹⁵

Wol i stap traehad bigwan wetem fasin blong stap tru mo strong taem i stap putum ol rul blong praktisim ol gudfala fasin we i kontrolem ol rilesensip bitwin ol pipol mo ol oganaesesen. Yes i gud, be ol rul ia, oli no hang strong long wan stret trutok mo i stap jenis sloslo folem ol kastom we oli yusum. Semmak olsem kwestin blong Elda Uchtdorf, sam oganaesesen oli trenem ol wokman blong tingting se bae i luk olsem wanem sapos oli pablisim ol desisen blong olgeta, o proses blong mekem desisen, onlaen o long fored blong pej blong wan popula niuspepa. Taem we Jos i kamaot long ples we i haed mo tudak,¹⁶ olsem Daniel, yumi mas girap aot long ol tingting blong wol mo kam fes blong tru God ia we i stap laef long evri taem mo long evri ples.¹⁷

Blong stap talem se yumi gat fasin blong stap tru mo strong, hem i no inaf, sapos ol aksen blong yumi oli no go stret wetem ol toktok blong yumi. Semmak olsem, fasin blong stap olsem wan Kristin, i no save tekem ples blong fasin blong stap tru mo strong. Olsem wan kavenan pipol, mo olsem ol lida long Jos blong Hem, yumi mas go moa bitim gudfala standed mo go wetem ol standet we Lod i bin putum.

Blong mekem samting wetem fasin blong stap tru mo strong i bildimap fet mo tras mo mekem ol narawan i kasem stret save se, yumi lukaotem nomo blong mekem tingting blong Lod. Long ol kaonsel blong yumi, yumi stopem ol paoa blong wol mo folem rod we Lod i soem long yumi, blong stap lukaotem ol klia tingting long wanwan woman mo man mo mekem samting folem kaonsel we i kam tru long insperesen.¹⁸

Lukluk blong yumi i stap nomo long Sevya, mo yumi lukaot gud blong stopem ol aksen we bae ol pipol oli tekem se yumi stap mekem ol samting blong gud blong yumiwan o famli blong yumi nomo, o mekem gud long wan be long narasaed, bae wan narawan i harem nogud. Yumi traehad moa blong no mekem samting we bae ol pipol i tekem se yumi stap givim ona long man,¹⁹ blong oli luksave yumi, blong oli laekem yumi moa, mo blong oli raet abaot yumi.

Long en, wan laef blong stap tru mo strong i nidim yumi blong stap tru long tabu aedentiti blong yumi.

Yumi save sam we oli no olsem. Wan gudfala eksampol i Koriho, man we i agensem Kraes, we i lidim hat blong plante i go longwe, folem wanem we i pulum tingting blong olgeta “tru long maen blong wol.”²⁰ Be yet, long ol las taem blong laef blong hem, hem i talemaot, “Oltaem mi save se i gat wan God.”²¹ Presiden Henry B. Eyring i tijim se blong stap giaman “i agensem fasin blong ol spirit blong yumi,”²² tabu aedentiti blong yumi. Koriho i giaman long hemwan, mo trutok i no stap long hem.²³

Wanem i defren i we, Profet Josef Smit i talemaot wetem ful tras se “Mi save hemia, mo mi save se God i save hemia, mo mi no save talem se i no tru.”²⁴

Lod i lavem tumas brata blong Josef, Haeram, “from fasin blong stap tru mo strong long hat blong hem.”²⁵ Hem mo Josef, tufala i gohed blong stap tru kasem en—tru long tabu aedentiti blong tufala, laet mo save we tufala i kasem, mo tru long man we tufala i save se, bae tufala i kam olsem.

Letem yumi stretem yumiwan “blong folem tingting blong God”²⁶ mo developem wan fasin olsem hemia blong Kraes blong stap tru mo strong. Letem yumi folem Eksampol blong Hem, Sevya blong wol, mo no stop blong laef folem wan laef we i tru long God, long wanwan long yumi mo long tabu aedentiti blong yumi.

Olsem we Job i talem, “I gud God i skelem laef blong mi, nao bambae hem i save luk we mi mi no mekem samting nogud nating.”²⁷ Long tabu nem blong Jisas Kraes, amen.