Wetem Sapot blong Jeneresen We I Stap Kam Antap

Long taem we mi stap rere blong toktok long yufala, mi bin stap tingting fulap long wan stori blong Hileman mo ol yang boe blong ol pipol blong Amon. Mi bin filim paoa blong tijing blong ol profet long Buk Blong Momon we i stap tijim ol papa mo mama, ol bisop, mo ol memba blong wod taem mi stap stadi long stori ia.

Hileman i wan man we ol yang boe blong Amon oli save trastem. Hem i helpem olgeta oli gro mo kam antap moa long klin fasin. Oli save mo lavem hem mo “oli wantem [hem] blong i kam lida blong olgeta.”¹

Hileman i lavem ol yang boe ia tumas olsem ol pikinini mo i bin luk wan gudfala samting long olgeta.² Elda Dale G. Renlund i bin talem se: “blong givim gud seves long ol narawan yumi mas luk olgeta … tru long ol ae blong Papa long Heven. Long wei ia nomo, bae yumi stat blong andastanem tru valiu blong wan sol. Long wei ia nomo, bae yumi filim save lav we Papa long Heven i gat long evri … pikinini blong Hem.”³ Ol Bisop tedei oli gat blesing ia blong save luksave tabu aedentiti blong ol yut long kea blong olgeta.

Hileman “i kaontem”⁴ ol yang man we oli stap long kea blong hem. Hem i putum fasin blong bildimap strong rilesensip wetem olgeta i kam faswan.

Long wan taem we i nid blong jusum laef mo ded, Hileman mo ol soldia blong hem oli bin lusum ol man we oli stap folem olgeta biaen. Hileman i toktok wetem ol yut:

“Luk, yumi i no save gud be maet oli stop long stamba tingting se bae yumi kam agensem olgeta. …

“From hemia, wanem nao yufala i talem, ol boe blong mi,… ?”⁵

Ol fetful yang man ia oli ansa, “‘Papa, luk God blong yumi i stap wetem yumi, mo hem bae i no letem se bae yumi foldaon; ale, yumi go.”⁶ Oli bin win long dei ia, taem Hileman i sapotem ol yang man ia blong go⁷ mo faet.⁸

Ol yang man blong Amon oli bin wan bigfala tul mo oli strong tumas wetem strong paoa long tingting blong “sapotem ol pipol.”⁹ “Smol ami ia,” we Hileman i bin lidim, i givim “bigfala hop mo plante glad”¹⁰ i go long hat blong ol man blong Nifae we oli bin gat eksperiens blong faet bifo. Ol bisop tedei oli save lidim ol yut blong olgeta we oli spesel mo gat ol talen blong blesem wod mo karem Isrel i kam tugeta. Presiden Nelson i bin talem se hem ia i misin “we oli bin sendem [olgeta] i kam long wol from.”¹¹

Olsem ol yang man blong Amon ia we “oli bin tru long evri taem long eni samting we ol ami lida blong olgeta oli trastem olgeta blong mekem,”¹² Hileman i fetful blong folem ol lida blong hem. Nomata ol jalenj o ol samting we i holembak olgeta, oltaem Hileman i stanap “mo gat strong tingting”¹³ blong muvum wok blong olgeta. Taem oli bin givim oda long hem blong “maj i go wetem ol smol boe blong [hem],”¹⁴ hem i bin lisin.

Ol yut tedei oli gat blesing ia we ol bisop oli folem kaonsel blong ol lida blong yumi blong “toktok wetem ol presiden blong Yang Woman long wod.”¹⁵ Ol stek presiden i mekemsua se ol bisop mo ol presiden blong Yang Woman oli kasem instraksen blong mekem i hapen ol responsabiliti blong olgeta long ol yut.¹⁶

Hileman i kipim ol kavenan. Taem Amon i tijim gospel long ol papa mo mama blong ol yang man ia, hat blong olgeta i open mo oli bin akseptem. Oli stap strong long niufala laef blong olgeta blong stap olsem ol klin disaepol we oli mekem wan kavenan blong “oli putum daon ol tul blong faet blong olgeta.”¹⁷ Samting nomo we i mekem olgeta oli tingting blong brekem kavenan ia blong gobak long ol samting we oli stap mekem bifo blong stap faet, i we oli luk ol man blong Nifae oli stap long denja.

Ol pipol blong Amon oli wantem blong helpem ol pipol ia we oli givim long olgeta wan sef hom. Hileman, wetem ol narawan, oli askem strong long olgeta blong kipim kavenan blong olgeta blong no moa faet. Hem i gat moa tras long paoa we God bae i givim i bitim paoa ia we ol pipol blong Amon oli save mekem wetem ol naef mo ol bonara blong olgeta.

Taem Hileman mo ol yang soldia blong hem oli stap fesem jalenj we oli had, Hileman i gat tingting blong stap strong. “Be, luk, i nomata—mifala i trastem se God bae i mekem mifala i kam fri.”¹⁸ Eksampol, long taem ia we kolosap oli bin ded from we i no gat kaekae, ansa blong olgeta i blong “oli i kapsaetem tingting blong sol blong [olgeta] long prea i go long God, blong hem i mekem [olgeta] i strong mo tekemaot [olgeta] aot long han blong ol enemi … [mo] Lod … i soemaot long [olgeta] wetem toktok blong pis se bae hem i tekemaot [olgeta] aot long han blong enemi blong olgeta”¹⁹ “from fet blong olgeta we i bigwan tumas long samting ia we ol mama blong olgeta i bin tijim olgeta blong bilif.”²⁰

Yumi bin lanem aot long Hileman se ol papa mo mama blong ol yang man ia oli bin sapotem olgeta. Ol fetful papa mo mama ia oli save se oli gat responsabiliti blong tijim ol pikinini blong olgeta. Oli bin tijim ol pikinini blong olgeta blong kipim ol komanmen mo “wokbaot long stret laef”²¹ long fored blong God. Ol mama blong olgeta oli bin tijim olgeta “se sapos oli no gat tu tingting, God bae i sevem olgeta.”²² Ol papa blong olgeta oli stap olsem ol strong gudfala eksampol blong stap mekem kavenan.²³ Ol man blong faet ia blong bifo oli save ol fraet blong faet. Oli trastem se Hileman bae i save lukaotem gud ol boe blong olgeta we oli neva eksperiensem faet mo oli sapotem olgeta taem oli sendem “plante kaekae.”²⁴

Hileman i no bin stap hemwan taem hem i stap helpem ol yang ami ia. Hem i gat ol pipol raon long hem we hem i save go long olgeta blong oli sapotem mo gaedem hem. Hem i askem help long Kapten Moronae, mo help i bin kam.

I no gat wan we i stap givim seves long kingdom blong Lod i stap givim seves hemwan. Lod i bin blesem yumi wetem ol wod mo ol stek. Tru long oganaesesen blong Hem we i kambak, yumi gat ol risos, waes tingting mo insperesen blong fesem eni jalenj.

Wan bisop i givim gaed long wod tru long ol kaonsel.²⁵ Hem i sapotem mo leftemap tingting blong kworom blong ol elda mo Rilif Sosaeti blong mekem i hapen ol responsabiliti blong olgeta long ol famli we oli stap givhan long olgeta taem hem i stap intaviu long olgeta fo taem long wan yia. Ol presidensi ia oli tekem lid blong help blong faenemaot ol nid mo ol ansa we i gat insperesen. Ol stek presiden i givim sapot taem i givim instraksen long ol presidensi blong kworom blong ol elda, mo Rilif Sosaeti long saed blong ol responsabiliti ia.

Gaed blong ol lida mo ol papa mo mama, yu save faenem long Gospel Laebri mo long Gospel Living ap. Long ol risos ia we oli givim insperesen, yumi save faenem ol skripja, ol tijing blong ol profet blong tedei, mo Jeneral Hanbuk. Yut tap long Gospel Laebri i gat plante risos blong kworom mo ol klas presidensi²⁶ mo Blong Ol Yut Oli Kam Strong: Wan Gaed blong Stap Mekem Ol Joes. Taem evri memba blong wod oli stadi long ol tabu risos ia mo lukaotem blong Spirit i lidim olgeta, bae Lod i daerektem evriwan blong mekem ol yut oli kam strong.

Bae ful wod i kasem blesing mo bae oli kam strong taem ol memba oli lukluk nomo long ol jeneresen we i stap kam antap. Nomata long ol samting we yumi no strong long hem mo ol harem nogud, Papa long Heven i invaetem wanwan long yumi, tru long kompanionsip blong Spirit blong Hem, blong go mo helpem ol narawan. Hem i save se yumi gro mo kam tabu taem yumi folem ol smol voes blong Tabu Spirit.²⁷ I nomata se ol hadwok blong yumi oli no stret gud. Taem yumi patna wetem Lod, yumi save gat tras se ol hadwok blong yumi bae i go wetem wanem we Hem bae i mekem blong ol yut.

Taem yumi folem daereksen blong Tabu Spirit blong helpem ol yut, yumi kam ol witnes blong lav we Papa long Heven i gat long laef blong olgeta. Blong stap mekem wanem we Lod i talem tru long smol voes blong Tabu Spirit i stap bildim ol rilesensip blong lav mo tras. Hem i ol rilesensip long laef blong ol yut we i gat bigfala paoa long ol joes blong olgeta.

Ol yut bae oli lanem wei blong revelesen taem oli tekpat wetem yumi long rod ia blong lukaotem mo mekem folem ol smol voes ia blong givim seves long ol narawan. Taem ol yut oli tanem olgeta i go long Lod from gaed ia we i givim insperesen, ol rilesensip wetem mo tras blong olgeta long Hem bae i kam moa strong.

Yumi talemaot tras blong yumi long ol yut taem yumi stap givim sapot mo daereksen, be i no blong stap kontrolem olgeta.²⁸ Taem yumi lego mo letem ol yut blong lan tru long ol kaonsel tugeta, stap jusum wan wei we i gat insperesen, mo stap putum plan blong olgeta long aksen, bae oli kasem tru glad mo gro.

Presiden Henry B. Eyring i tijim se: “wanem i moa impoten i we [ol narawan] oli lanem samting aot long [yu] abaot huia stret olgeta, mo huia oli save kam. Mi ting se bae oli no save lanem tumas samting aot long ol longfala toktok. Bae oli save kasem tru long ol filing se huia yu, huia yu ting se i olgeta, mo huia yu ting se bae olgeta oli save kam olsem.”²⁹

Ol yut oli mekem yumi sapraes wetem strong tingting, fet blong olgeta, mo hamas samting oli save mekem. Taem oli jus blong stap tekpat fulwan olsem ol disaepol blong Jisas Kraes, gospel blong Hem bae i stap strong long ol hat blong olgeta. Blong stap folem Hem bae i kam wan pat blong huia i olgeta, be i no wanem nomo we oli stap mekem.

Hileman i bin helpem ol yang man blong Amon blong luk olsem wanem wan strong disaepol blong Jisas Kraes i laef. Yumi save stap olsem ol gudfala eksampol long ol yut long olsem wanem ol disaepol blong Kraes oli laef tedei. Ol fetful papa mo mama oli stap prea from ol eksampol ia long laef blong ol pikinini blong olgeta. I no gat samting i save riplesem paoa blong lav, blong ol adalt we oli stap kipim kavenan.

Olsem presiden blong kworom blong ol pris, bisop i save soem wan eksampol long ol yut long olsem wanem blong stap olsem wan tru hasban mo wan papa we i gat lav³⁰ taem i stap protektem, stap givim, mo prisaed³¹ long fasin we i stret mo gud. Ol bisop, taem oli gat wan lukluk olsem long ol yut,³² bae i save gat wan jenis we bae i stap longtaem blong plante jeneresen.

Ol yut tedei oli ol haeman mo haewoman³³ spirit blong Papa long Heven. Oli bin stap long medel blong ol tru man blong protektem trutok mo fridom blong mekem joes long laef, bifo laef long wol ia.³⁴ Oli bin bon long ol taem ia blong karem i kam tugeta Isrel tru long ol witnes blong olgeta we i gat paoa abaot Lod Jisas Kraes. Hem i save wanwan long olgeta mo i save wanem ol bigfala samting we oli save mekem. Hem i gat fasin blong save wet longtaem, taem oli stap gro. Hem bae i pemaot mo protektem olgeta. Hem bae i hilim mo gaedem olgeta. Hem bae i givim insperesen long olgeta. Yumi, ol papa mo mama mo ol lida blong olgeta, oli bin rere long yumi blong sapotem olgeta. Yumi gat Jos Ia blong Sevya blong i sapotem yumi taem yumi stap lukaotem nekis jeneresen.

Mi talemaot witnes se Jos blong Kraes, i kambak bakegen tru long Profet Josef Smit mo tedei Presiden Russell M. Nelson i stap lidim, i bin oganaes blong helpem ol yut blong mekem i hapen bigfala stamba tingting long ol las dei ia. Long nem blong Jisas Kraes, amen.