Wan Glad we I Moa Hae
Bae yumi evriwan i lukaotem mo faenem glad we i moa hae we i kam tru long fasin blong komitim laef blong yumi long Papa long Heven mo Pikinini blong Hem we i lavem tumas.
Mi bin gat bigfala blesing blong stap toktok long jeneral konfrens blong 30 yia nao. Long taem ia, plante man raon long wol oli bin askem ol kwestin abaot ol mesej ia. Smol taem ia, kolosap wan kwestin ia nomo oli stap askem. Oltaem bae oli askem olsem: “Elda Uchtdorf, mi bin lisin gud long las toktok blong yu be [i stop] … mi no bin harem eni samting abaot plen?”
Yes, afta tedei, ating bae oli nomo askem kwestin ia blong wan smol taem.
Long “Ol Klaod We Oli Stap Rol mo Swing Andanit long Laet blong San”1
I had blong bilivim se 120 yia nomo i pas taem Wilbur mo Orville Wright tufala i mekem fas flaet ova long sanbij blong Kitty Hawk, North Carolina. Fofala sot flaet blong dei ia blong Disemba, i bin jenisim wol mo openem doa i go long wan long ol bigbigfala kriesen we man i mekem long histri blong wol ia.
I bin wan denja blong stap flae long ol dei ia. Tufala brata ia tufala i save hemia. Mo papa blong tufala tu, Milton, i save. I tru, hem i fraet bigwan blong lusum tugeta boe blong hem afta long wan aksiden blong plen, mekem se tufala i promes long hem se bae tufala i neva flae tugeta bakegen.
Mo tufala i neva bin flae tugeta—be long wan taem nomo. Seven yia i pas afta long flaet ia long Kitty Hawk, Milton Wright i bin givim raet mo wajem Wilbur mo Orville i flae tugeta blong fastaem. Afta we oli kam lan, Orville i askem papa blong hem blong kam insaed long plen mo blong luk se i olsem wanem.
Taem we plen i flae aot long graon, Milton we i gat 82 yia i harem i glad tumas blong flae, mekem se i nomo fraet. Orville i glad taem papa blong hem i singaot wetem glad, “moa hae, Orville, moa hae!”2
!Man ia i semmak nomo long mi!
Ating risen blong mi stap tokbaot plen samsamtaem hem i from se mi save sam samting we ol Wrights oli bin filim. Mi tu mi bin “ronwe long strong paoa blong graon ia mo mekem ol wing blong plen i danis antap long skae wetem laf mo glad.”3
Fas flaet blong ol Wright brata, we i hapen 37 yia nomo bifo mi bon, i openem ol doa blong niu save, sapraes, mo gudfala glad long laef blong mi.
Mo yet, olsem glad ia we i wan sapraes, i gat wan glad we i moa hae. Tedei, long spirit ia blong Milton we i talem wetem glad, “moa hae, Orville, moa hae,” Mi wantem blong tokbaot glad ia we i moa hae—i kam wea, olsem wanem i kam long hat blong yumi, mo olsem wanem yumi save eksperiensem moa.
Ful Stamba Tingting abaot Laef blong Man long Wol
Olsem we i klia gud i stap se evri man i wantem blong stap hapi.4 Be, i klia gud tu i stap se i no evri man oli hapi. Sore blong luk se blong plante pipol, fasin blong stap hapi i had blong faenem.5
?From wanem i olsem? Spos fasin blong stap glad i wan samting we yumi ol man blong wol i wantem moa, from wanem i had long yumi blong faenem? Blong talem long toktok blong wan kantri singsing, ating yumi stap lukaotem glad long ol rong ples.6
Wea Nao Yumi Save Faenem Fasin blong Stap Glad?
Bifo yumi tokbaot olsem wanem blong faenem glad, letem mi talem se mi luksave ol sore, mo ol nara hadtaem long saed blong maen mo filing se oli ril, mo ansa i no simpol nomo se blong “Traem blong stap glad moa.” Stamba tingting blong mi tedei i no blong daonem o blong no luksave ol helt problem long saed blong maen. Sapos yu fesem ol hadtaem olsem, mi krae mo stanap long saed blong yu. Long sam pipol, blong faenem glad oli go lukaotem help long ol dokta we oli skul mo spendem taem blong olgeta blong tritim sik long saed blong maen. Yumi mas talem tangkyu bigwan long kaen help olsem.
Laef i no ol hae filing we i folfolem olgeta long wan oda we i no gat en. “From i mas nid, se i mas gat wan fasin blong go agens long evri samting”7 Mo sapos God Hem i krae, olsem skripja i talem se Hem i krae,8 hemia i minim se yu mo mi bae yumitu krae tu. Filim sore i no wan saen blong filim se yu lus. Wan samting we i gud long laef ia, i we glad mo sore tufala i joen tugeta mo no save seperet.9 Olsem yufala evriwan, mi bin harem nogud, mi sore, mo no glad, mo rigret bigwan.
Be, mi bin eksperiensem wan niu stat blong laef tu long miwan we i fulumap gud sol wetem glad mekem se i had blong kipim insaed. Mi bin faenemaot blong miwan se strong filing blong pis ia i kam tru long fasin blong folem Sevya mo wokbaot long wei blong Hem.
Pis we hem i givim i no semmak long wanem wol i givim.10 I moa gud. Hem i moa hae mo i moa tabu. Jisas i talem, “Be mi mi kam blong mekem rod blong ol sipsip oli save gat laef, mo blong laef ya blong olgeta i save fulap gud long evri samting.”11
Gospel blong Jisas Kraes i tru se i “gud nius blong mekem man i glad”!12 ! I wan mesej we i givim hop! I wan mesej blong serem yok mo leftemap hevi samting.13 Blong karem laet i kam tugeta. I kam long heven, wetem andastaning we i moa hae, ol kavenan we oli moa tabu, sekiuriti we i no save finis, mo !glori we i blong oltaem!
Glad i stamba tingting blong God long plan blong Hem long ol Pikinini blong Hem. Hem i wanem oli krietem yu from—“blong bae [yu] maet gat glad”!14 oli bildim yu from hemia nao!
Papa blong yumi long Heven i no haedem rod blong stap glad. I no wan samting blong stap haedem. !I stap, blong evri man!15
Hem i wan promes long olgeta we oli wokbaot folem rod blong stap olsem disaepol, folem ol tijing mo eksampol blong Sevya, kipim ol komanmen blong Hem, mekem mo givim ona long ol kavenan we oli mekem wetem God. !Promes ia i naes tumas!
God I Gat Moa Samting blong Givim
Yumi evriwan i save ol man we oli talem se oli no nidim God blong stap glad, mo we oli no nidim relijin blong stap glad.
Mi luksave mo respektem ol filing ia. Papa blong yumi long heven we i gat lav i wantem evri pikinini blong Hem blong oli save gat moa glad olsem we oli save gat, mekem se i fulumap wol ia wetem plante naes mo ol gudfala samting blong “i luk naes long ae blong man, mo … mekem hat blong hem i glad.”16 Blong mi, blong stap flae i karem bigfala glad i kam long mi. Plante oli faenem long miusik, art, ol samting we yu laekem blong mekem, o ol samting raon long yumi (neja).
Taem yumi stap invaetem mo serem ol gudnius blong Sevya blong bigfala glad, i no minim se yumi stap katemaot ol nara sos blong glad ia. I minim nomo se God i gat moa samting blong givim. Wan glad we i moa hae mo i moa tru—wan glad we i bitim eni samting we wol ia i save givim. Hem i wan glad we i holemtaet hat we i brok, go insaed long sore, mo save daonem fasin blong stastap yuwan.
Glad we wol i givim, taem yumi komperem, i no save stap longtaem. I no save. Hem i neja blong ol samting blong wol blong oli kam olfala, kam sting, brokbrok, o kam nogud. Be glad we i olsem hemia blong God i no save finis, from se God Hem i no save finis. Jisas Kraes i bin kam blong leftemap yumi aot long taem naoia mo putum gudfala fasin i stap. Hem nomo i gat paoa ia, mo glad blong Hem nomo i save stap oltaem.
Sapos yu filim se i nid blong gat moa kaen glad olsem long laef blong yu, mi stap invaetem yu blong kam long wan wokbaot folem Jisas Kraes mo wei blong Hem. Hem i wan wokbaot blong laef taem—mo i no gat en. Plis letem mi givim sam long ol step we i blong statem wokbaot ia blong faenem stret glad.
Go Kolosap long God17
?Yu tingbaot woman ia long Niu Testeman we sik blong hem i stap blong 12 yia?18 Hem i spendem evri samting we hem i gat long ol dokta, be sik i no go daon nomo. Hem i harem abaot Jisas; oli save gud abaot paoa blong Hem blong hiling. ?Be bae Hem i save hilim hem? ?Mo bae hem i go moa kolosap long Hem olsem wanem? Sik blong hem i mekem hem i no klin folem loa blong Moses, mekem se hem i no nid blong kam kolosap long ol narawan.19
Hem i no save kam nomo long Hem long pablik ples mo askem blong i hilim hem.
Yet, hem i tingting se, “spos mi save tajem ol klos blong hem nomo, bae mi save kam oraet.”20
Long en, fet blong hem i mekem i winim fraet blong hem. Hem i winim ol strong toktok blong ol narawan mo i fosem hem i go long Sevya.
Afta, hem i kam kolosap blong save tajem Hem. Hem i pusum han blong hem.
Mo hem i kam oraet.
?Yumi evriwan i no olsem woman ia?
Maet bae i gat plante risen from wanem yumi no wantem blong kam moa kolosap long Sevya. Maet bae yumi fesem ol toktok we i kam long ol naraman we bae i mekem yumi wantem blong givap. Wetem hae tingting blong yumi, yumi save pusumaot janis blong kasem wan simpol samting wetem hae praes. Yumi save tingting se kondisen blong yumi i no kwalifaem yumi blong kasem hiling blong Hem—se i longwe tumas o ol sin blong yumi i fulap tumas.
Olsem woman ia, mi bin lanem se sapos yumi kam moa kolosap long God mo pusum han blong yumi blong tajem Hem, bae yumi save faenem hiling, pis, mo glad.
Lukaotem glad
Jisas i bin tijim, “lukaotem, mo bae yu faenem.”21
Mi bilif long sentens ia se i no wan promes nomo long saed blong spirit, hem i wan tru toktok.
Sapos yumi lukaotem ol risen blong stap kros, blong gat tu tingting, blong stap nogud o stap yumiwan, bae yumi faenem olgeta.
Be, sapos yumi lukaotem glad—sapos yumi lukaotem ol risen blong stap glad, mo glad blong folem Sevya, bae yumi faenem olgeta.
Yumi no faenem tumas wanem we yumi no stap lukaotem.
?Yu stap lukaotem Glad?
Lukaotem, mo bae yu faenem.
Stap Givhan long Yufala Wanwan22
Jisas i bin tijim, “Man we i stap givim, hem i save harem gud moa, i winim man we i stap kasem.”23
?I save hapen se taem yumi stap lukaotem glad, gudfala wei blong faenem, i blong serem wetem ol narawan?
!Ol brata mo sista, yu save mo mi save se hemia i tru! Glad i olsem wan besin blong flaoa o botel blong oel we bae i neva save finis.24 Tru glad i kam moa plante taem yumi serem.
I no nidim wan bigfala samting o wan had samting.
Yumi save mekem ol simpol samting nomo.
Olsem fasin blong stap prea from wan man wetem ful hat blong yumi.
Talem tru long wan se yu glad.
Helpem wan blong i filim welkam, respek, se i gat valiu, mo we yu lavem hem.
Serem wan fevret skripja mo wanem i minim long yumi.
O iven stap lisin nomo.
“Taem we yufala i stap wok blong ol narafala man, yufala i stap mekem wok blong God blong yufala nomo,”25 mo God bae i pem bak yu fulwan.26 Glad we yu givim i go long ol narawan bae i kambak long yu “olsem we man i fulumap gud bag, i seksekem, i ramem gogo i fulap gud, mo i folfoldaon.”27
“?Wanem Nao bae Yumi Mekem?”28
Long ol dei we i stap kam, ol wik, mo ol manis, bae mi invaetem yufala blong:
-
Spendem taem long wan tru fasin, blong traehad fulwan blong go moa kolosap long God.
-
Lukaotem evri dei ol taem blong filim hop, pis, mo glad.
-
Mekem olgeta we oli stap raon long yu oli glad.
Ol dia brata mo sista blong mi, ol dia fren, taem yu stap lukaotem toktok blong God blong kasem wan save we i moa klia long plan blong God, akseptem ol invitesen ia, mo traehad blong wokbaot long Wei blong Hem, bae yu eksperiensem “Pis blong God, i bitim save blong yumi,”29 nomata long taem blong sore. Bae yu filim lav blong God we i bigwan bitim mak, i stap solap long hat blong yu. Laet blong heven bae i kam tru long ol tudak blong ol hadtaem blong yu, mo bae yu stat blong eksperiensem ol glori mo sapraes blong kingdom blong heven we i stret gud. Bae yu filim se spirit blong yu i flae i go antap aot long paoa blong wol ia.
Mo olsem gudfala Milton Wright, maet bae yu leftemap voes blong yu wetem glad mo singaot “!moa hae, Papa, moa hae!”
Bae yumi evriwan i lukaotem mo faenem glad we i moa hae we i kam tru long fasin blong komitim laef blong yumi long Papa long Heven mo Pikinini blong Hem we i lavem tumas. Hemia i tru prea mo blesing blong mi long tabu nem blong Jisas Kraes, amen.