“Stap Kwaet, mo Save se Mi Mi God”
Yumi save stap kwaet mo save se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi.
I no longtaem, long wan taem blong wan open haos mo wan dei blong media blong wan niu haos blong Lod, mi bin lidim wan grup blong ol jenalis long wan tua raon long tabu bilding ia. Mi tokbaot stamba tingting blong ol tempol long Jos Ia blong Jisas Kraes blong Ol Lata dei Sent mo ansarem plante long ol gudfala kwestin blong olgeta.
Bifo mifala i go insaed long selestial rum, mi eksplenem se spesel rum ia insaed long haos blong Lod, hem i saen we i representem pis mo olsem wanem i naes insaed long hom long heven we yumi save gobak long hem afta long laef ia. Mi talem long ol visita se bae yumi no toktok taem yumi stap insaed long selestial rum, be bae mi glad blong ansarem eni kwestin afta we mifala i muv i go long nekis ples blong visit.
Taem mifala i kamaot long selestial rum, mo taem mifala i kam tugeta long nekis ples blong visit, mi askem ol visita sapos oli bin luk wan samting we oli wantem blong serem. Wan long ol jenalis i serem wetem filing i stap daon bigwan, “mi neva eksperiensem wan samting olsem long ful laef blong mi. Mi no save bilivim se i gat fasin blong stap kwaet olsem long wol, mi jes neva bilivim nomo se hemia i posibol.”
Toktok blong jenalis ia we i tru mo i klia i bin tajem mi. Mo aksen blong jenalis ia i bin soem wan impoten pat blong stap kwaet—blong kamaot mo no givim intres long ol noes aotsaed raon long yumi.
Taem mi stap tingting hevi long toktok blong jenalis ia mo lukluk long olsem wanem laef blong yumi tedei i bisi mo i kwik—ples i bisi, noes, defren rod, ol rod blok, tekem longfala rod we plante taem i luk olsem i tekem taem blong yumi tumas—wan skripja i kam long maen blong mi: “Stap kwaet, mo save se, Mi, Mi God.”1
Mi prea se Tabu Spirit bae i tajem wanwan long yumi taem yumi tingting long wan hae mo tabu ples we i kwaet long laef blong yumi—wan insaed pat blong sol long spirit we i kwaet i mekem yumi kam blong save mo tingbaot se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi. Spesel blesing ia i stap blong evri Jos memba we oli traehad mo stap fetful blong kam “ol kavenan pipol blong Lod.”2
Stap Kwaet
Long 1833, bigfala hadtaem i bin kasem bigwan nao ol Sent blong Misuri. Ol grup blong rabis man i bin ronemaot olgeta long ol hom blong olgeta long Jakson Kaonti, mo sam Jos memba oli traem blong go stap long sam kantri kolosap. Be bigfala hadtaem ia i gohed, mo i bin gat plante ded. Long bigfala taem ia blong jalenj, Lod i givimaot instraksen ia long Profet Josef Smit insaed long Ketlan, Ohaeo:
“From hemia, leftemap tingting blong hat blong yufala long saed blong Saeon; from we evri samting we i laef i stap long han blong mi; stap kwaet mo save se, mi, mi God.”3
Mi biliv se toktok blong Lod blong “stap kwaet” i minim moa bitim blong no stap toktok nomo o no muvmuv. Ating wanem Hem i wantem yumi blong tingbaot i blong dipen long Hem mo paoa blong Hem “long evri taem mo long evri samting, mo long evri ples we [yumi] stap long hem.”4 From hemia “stap kwaet” i wan wei blong rimaenem yumi blong stap lukluk nomo long Sevya olsem ples we i moa hae blong mekem sol i kwaet long saed blong spirit blong save kam strong moa mo winim ol had samting.
Bildim antap long Strong Ston
Tru fet i lukluk nomo insaed mo long Lod Jisas Kraes—long Hem olsem Tabu mo Wan Stret Pikinini Ia Nomo blong Papa We I No Save Finis mo long Hem mo misin blong pemaot man we Hem i bin kam mekem.
“From hem i bin mekem wanem we loa i askem, mo hem i wantem olgeta evriwan we oli gat fet long hem; bae oli hang long evri gudfala samting; taswe, hem i toktok from stamba tingting blong ol pikinini blong ol man.”5
Jisas Kraes i Ridima,6 i Man blong Toktok,7 mo i Loya blong yumi8 wetem Papa We I No Save Finis mo strong ston ia we yumi mas bildim laef blong yumi long saed blong spirit antap long hem.
Hileman i eksplenem, “Tingbaot, tingbaot se hem i antap long strong ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala ; blong mekem se taem we devel bae i sendemaot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae oli no gat paoa ova long yutufala blong pulum yutufala i go daon long bigfala hol blong harem nogud mo trabol we i no gat en; hemia i from strong ston we yutufala i bin bildimap yutufala antap long hem, wan fandesen we sapos ol man oli bildimap olgeta antap long hem, oli no save foldaon.”9
Saen ia blong Kraes olsem “strong ston” ia we yumi mas bildim fandesen blong laef blong yumi long hem, i givim moa save. Plis luk gud long ves ia se Sevya i no fandesen. Be, oli bin talem long yumi blong bildim fandesen blong yumi long saed blong spirit antap long Hem.10
Fandesen i wan pat blong wan bilding we i joen i go long graon. Wan strong fandesen i protektem bilding aot long ol disasta blong laef mo plante nara fos we i stap damejem bilding. Wan stret fandesen i serem weit blong wan bilding we i stap long wan bigfala eria blong mekem se i no hevi tumas antap long graon ia mo i mekem bilding i sidaon gud antap long graon.
Wan strong mo gud joen bitwin graon mo fandesen i impoten sapos wan bilding i mas stanap strong gud blong longtaem. Mo blong ol spesel kaen bilding, angka pin mo ol waea, oli yusum blong joenem fandesen blong wan bilding i go long “bedston,” we hem i ston we i stap andanit long fandesen we antap long hem i gat ol samting olsem graon mo karie.
Long sem fasin, yumi mas joenem fandesen blong laef blong yumi i go long Kraes sapos yumi nidim blong stap moa strong. Ol tabu kavenan mo odinens blong gospel blong Sevya we i kambak bakegen, yumi save komperem wetem angka pin mo waea we oli yusum blong joenem bilding i go long bedston. Evri taem we yumi kasem, riviu, tingbaot, mo riniu ol tabu kavenan wetem fet, ol angka blong yumi long saed blong spirit oli moa strong mo sef gud antap long “strong ston” ia we i Jisas Kraes.
“Taswe, eni man we i biliv long God, i maet wetem wan tru hop, kasem wan wol we i moa gud, yes, iven blong kasem wan ples long raet han blong God, we hop ia i kam tru long fet, i mekem wan angka long sol blong ol man, we bae i mekem olgeta oli strong gud mo oli stanap strong, mo oltaem oli mekem plante gudfala wok, mo i lidim olgeta blong leftemap nem blong God.”11
Sloslo, ol samting i stap kam antap “folem taem,”12 “klin fasin i flasem ol tingting blong [yumi] oltaem,” “tras blong yumi [bae i gro mo i kam moa strong] long fored blong God,” mo “Tabu Spirit bae [ i fren blong yumi] we i folem yumi oltaem.”13 Yumi kam blong fas moa, joen strong long rus, stanemap gud mo stap gud.14 Taem yumi bildim fandesen blong laef blong yumi long Sevya, yumi kasem blesing blong “stap kwaet”—blong gat wan klia save long saed blong spirit se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi.
Ol Tabu Taem, Ol Tabu Ples, mo Hom
Lod i givim tugeta ol tabu taem mo tabu ples blong helpem yumi eksperiens mo lanem abaot fasin ia blong stap kwaet insaed long ol sol blong yumi.
Eksampol, Sabat i dei blong God, wan tabu taem we oli putum i stap blong tingbaot mo wosipim Papa long nem blong Pikinini blong Hem, blong tekpat long prishud odinens, mo blong kasem mo riniu ol tabu kavenan. Evri wik yumi wosipim Lod long taem blong hom stadi mo tu olsem “ol man we i gat raet insaed long ples blong God, olsem ol narafala man blong God nomo”15 long taem blong sakramen mo ol nara miting. Long tabu dei blong Hem, ol tingting, ol aksen, mo ol fasin blong yumi, oli ol saen we yumi stap givim i go long God, mo i wan saen blong lav ia we yumi gat long Hem.16 Evri Sandei, sapos yumi wantem, yumi save stap kwaet mo save se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi.
Mein tingting blong wosip long Sabat, i blong “go long haos blong prea mo mekem ol tabu seremoni blong [yumi] long tabu dei blong [Lod].”17 Ol “Haos blong prea” we yumi stap kam tugeta long hem long Sabat oli ol mitinghaos mo ol nara ples we oli apruvum—ol tabu ples blong stap revren, wosip, o stap lan. Wanwan long ol mitinghaos mo bilding we wan prishud atoriti i bin dediketem olsem wan ples we Spirit blong Lod bae i stastap long hem, mo wan ples we ol pikinini blong God bae oli save kam long hem blong “save Ridima blong olgeta.”18 Sapos yumi wantem, yumi save “stap kwaet” long ol tabu ples blong yumi blong wosip mo save gud fulwan se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi.
Tempol i wan nara tabu ples we oli mekem speseli blong stap wosip mo stap givim seves long God mo stap lanem ol trutok we i no save finis. Yumi tingting, yumi mekem samting, mo yumi dresap defren insaed long haos blong Lod bitim ol nara ples we yumi stap long hem oltaem. Insaed long tabu haos blong Hem, sapos yumi wantem, yumi save stap kwaet mo save se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi.
Stamba prinsipol blong ol tabu taem mo tabu ples ia oli semmak gud: blong ripitim mo putum lukluk blong yumi moa long Papa long Heven mo plan blong Hem, Lod Jisas Kraes mo Atonmen blong Hem, paoa blong Tabu Spirit blong mekem wan i kam antap, mo ol promes we i go wetem ol odinens mo kavenan blong gospel blong Sevya we i kambak bakegen.
Tedei mi ripitim wan prinsipol we mi bin talem fastaem. Ol hom blong yumi i mas gat tugeta tabu taem mo tabu ples we insaed wanwan man mo ol famli i save “stap kwaet” mo save se God i Papa blong yumi long Heven, yumi ol pikinini blong Hem, mo Jisas Kraes i Sevya blong yumi. I impoten blong yumi aot long ol hom blong yumi blong go wosip long Sabat long haos blong Lod. Be taem nomo we yumi gobak long ol hom blong yumi wetem lukluk ia mo paoa ia long saed blong spirit we yumi kasem insaed long ol tabu ples mo ol aktiviti, bae yumi save holemtaet ol stamba tingting blong laef long wol ia mo winim ol temtesen long wol ia we i fulap long sin.
Ol eksperiens blong yumi blong Sabat, tempol, mo hom, i mas mekem yumi strong wetem paoa blong Tabu Spirit, mo gohed blong joenem yumi wetem wan strong kavenan i go long Papa mo Pikinini, mo wetem “wan stret mo klin hop”19 long ol promes blong God we i no save finis.
Taem hom mo Jos i kam tugeta mo stap wan long Kraes,20 plante taem yumi gat trabol, be neva tingting mo hat blong yumi i foldaon. Yumi save lusum rod tru ol situesen mo jalenj blong yumi, be neva yumi lus olgeta. Nating we oli stap ronem yumi, be bae yumi luksave tu se yumi neva stap yumiwan nomo.21 Yumi save kasem paoa long saed blong spirit blong kam mo stap strong, mo tru.
Promes mo Testemoni
Mi promes se taem yumi bildim fandesen blong laef blong yumi antap long “strong ston” ia we i Jisas Kraes, bae Tabu Spirit i save blesem yumi blong kasem wan filing blong stap kwaet long saed blong spirit insaed long sol we i mekem yumi save mo tingbaot se God i Papa blong yumi long Heven, yumi ol pikinini blong Hem, Jisas Kraes i Sevya blong yumi, mo yumi kasem blesing blong mekem mo winim ol had samting.
Wetem glad, mi talem witnes blong mi se God i Papa blong yumi long Heven, yumi ol Pikinini blong Hem, mo Jisas Kraes, i Ridima blong yumi, mo i “strong ston” blong salvesen blong yumi. Mi testifae olsem long tabu nem blong Lod Jisas Kraes, amen.