Jisas Kraes I Stap long Medel blong Laef blong Yumi

Taem yumi go tru long laef long wol ia, bae yumi fesem ol tes blong laef long ol taem we: hat i soa tumas from wan we yumi lavem i ded, stap go tru long wan bigfala sik, kasem panis tru loa from samting we yu no mekem, ol nogud eksperiens blong abius, traehad from no gat wok, famli problem, kwaet krae from fasin blong stap yuwan, o ol harem nogud we i kam from ol raorao.¹ Long ol taem olsem, ol sol blong yumi i lukaotem sefples blong stap long hem.² Yumi traehad blong lukaotem blong save: ?Wea nao yumi save faenem meresin blong pis?³ ?Long huia nao yumi save putum tras blong yumi long hem blong helpem yumi wetem tras mo paoa blong winim ol jalenj ia?⁴ ?Hu i gat fasin blong save wet longtaem, i fulap wetem lav, mo i gat paoa mo sapot blong leftemap mo sapotem yumi?

Ol hevi kwestin blong sol, hem i olgeta we oli kamaot klia long taem blong ol had eksperiens mo hevi tes blong laef blong yumi, oli ansarem olgeta tru long bigfala lav blong Jisas Kraes.⁵ Long Hem, mo tru ol promes blesing blong gospel we i kambak bakegen,⁶ yumi faenem ol ansa we yumi lukaotem. Hem i tru long Atonmen we i no gat en we yumi kasem wan bigfala presen we i bitim mak—wan blong hop, hiling, mo stret save ia blong gat Hem long laef blong yumi we i gogohed blong oltaem.⁷ Presen ia i gat i stap blong evriwan we oli soem fet, mo akseptem pis mo fasin blong pemaot man we Hem i givim i fri.

Lod i stretem han blong Hem long wanwan long yumi, wan aksen we i impoten long tabu lav mo fasin blong stap kaen blong Hem. Invitesen blong Hem long yumi i moa bitim wan simpol singaot, hem i wan tabu promes, we i mekem i kam strong tru long paoa blong gladhat blong Hem we i stap strong kasem en. Long ol skripja, Hem i talem long yumi wetem lav:

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan abaot mi, nao bambae yufala i save faenem pis long laef blong yufala.

“From we yok blong mi i isi nomo, mo oli no hevi.”⁸

Klia invitesen blong Hem “yufala i kam long mi” mo “putum yok blong mi” hem i pruvum tru fasin blong promes blong Hem—wan promes we i bigwan we i fulap long lav blong Hem, mo givim long yumi wan agrimen: “Bae yufala i faenem pis long laef.”

Taem yumi wok had oltaem blong lukaotem spirit blong i lidim yumi,⁹ yumi stat blong mekem wan ful jenis we bae i mekem testemoni blong yumi i kam strong moa. Taem yumi andastanem bigfala lav we i stret gud evriwan blong Papa blong yumi long Heven mo Jisas Kraes,¹⁰ hat blong yumi i fulap wetem fasin blong talem tangkyu, tingting we i stap daon,¹¹ mo mekem i kam niu bakegen tingting ia blong wantem folem rod ia blong stap wan disaepol.¹²

Presiden Russell M. Nelson i tijim: “taem we laef blong yumi i stap lukluk nomo long plan blong God blong fasin blong sevem man … mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi. Glad i kam long Hem mo from Hem.”¹³

Alma i stap toktok long boe blong hem Hileman, mo i talem: “Mo nao, o boe blong mi Hileman, luk, yu stap long yangfala laef blong yu, mo from hemia, mi askem strong long yu se bae yu harem ol toktok blong mi mo lanem samting aot long mi; from mi save se eni man we bae i putum tras blong hem long God, bae God i sapotem olgeta long ol tes blong olgeta, mo trabol blong olgeta, mo ol hadtaem blong olgeta, mo bae God i leftemap olgeta long las dei.”¹⁴

Hileman, i stap toktok long ol boe blong hem, i bin tijim abaot prinsipol ia we i no save finis blong putum Sevya long medel blong laef blong yumi: “Tingbaot, tingbaot se hem i antap long strong ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala.”¹⁵

Long Matiu 14 yumi lanem se afta we yumi harem abaot ded blong Jon Baptaes, Jisas i lukaotem blong stap Hemwan. Be, wan bigfala grup i bin folem Hem. Wetem fasin blong lav mo sore, mo blong no letem harem nogud blong Hem i stopem Hem from misin blong Hem, Jisas i welkamem olgeta, mo stap hilim olgeta we oli sik long medel blong olgeta. Taem naet i kam, ol disaepol i bin fesem wan had jalenj: from i gat plante pipol, i no bin gat inaf kakae i stap blong fidim olgeta. Ol disaepol i talem long Jisas blong sendemaot ol pipol i go blong lukaotem kakae, be Jisas wetem bigfala lav mo save finis wanem bae i hapen, i askem ol disaepol blong fidim olgeta nomo.

Taem we ol disaepol i bin bisi wetem jalenj ia blong lukaotem kaekae, Jisas i soem tras mo lav blong Hem long Papa blong Hem, wetem lav ia we Hem i gat oltaem blong ol pipol. Hem i lidim ol pipol blong sidaon long gras, mo i tekem faef bred mo tu fis nomo, Hem i jusum blong talem tangkyu long Papa blong Hem, mo luksave wanem we God i save mekem ova long atoriti mo paoa blong Hem.

Afta we Hem i talem tangkyu, Jisas i brekem bred mo ol disaepol oli serem long ol pipol. Hem i wan merikel, kakae i no bin inaf nomo, be i bin plante wetem 12 basket we i stap oli no bin kakae. Grup we oli bin fidim i bin gat faef taosen man, wetem ol woman mo ol pikinini.¹⁶

Merikel ia i bin tijim yumi wan bigfala lesen: taem fesem ol jalenj, i isi blong lukluk moa long ol hadtaem blong yumi. Be, Jisas Kraes i soem eksampol blong paoa ia blong lukluk moa long Papa blong Hem, taem i stap talem tangkyu, mo stap luksave se ol ansa blong ol hadtaem blong yumi i no stap long yumi nomo be wetem God.¹⁷

Taem yumi fesem ol hadtaem, hem i nomol blong yumi tingting blong lukluk nomo long ol hadtaem ia we yumi stap fesem. Ol jalenj blong yumi oli ril, mo oli tekem ful tingting blong yumi, be prinsipol we yumi yusum blong winim ol jalenj ia, i ples ia we yumi jusum blong putum tingting blong yumi long hem. Taem yumi putum Kraes long medel blong ol tingting mo ol wok blong yumi, bae yumi mekem samting long wei we i semmak wetem lukluk mo paoa blong Hem.¹⁸ Jenis ia i no mekem ol hadtaem blong yumi i kam smol; be, i helpem yumi blong go tru wetem help we i kam antap long heven.¹⁹ Olsem risal, yumi faenem ol ansa mo sapot we i kam long wan waes we i moa hae. Blong adoptem lukluk ia we Kraes i stap long medel blong laef i givim paoa long tingting blong winim ol tes blong yumi,²⁰ mo stap rimaenem yumi se wetem Sevya, wanem we i luk olsem wan bigfala problem i save kam wan rod blong bigfala progres long saed blong spirit.

Stori blong yangfala Alma insaed long Buk blong Momon i soem wan tru stori abaot fasin blong pemaot man mo strong paoa blong Kraes long medel blong laef blong wan. Blong fas taem, Alma i bin stanap olsem wan we i agensem Jos blong Lod, taem i stap lidim plante man i kamaot long rod blong stret mo gud fasin. Be, wan we i kam long heven i stopem hem, we i bin wan visit blong wan enjel, we i mekem hem i luksave ol rabis fasin blong hem.

Long taem ia we hem i harem nogud tumas, from rong mo wantem tumas blong faenem wan wei blong kamaot long harem nogud blong hem long saed blong spirit, Alma i tingbaot ol tijing blong papa blong hem abaot Jisas Kraes mo paoa blong Atonmen blong Hem. Wetem wan hat we i wantem tumas fasin blong pemaot man, wetem tru hat hem i sakem sin mo krae from sore blong Lod. Long impoten taem ia, taem we Alma i gat klia tingting ia se hem i rili nidim sore blong Kraes, tingting ia i givim long hem wan impoten wei blong jenisim laef. Ol sin mo mistek mo fasin blong lusum hop i aot long hem mo wan filing blong glad mo pis i fulumap hem.²¹

Jisas Kraes i hop mo ansa long evri bigfala harem nogud blong laef. Tru long sakrifaes blong Hem, Hem i pemaot ol sin blong yumi mo tekem long Hemwan evri harem nogud blong yumi—soa, no gat jastis, sore, mo fraet—mo Hem i fogivim mo hilim yumi taem yumi gat tras long Hem mo lukaotem blong jenisim laef blong yumi blong kam moa gud. Hem i Man blong Hilim yumi,²² stap givim kamfot mo stretem ol filing mo tingting blong yumi tru long lav mo paoa blong Hem, olsem we Hem i hilim plante long taem blong Hem long wol.²³ Hem i wota ia we i stap laef, stap fulfilim bigfala nid blong sol blong yumi wetem lav mo fasin blong stap kaen we i stap oltaem. Hemia i olsem promes ia we Hem i bin mekem long woman Sameria ia long wel, taem hem i talem blong givim long hem, “wan springwota we i save ron oltaem blong givim laef ya we i no save finis.”²⁴

Mi talem witnes blong mi se Jisas Kraes i laef, se Hem i prisaed ova long tabu jos Jos ia blong Hem, Jos Ia blong Jisas Kraes blong Ol Lata-dei Sent.²⁵ Mi testifae se Hem i Sevya blong wol, Prins blong Pis,²⁶ King blong ol king, Lod blong ol Lod,²⁷ Ridima blong wol. Mi talemaot tru se yumi stap oltaem long maen mo hat blong Hem. Olsem wan pruf long hemia, Hem i putumbak Jos blong Hem long ol las dei ia mo singaotem Presiden Russell M. Nelson olsem profet blong Hem mo Presiden blong Jos long taem ia tedei.²⁸ Mi save se Jisas Kraes i givim laef blong Hem, blong yumi save gat laef we i no save finis.

Taem yumi traehad blong stap putum Hem long medel blong laef blong yumi, ol revelesen i kam, bigfala pis i kavremap yumi, mo tru long Atonmen blong Hem, yumi save kasem fogivnes mo hiling.²⁹ Hem i long Hem we yumi faenem paoa blong win, strong paoa long tingting blong gohed strong, mo pis we i bitim evri andastaning. Bae yumi traehad evri dei blong kam moa kolosap long Hem, we i ples blong evri gud samting,³⁰ wan laet blong hop long rod blong yumi i gobak long ples blong Papa blong yumi long Heven. Long tabu nem blong Jisas Kraes, amen.