Gat Tras long Lod

Long famli blong mifala, samtaem mifala i stap plei wan gem we oli singaotem “Pleiplei blong Tras.” Maet yu tu yu bin plei long hem finis. Tu pipol i stanap samples wan mita longwe long narawan, mo wan bae i givim baksaed blong hem i go long narawan. Taem hem we i stanap biaen i givim saen, hem long fored bae i foldaon i gobak biaen i go long han blong fren blong hem we i stap wet blong holemtaet hem.

Tras i fandesen blong evri rilesensip. Wan impoten kwestin long eni rilesensip hem i “?Mi save trastem nara man o woman ia?” Wan rilesensip i stat nomo taem ol pipol oli wantem blong trastem olgeta wanwan. Hem i no wan rilesensip sapos wan i trastem narawan fulwan be narawan i no trastem bak narawan.

Wanwan long yumi i wan spirit pikinini boe o gel blong wan Papa long Heven we i gat fulap lav.¹ Be nomata we long laen ia long saed blong spirit, i givim wan fandesen, laen ia hemwan i no save krietem wan rilesensip wetem God we i gat moa mining. Oli save bildim wan rilesensip nomo taem yumi jusum blong trastem Hem.

Papa long Heven i wantem blong bildim wan rilesensip we kolosap mo i blong wanwan long ol spirit pikinini wetem Hem.² Jisas i soem tingting ia taem Hem i prea se, “Blong olgeta evriwan oli save stap wan nomo Papa. Laef blong yu i joen gud long laef blong mi, mo laef blong mi i joen gud long laef blong yu.”³ Rilesensip ia we God i wantem wetem wanwan spirit pikinini blong Hem, i wan we i kolosap gud mo i blong wanwan, mekem se bae Hem i save serem evri samting we Hem i gat mo evri samting we i Hem.⁴ Kaen rilesensip ia we i dip mo stap strong kasem en, i save develop nomo taem oli bildim antap long tras we i stret gud mo i fulwan.

Long pat blong Hem, Papa long Heven i bin wok stat long stat blong soem tras blong Hem we i sua long tabu paoa blong wanwan long ol pikinini blong Hem. Plan we Hem i givim bifo yumi kam long wol ia blong gro mo progres, i stanap long tras. Bae Hem i tijim ol loa we oli no save finis long yumi, krietem wan wol, givim ol bodi blong mit mo bun long yumi, givim yumi presen ia blong jus blong yumiwan, mo letem blong yumi lan mo gro taem yumi mekem ol joes blong yumiwan. Hem i wantem blong yumi jusum blong folem ol loa blong Hem mo gobak blong stap glad long laef we i no save finis wetem Hem mo Pikinini blong Hem.

From Hem i save se bae yumi no stap mekem ol gudfala joes oltaem, i mekem se Hem i rere tu long wan rod blong yumi blong ronwe long ol risal blong ol nogud joes. Hem i givim wan Sevya long yumi—Pikinini blong Hem, Jisas Kraes—blong pemaot sin blong yumi mo mekem yumi klin bakegen long kondisen ia se yumi sakem sin.⁵ Hem i invaetem yumi blong yusum spesel presen ia blong sakem sin oltaem.⁶

Evri papa mo mama i save hamas i had blong trastem wan pikinini inaf, blong oli mekem ol desisen blong olgetawan, speseli taem papa o mama i save se pikinini ia bae i mekem ol mistek mo harem nogud long risal blong hem. Be yet, !Papa long Heven i letem yumi blong mekem ol joes we bae i helpem yumi blong kasem tabu paoa blong yumi! Olsem we Elda Dale G. Renlund i bin tijim, “Gol blong [Hem] blong stap olsem papa mo mama, i no blong mekem ol pikinini blong Hem blong oli mekem wanem we i raet; hem i blong mekem ol pikinini blong Hem oli jusum blong mekem wanem we i raet, mo long en, blong kam olsem Hem.”⁷

Be, nomata long tras blong God long yumi, rilesensip blong yumi wetem Hem bae i gro nomo kasem level ia, we yumi wantem blong putum tras blong yumi long Hem. Jalenj hem i we, yumi stap laef long wan wol we i foldaon mo yumi evriwan i bin eksperiensem wan taem we yumi lusum tras long ol narawan from fasin blong no stap ones, stap kontrolem man, fosem wan blong mekem samting we hem i no wantem mekem, o ol nara situesen. Taem oli giaman long yumi, maet yumi faenem i had blong tras bakegen. Ol nogud eksperiens ia blong tras wetem ol pipol we oli no stret evriwan, i save spolem hat blong yumi we i wantem blong trastem wan Papa long Heven we i stret evriwan.

Sam yia i pas, tu fren blong mi, Leonid mo Valentina, tufala i bin soem intres blong kam ol memba blong Jos. Taem Leonid i stat blong lanem gospel, hem i faenem i had blong prea. Long wan taem bifo long laef blong hem, Leonid i bin harem nogud from fasin blong kontrolem man we olgeta we oli moa hae long hem oli bin mekem long hem, mo hem i faenem i had naoia blong trastem olgeta we oli mo hae o gat atoriti. Ol eksperiens ia oli spolem paoa blong hem blong openem hat blong hem mo talemaot ol filing blong hemwan long Papa long Heven. Wetem taem mo stadi, Leonid i kasem wan andastaning we i moa gud abaot fasin blong God mo i eksperiensem blong filim lav blong God. Long en, prea i bin kam wan nomol wei blong hem blong talemaot tangkyu mo lav blong hem we hem i stap filim long God. Tras blong hem long God we i stap kam moa bigwan i lidim hem mo Valentina blong mekem ol tabu kavenan blong mekem rilesensip blong tufala wetem God mo tufala wanwan, i kam moa strong.

Sapos yu bin lusum tras bifo mo hemia i stap stopem yu blong trastem God, plis folem eksampol blong Leonid. Gohed blong lanem moa abaot Papa long Heven, fasin blong Hem, ol kwaliti blong Hem, mo ol stamba tingting blong Hem. Lukaotem mo raetemdaon ol eksperiens blong ol taem we yu filim lav mo paoa blong Hem long laef blong yu. Profet blong yumi we i stap laef, Presiden Russell M. Nelson, i bin tijim se moa yumi lanem abaot God, moa bae i isi blong yumi trastem Hem.⁸

Samtaem bes wei blong lanem blong trastem God i simpol olsem blong trastem Hem nomo. Olsem “Pleiplei blong Tras,” samtaem yumi mas wantem blong foldaon i go biaen mo letem Hem i kasem yumi. Laef blong yumi long wol i wan tes. Ol hadtaem we i pulum yumi bitim paoa blong yumiwan oli stap kam moa. Taem save mo andastaning blong yumiwan i no inaf, i nomol blong yumi lukaotem ol nara samting blong helpem yumi. Long wan wol we i fulap tumas long ol infomesen, yumi no save sot long ol ples we oli stap promotem ol ansa blong olgeta long ol jalenj blong yumi. Be, kaonsel ia we i simpol, mo i tru long taem finis i kam, long Ol Proveb, i givim yumi bes advaes: “Trastem Hae God long olgeta tingting blong yu.”⁹ Yumi soem tras blong yumi long God taem yumi tanem yumi go long Hem faswan, taem yumi stap long ol hadtaem blong laef.

Afta we mi finis blong skul long loa skul long Yuta, famli blong mifala i mas disaed long weaples bae mifala i go wok long hem mo mekem hom blong mifala long hem. Afta we mitufala i kaonsel tugeta mo wetem Lod, mitufala i filim Lod i lidim famli blong mifala blong muv i go long is blong Ol Yunaeted Stet, longwe long papa mo mama mo ol brata mo sista. Long stat, ol samting oli bin go gud, mo mifala i filim konfemesen blong desisen blong mifala. Be afta ol samting oli jenis. Ol bisnis blong loa oli bin go daon fulap, mo mi bin luk se bae i no gat wok o insurens stret long taem we gel blong mifala Dora i bon i kam long wol wetem ol series medikol hadtaem mo ol spesel nid we bae i stap blong wan longfala taem. Taem mi stap go tru ol hadtaem ia, mi kasem wan koling long Jos blong givim seves we bae i nidim plante taem mo komitmen.

Mi neva bin go tru wan jalenj olsem mo mi filim se hem i tumas long mi. Mi stat blong kwestinim desisen we mifala i bin mekem mo konfemesen we mifala i bin kasem. Mifala i bin trastem Lod, mo ol samting oli sud wok gud. Mi bin foldaon i gobak biaen, mo naoia i luk olsem se nogat man bae i kasem mi.

Wan dei, ol toktok ia “No askem from wanem; askem wanem nao mi wantem yu blong lanem” oli kam klia long maen mo hat blong mi. Naoia mi konfius moa. Stret long taem ia we mi stap traehad wetem desisen we mi bin mekem bifo, God i stap invaetem mi blong trastem Hem moa. Naoia taem mi lukluk i gobak, hem i bin wan impoten taem tumas long laef blong mi—hem i stret taem ia we mi luksave se bes wei blong lanem blong trastem God, i simpol olsem blong trastem Hem nomo. Long ol wik we i kam, mi wajem wetem sapraes taem Lod i soemaot plan blong Hem blong blesem famli blong mifala, we i bin wan merikel.

Ol gud tija mo koj oli save se fasin blong gro long saed blong save, mo gat moa paoa long saed blong bodi i save hapen nomo taem ol maen mo masel oli wok moa. Long semmak fasin, God i invaetem yumi blong gro taem yumi stap trastem Hem blong tijim yumi long saed blong spirit, tru long ol eksperiens we i mekem sol blong yumi i wok moa. From hemia, yumi save sua se nomata wanem tras yumi bin soem long God long pas, i gat wan nara eksperiens yet i stap kam blong pusum tras blong yumi moa. God i lukluk moa long fasin blong yumi blong gro mo progres. Hem i Masta Tija, koj ia we i fulwan mo oltaem i stap mekem yumi wok moa blong helpem yumi blong luksave tabu paoa blong yumi moa. Hemia oltaem bae i tekem tu wan fiuja invitesen blong trastem Hem smol moa.

Buk blong Momon i tijim fasin ia we God i yusum blong mekem yumi wok moa, blong bildim ol strong rilesensip wetem yumi. Long Kam Folem Mi, i no long taem i pas, mifala i bin stadi abaot olsem wanem God i bin testem tras blong Nifae long Hem, taem Hem i givim komanmen long Nifae mo ol brata blong hem blong gobak long Jerusalem blong kasem ol gol buk. Afta we oli traem faswan mo i no bin go gud, ol brata blong hem oli givap mo oli rere blong gobak we oli nogat ol gol buk. Be Nifae i jusum blong putum ful tras blong hem long Lod mo hem i winim blong karem ol gol buk.¹⁰ Eksperiens ia i bin mekem tras blong Nifae long God i kam moa strong, taem bonara blong hem i brok mo famli blong hem i stap hanggri long ples we i nogat man long hem. Bakegen, Nifae i jusum blong trastem God, mo famli blong hem i sef.¹¹ Ol eksperiens ia we oli bin go gud, oli mekem tras blong Nifae long God i kam moa strong from nara wok we i stap kam yet we bae i pusum tras blong Nifae moa—blong bildim wan sip.¹²

Tru long ol eksperiens ia, Nifae i bin mekem rilesensip blong hem wetem God i kam moa strong taem hem i oltaem gohed blong stap trastem God. God i stap yusum semmak fasin ia wetem yumi. Hem i stap mekem ol invitesen ia long yumi wanwan blong mekem tras blong yumi long Hem i kam moa strong mo dip.¹³ Evri taem we yumi akseptem mo mekem folem wan invitesen, tras blong yumi long God i gro. Sapos yumi no luksave o no akseptem wan invitesen, progres blong yumi i stop kasem taem yumi redi blong mekem samting folem wan niu invitesen.

Gud nius i we, nomata long tras we maet yumi bin jusum o no jusum blong gat long God long pas, yumi save jusum blong trastem God tedei mo evri dei stat naoia i go. Mi promes se evri taem yumi mekem olsem, God bae i stap blong kasem yumi, mo rilesensip blong tras blong yumi bae i gro moa strong kasem dei ia we bae yumi kam wan wetem Hem mo Pikinini blong Hem. Afta yumi save talemaot olsem Nifae i talem, “O Lod, mi bin trastem yu, mo bae mi trastem yu blong oltaem.”¹⁴ Long nem blong Jisas Kraes, amen.