Ol Toktok Oli Impoten

Ol brata, ol sista mo ol fren raon long wol, mi glad tumas blong toktok long plante man long konfrens senta ia, we plante long yufala i ol memba blong Jos blong yumi, mo plante oli ol fren mo oli niu blong lisin long brodkas blong konfrens ia. !Welkam!

Ol mesej we oli serem long pulpit ia oli talem tru long ol toktok. Oli talemaot long Inglis mo oli transletem long kolosap wan handred defren lanwis. Be stamba mesej i oltaem semmak. Ol toktok. Mo ol toktok oli impoten tumas. Bae mi talem bakegen. !Ol toktok oli impoten!

Oli ol fandesen blong olsem wanem yumi konek wetem ol narafala man; oli ripresentem ol bilif blong yumi, ol fasin mo lukluk blong yumi. Samtaem yumi talem ol toktok, ol narafala taem yumi lisin. Ol toktok oli soemaot wan fasin. Oli talemaot ol tingting, ol filing mo ol eksperiens blong yumi, we oli gud mo oli nogud.

Sore nomo, ol toktok oli save kam samting nating, i kam hariap, mo i mekem wan i harem nogud. Taem yumi toktok, yumi no save tekembak ol toktok ia. Oli save givim kil, givim panis, putumdaon wan, mo iven lid i go long aksen we i save spolem gud wan. I save mekem yumi harem nogud.

Long narasaed, ol toktok oli save selebretem, gat hop mo leftemap tingting. Oli save givim tingting long yumi blong tingting bakegen, statem bakegen, mo jenisim bakegen rod blong yumi. Ol toktok i save openem maen blong yumi i go long trutok.

Hemia i from wanem, toktok blong Lod i kam faswan mo i moa impoten.

Insaed long Buk blong Momon, profet Alma mo ol pipol blong hem long Amerika blong bifo oli fesem plante wo wetem olgeta we oli no wantem lisin long tok blong God, mekem ol hat blong olgeta i strong, mo spolem kalja blong olgeta. Ol fetful oli save faet, be Alma i givim kaonsel: “Mo nao, from we trutok we oli prijim i lidim ol man blong mekem wanem we hem i stret—yes, hem i gat moa bigfala paoa long tingting blong ol pipol bitim naef blong faet, o eni narafala samting, we i bin hapen finis long olgeta—from hemia, Alma i ting se i gat nid se oli mas traem paoa blong toktok blong God.”¹

“Tok blong God” i saen moa bitim evri narafala toktok. Hem i olsem long taem blong kriesen blong wol taem we Lod i talem: “I mas gat delaet: Nao delaet i kamtru olsem we Hem i talem.”²

Ol stret save ia i kam long Sevya insaed long Niu Testeman: “Bambae skae mo graon tufala i lus, be tok blong mi bambae i no save lus samtaem.”³

Mo hemia: “Man we i lavem mi, hem bambae i save obei long ol tok blong mi. Mo Papa blong mi bambae i lavem hem, nao bambae mi wetem Papa blong mi i save kam stap wetem hem, [mo] mekem hom blong mitufala wetem hem.⁴

I kam long mama blong Jisas wan testemoni we i stap daon: “Mi mi gel blong wok nomo blong Hae God. Mi wantem blong i kamtru long mi olsem we yu yu talem.”⁵

Blong stap bilivim mo folem tok blong God bae i mekem yumi kam moa kolosap long Hem. Presiden Russell M. Nelson i promes, “Sapos yu stadi ol toktok blong Hem, wanem we yu save mekem, blong kam moa olsem Hem, bae i kam antap.”⁶

?Yumi no wantem blong kam olsem we hym ia i talem, “moa blesing mo moa tabu—kam moa olsem Yu, Sevya”?⁷

Mi pikjarem yangfala Josef Smit we i nildaon mo stap harem ol toktok blong Papa blong Hem long Heven: “[Josef,] Hemia i Pikinini blong Mi we Mi Lavem Tumas. !Lisin gud long Hem!”⁸

Yumi “lisingud long Hem” insaed long ol toktok blong skripja, ?be bae yumi ridim nating nomo olsem, o bae yumi luksave se Hem i stap toktok long yumi? ?Yumi jenis?

Yumi “lisingud long Hem” long revelesen blong yumiwan mo ol kwaet tingting we i kam long Tabu Spirit, long ol ansa blong prea, mo long ol taem we Jisas Kraes nomo, tru long paoa blong Atonmen blong Hem, i save leftemap ol hevi samting, i givim long yumi fogivnes mo pis, mo i kavremap yumi long “ol han blong lav blong hem.”⁹

Nambatu, ol toktok blong ol profet oli impoten.

Ol profet oli testifae abaot tabu fasin blong Jisas Kraes. Oli tijim gospel blong Hem mo soem lav blong Hem long evriwan.¹⁰ Mi talem witnes blong mi se Profet blong yumi we i stap laef, Presiden Russell M. Nelson, i harem mo talem tok blong Lod.

Presiden Nelson i gat wan fasin blong yusum ol toktok. Hem i talem, “Stap long kavenan rod,”¹¹ “Karem Isrel i Kam Tugeta,”¹² “Letem God I Win,”¹³ “Bildim ol koneksen blong andastanem ol pipol,”¹⁴ “Fasin blong talem tangkyu,”¹⁵ “Mekem fet long Jisas Kraes i kam antap,”¹⁶ “Stap responsibol long testemoni blong yuwan,”¹⁷ mo “Kam wan man blong mekem pis.”¹⁸

I no longtaem i pas hem i askem yumi blong “tingting selestial.” “Taem yu mas mekem wan had joes,” hem i talem, “!tingting selestial! Taem yu kasem temtesen, !tingting selestial! Taem laef o olgeta we yu lavem i putum yu daon, !tingting selestial! Taem wan bebi i ded from i no taem blong hem yet blong bon, tingting selestial. …Taem ol wari blong laef i fulumap yu, !tingting selestial! … Taem yu tingting selestial, sloslo bae hat blong yu i jenis, … bae yu luk ol hadtaem mo fasin blong agens long wan niu wei, … [mo] taem yu tingting selestial, bae fet blong yu i kam antap.”¹⁹

“Taem yumi tingting selestial, yumi luk ol samting olsem we oli rili stap mo olsem we bae i stap.”²⁰ Long wol ia we i fulap long konfius mo raorao, yumi evriwan i nidim lukluk ia.

Elda George Albert Smith, bifo i kam presiden blong Jos, i tokbaot blong sastenem profet mo folem ol toktok blong hem. Hem i talem: “Diuti we yumi mekem taem yumi leftemap ol han blong yumi … i wan samting we i moa tabu. … Hem i minim se … bae yumi difendem gudfala nem blong Hem, mo bae yumi traehad blong mekem folem ol instraksen blong Hem olsem we Lod i daerektem.”²¹ Long narafala toktok, bae yumi mekem folem ol toktok blong profet blong yumi.

Olsem wan long ol 15 profet, sia mo reveleta we oli sastenem olgeta yestedei tru long Jos raon long wol, mi wantem serem wetem yufala wan long ol eksperiens blong mi blong sastenem profet mo kam blong lavem ol toktok blong hem. Long mi i olsem we profet Jekob, i talem, “mi bin harem voes blong Lod i toktok long mi wetem tru voes blong hem, long wanwan taem.”²²

Las Oktoba mi mo waef blong mi Melanie, i stap long Bangkok, Thailand, taem mi stap rere blong dediketem tempol we bae i kam 185 tempol blong Jos.²³ Long mi, asaenmen ia i tugeta olsem wan drim mo i putum tingting blong mi i stap daon. Hemia i fas tempol long saotis blong Esia long Peninsula.²⁴ Oli disaenem gud tumas—wan sikis stori bilding, wetem sap aean we i hae naen taem antap long hem, we i fit stret long hem”²⁵ blong i kam haos blong Lod. Blong plante manis mi stap lukluk long dedikesen ia. Wanem we i kam long sol mo maen blong mi se ol profet mo ol aposol oli kavremap kantri mo tempol ia long han blong olgeta. Presiden Thomas S. Monson i anaonsem tempol ia²⁶ mo Presiden Nelson i dediketem.²⁷

Mi bin rere long prea blong dedikesen sam manis bifo. Ol tabu toktok ia oli transletem i go long 12 lanwis. Mifala i bin rere. O so mi ting se.

Long naet bifo dedikesen mi wekap long slip blong mi wetem wan wari, wan filing we i nid blong mi lukluk long hem kwik taem abaot prea blong dedikesen. Mi traem blong putum long saed filing ia, tingting se prea ia i stret gud. Be Spirit i no wantem lego mi nomo. Mi filim se sam toktok oli nogat, mo wetem tabu wei oli kam long mi long wan revelesen, mo mi putum ol toktok ia kolosap long en blong prea: “letem yumi tingting selestial, letem Spirit i win long ol laef blong yumi, mo traehad blong kam ol man blong mekem pis oltaem.”²⁸ Lod i stap rimaenem mi blong folem ol toktok blong profet blong yumi we i stap laef tedei: “tingting selestial,” “letem Spirit i win,” “traehad blong kam ol man blong mekem pis.” Ol toktok blong profet oli impoten long Lod mo long yumi.

Nambatri, mo hemia we i moa impoten, hem i ol toktok blong yumi. Bilivim mi se long wol blong yumi we i fulap long²⁹ ol pikja fes (emoji), ol toktok blong yumi oli impoten.

Ol toktok blong yumi oli save givim sapot o kros, glad o rabis toktok, gat sore o no wantem save. Long stret taem we wan i filim nogud, ol soa toktok oli save stikim mo draon gud insaed long wan sol—mo stap ia. Ol toktok blong yumi long intanet, teks, sosol media, o ol twit oli gat paoa mo wei we i moa bitim wanem we yumi wantem. Mekem se yu mas lukaot gud long wanem yu talem mo olsem wanem yu talem. Insaed long ol famli blong yumi, speseli wetem ol hasban, ol waef, mo ol pikinini ol toktok blong yumi oli save tekem yumi kam tugeta o oli seraotem yumi.

Letem mi givim yu tri simpol sentens we yumi save yusum blong tekemaot nogud filing aot long ol hadtaem mo wanem we i mekem yumi defren, leftemap mo mekem tingting i kwaet bakegen wetem wanwan long yufala.

“Tangkyu.”

“Mi mi sore.”

Mo “mi lavem yu.”

No sevem ol sentens ia blong tingting stap daon blong wan spesel taem o rabis taem. Yusum olgeta oltaem mo wetem tru hat, from oli soem respek long ol narawan. Sam man, toktok blong olgeta i nogat mining. No folem toktok ia.

Yumi save talem “tangkyu” long insaed long eleveita, long ples blong pakem trak, long maket, long ofis, taem yu stanap long laen, o wetem ol neba mo ol fren. Yumi save talem “mi, mi sore” taem yumi mekem wan mistek, mestem wan miting, fogetem wan betdei, o luk se wan man i stap harem nogud. Yumi save talem “mi lavem yu,” mo ol toktok ia i karem mesej ia “mi stap tingting long yu,” “mi kea long yu,” “mi stap ia from yu,” o “yu yu evri samting long mi.

Bae mi serem wan eksampol blong miwan. Ol hasban, yufala i lisin gud. Ol sista, hemia bae i helpem yu tu. Bifo long fultaem asaenmen blong mi insaed long Jos, mi stap travel plante blong kampani blong mi. Mi go aot plante long plante ples long wol. Long en blong dei blong mi, nomata wea ples mi stap long hem, oltaem mi ringbak i go hom. Taem we waef blong mi, Melanie i ansarem fon mo mi talem wanem mi mekem, oltaem ol storian blong mitufala bae i lid i go oltaem long toktok ia “mi lavem yu.” Evri dei ol toktok ia oli stap olsem wan angka long sol blong mi mo aksen blong mi; oli ol proteksen long mi aot long ol rabis samting blong wol. “Melanie, mi lavem yu” i tokbaot spesel tras ia bitwin mitufala.

Presiden Thomas S. Monson i stap talem, “I gat ol leg blong stanap stret, ol han blong holemtaet, ol maen blong leftemap tingting, ol hat blong givim insperesen, mo ol sol blong sevem laef.”³⁰ Blong talem “tangkyu,” “mi, mi sore,” “mi lavem yu” bae i mekem hemia i hapen.

Ol brata mo sista, ol toktok oli impoten.

Mi promes se taem we yumi a “kakae gud long ol toktok blong Kraes”³¹ we i lid i go long fasin blong sevem man, ol toktok blong profet blong yumi we i lidim mo leftemap tingting blong yumi, mo ol toktok blong yumiwan we i talem huia yumi mo wanem yumi holemtaet we i gud, ol paoa blong heven bae i kam daon long yumi. “Ol toktok blong Kraes bae oli talem long [yu] evri samting we [yu] mas mekem.”³² Yumi ol pikinini blong Papa long Heven mo Hem i God blong yumi, mo Hem i wantem yumi toktok wetem “lanwis blong ol enjel”³³ tru long paoa blong Tabu Spirit.³⁴

Mi lavem Lod Jisas Kraes. Hem i stap, insaed long OlTesteman long toktok blong profet Aesea, “Gudfalawan, Kaonsela, Hae God, Papa we I No Gat En, Prins blong Pis.”³⁵ Olsem wan Aposol Jon i bin mekem i klia, Kraes Hemwan i “Tok.”³⁶

Long hemia mi testifae olsem wan Aposol blong Lod long tabu seves ia—blong talemaot toktok blong Hem—mo oli singaotem mi blong stanap olsem wan spesel witnes blong Hem. Long tabu nem blong Lod, Jisas Kraes. Amen.