Fasin blong Agens long Evri Samting

I no longtaem i pas, taem mi stap draev long wan taon we mifala i no save, mi mestem mo tanem i go long wan rong saed, we i lidim mi mo waef i go long wan mein rod we i longfala tumas blong tanem raon i gobak. Mifala i kasem wan naesfala invitesen blong go long haos blong wan fren mo mifala i wari se naoia bae mifala i let.

Taem mifala i stap yet long mein rod ia mo wantem tumas blong faenem wan rod we i go aot bakegen, mi blemem miwan blong no stap folem smol skrin long trak we i stap soem rod. Eksperiens ia i mekem mi tingbaot se, samtaem long laef blong yumi, yumi mekem ol rong desisen mo olsem wanem yumi mas laef wetem ol risal blong olgeta wetem fasin blong gat tingting i stap daon mo fasin blong gat longfala tingting, kasem we yumi save jenisim wei blong yumi bakegen.

Laef ia i blong mekem ol joes. Papa blong yumi long Heven i givim tabu presen ia we i fridom blong mekem ol joes we i stret, blong mekem se yumi save lanem samting aot long ol joes we yumi mekem—long ol raet wan mo tu long ol rong wan. Yumi stretem ol joes blong yumi we i rong taem yumi sakem sin. Ples ia nao yumi stap gro i kam antap long hem. Plan ia blong Papa long Heven we i blong yumi evriwan, i blong stap lanem samting, blong kam antap gud, mo progres i go kasem laef we i no save finis.

Stat long taem we ol misinari i stap tijim mi mo waef blong mi, mo joenem Jos plante yia i pas, mi oltaem sapraes long ol impoten tijing we Lihae i givim long boe blong hem Jekob long Buk blong Momon. Hem i tijim Jekob se “Lod God i bin givim long man blong i tekem aksen blong hemwan”¹ mo se “i mas gat wan, fasin blong go agens long evri samting.”² Blong save yusum fridom blong yumi blong mekem joes, yumi nid blong lukluk long ol samting we i go agens. Blong mekem hemia, Buk blong Momon i rimaenem yumi se yumi “kasem inaf tijing”³ mo se “Spirit blong Kraes,”⁴ God i givim long evri man blong oli “save gat save long samting we i gud aot long samting we i nogud.”⁵

Long laef, oltaem yumi fesem plante impoten joes. Eksampol:

• Jusum blong wantem o no wantem folem ol komanmen blong God.

• Jusum blong gat fet mo luksave taem ol merikel i hapen o gat tu tingting blong wet long wan samting i hapen bifo jusum blong biliv.

• Stap jusum blong mekem tras blong yu long God i gro o fraet long narafala jalenj long nekis dei.

Long taem we mi tanem i go long wan rong wei long mein rod, safaring from pua desisen blong yumiwan i save mekem yumi harem nogud plante taem, from yumi stap blemem yumiwan nomo. Nomata long hemia, oltaem yumi save jusum blong kasem kamfot tru long tabu step ia blong sakem sin, mekem ol samting we i rong i kam oraet bakegen, mo taem yu mekem hemia, lanem sam lesen we i jenisim laef.

Samtaem, yumi save eksperiensem tu fasin blong agens mo ol hadtaem long ol samting we yumi no save kontrolem olsem:

• Ol taem we yumi helti mo ol taem blong sik.

• Ol taem blong pis mo blong faet.

• Ol aoa blong dei mo blong naet mo ol sisen blong hot mo blong kolkol.

• Ol taem blong wok i kam wetem ol taem blong spel.

Nomata se yumi no save jusum bitwin ol kaen situesen olsem from we oli jes hapen, yet yumi fri blong jusum olsem wanem bae yumi fesem olgeta. Yumi save mekem hemia wetem wan gudfala lukluk o wetem wan lukluk blong invaetem ol rabis fasin. Yumi save lukaotem blong lanem samting aot long ol eksperiens mo askem help mo sapot long Lod blong yumi, o yumi save tingting se yumi stap yumiwan long ol hadtaem ia mo yumi mas safa yumiwan nomo. Yumi save “jenisim spid o rod blong yumi” i go long niu laef, o yumi save jusum blong no jenisim eni samting. Long naet we i tudak, yumi save onem ol laet blong yumi. Long taem blong kolkol, yumi save jusum blong werem ol klos we i wom. Long ol taem we yumi sik, yumi save askem help long saed blong medikol mo long saed blong spirit. Yumi jusum olsem wanem blong fesem ol situesen ia.

Jenisim, lanem, lukaotemmo jusum oli ol toktok blong tekem aksen. Tingbaot se yumi ol man mo woman blong tekem aksen be i no samting we i no gat laef. Mo bae yumi neva fogetem se Jisas i promes blong “tekem long hem ol soa blong bodi mo ol sik blong ol pipol blong hem … mekem se hem i save … help” o helpem yumi taem yumi tanem yumi i go long Hem.⁶ Yumi save jusum blong bildim fandesen blong yumi long strong ston ia we i Jisas Kraes, mekem se taem wael win i kam, “bae oli no gat paoa ova long [yumi].”⁷ Hem i promes se “eni man we bae i kam [long Hem], bae [Hem] i akseptem; mo olgeta we oli kam long [Hem] oli kasem blesing.”⁸

Naoia, i gat wan moa prinsipol we i moa impoten. Lihae i talem se “i mas gat … wan fasin blong go agens long evri samting.”⁹ Hemia i minim se, i mas gat fasin blong agens long evri samting we yumi fesem long laef. Oli defren, we i mekem se oli go gud tugeta. Bae yumi no save luksave glad, sapos nomo yumi eksperiensem harem nogud long sam situesen. Blong stap gat filing ia blong hanggri wanwan taem, i helpem yumi, blong stap glad speseli taem yumi gat inaf blong kakae bakegen. Bae yumi no save faenem trutok, sapos nomo yumi bin luk tu ol giaman long ples ia mo longwe.

Fasin blong agens oli olsem tufala saed blong wan semmak koen. Tugeta saed i stap oltaem. Charles Dickens i givim wan eksampol blong aedia ia taem hem i raetem se “Hem i wan moa gud taem bitim ol narafala taem, hem i wan taem we i moa nogud bitim ol narafala taem taem.”¹⁰

Letem mi givim wan eksampol blong laef blong yumiwan. Blong mared, statem wan famli, mo gat ol pikinini, i givim long yumi ol gudfala taem blong glad we yumi eksperiensem oltaem long ol laef blong yumi be i wan taem tu blong harem nogud bigwan, safaring, mo bigfala sori taem wan samting i hapen long eniwan long yumi. Glad we i no gat en mo i stret evriwan wetem ol pikinini blong yumi, samtaem bae i kam wetem ol taem blong sik, taem blong slip long hospital, mo ol naet we yu no slip from wari tumas, semmak olsem blong stap faenem help tru ol prea mo prishud blesing. Tufala defren eksperiens ia i tijim yumi se yumi neva stap yumiwan long ol taem blong safaring, mo oli soemaot tu long yumi hamas hadtaem yumi save winim wetem givhan mo help blong Lod. Ol eksperiens ia i helpem yumi blong jenisim yumi long ol gudfala wei, mo evriwan i blong gud blong yumi. ?Hemia i no wanem we yumi kam from long ples ia?

Insaed long ol skripja yumi lanem sam intresting eksampol:

• Lihae i tijim boe blong hem Jekob se ol hadtaem we hem i safa long hem long waelples, i helpem hem blong save ol gudfala samting blong God mo we “[God] bae Hem i konsekretem ol hadtaem blong [hem] blong oli kam wan blesing blong [Hem].”¹¹

• Long taem we Josef Smit i bin stap safa long Libeti Kalabus, Lod i bin talem long hem se “evri samting ia bae i givim [hem] eksperiens, mo bae i blong gud blong [hem].”¹²

• Long en, Sakrifaes blong Jisas Kraes we i nogat en i wan tru mo bigfala eksampol blong soa mo safaring we yumi luk, be i karem i kam tu naesfala blesing blong Atonmen blong Hem long evri pikinini blong God.

Long ples we san i saen long hem, i mas gat sado tu. Ol wota we i ron bigwan i save spolem gud ples, be oli givim laef tu. Ol wota blong ae we i harem nogud, plante taem oli tanem i go long wota blong ae blong harem gud mo hapines. Ol filing blong harem nogud, taem wan we yumi lavem i lego yumi, biaen i givim glad taem yumi mitim olgeta bakegen. Long ol taem blong faet mo prapa spolem gud samting, plante smol aksen blong stap kaen mo gat lav oli stap hapen tu long olgeta wetem “ol ae we i save luk, mo ol sora we i save harem.”¹³

Wol blong yumi tedei, plante taem i wan ples blong fraet mo wari—fraet long wanem we i stap kam long fiuja. Be Jisas i tijim yumi blong trastem mo, “lukluk long [Hem] long evri tingting; no gat tu tingting, no fraet.”¹⁴

Letem yumi gohed blong traehad blong luksave tugeta saed blong evri koen we oli givim i kam long ol laef blong yumi. Nomata se tugeta saed blong koen, samtaem i no kamaot klia long yumi kwiktaem, yumi save gat save ia mo trastem se tufala i stap oltaem.

Yumi save gat stret save se long ol hadtaem, ol harem nogud, mo ol soa oli no talem huia yumi; be hem i olsem wanem yumi go tru long olgeta we i helpem yumi gro mo kam moa kolosap long God. Hem i ol fasin mo ol joes blong yumi we i talem huia yumi bitim ol jalenj blong yumi.

Long taem we yu helti, lukaot gud mo stap talem tangkyu from, evritaem. Long taem we yu sik, lukaotem blong lanem samting aot long hem wetem fasin blong save wet longtaem mo save se hemia i save jenis bakegen folem tingting blong God. Long taem blong harem nogud, trastem se hapines bae i kam i no longtaem, be plante taem, yumi no save luk yet. !Jenisim lukluk blong yu mo leftemap ol tingting blong yu blong luk ol gud saed blong ol jalenj, from bae oltaem oli stap tu! Neva fogetem blong stap talem tangkyu. Jusum blong biliv. Jusum blong gat fet long Jisas Kraes. Jusum blong save trastem God oltaem. !Jusum blong “tingting selestial,” olsem Presiden Russell M.Nelson i tijim yumi!¹⁵

Oltaem, letem yumi tingbaot plan ia blong Papa long Heven we i gat blong yumi. Hem i lavem yumi mo i sendem Pikinini blong Hem we i lavem tumas blong helpem yumi long ol tes blong laef mo blong openem doa blong gobak long Hem. Jisas Kraes i stap laef mo i stanap ia evri taem, i stap wet long yumi blong jusum blong singaotem Hem blong givhan, givim paoa, mo blong sevem man. Long ol samting ia, mi testifae long nem blong Jisas Kraes, amen.