Ol Kavenan mo Ol Responsabiliti
Oli save Jos Ia blong Jisas Kraes olsem wan jos we i tokbaot fulap fasin blong stap mekem ol kavenan wetem God.
“?Olsem wanem nao Jos blong yu i defren long ol narawan?” Ansa blong mi long impoten kwestin ia i bin jenis folem taem we mi bin stap groap mo folem hamas we Jos i bin gro. Taem mi bon i kam long wol long Yuta long 1932, Jos membasip blong yumi i bin samples long 700,000 nomo, mo plante long olgeta oli kolkolosap long Yuta mo ol stet raon long hem. Long taem ia, mifala i bin gat 7 tempol nomo. Tedei namba blong membasip blong Jos Ia blong Jisas Kraes blong Ol Lata-dei Sent i moa long 17 milian mo samples long 170 kantri. Stat long nambawan Epril ia, mifala i bin dediketem 189 tempol long plante kantri mo 146 tempol oli stap mekem ol plan mo konstraksen blong olgeta. Mi filim strong blong tokbaot stamba tingting blong ol tempol ia mo histri mo wok blong ol kavenan insaed long wosip blong yumi. Hemia bae i mekem ol tijing we i kam tru long insperesen, blong ol spika fastaem, i fulwan.
I.
Wan kavenan i wan komitmen blong mekem samfala responsabiliti. Ol komitmen blong yumiwan oli impoten long ol rul we i stap blong kontrolem laef blong yumi wanwan mo wei we sosaeti i stap wok. Tedei fulap oli stap jalenjem aedia ia blong ol komitmen. Wan smol grup blong ol pipol oli agensem ol atoriti we i stap mo oli talem strong se ol man mo woman oli mas fri long eni rul we i limitim fridom blong wanwan man o woman. Be yumi bin save long eksperiens tru long taosen blong yia se ol pipol oli givimaot sam fridom blong olgetawan blong save kasem ol gudfala saed blong stap laef long ol komuniti we oli oganaesem. Ol prinsipol ia blong givimaot ol fridom ia blong yumi wanwan oli stanap long ol komitmen o kavenan, we oli tokbaot o oli tru.
Hemia sam eksampol blong ol kavenan responsabiliti long sosaeti blong yumi: (1) ol jaj, (2) militeri, (3) ol dokta mo (4) ol faea man. Evriwan we oli pat long ol wok ia we yumi save gud, oli mekem wan komitmen—plante taem oli mekem komitmen ia i kam ofisol tru long promes o kavenan—blong mekem ol wok we oli asaenem long olgeta. Hemia i semmak tu blong ol ful-taem misinari blong yumi. Wei blong dresap o ol nem tag blong olgeta i blong soem se hem we i stap werem klos o tag ia, i stap andanit long wan kavenan mo from hemia, hem i gat wan diuti blong tij mo givim seves mo oli mas sapotem olgeta long seves ia. Wan nara stamba tingting i blong rimaenem olgeta we oli stap werem klos o tag ia, abaot ol kavenan responsabiliti blong olgeta. I no gat majik o saen long wei we oli dresap, hem i wan rimaenda nomo we oli nidim blong tingbaot ol spesel responsabiliti we oli bin tekem. Hemia i tru tu abaot ol saen blong ol mared ring o ol ring we i soem se wan i stap redi blong mared, mo wok blong olgeta we i blong givim notis long olgeta we oli stap lukluk hem we i werem ring, o blong rimaenem olgeta we oli stap werem ring abaot ol kavenan responsabiliti.
II.
Wanem we mi bin talem abaot ol kavenan we oli stap olsem wan fandesen blong ol rul we i stap blong kontrolem laef blong wanwan, i semmak fulap long ol relijin kavenan. Fandesen mo histri blong plante bilif blong relijin mo ol samting we i nidim long relijin, oli mekem folem ol kavenan. Eksampol, kavenan blong Ebraham hem i stamba blong plante bigfala kastom blong relijin. Hem i introdiusum tabu aedia blong ol kavenan promes blong God long ol pikinini blong Hem. Plante taem OlTesteman i stap tokbaot kavenan blong God mo Ebraham mo ol jeneresen blong hem.1
Fas pat blong Buk blong Momon, we oli bin raetem long taem blong OlTesteman, i soem klia wok blong ol kavenan insaed long histri mo wosip blong Ol Man Isrel. Oli talem long Nifae se ol raeting blong Ol Man Isrel, oli blong wan taem we i “wan histri blong Ol Jiu, we i holem ol kavenan blong Lod, we hem i bin mekem wetem laen blong Isrel.”2 Ol buk blong Nifae i stap tokbaot kavenan blong Ebraham3 mo long Isrel olsem “kavenan pipol blong Lod.”4 Praktis ia blong stap mekem kavenan wetem God o ol lida blong relijin, oli rekodem tu insaed long ol raeting blong Buk blong Momon abaot Nifae, Josef long Ijip, King Benjamin, Alma, mo Kapten Moronae.5
III.
Taem we hem i taem blong Putumbak blong gospel blong Jisas Kraes we i fulwan long wol, God i bin singaotem wan profet, Josef Smit. Yumi no save evri samting we enjel Moronae i bin talem long ol instraksen blong hem i go long yangfala profet ia we i stap groap yet. Yumi save se hem i bin talem long Josef se “God i gat wan wok we Hem i wantem [Josef] blong mekem” mo we “gospel we i fulwan we i no gat en” i mas kam fored, we i tekem tu “ol promes we Lod i bin mekem long ol papa.”6 Yumi save tu se ol skripja we Josef i bin stap ridim plante—iven bifo oli daerektem hem blong oganaesem wan jos—oli ol plante tijing abaot ol kavenan we hem i stap transletem long Buk blong Momon. Buk ia i stap olsem wan bigfala pat blong Restoresen blong gospel we i fulwan, we i tekem tu plan blong God we Hem i gat blong ol pikinini blong Hem, mo Buk blong Momon i fulap long ol refrens we i tokbaot ol kavenan.
Josef we i save gud Baebol, hem i bin save se long buk blong Hibrus, hem i stap tokbaot we Sevya i wantem blong “[mekem wan niufala promes wetem ol man Isrel mo ol man Juda].”7 Hibrus i tokbaot Jisas tu olsem “man blong stanemap niufala promes.”8 Hem i impoten tu se, ol Baebol stori blong ministri blong Sevya long wol ia, taetol blong hem i “Niu Testeman,” wan nara toktok we i gat semmak mining olsem “Niu Kavenan.”
Ol kavenan oli stamba insaed long Restoresen blong gospel. Hemia yu save luksave long ol fas step we Lod i bin daerektem Profet blong mekem taem hem i stap oganaesem Jos blong Lod. Taem oli finis blong pablisim Buk blong Momon nomo, Lod i bin daerektem blong oli oganaesem Jos blong Hem we i kambak long wol bakegen, mo bae i no long taem, oli putum nem blong hem, Jos Ia blong Jisas Kraes blong Ol Lata-dei Sent.9 Long revelesen we oli rekodem long Epril 1830, i daerektem se “bae oli akseptem olgeta insaed long jos blong hem tru long baptaes” afta we ol man bae oli “witnes” (we i minim blong testifae wetem paoa) “se i tru se oli bin sakem evri sin blong olgeta, blong oli rere blong tekem long olgeta nem blong Jisas Kraes, wetem wan strong tingting blong wok blong hem kasem en,” nao “bae oli akseptem olgeta insaed long jos blong hem tru long baptaes.”10
Semmak revelesen ia i daerektem se Jos bae “i mas mit tugeta plante taem blong tekem mo kakae bred mo dring waen [wota] blong tingbaot Lod Jisas.” Yumi save luksave hamas odinens ia i impoten tru long ol toktok blong kavenan we elda o pris we i talem, blong mekem odinens ia. Hem i blesem ol bred ia blong “long sol blong olgeta evriwan we oli tekem … , blong oli … testifae long yu, O God, yu yu Papa we I No Save Finis, se oli rere gud blong tekem long olgeta, nem blong Pikinini blong yu, mo oltaem tingbaot hem, mo stap obei long ol komanmen blong hem we Hem i bin givim long olgeta.”11
Stamba wok blong ol kavenan insaed long Jos we i kambak bakegen long wol, i sua insaed long introdaksen we Lod i bin givim long fas buk blong ol revelesen blong Hem. Long ples ia Lod i talemaot se Hem bin singaotem Josef Smit from se ol man blong wol “oli bin aot long ol odinens blong mi, mo oli bin brekem kavenan blong mi we i no gat en.”12 Revelesen ia i gohed blong eksplenem se Hem i givim ol komanmen blong Hem “blong kavenan blong [Hem] we i no gat en i save stanap.”13
Tedei yumi andastanem ol wok blong kavenan insaed long doktrin ia blong Jos we i kambak long wol, mo wosip blong ol memba blong hem. Presiden Gordon B. Hinckley i bin talem ol toktok ia abaot paoa blong baptaes blong yumi mo fasin blong stap tekpat long sakramen evri wik: “Evri memba blong jos ia we i bin go insaed long ol wota blong baptaes, oli bin kam wan pati long wan tabu kavenan. Evri taem yumi tekem sakramen we i kaekae blong Lod, yumi stap riniu kavenan ia.”14
Plante spika oli rimaenem yumi long konfrens ia se fulap taem Presiden Russell M. Nelson i stap tokbaot plan blong sevem man olsem “kavenan rod,” we i “lidim yumi gobak long [God]” mo “i evri samting abaot rilesensip blong yumi wetem God.”15 Hem i tijim yumi abaot hamas ol kavenan oli impoten insaed long ol tempol seremoni blong yumi, mo i askem strong long yumi blong luk en stat long stat mo blong “tingting selestial.”16
IV.
Naoia bae mi tokbaot moa ol tempol kavenan. Blong mekem responsabiliti blong hem i hapen we i blong putumbak gospel blong Jisas Kraes we i fulwan, Profet Josef Smit i bin spendem fulap long ol las yia blong hem blong stap daerektem konstraksen blong wan tempol long Navu, Ilinoa. Tru long hem, Lod i bin soem ol tabu tijing, doktrin, mo ol kavenan tru long revelesen, blong olgeta we bae oli lid afta long Josef, blong wok long ol tempol. Long ples ia, olgeta we bae oli kasem endaomen, bae oli tijim olgeta abaot plan blong God blong sevem man mo oli invaetem olgeta blong mekem ol tabu kavenan. Olgeta we oli bin fetful blong laef folem ol kavenan ia, oli promesem olgeta laef we i no save finis, we long ples ia “evri samting oli blong olgeta” mo “bambae oli stap long ples blong God mo Kraes blong hem, blong oltaem mo oltaem.”17
I no longtaem afta nomo we oli bin mekem ol seremoni blong endaomen long Navu Tempol, oli bin sakemaot ol paeonia long ples ia mo ol paeonia oli statem longfala wokbaot blong olgeta we i bin wan histri, i go long ol maonten long Wes. Yumi gat ol testemoni we i kam long plante paeonia ia, se paoa we oli bin kasem from oli bin fasem olgeta i go long Kraes tru long ol endaomen blong olgeta long Navu Tempol, i bin givim paoa long olgeta blong mekem had mo longfala wokbaot ia mo blong oli bildimap ples blong olgeta long Wes.19
Ol man mo woman we oli bin endao long wan tempol, oli gat responsabiliti ia blong werem wan tempol gamen, wan klos we yu no save luk from oli stap werem andanit long nomol klos blong olgeta. Hem i rimaenem ol memba we oli endao long ol tabu kavenan we oli bin mekem mo ol blesing we oli bin promesem long olgeta insaed long tabu tempol. Blong kasem ol tabu stamba tingting ia, oli givim instraksen long yumi blong gogohed blong werem ol tempol gamen, mo tekemaot nomo taem i nidim blong mekem. From se ol kavenan oli no stap “tekem wan dei blong spel,” sapos wan i karemaot ol gamen blong hem, yumi save andastanem hemia olsem se hem i no wantem gohed blong tekem ol kavenan responsabiliti mo ol blesing we i kam wetem kavenan ia. Long nara saed, ol man mo woman we oli fetful blong werem ol gamen blong olgeta mo kipim ol tempol kavenan blong olgeta, oli gohed blong soem bakegen wok blong olgeta olsem ol disaepol blong Lod Jisas Kraes.
Jos Ia blong Jisas Kraes blong Ol Lata-dei Sent i stap bildim ol tempol raon long ful wol. Stamba tingting blong olgeta i blong blesem ol kavenan pikinini blong God wetem tempol wosip, mo wetem ol tabu responsabiliti mo paoa mo ol spesel blesing we i fasem yumi long Kraes we oli kasem tru long kavenan.
Oli save Jos Ia blong Jisas Kraes olsem wan jos we i tokbaot fulap fasin blong stap mekem ol kavenan wetem God. Ol kavenan oli gat wanwan odinens blong fasin blong sevem man mo kam olsem wan god, we Jos ia we i kambak bakegen i stap givim. Odinens blong baptaes mo kavenan ol kavenan we i go wetem oli ol samting we i nidim blong kam insaed long selestial kingdom. Ol odinens blong tempol mo ol kavenan we i kam wetem, oli ol samting we i nidim blong kam olsem wan god long selestial kingdom, we i laef we i no save finis, presen we i moa hae long evri presen blong God.”19 Hemia i stamba lukluk blong Jos Ia blong Jisas Kraes blong Ol Lata-dei Sent.
Mi testifae abaot Jisas Kraes, we i hed blong Jos Ia, mo mi prea from ol blesing Hem long evriwan we i wantem blong kipim ol tabu kavenan blong olgeta. Long nem blong Jisas Kraes, amen.