Stap Fetful Kasem En

?Yu yu bin gat tingting ia abaot olsem wanem yu save stap fetful long God taem yu stap laef long wan wol blong sin? ?Wea nao yu kasem paoa blong go fored mo gohed blong stap mekem gud? ?Olsem wanem nao yu kasem eksperiens blong tru glad?

Mi ting se eksperiens blong Deved mo Golaeat¹ i save help.

Insaed long OlTesteman, ol ami blong ol man Filistia oli stap faet wetem Ol Man Isrel, mo evri moning mo naet, wan bigfala man Filistia we nem blong hem Golaeat i jalenjem eni Man Isrel blong faetem hem.

Pikja

Deved mo Golaeat.

Long medel blong ol man Isrel i gat Deved, wan yangfala man blong lukaotem sipsip we i smol bitim Golaeat be wetem wan bigfala fet long Jisas Kraes. Deved i volontia blong faet. Iven king i traem blong stopem hem, be Deved i jusum blong putum tras blong hem long Jisas Kraes.

Bifo, Deved i bin kilim wan laeon mo tu mo wan bea. From eksperiens ia blong hemwan, hem i save se God i bin protektem hem mo mekem hem i win. Long Deved, i moa impoten blong mekem eni samting we God i wantem. Fet blong hem i bigwan long God we bae i no save lego hem, hem i karem faef raon ston, i tekem sling blong hem, mo i go blong fesem bigfala man ia.

Pikja

Ol faef ston blong Deved.

Ol skripja oli talem long yumi se fas ston we Deved i slingim i go faerap long fored blong Golaeat, i stap putum en long laef blong hem.²

Deved i bin rere long faef ston taem hem i yusum wan ston nomo blong kilim Golaeat. !Wetem Faef! Hemia i mekem mi tingbaot olsem wanem mi save rere long miwan blong fesem wol.

?Bae i olsem wanem sapos wanwan long ol ston blong Deved i ripresentem wan paoa we yumi nidim blong winim long laef blong yumi? ?Wanem nao bae oli ol faef ston ia? Mi tingting long ol paoa ia:

1. Ston blong lav blong mi long God.

2. Ston blong fet blong mi long Sevya blong yumi, Jisas Kraes.

3. Ston blong save abaot tru aedentiti blong mi.

4. Ston blong fasin blong mi blong sakem sin evri dei.

5. Ston blong save kasem paoa blong God long mi.

Bae yumi tokbaot olsem wanem yumi kasem blesing tru long ol paoa ia.

Faswan, Ston blong lav blong mi long God. Blong lavem God hem i fas mo bigfala komanmen.³ Long Blong Ol Yut Oli Kam Strong gaed oli tijim yumi: “God i lavem yu. Hem i Papa blong yu. Lav blong Hem we i stret gud evriwan i save givim insperesen long yu blong lavem Hem. Taem lav blong yu long Papa long Heven i paoa we i moa impoten long laef blong yu, plante desisen bae oli kam isi.”⁴

Lav blong yumi long God mo rilesensip blong yumi we i kolosap wetem Hem, i givim yumi paoa we yumi nidim blong jenisim hat blong yumi mo mekem i moa isi blong winim ol jalenj blong yumi.

Seken, Ston blong fet blong mi long Sevya blong yumi, Jisas Kraes. Taem Jisas Kraes i kam long wol, Hem i safa from ol sin blong yumi,⁵ mo Hem i tekem long Hemwan ol sore blong yumi, ol harem nogud, ol wiknes mo ol sik long saed blong bodi mo tingting blong yumi. Hemia nao from wanem Hem i save olsem wanem blong helpem yumi. Blong gat fet long Jisas Kraes i minim blong gat ful tras long waes, taem, lav mo paoa blong Hem we i pem praes blong ol sin blong yumi. Ston blong fet long Jisas Kraes bae i blokem yumi long eni “bigfala samting” long laef blong yumi.⁶ Yumi save winim wol ia we i foldaon from Hem i faswan blong i winim.⁷

Nambatri, Ston blong save abaot tru aedentiti blong mi. Profet blong yumi we yumi lavem tumas, Presiden Russell M. Nelson i tijim yumi se aedentiti blong yumi we i moa impoten hem i, ol pikinini blong God, ol pikinini blong kavenan mo ol disaepol blong Jisas Kraes.⁸

Evri samting i jenis taem mi save huia mi tru.⁹ Taem mi gat tu tingting long wanem mi save mekem, plante taem mi ripitim long maen blong miwan o talemaot bigwan, “Mi mi wan pikinini gel blong God, mi mi wan pikinini gel blong God,” plante taem olsem we mi nidim kasem taem we mi filim se mi gat strong tingting ia bakegen blong stap gohed i go.

Nambafo, Ston blong fasin blong mi blong sakem sin evri dei. Insaed long Blong Ol Yut Oli Kam Strong gaed, yumi ridim: “Fasin blong sakem sin i no wan panismen; hem i wei ia nao we Sevya i mekem yumi kam fri long sin. Blong sakem sin i minim blong jenis—blong tanem yu go longwe long sin mo go long God. I minim blong kam antap gud moa mo kasem fogivnes. Kaen jenis ia hem i no wan wan-taem samting; be i wan samting we i stap gogohed nomo.”¹⁰

I nogat wan samting i mekem yu fri bitim blong gat filing blong fogivnes we i kam long God mo blong save se yumi klin mo kam stret wetem Hem bakegen. Fogivnes i posibol blong evriwan.

Nambafaef, Ston blong save kasem paoa blong God long mi. Ol kavenan we yumi mekem wetem God, olsem olgeta we yumi mekem long odinens blong baptaes, i givim yumi akses long paoa we olsem hemia blong God.¹¹ Paoa blong God hem i tru paoa we i helpem yumi blong fesem ol jalenj, mekem ol gud desisen mo kam antap moa long paoa blong yumi blong stap strong long ol had situesen. Hem i wan paoa we yumi nidim we yumi save kam gud long hem long wanem yumi save mekem.¹²

Long Blong Ol Yut Oli Kam Strong gaed i eksplenem: “ol kavenan oli konektem yu long Papa long Heven mo long Sevya. Oli mekem paoa blong God i kam antap long laef blong yu.”¹³

Bae yumi tokbaot koneksen ia. ?Tingbaot taem Kraes i tijim wanem i defren bitwin wan haos we oli bildim antap long wan bigfala ston mo wan we oli bildim long sanbij?¹⁴ Elda Dieter F. Uchtdorf i eksplenem: “Wan haos i no stanap strong agensem wan strong win from haos ia i strong. Hem i no stanap strong tu from nomo se ston ia i strong. Haos ia i stanap strong agensem strong win from hem i fasgud long bigfala strong ston ia. Hem i paoa ia blong koneksen long ston ia we hem i impoten.”¹⁵

Pikja

Haos we oli bildim long wan bigfala ston.

Koneksen blong yumiwan long Jisas Kraes bae i leftemap mo givim yumi strong tingting blong muv i go fored long medel blong ol pipol we oli no respektem ol biliv blong yumi o oli stap jikim yumi. Kraes i invaetem yumi blong kipim Hem long tingting blong yumi oltaem; Hem i talem long yumi, “Lukluk long mi long evri tingting blong yufala”¹⁶ Blong stap tingbaot Sevya i givim yumi wan klia tingting blong mekem ol desisen, blong tekem aksen mo nogat fraet mo blong talem no long wanem we i go agensem ol tijing blong God.¹⁷ Taem ol dei blong mi oli had mo mi filim olsem se mi no save mekem i go moa, blong stap tingting abaot Kraes i givim mi pis mo hop.

?Olsem wanem nao yumi save yusum paoa ia blong Jisas Kraes? Blong stap obei ol kavenan blong yumi mo kam antap moa long fet blong yumi long Jisas Kraes, oli ol ki.

Mi wantem tumas blong Deved i gat wan moa ston; we bae hem i ston blong testemoni blong mi. Testemoni blong yumi, yumi bildim tru ol eksperiens blong yumiwan, hem i weaples yumi luksave ol tabu paoa long laef blong yumi.¹⁸ I no gat wan i save tekemaot save ia long yumi. Blong save wanem we yumi save blong gat eksperiens long saed blong spirit long laef blong yumi hem i nogat praes. Blong stap tru long save ia i givim yumi fridom. !Hem i givim yumi glad! Sapos yumi lavem trutok, bambae yumi lukaotem, mo taem yumi faenem, bae yumi protektem gud.¹⁹

Olsem we mi jusum ston nambasikis, mi invaetem yufala blong mit wetem klas, kworom o famli blong yufala mo tingbaot wanem ol nara paoa we yufala i nidim blong gat blong gohed blong stap fetful long God mo blong winim wol ia.

Ol dia fren, Kraes i wantem tumas blong gat kampani blong yumi long rod ia blong laef blong yumi. Mi promesem yu, se taem yu hang strong long aean rel bae yu wokbaot mo holem han wetem Jisas Kraes long saed.²⁰ Hem bae i lidim yu, mo Hem bae i tijim yu.²¹ Tru long han blong Hem bae yu save putum daon evri Golaeat we i stap long laef blong yu.

Mi testifae se i gat glad taem yu prea evri dei, ridim Buk blong Momon evri dei, stap tekpat long sakramen evri Sandei mo stap go long seminari—!iven long eli moning! I gat glad taem yu stap mekem gud.

I gat glad taem yu stap fetful long God blong yunives, Sevya blong wol, King blong ol king. I gat glad taem yu stap olsem wan disaepol blong Jisas Kraes.

God i Papa blong yumi. Hem i save wanem hat blong yu i wantem, wanem ol samting yu save mekem, mo Hem i gat tras long yu.

Dia yut, Jisas Kraes bae i helpem yufala blong stap fetful kasem en. Wetem ol trutok ia, mi serem testemoni blong mi long nem blong Jisas Kraes, amen.