Singaot, No Foldaon

Tedei mi wantem stat blong testifae wetem hat blong mi we i save tru mo fulwan se God, i stap harem ol prea blong yumi mo ansarem olgeta long wei we i blong yumi wanwan.

Long wan wol we pipol i stap go tru long ol taem we tingting i fasfas, soa blong bodi, bigfala harem nogud, mo hat we i brok, maet yumi filim se yumi wantem tanemraon blong dipen moa long wanem yumi save mekem mo wanem yumi laekem, mo tu, wetem save mo sefti we i kam long wol. Hemia i save mekem yumi luksave tru ples blong kasem givhan mo sapot we oli stap kam olsem ol ansa blong ol jalenj blong laef long wol ia.

Mi tingbaot wan taem, taem oli tritim mi long hospital from wan sik, mo i had tumas long mi blong silip. Taem mi ofem ol laet mo rum i tudak, mi luk wan saen we i laet long siling long fored blong mi we i talem, “Singaot, no foldaon.” Mi sapraes se, long nekis dei mi luk semmak mesej i stap bakegen long sam pat blong rum.

?From wanem mesej ia i impoten tumas? Taem mi askem nes abaot hemia, hem i talem, “Hemia i blong stopem eni aksiden we i save mekem harem nogud we i stap finis, i kam antap.”

Laef ia, olsem we i stap, i givim ol soa eksperiens blong bodi, sam we oli stap laef insaed long bodi blong yumi, sam we oli hapen from ol wiknes o ol harem nogud blong yumi, sam oli hapen tru long wei we ol narawan oli yusum fridom blong mekem joes blong olgeta, mo sam i hapen from fridom blong yumi blong mekem joes.

I gat wan promes we i gat moa paoa bitim wan we Sevya, Hemwan i bin mekem taem Hem i talemaot: “Askem, bambae yufala i save kasem, mo yufala i mas gohed blong lukaotem, nao bambae yufala i save faenem, mo yufala i mas gohed blong kilkilim doa”, o singaot wetem tru hat, “nao bambae doa i save open long yufala”?¹

Prea i wei we yumi toktok wetem Papa blong yumi long Heven we i letem yumi blong “singaot, mo no foldaon.” Be, i gat ol situesen we, maet yumi ting se oli no harem singaot ia from se yumi no kasem wan kwik ansa o wan we i folem tingting blong yumi.

Hemia, samtaem i lid i go long wari, filim sori, o harem nogud. Be tingbaot Nifae olsem wanem hem i soem fet blong hem long Lod, taem hem i talem “From wanem nao hem i no save talem long mi se mi mas bildim wan sip?”² Naoia mi askem yu, ?olsem wanem nao Lod i no save tijim yu, blong yu no foldaon?

Blong trastem ol ansa blong God i tekem tu, stap akseptem ol wei blong Hem se oli no ol wei blong yumi³ mo se “evri samting i mas kam blong hapen long stret taem blong olgeta.”⁴

Filing ia blong save tru se yumi ol pikinini blong wan Papa long Heven we i gat lav, i gat bigfala sore long yumi, i sud kam ol samting we i pusum yumi blong “singaot” wetem tru filing blong prea wetem wan fasin blong “[stap] prea oltaem, no [stap] letem tingting blong yufala i foldaon; … se ol wok blong [yumi] i save helpem gudfala laef blong sol blong [yumi].”⁵ pikjarem long maen blong yufala, ol filing blong Papa long Heven, se long wanwan prea, yumi askem help long nem blong Pikinini blong Hem, Jisas Kraes. Wanem paoa mo fasin blong stap kaen, !mi biliv, oli kam tru taem yumi mekem olsem!

Ol skripja oli fulap long ol eksampol blong olgeta we oli “singaot i go long God mekem se bae oli no save foldaon.” Hileman mo ami blong hem, taem oli stap fesem ol harem nogud, oli “singaot” i go long God, mo stap kapsaetem sol blong olgeta long prea. Oli kasem stret save, pis, fet mo hop, kasem strong paoa long tingting mo save wanem stret blong mekem, kasem taem we oli kasem gol blong olgeta.⁶

Pikjarem long maen, olsem wanem Moses i mas singaot wetem krae strong i go long God taem hem i faenem se hem i stap bitwin Red Si mo Ol Man Ijip we oli stap kam kolosap blong atakem olgeta, o Ebraham, taem hem i obei long oda blong sakrifaesem boe blong hem, Aesak.

Mi save tru, se wanwan long yufala i bin gat mo bae i kasem ol eksperiens we, blong stap singaot bae i ansa blong no foldaon.

Teti yia i pas, taem mi mo waef blong mi i stap rere long sivil mared mo tempol mared blong mitufala, mitufala i kasem wan fon kol we oli stap talem se, ol sivil mared oli bin kanselem from i bin gat wan straek. Mitufala i kasem fon kol ia tri dei bifo deit we mitufala i putum blong mared. Hamas taem we mitufala i traem kontaktem ol nara ofis blong mekem apoenmen be i fulap, mitufala i stat blong filim bigfala wari mo gat tu tingting se bae mitufala i mared olsem we i stap long plan o no.

Mi mo gelfren blong mi, i “singaot,” givim ful sol blong mitufala i go long God long prea. Long en, wan i bin talem long mitufala abaot wan ofis long wan smol taon aotsaed long siti, long ples ia, i gat wan we mitufala i save long hem, hem i meya. Kwiktaem, mitufala i go blong visitim hem mo askem hem sapos i posibol blong i mekem mared blong mitufala. Mitufala i glad taem hem i agri. Sekretari blong hem i tokbaot plante long mitufala se, mitufala i mas kasem wan setifiket long siti ia mo givim evri infomesen pepa blong mitufala long nekis dei, bifo 12 klok medel dei.

Long nekis dei, mitufala i muv i go long smol taon mo go long polis stesen blong askem ol infomesen pepa we oli nidim. Long sapraes blong mitufala, ofisa ia i se bae hem i no save givim long mitufala, from plante yang kapol oli bin stap ronwe long ol famli blong olgeta blong mared haed long taon ia, we i tru, be i no long situesen blong mitufala. Bakegen, fraet mo harem nogud i fulap long mitufala.

Mi tingbaot olsem wanem mi bin singaot kwaet i go aot long Papa blong mi long Heven olsem, blong no foldaon. Mi kasem wan klia filing we i kam long maen blong mi, i gohed blong ripit mo stap talem, “Tempol rekomen, tempol rekomen.” Kwiktaem, mi karemaot tempol rekomen blong mi mo givim i go long ofisa, we i luk gelfren blong mi i konfius.

Mitufala i bin sapraes taem we mitufala i harem ofisa i talem, “?From wanem yutufala no talem long mi se yutufala blong Jos Ia blong Jisas Kraes blong Ol Lata-dei Sent? Mi save gud jos blong yufala.” Kwiktaem, hem i stat blong mekem rere ol infomesen pepa. Mitufala i sapraes moa taem we ofisa ia i aot long stesen be i nomo talem wan samting.

Fifti minit i pas, mo hem i nomo kambak. Naoia hem i 11:55 finis long moning, mo mitufala mas putum ol pepa ia long 12 klok medel dei ia. I no longtaem, hem i kamkamaot wetem wan naes smol dog mo talem hem i wan mared presen blong mitufala, mo givim long mitufala semtaem wetem ol pepa ia.

Mitufala i ron i go from ofis blong meya wetem ol pepa ia mo niufala dog blong mitufala. Afta, mitufala i luk wan trak blong gavman we i kam stret long fored blong mitufala. Mi stop long fored blong hem. Trak ia i stop mo mitufala i luk sekretari insaed. Hem i luk mitufala, mo talem, “mi sore; mi talem long yutufala se, 12 klok. Mi mas go from wan narafala wok blong mi.”

Mi putum tingting i stap daon, stap singaot kwaet wetem ful hat blong mi i go long Papa blong mi long Heven, stap askem help wan moa taem bakegen, blong “no foldaon.” Kwiktaem, merikel i hapen. Sekretari i talem long mitufala, “Hemia wan naesfala dog ia we yu gat. ?Weaples nao mi save faenem wan olsem blong boe blong mi?”

Kwiktaem, mitufala i talem, “Hemia i blong yu”.

Sekretari i lukluk long mitufala wetem sapraes mo talem, “Oke, bae yumi go long ofis mo mekem ol arenjmen.”

Tu dei afta, mi mo Carol i mared folem loa blong kantri, olsem we i stap long plan, mo afta, mitufala i sil insaed long Lima, Peru Tempol.

Yes, yumi nid blong tingbaot se stap singaot i wan samting blong fet mo aksen—fet blong luksave se yumi gat wan Papa long Heven, we i stap ansarem ol prea blong yumi folem waes tingting blong Hem we i no gat en, mo afta, tekem aksen folem wanem we yumi askem. Blong stap prea—stap singaot—i save kam wan saen blong hop blong yumi. Be blong tekem aksen afta prea i wan saen se, fet blong yumi i tru—fet ia we oli testem long ol taem blong harem nogud, fraet o tingting i we i kam slak.

Mi ting se, yufala i traem tingting long ol samting ia:

1. Oltaem, tingting long Lod olsem faswan blong kasem help long hem.

2. Singaot, no foldaon. Tanem yu i go long God wetem tru prea we i kam long hat.

3. Afta prea, mekem evri samting we yu save mekem blong kasem ol blesing we yu bin prea from.

4. Gat tingting i stap daon blong akseptem ansa, long taem mo wei blong Hem.

5. !No stop! Gohed blong muv i go fored long rod blong kavenan, taem yu stap wet long wan ansa.

Maet i gat wan we naoia, folem ol situesen blong hem, bae i filim olsem se bae hem i foldaon mo i wantem blong singaot olsem we Josef Smit i bin mekem, taem hem i prea, “O God, ?Yu Yu Stap Wea? … ?Kasem wetaem nao bae yu holembak han blong yu?”⁷

Iven long ol situesen olsem hemia, prea wetem “paoa blong faea blong spirit,” olsem we Presiden Nelson i bin tijim,⁸ from se, oltaem Hem i harem ol prea blong yufala!

Tingbaot hym ia:

Taem yumi prea, yumi save filim Papa long Heven i haggem yumi, we i sendem wan Pikinini ia Nomo blong Hem, we Hem i lavem tumas, blong karemaot ol hevi samting blong yumi, from se, sapos yumi singaot i go long God, mi testifae, bae yumi no foldaon. Long nem blong Jisas Kraes, amen.