Prea, Hem I Stap

?Wanem nao yu nidim blong save?

I gat wan singsing abaot prea we ol pikinini blong Praemeri raon long wol oli stap singsing long hem. I stat wetem wan kwestin. ?Yu save wanem singsing ia? Sapos mi no fraet, !bae mi save singsing long yufala!

“Papa long Heven, ?i tru se yu stap ia? ?Mo yu stap harem mo ansarem evri prea blong wan pikinini?”²

?Olsem wanem nao yumi save se Papa long Heven i stap laef, nomata se yumi no save luk Hem?

Presiden Russell M.Nelson i invaetem yu blong, “talemaot hat blong yu long Papa blong yu long Heven. … !Mo afta yu lisin!”³ Lisin long wanem yu filim long hat blong yu mo ol tingting we i stap kam long maen blong yu.⁴

Papa long Heven i gat wan bodi blong mit mo bun we i fulap long glori mo Hem i Papa blong spirit blong yu. From Papa long heven i gat evri paoa mo i save evri samting, Hem i save luk evri Pikinini blong Hem⁵ mo i save harem mo ansarem evri prea. Yu save kam blong save long yuwan se Hem i stap mo Hem i lavem yu.

Taem yu save se Papa long Heven i stap mo se Hem i lavem yu, !yu save stap laef wetem strong paoa long tingting mo gat hop! “Prea, Hem i stap; toktok, Hem i stap lisin.”⁶

?Yu bin filim se yu stap yuwan? Wan dei apugel blong mitufala Ashley we i gat sikis yia, i stap hemwan mo no gat wan fren blong pleiplei wetem long plei graon blong skul. Taem hem i stap stanap long ples ia, hem i filim se hem i no impoten mo i no gat wan we stap luksave hem, wan klia tingting i kam long maen blong hem: “!Wet! !Mi no stap miwan! !Mi gat Kraes!” Ashley i nildaon stret long medel blong plei graon, foldem tufala han blong hem mo prea i go long Papa long Heven. Taem hem i openem ae blong hem, wan gel semmak yia olsem hem i stap stanap long ples ia mo i askem sapos hem i wantem blong pleiplei. Ashley i kam blong save se, “Yumi i impoten long Lod, mo yumi neva stap yumiwan.”

Samtaem bae yu wantem blong save from wanem wan had samting i stap hapen long laef blong yu o from wanem yu no kasem wan blesing we yu stap prea from. Oltaem, gudfala kwestin blong askem Papa long Heven i no, ?from wanem? be ?wanem?

?Yu tingbaot taem Nifae mo ol famli blong hem i bin hanggri taem oli stap wokabaot long waelples? Taem Nifae mo ol brata blong hem oli go lukaotem ol wael animol blong kaekae, Nifae i brekem bonara blong hem. Nifae i no askem se from wanem.

Pikja

Nifae i askem Lihae weaples blong go faenem kaekae.

Nifae i mekem wan niufala bonara mo askem papa blong hem, Lihae, weaples blong hem i go lukaotem wael animol. Lihae i bin prea, mo Lod i soem long olgeta weaples Nifae i save go long hem.⁷ Papa long Heven bae i lidim yu taem yu askem Hem wanem yu save mekem mo wanem yu save lanem.

Papa long Heven i wantem helpem yu blong !gro! Hem i lavem yumi tumas, mekem se Hem i sendem Pikinini blong Hem, Jisas Kraes, blong soem rod long yumi blong stap laef.⁸ Jisas i bin safa, i ded, mo i bin laef bakegen long ded mekem se yumi save kasem fogivnes from ol sin blong yumi mo gro blong kam olsem Hem.

?Yu wantem blong gro tru fasin blong save wet longtaem o tru fasin blong stap ones? ?Yu wantem blong gro i kam antap long wan skil? Maet yu stap sem mo wantem blong gro blong gat strong paoa long tingting. “!Prea. Hem i stap”!⁹ Tru long spirit blong Hem, bae yu kasem jenis long hat, mo bae yu save kasem paoa.

Niufala fren blong mi: Jonah i bin raetem, “samtaem mi filim mi fraet taem mi stap long rod blong go long skul long moning. Mi wari abaot ol samting olsem, bae mi let, o mi fogetem wan samting o abaot ol tes blong skul. Taem mi gat 10 yia, mi stat blong talem ol prea blong mi taem mama blong mi i stap draevem mi go long skul. Mi askem help from ol nid blong mi, mo mi prea from famli blong mi tu. Mi tingbaot tu ol samting we mi glad from. [Blong stap prea i go long Papa long Heven i bin] helpem mi. Samtaem mi no filim i stret blong kamaot long trak, be taem mi kasem klasrum blong mi, mi filim pis.”¹⁰

Fet blong Jonah i stap gro taem hem i stap prea evri dei mo hem i stap muv i go fored.

Yu save prea from help blong soem lav blong Papa long Heven long ol narawan.¹¹ Tru long Spirit blong Hem, Papa long Heven bae i helpem yu blong luksave wan we i filim nogud mekem se yu save givim kamfot long olgeta. Hem i save helpem yu blong soem lav blong Hem taem yu stap fogivim narawan. Hem i save givim long yu strong paoa long tingting blong givim seves long wan mo talemaot long olgeta se oli wan pikinini blong God. Yu save helpem ol narawan blong kam blong save mo lavem Jisas mo Papa long Heven olsem we yu mekem.¹²

Long ful laef blong mi, mi bin prea se bae Papa blong mi bae i kam wan memba blong Jos Ia blong Jisas Kraes blong Ol Lata-dei Sent. Iven olsem wan yang gel, mi save hamas blesing we bae hem i save kasem. Bae famli blong mifala i save kasem ol blesing blong sil tugeta blong taem we i no save finis. Famli blong mi, ol fren, mo mi, oltaem mifala i prea from hem be hem i no joenem Jos. Papa long Heven i no fosem eniwan blong mekem joes.¹³ Hem i save ansa long ol prea blong yumi long ol narafala wei.

Pikja

Presiden Porter wetem papa, mama mo ol brata mo sista blong hem.

Taem mi kam bigwan, mi bin kasem petriakel blesing blong mi. Long blesing blong mi, petriak i bin talem wan nambawan samting we mi save mekem blong helpem famli blong mi i stap tugeta long heven, i blong stap wan eksampol long gospel blong Jisas Kraes. !Hemia nao wanem we bae mi save mekem!

Papa blong mi i laef kasem 86 yia blong hem. Faef dei afta we hem i bin ded, mi kasem wan tabu filing blong glad. !Papa long Heven i letem mi save tru long Spirit blong Hem, se papa blong mi i wantem kasem ol blesing blong gospel blong Jisas Kraes! Bae mi neva fogetem dei we mi bin nildaon raon long olta insaed long tempol wetem ol brata mo sista blong mi blong sil i go long papa mo mama blong mi. Mi bin stat blong prea from ol blesing ia taem mi stap long Praemeri mo mi kasem taem mi kam wan bubuwoman.

Maet yu stap prea from ol blesing blong famli blong yu mo ol narawan we yu lavem. !Yu no givap! Papa long Heven bae i soem long yu wanem yu save mekem.

Serem wetem Papa long Heven wanem i stap insaed long hat blong yu.¹⁴ Taem yu askem help blong Hem wetem wan tru hat, bae yu kasem Spirit blong Hem blong i lidim yu.¹⁵ Blong stap prea evri dei, bae i fulumap yu wetem filing blong lavem Papa long Heven mo Jisas Kraes. !Hemia bae i helpem yu blong wantem folem Tufala long ful laef blong yu!

Pikjarem long maen blong yu ?wanem bae i save hapen sapos evri pikinini long Afrika, Saot Amerika, Esia, Yurop, Not Amerika mo Ostrelia oli stap prea evri dei? !Bae ful wol i gat blesing blong kasem moa lav blong God!